(1) Chësta lege regolëia le sorvisc de proteziun zivila y modifichëia y completëia les normes de lege che reverda le sorvisc di stödafüch tl’atuaziun dl Statut spezial dla Regiun Trentin-Südtirol y dles normes d’atuaziun, tl ćiamp dl’urbanistica y di laûrs publics y inće dles desposiziuns de lege dl Stat y dla Regiun relatives.
(2) Les ativitês dla proteziun zivila s’orientëia ala previjiun y ala prevenziun di risć poscibli, al aiüt y al’assistënza de popolaziuns te situaziuns de prigo o danejades y a vigni atra ativité che va debojëgn y che é d’urgënzaa por superè l’emergënza, por restabilì i sorvisc d’interès publich y por slisiré la recostruziun de bëgns publics o privać danejà o desdrüć.
(3) Dl’atuaziun dles ativitês dl sorvisc zivil se fistidiëia aladô de sü ordinamënć y de sües competënzes l’aministraziun provinziala, i comuns, les aministraziuns dl Stat, i sorvisc di stödafüch y de proteziun zivila en colaboraziun cun i ënć publics y privać, les assoziaziuns de volontariat por la proteziun zivila reconesciüdes y i istituć de inrescida scientifica cun fins de proteziun zivila.
(4) Tl caje de avenimënć che provochëia inće ma temporaneamënter situaziuns de prigo por la comunité y dificoltês d’intervënt por les strotöres locales ativëia le Presidënt dla Provinzia o le Zënter operatif provinzial les prozedöres y les strotöres odüdes danfora da chësta lege.
(5) Le sorvisc di stödafüch garantësc la sconanza de porsones y cosses tres la prevenziun cuntra le medefüch, le destodé füć y en general tres l’aiüt tecnich. Al é inće na componënta fondamentala y n’istituziun operativa dla proteziun zivila.