(1) L vën istituì l Coleghium di revisëures di conc, da tlo inant denuminà “Coleghium”, sciche organn de verdia sun la regularità cuntabla, finanziera y economica dla gestion dla Provinzia. L Coleghium dejëuj si funzion n acurdanza cun la Sezion de cuntrol cumpetënta dla Chëurt di conc che ie a Bulsan.
(2) L Coleghium ie metù adum da trëi cumëmbri efetifs y da doi cumëmbri suplënc, numinei dala Jonta provinziela tl tëmp nchin ai 31 de dezëmber 2016, do che i ie unic trac ora a cajo, tla manieres ududes danora dal articul 65/septies, da na lista istituida pra l Secretariat generel dla Provinzia. La funzions de Presidënt vën dejëutes dal cumponënt che resultea avëi curì l plu ncëries de revisëur pra ënc locai y, tl cajo dl medemo numer de ncëries, conta la majera dimenscion demografica di ënc pra chëi che la ncëria ie unida dejëuta. I cumëmbri suplënc zapa mé tla funzion di cumëmbri efetifs sce chisc lascia si ncëria dan l tëmp aldò dla manieres stabilides cun delibrazion dla Jonta provinziela aldò dl articul 65/septies y i resta tla ncëria per l tëmp che resta nchin che l Coleghium ie numinà.
(3) La cumposizion dl Coleghium se adatea ala normes provinzieles n forza tla materia dl respet dla cunsistënza dla trëi grupes linguistiches y dl respet dl balanz danter i gëndri. I cumëmbri dl Coleghium à na cunescënza dla rujeneda tudëscia y dla rujeneda taliana adecuata.
(4) Tla lista nunzieda tl coma 2 iel scrit ite, sun dumanda, chi che resultea avëi duc chisc recuisic:
- iscrizion tl register di revisëures legai nunziei tl decret legislatif di 27 de jené 2010, n. 39, y mudazions suzessives, da almanco diesc ani;
- esperienza de almanco cin ani madureda tl’eserzitazion de ncëries de revisëur di conc o de respunsabl di servijes economics y finanzieres pra ënc teritoriei o si assoziazions cun na populazion sëura i 10.000 abitanc, sciche nce pra i ënc preudui dal articul 79, coma 3, dl Statut d’autonomia, y mudazions suzessives;
- acuisizion de almanco diesc credic furmatifs tla materia de cuntabltà publica;
- unerabltà, prufesciunalità y ndependënza, aldò de cie che ie preudù tl articul 2387 dl codesc zevil, y mudazions suzessives. 121)