In vigore al

RICERCA:

Ultima edizione

a) Lege Provinziala di 15 de mà dl 2000, n. 91)
Pruvedimënc per la defendura di tieres y per la prevenzion dl slundernamënt de tieres

1)
Publicheda tl Supl. nr. 2 dl B.U. dl 30 de mei 2000, nr. 23.

Art. 1 (Fins)

(1) La Provinzia autonoma de Bulsan sustën la defendura di tieres y cundanea l malterjamënt, l meltratamënt y l arbandonn de tieres per purté pro a n drë cumpurtamënt dla persones de viers di tieres y per stravardé la sanità publica y l ambient.

(2) Chësta lege ne reverda nia i tieres salveres che ie defendui dala lege provinziela di 17 de lugio 1987, n.14 y mudazions suzessives, y dala lege provinziela di 9 de juni 1978, n. 28 y mudazions suzessives.

Art. 2 (Despusizions n cont dl tratamënt di tieres)  

(1) I tieres à da unì tratei a na maniera che tënie cont l plu che la va de si bujëns. Chi che tën tieres muessa se cruzië che i s’n stebe bën. Deguni ne daussa fé patì o gaujé n dann a n tier zënza rejons giustificables. Chi che tën tieres à te uni cajo l duvier de i traté te na maniera adateda ala spezia y de cialé che i sibe nëc, che i vënie mantenii sciche toca y vejelei regulermënter. Per cie che reverda si sistemazion muessel unì garantì na lerch de vita y de muvimënt adateda ala spezia.

(2) L ie pruibì arbanduné tieres de cësa, tieres d’afezion o tieres salveres che n tën tla perjunia y che ne ie nia boni de viver liedesc tla natura aldò de si spezia.

(3) Zënza arziché la despusizions spezieles y la despusizions valëivles tl ciamp dla defendura di tieres canche i vën mazei dal beché, daussa n tier mé unì tëut via tres eutanasia da pert de n dutor di tieres, che muessa a chësc fin scrì ora n atestat aposta.

Art. 3 (Asii per tieres slundernënc y arbandunei)  delibera sentenza

(1) I asii per tieres y i cianii ie strutures che possa tò su, per n tëmp permanënt o temporermënter, tieres slundernënc, tieres vaganc zënza patron o tieres de n patron. I cianii menei da lies o persones privates possa mé tò su tieres slundernënc o tieres vaganc zënza patron do che chisc ie stai per n tëmp de carantena te n cianil menà dal’aministrazion publica.

(2) La strutures nunziedes tl coma 1 daussa mé tò su tieres nchin a na cumpëida mascima fisseda tl’autorisazion ala giaurida dl asil.

(3) La strutures che tol su cians, giac y d’autri tieres, menedes dal’aministrazion provinziela o da d’autri ënc publics raionei vën istituides per i tieres de dut l teritore dla Provinzia.

(4) Ora che la strutures nunziedes tl coma 3 iel nce puscibl istituì, fé su, cumpré o fité, ti raions teritoriei nord, ost y vest dl Servisc veteriner multiraionel dl’Azienda speziela unità sanitera locala zënter sud, cianii o box per la sistemazion temporera di cians.

(5) Sce i asii per tieres vën menei da n’Azienda sanitera, toma si gestion danter la ublianzes istituzioneles dl’azienda nstëssa. 2)

(6)3)

(7) La modalità de funzionamënt dla strutures nunziedes tl coma 3 vën stabilida cun regulamënt d’esecuzion.

(8) La strutures aldò dl coma 1 muessa numiné n dutor di tieres, scrit ite tl register prufesciunel, respunsabl per l’ativieteies saniteres dejëutes tla strutura. La numineda ti muessa unì fata al savëi al servisc veteriner provinziel.

massimeVerwaltungsgericht Bozen - Urteil Nr. 20 vom 21.01.2004 - Ermächtigung zur Eröffnung einer Tierpension - Zuständigkeit des Bürgermeisters - Qualifizierung der Tätigkeit als landwirtschaftliche Nebentätigkeit einer Hundezucht
2)
L coma 5 ie unì remplazà dal articul 40 dla Lege Provinziela dl 28 de dezëmber 2001, n. 19.
3)
L coma 6 ie unit tëut ju dal articul 1 dla L.P. di 20 de juni 2005, n. 4.

