(1) L’aziënda conzepësc sües ativitês sön la basa dla programaziun, che s’articolëia tla programaziun trienala y anuala, en armonia cun i contignüs y i orientamënć dles normes de lege statales y provinziales, dl Plann sanitar provinzial y dles diretives dl’organisaziun y dla programaziun dla Junta provinziala.
(2) La programaziun trienala definësc la politica sanitara sciöch’inće les strategies sanitares y organisatives en conformité cun les prescriziuns dl Plann sanitar provinzial y les diretives por le svilup a tëmp mesan dl’aziënda.
(3) La programaziun anuala stabilësc obietifs, ativitês, tëmp y responsabilité por la realisaziun tignin cunt dla cualité y dla cuantité.
(4) Le stromënt dla programaziun trienala é le plan general trienal che contëgn le plann dla performance y vá a öna cun la previjiun economich-finanziaria di trëi agn. 3)
(5) I stromënc dla programaziun anuala é le program d’ativité anual y le bilanz preventif economich anual. 4)
(6) Le bilanz preventif anual é de natöra economica y esponn les dezijiuns dades dant tl program d’ativité anual y tl budget. L’eserzize ti corespogn al ann solar. 5)
(7) I documënc costitutifs obligatori dl bilanz preventif anual é metüs adöm dal cunt economich y dal budget finanziar, cun lapró:
- i criters de determinaziun tecnics cun lapró les tabeles por la pert economica preodüda tla injunta;
- la relaziun dl diretur general/dla direturia generala;
- le plann de investimënc;
- relaziun dl consëi de verda. 6) 7)
(8) Le bilanz preventif anual vëgn realisé aladô di modì preodüs dales diretives de contabilité generala preodüdes dal articul 10. 8)
L'art. 2, coma 4 é gnü sostituí insciö dal art. 23, coma 1 dla l.p. di 24 de setëmber dl 2019, n. 8.
L'art. 2, coma 5 é gnü sostituí insciö dal art. 23, coma 1 dla l.p. di 24 de setëmber dl 2019, n. 8.
L'art. 2, coma 6, é gnü sostituí insciö dal art. 10, coma 2, dla l.p. di 13 de mà dl 2011, n. 3.
L’art. 2, coma 7 é gnü sostituí insciö dal art. 10, coma 2, dla l.p. di 13 de ma dl 2011, n. 3, y spo dal art. 4, coma 2 dla l.p. di 21 d’aurí dl 2017, n. 4.
La lëtra d) dl'art. 2, coma 7 é gnü mudé dal art. 33, coma 1 dla l.p. di 27 de merz dl 2020, n. 2.
L'art. 2, coma 8, é gnü sostituí insciö dal art. 10, coma 2, dla l.p. di 13 de mà dl 2011, n. 3.