(1) Tla Repartiziun provinziala Sanité vëgnel isituí la Comisciun d’apajamënt por les chestiuns de responsabilité tl ciamp sanitar.
(2) La Comisciun d’apajamënt é competënta por düc i caji olache n paziënt s’á anuzé de na prestaziun sanitara tla provinzia de Balsan y ël instës o sü suzessurs legai dá dant che al é gnü a s'al dé öna o de plü de chëstes situaziuns:
- le paziënt á albü n dann ala sanité deache al é gnü fat n fal tla diagnosa o tla terapia o te tramesdöes, sciöche conseguënza de n’aziun o omisciun da pert de sogec che eserzitëia na profesciun sanitara;
- le paziënt á albü n dann ala sanité deache al n'á ciafé degöna informaziun o nia assá informaziuns;
- le paziënt á albü n dann ala sanité sciöche conseguënza de n comportamënt negligënt che é gnü a s'al dé te na strotöra sanitara, ma por ci che reverda ativités de diagnosa o terapia, che ne pó nia gní atribuí a na porsona che eserzitëia na profesciun sanitara.
(3) La Comisciun d’apajamënt é n organism independënt y imparzial. Süa ativité é caraterisada dal fat che le prozedimënt d'apajamënt é facoltatif y debann y che sü provedimënc y sües propostes d'apajamënt n'é nia vincolanc.
(4) La Comisciun d'apajamënt vëgn nominada dala junta provinziala por trëi agn y é metüda adöm da:
- döes avocates/dui avocac chirides/chiris fora danter trëi inoms proponüs dal Ordin di Avocac de Balsan; öna/un de ëres/ëi mëss surantó la funziun de presidënta/presidënt;
- na doturia/n dotur cun spezialisaziun de medejina legala, che n'á degun raport profescional cun le sorvisc sanitar provinzial, chirida/chirí fora danter trëi inoms proponüs dal Ordin di doturs chirurgs y di doturs di dënz dla provinzia de Balsan danter personal dozënt universitar, danter personal dirigënt medich che é sté en sorvisc por altamo diesc agn pro ënc dl sorvisc sanitar publich o d’atri ënc publics o danter personal dirigënt medich che laora sciöche profescionisć lëdi da altamo 15 agn. 8)
(5) La junta provinziala nominëi n comëmber suplënt por vigni componënt dla Comisciun. Canche le mandat toma pó i comënbri dla Comisciun gní confermá.
(6) Te caji dër complesc olache les competënzes spezialistiches di comëmbri dla Comisciun d'apajamënt ne basta nia por na valutaziun, pó la Comisciun damané l'arat de na consulënta tecnica esterna/n consulënt tecnich estern.
(7) Ai comëmbri dla Comisciun d'apajamënt ti vëgnel paié en derogaziun ala regolamentaziun preodüda dala lege provinziale 19 marzo 1991, n. 6, y mudaziuns suandëntes n'indenité de 60,00 euro por vigni ora de sentada, de preparaziun dles sentades y de n'atra ativité che vá debojëgn por le funzionamënt dla Comisciun d'apajamënt. L’indenité por les ores de preparaziun dles sentades vëgn paiada fora do le control dla Repartiziun provinziala Sanité. L’indenité vëgn vigni ann adatada al'incremënt dl cost dla vita aladô dl indesc ISTAT. Ai comëmbri dla Comisciun d'apajamënt ti spetel ince la retüda dles spëises de iade, le mangé y dormí aladô dla regolamentaziun de misciun preodüda por le personal provinzial.
(8) La colaboraziun, l'organisaziun y le funzionamënt dla Comisciun d'apajamënt vëgn regolamentá cun regolamënt d'esecuziun. 9) 10)
L'art. 4/bis, coma 4 é gnü sostituí insciö dal art. 31, coma 1 dla l.p. di 27 de merz dl 2020, n. 2.
L'art. 4/bis é gnü injunté dal art. 15 dla l.p. di 18 de novëmber dl 2005, n. 10, y spo sostituí dal art. 3, coma 4 dla l.p. di 21 d'aurí dl 2017, n. 4, y dal art. 28, coma 1 dla l.p. di 24 de setëmber dl 2019, n. 8.
Ciara ince l'art. 28, coma 4 dla l.p. di 24 de setëmber dl 2019, n. 8.