Art. 4 (Sistemazion de tieres te asii per tieres y cianii)  

(1) I cians slundernënc piei vën tëuc su tla strutures, nunziedes tl articul 3, ulache l vën cialà lessù, ora che tl cajo che l fossa la cundizions aldò dl coma 2. Te chësta strutures vën i tieres sometui a vijites saniteres, ejams y, sce l ie de bujën, a tratamënc terapeutics, ala dlavea contra la rabia y a tratamënc profilatics contra la echinococosa y d’autra malaties nfetives. Oradechël vën i cians identifichei y, sce l ne ie nia bele unit fat, registrei.

(2) I cians piei ne daussa nia unì dac ca per fins de sperimentazion. I ne daussa nia unì mazei, ora che sce i ie tuchei da na malatia grieva y nia da varì o sce l ie desmustrà che i ie tan agressifs da vester n pericul o sce i reprejentea n pericul per la segurëza y la sanità publica. Nia arzichedes resta la despusizions cuntenides ti articuli 86, 87, 91 y 104 dl regulamënt dla polizai veterinera dat ora cun decret dl Presidënt dla Republica di 8 de fauré 1954, n. 320, y mudazions suzessives. Sce l dutor di tieres ufiziel nunzià tl articul 11, coma 3, tol la dezijion, tl cajo de cians periculëusc, de ti fé fé n curs de reeducazion, ti vën la spëises ciariedes al ultim patron respunsabl dl cian. 4)

(2/bis) I tieres afidei temporermënter ala strutures nunziedes tl articul 3, coma 3, y che deguni ne ie unic a tò tl tëmp de 30 dis dala data stabilida cun la direzion dla strutura, ie a duta la manieres da raté lascei ala strutura nstëssa. L medemo vel nce per tieres arbandunei te chësta strutura. L ultimo patron che resultea dal ufize anagrafich muessa ti rembursé ala strutura la spëises de detenzion dl tier nchin che l vën afidà a zachei o nchin che l mor. 5)

(3) I giac che viv liedesc vën piei dal Servisc veteriner raionalmënter cumpetënt dl’Azienda speziela y sterilisei tres n ntervënt chirurgich o n auter sistem ratà adatà, tenian cont dl progres scientifich, per po inò unì lascei ora tla colonies de pruvenienza.

(3/bis) L Servisc veteriner teritorialmënter cumpetënt dl’Azienda sanitera ie respunsabl dl cuntrol saniter y dl relevamënt dla culonia de giac. L Servisc ncëria lies de defendura di tieres o privac a se cruzië de chësta culonies, ndividuan te uni cajo na persona de referimënt respunsabla per la culonia de giac ai fins de lege y nen nfurmea l chemun. L afidamënt vën revucà sce l ne vën nia cialà sun i tieres aldò dla manieres ududes danora. Mé te caji d’ezezion y sun dumanda mutiveda possa l servisc veteriner teritorialmënter cumpetënt dl’Azienda sanitera ti afidé a privac giac che vën da culonies. L cost eventuel per l ntervënt de sterilisazion ie a cëria dla persona, a chëla che l ti ie unit afidà l tier. 6)

(4) Sce l Servisc veteriner multiraionel dl’azienda speziela unità sanitera locala zënter sud ne ie nia tla cundizions de dejëujer l’atività nunzieda tl coma 3, possela nciarië dutores di tieres che lëura coche prufescionisć liedesc o lies per la defendura di tieres. Te chësc cajo vën l ntervënt chirurgich de sterilisazion a uni moda fat da n dutor di tieres.

(5) I asii per tieres y i cianii lascia sterilisé a si spëises i cians y i giac che i à tëut su da n dutor di tieres, ora che ti caji che la sterilisazion fossa contrandicheda per rejons saniteres, sce:

  1. l ie passà almanco 60 dis da canche i ie unic abinei, o sce
  2. l patron dl tier à scrit na detlarazion cun chëla che l renunzieia al tier.

