(1) I strumënc dla prugramazion di ënc funzionei dla Provinzia tla cuntabltà zevilistica ie:
- l plann dl’ativiteies o l plann program de trëi ani, che vën definì tl respet dla indicazions dla Provinzia. L plann possa vester cuntenì te na sezion aposta dla relazion ilustrativa o nota ilustrativa njunteda al budget economich;
- l budget economich de trëi ani, che ie da deliberé tl tëmp nchin ai 30 de nuvëmber dl ann dant;
- la variazions eventueles dl budget economich;
- l bilanz d’eserzize, che ie da deliberé tl tëmp nchin ai 30 d’auril dl ann do l eserzize de referimënt y che stluj ju l sistem de bilanz di ënc funzionei.
(2) I documënc nunziei pra i pustoms a), b) y d) dl coma 1 vën dai deliberei dai organs cumpetënc dl ënt tl tëmp de 15 dì dala deliberazion respetiva y mandei, nce tres mesuns telematics, ala Jonta provinziela per l’apurvazion.
(3) La despusizions nunziedes pra l coma 2 vën aplichedes nce ai documënc aldò dl pustom c) dl coma 1 tl cajo te chël che l ënt sibe benefizier d’erogazions a cëria dl bilanz provinziel y sce l se cruzia de adaté la previjions curespundëntes de ntreda dl budget al amudlé dl’asseniazions cumandedes a si bën dala Provinzia.
(4) Per la redazion dl bilanz cunsolidà dla Provinzia, ti manda i ënc funziunei y i autri organisms cuntrolei y partezipei, tl tëmp de diesc dis dal’apurvazion y, a uni moda, nchin ai 31 de mei dl ann do l eserzize de referimënt, ala Repartizion Finanzes l bilanz d’eserzize o l rendicont, retlassifichei aldò de cie che ie preudù dala njonta 11 al decret legislatif di 23 de juni 2011, n. 118, tl respet dla istruzions dates dala Repartizion nstëssa. Tl cajo che l’apurvazion relativa ne fossa nia unida fata nchin n la data nunzieda manda l ënt la pruposta dl bilanz de eserzize o de rendicont njinieda per l’apurvazion. 112)
(5) La despusizions di comes 2 y 3 vën nce aplichedes ai documënc curespundënc de prugramazion di ënc strumentei dla Provinzia che adotea la cuntabltà finanziera. 113)
L articul 63/ter, coma 4 ie unì baratà ora nsci dal articul 4, coma 1, dla L.P. di 19 de dezëmber 2019, n. 15.
L articul 63/ter ie unì njuntà dal articul 3, coma 1, dla L.P. di 18 de setëmber 2018, n. 19.