(1) Por sostigní l’insediamënt de doturs/doturies de medejina generala convenzioná, dantadöt tles agregaziuns funzionales teritoriales y tles medejines de grup, mët i comuns o d’atri ënc publics a desposiziun di doturs/dles doturies, debann, locai da arjigné ca sciöche ambulatore prinzipal.
(2) La Provinzia autonoma de Balsan alisirëia i doturs/les doturies de medejina generala y i doturs/les doturies di mituns de lita lëdia, ti conzedon na soma forfetara por le cost di locai en afit o de proprieté adorá sciöche ambulatore prinzipal, dantadöt tles agregaziuns funzionales teritoriales y tles medejines de grup. La Junta provinziala stabilësc la soma forfetara paiada dal’Aziënda Sanitara dal 1. de jená dl 2017 por l’ambulatore prinzipal, sciöche ince les desposiziuns d’atuaziun en materia.
(3) Le contribut preodü dal coma 2 vëgn conzedü ma sce al ne vëgn nia metü a desposiziun debann dal comun o da n ater ënt publich sön le teritore, locai adatá da arjigné ca sciöche ambulatore prinzipal.
(4) Por alisiré le sorvisc di doturs/dles doturies de medejina generala convenzioná y di doturs/dles doturies di mituns de lita lëdia te localités dezentrades, pó i comuns o d’atri ënc publics mëte a desposiziun di doturs/dles doturies locai olache ai pó, tl respet dl orar minim stabilí cun le comun, ti pité ala popolaziun so sorvisc sön le teritore.
(5) L’Aziënda Sanitara pó mëte a desposiziun di doturs/dles doturies de medejina generala convenzioná y di doturs/dles doturies di mituns de lita lëdia che laora pro n’agregaziun funzionala teritoriala y che á paziënc tl cheder di percursc diagnostics terapeutics d’assistënza n valgönes atrezadöres mediches y personal sanitar nia medich. En alternativa pó l’Aziënda Sanitara sostigní na pert dl cost de cumpra o di cosć por le leasing dles atrezadöres, o na pert di cosć che vëgn dal’assunziun de personal sanitar nia medich, bele en sorvisc pro le dotur interessé al 1° de jená dl 2017. La cualité dl’assistënza teritoriala vëgn promoiüda dantadöt tres sostëgns por les agregaziuns funzionales teritoriales, les medejines de grup, sciöche ince por l’assunziun de personal de stüde. La Junta provinziala emanëia les desposiziuns d’atuaziun por chëstes alisiraziuns che vëgn paiades dal’Aziënda Sanitara.
(6) La Provinzia sostëgn l’insediamënt di doturs/dles doturies de medejina generala convenzioná por le pröm iade cun l’Aziënda Sanitara cun alisiraziuns che sostëgn le scomenciamënt dles ativités fates fora dala Junta provinziala. La Junta provinziala emanëia desposiziuns d’atuaziun por chësta sort de alisiraziuns che vëgn paiada dal’Aziënda Sanitara. 24)