(6) La persona a chëla che l ti ie unit afidà per n cër tëmp n cian o n giat muessa, do che l ie passà 60 dis, y te uni cajo tl lim de tëmp de sies mënsc dala data dl afidamënt, se cruzië che l tier vënie sterilisà chirurgicamënter, a si spëises, da n dutor di tieres privat o debant pra la strutura che ti à sëurandat l tier.

(7) Sce l vën ratà de bujën, possa l diretëur dl Servisc veteriner provinziel fissé l’età minima che i tieres muessa avëi dan che i posse unì sterililisei.

(8) L afidamënt per n tëmp limità de cians slundernënc piei, ma nce de giac y d’autri tieres, a persones privates o a lies per la defendura di tieres, dan che l tëmp de 60 dis da canche i ie unic abinei ie passà, vën mé lascià pro sce chi che tòl su l tier se mpenieia per scrit de l reter ai patrons che se l damanda tl lim de tëmp nunzià dessëura.

(9) Al fin de schivé che l vënie arbandunà cians, giac y d’autri tieres da pert de persones che ie te deficulteies particuleres, possa chisc tieres unì tëuc su provisormënter tla strutures nunziedes tl articul 3.

(10) Per schivé sufrënzes che ne muessa nia vester possel nce unì tëut su tla strutures nunziedes tl articul 3, per l tëmp che ie de bujën, acioche i varësce, tieres salveres. Ma, do che i ie varii muessa chisc tieres riesc unì delibrei.

4)
L articul 4, coma 2 ie unit mudà nsci dal articul 14, coma 1 dla L.P. di 12 de dezëmber 2011, n. 14.
5)
L articul 4, coma 2/bis ie unit mudà nsci dal articul 14, coma 2 dla L.P. di 12 de dezëmber 2011, n. 14.
6)
L articul 4, coma 3/bis ie unit mudà nsci dal articul 22, coma 1 dla L.P. di 10 de juni 2008, n. 4.

Art. 4/bis Tupes de zità  

(1) Per rejons de igiena y sanità publica sciche nce per la defendura dl patrimone artistich y ambientel ie l chemun, a una cun l Servisc veteriner dl’Azienda sanitera teritorialmënter cumpetënta autoriseda a se tò, a fins diagnostics, n numer statisticamënter senificatif de tupes y lauré ora planns de limitazion dla populazion, stlujan ite te chisc planns, sce n cajo, ënghe l’eutanasia. 7)

7)
L articul 4/bis ie unit njuntà dal articul 22, coma 2 dla L.P. di 10 de juni 2008, n. 4.

Art. 5 (Cuntribuc per la defendura di tieres)    delibera sentenza

(1)Per i fins nunziei tl articul 1 possa la Jonta provinziela cunzeder a urganisazions de ulentariat cuntribuc nchin al 90 per cënt dla spëisa recunesciuda lasceda pro per:

  1. la gestion di asii per tieres;
  2. la sterilisazion, la identificazion, l fé la dlavea o d’autri tratamënc saniteres a tieres tenii te asii per tieres;
  3. la sterilisazion y la identificazion de giac che viv liedesc y d’autri tratamënc veterineres che ie de bujën per chisc;
  4. l socors de tieres ferii de chëi che n ne sà nia chi che ie si patron;
  5. i ntervënc cumandei ala verdies per la defendura di tieres dal organism che ie metù dant a si coordinamënt, la premies d’assegurazion a bën de chëstes y di ulenteres che lëura pra l asil saniter per tieres menà dala Azienda Sanitera dl Südtirol;
  6. scumenciadives de carater devulgatif, nfurmatif y furmatif per la sensibilisazion dla sozietà n cont dla defendura di tieres. 8)
massimeBeschluss vom 3. Mai 2016, Nr. 470 - Richtlinien für die Gewährung von Beiträgen für den Tierschutz
8)
L art. 5 ie unit remplazà nsci dal art. 29, coma 1, dla L.P. di 23 de dezëmber 2015, n. 18.

Art. 6 (Register anagrafich di tieres d’afezion)    delibera sentenza

(1)Pra l Servisc veteriner aziendel dl’Azienda Sanitera dl Sudtirol vëniel istituì l register anagrafich di tieres d’afezion, identifichei aldò dla despusizions n forza.

