(1) I mesi finanziars che vëgn preodüs por le Sorvisc sanitar provinzial é por:
- le finanziamënt dl bojëgn sanitar che l'Aziënda Sanitara á da ademplí;
- le finanziamënt dles spëises por ativités istituzionales tl ciamp sanitar che é de competënza dla Provinzia, sciöche ince dl' ativité de inrescida sanitara;
- le finanziamënt de programs de investimënt che vëgn definis dala programaziun provinziala;
- la realisaziun de funziuns de assistënza spezifiches o de fins o proiec determiná dala programaziun provinziala.
(2) Le fabojëgn de spëisa vëgn determiné tl cheder di mesi finanziars programá dala Provinzia sön la basa di cosć che é debojëgn por na realisaziun efiziënta, efetiva y adeguada di standarg d'assistënza essenziai y surapró.
(3) Le finanziamënt dl Sorvisc sanitar provinzial vëgn a s'al dé tres:
- le fonds sanitar provinzial preodü dal coma 4, che tëgn cunt dl saldo de mobilité sanitara;
- la partezipaziun direta dles porsones assistides;
- i fonds integratifs eventuai dl Sorvisc sanitar provinzial preodüs dales normes varëntes;
- les entrades che vëgn dales prestaziuns sanitares o da intervënc en materia de igiena y sanité publica;
- les entrades y i rendimënc che vëgn dal'adoranza dl patrimone;
- donaziuns y d'atres sportes volontares;
- d'atres entrades eventuales.
(4) Le fonds sanitar provinzial vëgn scrit ite ti programs aposta dla misciun 13 "Proteziun dla sanité" tl preventif dles spëises dl bilanz dla Provinzia, despartí danter spëises corëntes y spëises d'investiziuns.
(5) La Junta provinziala stabilësc, despartí danter spëises corëntes y spëises d'investiziuns, sciöche i mesi dl fonds vëgn partis sö danter Provinzia y Aziënda Sanitara, i criters por la repartiziun de chisc mesi sciöche ince limic de spëisa eventuai y limitaziuns d'adoranza dles cuotes dl fonds cun lian de destinaziun spezifich.
(6) Por garantí la licuidité finanziara dl'Aziënda Sanitara tratan l'eserzize finanziar desponn la Provinzia antizipaziuns regolares a bëgn dl'Aziënda Sanitara, sön la basa dl fabojëgn de licuidité manifesté da chësta. 60)