(2)  L’identificazion y la iscrizion tl register anagrafich possa unì fates o pra i dutores di tieres che lëura coche prufesionisć liedesc acreditei o pra l Servisc veteriner aziendel dl’Azienda Sanitera dl Sudtirol.

(3)  Cun la iscrizion vëniel registrà i dac anagrafics dl patron y/o dla persona che tën l tier. Tl cajo de minoréns y de persones interdites o nia bones de ntënder muessel nce unì registrà i dac de n genitor, dl tutor o dl curadëur. L vën oradechël registrà i dac d’identificazion di tieres.

(4)  Dal prim de jené 2021 muessel pra i cians nce unì registrà i dac liei al profil genetich. La spëises ie a cëria dl patron o de chi che l tën. Per i cians che ie bele registrei nchin n chëla data muessa la determinazion dl profil genetich unì fata nchin ai 31 de dezëmber 2022. La manieres d’abiné adum y de manejé i dac liei al profil genetich vën stabilides cun l regulamënt d’esecuzion de chësta lege.

(5)  I cians ratei periculëusc vën scric ite te na sezion aposta dl register anagrafich.

(6)  L regulamënt d’esecuzion de chësta lege stabilësc ce cians che muessa unì scric ite tla sezion nunzieda pra l coma 5 y la mesures de prevenzion de periculi per la persones, i tieres y la cosses. 9)

massimeCorte costituzionale - Sentenza N. 222 del 13.06.2006 - Tutela dell'incolumità pubblica dal rischio di aggressioni di cani potenzialmente pericolosi - Provvedimento riconducibile alla materia “ordine pubblico e sicurezza"
9)
L articul 6, ie unì remplazà nsci dal articul 16, coma 1, dla L.P. di 24 de setëmber 2019, n. 8.

Art. 7 (Tenì cians a fins cumerziei y scoles d’adestramënt)

(1) I zidladëures de cians o chëi che tën cians per i vënder o i dé inant muessa tenì n register te chël che i scrij ite avisa canche i cians vën menei ora y canche i vën inò ite.

(2) La maniera de coche l register vën tenì y la maniera de coche la scoles d’adestramënt per cians vën menedes ie stabilides tl regulamënt d’esecuzion.

Art. 8 (Nfurmazion, educazion y furmazion)

(1) L’Azienda speziela sustën tl ciamp dl’ativieteies dl’educazion sozio-sanitera programs de nfurmazion y d’educazion che mira a na mieura cunescënza di tieres y a n cumpurtamënt respetëus te si cunfronc, ma nce a dé inant nfurmazions n cont de n tratamënt adatà ala spezia di tieres de cësa y di tieres da produzion per la defendura de si sanità y de si ambient. L’azienda speziela dà oradechël nce ora nfurmazions n cont dla prevenzion dl slundernamënt de tieres, n cont dl cumpurtamënt che ie da avëi ti cunfronc de chisc, n cont dla dlavées che ie de bujën y dla profilassa dla malaties nfetives di tieres che possa nce unì tachedes ala persones o dala persones ai tieres; a chësta atività cunlëura nce la Provinzia, i chemuns, la lies per la defendura di tieres, la sëurantendënza y la ntendënzes dla scoles y i dutores di tieres numinei dal orden di dutores di tieres.

Art. 9 (Trasport di tieres)  

(1) Chi che mëina ncantëur tieres muessa l fé i tratan a na maniera adateda ala spezia y te uni cajo a na moda che i ne patësce nia y che l ne ti vënie nia fat dann ntan l viac. Te chësc cuntest muessel, oradechël, nce unì segurà che i tieres vënie vejelei assé, che i giape assé da bever y che i ébe lerch assé. L trasport de tieres daussa mé unì fat sce l ie da udëi danora che i sibe tla cundizions de l supurté zënza unì danejei. I tieres amalei, ferii o ndeblii daussa mé unì traspurtei cun mesures de precauzion spezieles. I tieres à da unì traspurtei, tan inant che l ie puscibl, spartii aldò dla spezia, dl’età y dl sés. Canche i tieres vën ciariei y desćiariei ne daussel nia unì laurà a na maniera grovia limpea y l ie da mëter verda che l ne ti vënie nia fat mel. La spersa dla rampes muvibles y fisses adurvedes per i ciarië y i desćiarië ne daussa nia vester lize. Acioche i tieres ne sbrisce nia ntan l trasport, muessel ti autoveiculi unì sterdù stram o n auter sterdum adatà. Oradechël, muessel unì segurà che i tieres giape assé aria frëscia y che i sibe a sosta y prutejei da cundizions atmosferiches che pudëssa i danejé. La ndrova de njins eletrics, fusć o cordes ntan che i tieres vën ciariei, desćiariei o ciariei sun n auter veicul vën lascià pro a cundizion che l ne ti vënie nia fat dann ai tieres.

(2) L ie pruibì traspurté o lascé n tier te n auto o te n auter mesun de trasport, sce chësc ti gauja sufrënza o dann al tier. Tl particuler iel pruibì stlù o traspurté n tier tl portacufri dl auto.

(3)Per l trasport de tieres sun l teritore dla Provinzia, che ne ie nia lià a ativiteies economiches o che vën fat cun i mesuns de trasport che n à nstësc per na distanza mëndra che 65 km da ulache n pëia via, calculeda coche valor mesan al ann di trasporc fac, vëniel mé aplicà la despusizions nunziedes te chësc articul. 10)

(4) L trasport de tieres, nce d’autri propreteres, samont o sun pastura te n mesun de trasport che n à nstësc possa unì fat zënza limitazion de chilometri. 11)

10)
L articul 9, coma, 3 ie unit njuntà dal articul 22, coma 4 dla L.P. di 10 de juni 2008, n. 4, y dadedò iel unit mudà nsci dal articul 1, coma 1 dla L.P. di 12 de fauré 2016, n. 1..
11)
L articul 9, coma 4, ie unit njuntà dal articul 1, coma 2 dla L.P. di 12 de fauré 2016, n. 1.

Art 10 (Sucors a tieres ferii)   delibera sentenza

(1) Chi che abina n tier ferì o chi che l ferësc zënza ulëi muessa ti purté aiut o se cruzië che l ti vënie purtà aiut.

(2) Tl cajo de tieres cun ferides o te na situazion de bujën, y te caji d’ezezion nce canche i tieres ie bele morc, y sce i ie te luesc che ie riei da arjonjer, ie la recupereda de chisc nce lasceda pro tres l’adurvanza dl joler dla prutezion zevila. La despusizions per la manieres de co dejëujer chësta recupereda sciche nce per la partezipazion economica dla persones respunsables per i tieres ala speises che se porta pro dainora vën determineda dala Jonta provinziela. 12)

massimeBeschluss vom 26. März 2019, Nr. 197 - Richtlinien zur Hubschrauberbergung von Nutztieren
12)
L articul 10, coma 2 ie unit njuntà dal articul 19, coma 1 dla L.P. di 19 de lugio 2013, n. 10.

Art. 11 (Tenì i tieres)   

(1) Cun regulamënt d’esecuzion vëniel regulà i criteres a chëi che l ie da se tenì canche n tën tieres. La njonta valëivla dan la ntreda n forza de chësta despusizion resta n forza nchin che l vën ora l regulamënt d’esecuzion. 13)

(2)Ti caji che l ie tieres che vën tenii te cundizions che ne garantësc nia la segurëza publica o l’igiena o sce la cundizions de sanità di tieres ne ie nia cunesciudes o sce l vën malterjà tieres o tenì tieres te cundizions d’arbandonn, cumanda l ambolt, sun pruposta dl dutor di tieres cumpetënt, che i tieres vënie cunfischei y trasferii te strutures adatedes. L Servisc veteriner teritorialmënter cumpetënt dl’Azienda sanitera, do avëi ademplì a duta la ublianzes de lege per azerté o garantì la cundizions saniteres di tieres cunfischei, se cruzia debota de mëter a lincant chisc tieres, sce l se trata de spezies de tieres da beché. I davanies che se porta pro dal lincant vën destinei dantaldut a curì la spëises liedes ala cunfiscazion di tieres y a si detenzion nchin che i vën vendui. Sce n cajo che l unissa a se l dé somes sëurora vënieles retudes ala persona, a chëla che n ti à cunfiscà i tieres. Sce l se trata pra i tieres cunfischei de tieres che ne ie nia da beché vëni dac n afidamënt aldò dl articul 4. Ala persones, a chëles che l ti ie unit cunfiscà tieres, ti vëniel pruibì de tenì tieres per n tëmp de almanco sies mënsc nchin a al plu un n ann dal mumënt dla cunfiscazion, aldò dla grievëza dla viulazion. Tl cajo che la viulazion se purtëssa inò pro tl tëmp de diesc ani dal di dl azertamënt dla prima viulazion cuntesteda tla maniera ududa danora dala lege, vëniel pruibì de tenì tieres per almanco un n ann nchin a al plu 4 ani, aldò dla grievëza dla viulazion. Tl cajo che la viulazion se purtëssa pro mo n iede y per uni auter iede, sarà la pruibizion de tenì tieres uni iede de almanco 2 ani nchin a al plu 8 ani. 14) 15)

(2/bis) I tieres tenii da persones, a chëles che l ti ie unit pruibì de nen tenì aldò de chësta lege o de d’autra despusizions n forza tla materia, vën cunfischei aldò dl coma 2. 16)

(3) L dutor di tieres ufiziel raionalmënter cumpetënt ie l’autorità che stabilësc l’eutanasia di tieres per la rejons nunziedes tl articul 2, coma 6 dla lege di 14 d’agost 1991, n. 281, ma nce per nen determiné la cundizion de “tier che vën tenì a na maniera che la segurëza publica o l’igiena ne ie nia garantides” y chëla de “tier malterjà”. Tl cajo de bujën possa l Servisc veteriner provinziel dé ora diretives a chëles che l dutor di tieres ufiziel cumpetënt à da se tenì.

13)
L articul 11, coma 1 ie unit remplazà nsci dal articul 14, coma 4 dla L.P. di 12 de dezëmber 2011, n. 14.
14)
L articul 11, coma 2, ie unit remplazà nsci dal articul 22, coma 5, dla L.P. di 10 de juni 2008, n. 4, y pona mudà dal articul 2, comes 1 y 2, dla L.P. di 12 de fauré 2016, n. 1.
15)
Cëla nce l articul 3, coma 1, dla L.P. di 12 de fauré 2016, n. 1.
16)
L articul 11, coma 2/bis ie unit remplazà nsci dal articul 14, coma 5 dla L.P. di 12 de dezëmber 2011, n. 14.

Art. 12 (Fieres, marcëi y mostres)

(1) Tl raion dla Provinzia autonoma de Bulsan iel pruibì dejëujer fieres, marcëi y mostres de cians, giac, retii y aranies, ora che sce l se trata de cuncorsc de belëza. Chisc ultimi muessa unì autorisei dal ambolt do avëi tëut ite l bensté positif dl Servisc veteriner raionalmënter cumpetënt che à cuntrolà la strutures che ie da garat, tl respet dla prescrizions cuntenides tl regulamënt dla polizai veterinera, dat ora cun decret dl Presidënt dla Republica di 8 de fauré 1954, n. 320 y mudazions suzessives, y n particuler dl articul 22.

(1/bis) La pruibizion nunzieda tl coma 1, prima frasa, ne vën nia aplicheda pra la istituzions che à i recuisic nunziei ti articuli 5/bis y 6 dla lege di 7 de fauré 1992, n. 150 y mudazions suzessives, ma ënghe de no pra l’ativiteies didatiches urganisedes dala istituzions publiches. 17)

(2) Dan dé ju l bensté nunzià pra l coma 1 possa l Servisc veteriner teritorialmënter cumpetënt audì l ënt che ie nciarià, aldò dl articul 15, coma 5, dl coordinamënt dla verdies per la defendura di tieres.

(3) Per la sëuraverdia dla manifestazions nunziedes pra l coma 1 possa l Servisc veteriner teritorialmënter cumpetënt nce se nuzé dla cunlaurazion dla verdies per la defendura di tieres.

17)
L coma 1/bis ie unit njuntà dal articul 43 dla L.P. di 29 d’agost 2000, n. 13.

Art. 13 (Spetacui y garejedes)

(1) Duc i juesc, spetacui, garejedes, reprejentazions y adestramënc pra chëi che l vën malterjà tieres ie pruibii. Sot a chësta pruibizion toma nce la garejedes pra chëles che l vën adurvà pec spic, l’adurvanza de amurijes strandlënc cun ficeri, spetacui, garejedes, reprejentazions publiches cun la droa de strom sun i tieres, cumbac danter tieres, l tré anei sun uciei da ega o l’adurvanza de tieres vives coche mira o per fins simileres.

Art. 14 (Esperimënc sun i tieres)

(1) L zidlé, l cumpré, l afidé tieres per rejons de sperimentazion, ma nce l dejëujer uni sort de esperimënc sun tieres, che cumporta per chisc duel, sufrënza y dann, ie pruibii.

(2) La prescrizions nunziedes pra l coma 1 vel, ora che per i tieres vertebrei, nce per i crëibes a diesc giames (decapodesc) y per i cefalopodesc.

Art. 15 (Verdia)   delibera sentenza

(1) Dla verdia sun l’aplicazion dla prescrizions y dla pruibizions cuntenides te chësta lege y tl regulamënt d’esecuzion curespundënt vën nciariei i funzioneres dl Servisc veteriner provinziel, dl’aziendes spezieles y di chemuns.

(2) Per garantì la usservanza y la verdia dla leges tla materia dla prutezion di tieres possa l Presidënt dla Provinzia, sun pruposta dl Servisc veteriner provinziel, nce numiné verdies juredes nciariedes dla defendura di tieres, denuminedes verdies zoofiles, la persones che à i recuisic udui danora dal articul 138 dl decret dl rë di 18 de juni 1931, n. 773, y mudazions suzessives, che ébe stlut ju cun resultat positif l curs d’abilitazion metù a jì dala Provinzia. La numinazion ie per cin ani, ora che sce la vën revucheda dan l destumé di cin ani sun pruposta mutiveda dl Servisc veteriner provinziel. La verdies juredes dejëuj si funzion coche atività unerera. 18)

(3) La verdies per la defendura di tieres ie funzioneres aldò dl articul 357 dl Codesc Penal, a chëi che ti ie atribuida la cualifica de polizai giudiziera. Tl eserzize de si servisc iesi furnii cun na uniform o, sce no, porti n contrasëni dla lia o dl ënt nciarià dl coordinamënt dl servisc dla verdies per la defendura di tieres nunziei pra l coma 4. La uniform y l contrasëni muessa unì apurvei dal Presidënt dla Provinzia. La verdies se dà da cunëscer tres la presentazion de n documënt cun fotografia, relascià dal Presidënt dla Provinzia.

(4) La Jonta provinziela possa deleghé l eserzize dla funzions che à da nfé cun l coordinamënt dla verdies per la defendura di tieres ala lies per la defendura di tieres atives tla Provinzia de Bulsan o a si federazion, o nce al Servisc veteriner dl’azienda speziela. Chisc duvieres deleghei ie a uni moda sometui al control dl Servisc veteriner provinziel.

(5) La modaliteies n cont dl coordinamënt dl’ativiteies dla verdies per la defendura di tieres y dl mëter a jì cursc d’abilitazion vën stabilides cun regulamënt d’esecuzion.

massimeDelibera N. 1749 del 23.05.2005 - Guardie zoofile - delega delle funzioni connesse all'attività di coordinamento delle guardie zoofile al Servizio Veterinario Interaziendale dell'azienda Sanitaria di Bolzano
18)
L coma 2 ie unit remplazà dal articul 1 dla L.P. di 20 de juni 2005, n. 4.

Art. 16 (Straufonghes aministratives)  

(1) Restan mpe l’aplicazion dla straufonghes penales ti caji te chëi che l fat costituesc reat y l dërt eventuel ala remburseda dl dann abù, ie sometù a na straufonga tla forma de scioldi:

  1. da 292 euro a 874 euro a chi che arbandunea o malterjea tieres, a chi che i sforza a lauré, scebën che i ie inant cun i ani, amalei o ferii, a chi che malterjea i tieres ntan l trasport o che i fej patì o ti fej dann te n’autra maniera o a chi che i maza zënza na rejon valëivla; 19)
  2. da 874 euro a 3.438 euro a chi che malterjea tieres a mort o a chi che i malterjea tan che l ie de bujën de i tò via cun prëscia; 19)
  3. da 2.911 euro a 5.821 euro a chi che marciadea cun tieres al fin de sperimentazion jan contra la despusizions valëivles tla materia; 19)
  4. da 292 euro a 1.048 euro a chi che ne respetea nia i articuli 2, coma 3 y i articuli 4,10, 11, 12, 13 y 14 y la prescrizions sun l tenì tieres cuntenides tla njonta a chësta lege; 19)
  5. da 292 euro a 1.456 euro a duc chëi che gauja o porta pro al se spander ora de malaties de tieres, nce n viulazion dla despusizions dla polizai veterinera; 19)
  6. da 292 euro a 1.048 euro a chi che ne respetea nia la despusizions cuntenides tl regulamënt d’esecuzion de chësta lege. 19)
  7. da 50,00 euro a 500,00 euro chi che ne respetea nia l duvier de ne lascé nia slunderné ncantëur i cians;  20)
  8. da 150,00 euro a 1.500,00 euro chi che ne lascia nia cuntrolé l respet dla despusizions valëivles de prutezion di tieres che l tën.  21)

(2) La straufonghes tla forma de scioldi nunziedes pra l coma 1 vën aplichedes tl respet dla pruzedura ududa danora dala lege provinziela di 7 de jené 1977, n. 9 y mudazions suzessives dal diretëur dl Servisc veteriner provinziel.

19)
La somes ie unides sostituides dal articul 1, coma 58 dl D.P.P. di 19 de lugio 2006, n. 34.
20)
L pustom g) ie unì njuntà dal articul 14, coma 6, dla L.P. di 12 de dezëmber 2011, n. 14, y dadedò remplazà dal articul 16, coma 2, dla L.P. di 24 de setëmber 2019, n. 8.
21)
L pustom h) ie njuntà dal articul 14, coma 6 dla L.P. di 12 de dezëmber 2011, n. 14.

Art. 17 22)

22)
L articul 17 ie unit abrogà dal articul 11, coma 2, pustom a) dla L.P. di 19 de mei 2015, n. 5.

Art. 18 23)

23)
Cuntën mudazions ala L.P. di 27 d’auril 1995, n. 9.

Art. 19 24)

24)
Cuntën mudazions ala L.P. di 14 de dezëmber 1999, n. 10.

Art. 20 25)

25)
Omissis

Art. 21 (Despusizions cuntlujives)

(1) La lege provinziela di 8 de lugio 1986, n. 16 y mudazions suzessives ie abrogheda.

(2) Per dut chël che ne ie nia regulamentà da chësta lege iel da apliché i regulamënc dla UE y la normativa statela valëivla tla materia.

Chësta lege unirà publicheda tl Buletin Ufiziel dla Region. Uni un, a chël che ti spieta, ie ublià a la respeté sciche lege provinziela y a la fé respeté.

Njonta (articul 11)
Criteres per tenì tieres

 

1. Armënc

I armënc muessa unì tenii te n ambient cun n tlima adatà y na ventilazion naturela o artifiziela bona assé, cun na tempratura, tumienza y luminazion adecuates y n livel de gasc da tuesse basc. L muessa vester lerch assé per i tieres aldò de si mesures, a na moda che i posse sté mpe o pendui. A mespies muessel unì sterdù n stram adatà o n’autra sort de material munjel y flessibl.

Ai armënc che vën for tenii tachei ti muessel uni tant unì dat la puscibltà – tan inant che l ie puscibl pervia dla nluegeda geografica dl luech da paur y per la cundizions atmosferiches – de se muever dedora dla stala. La ondles à da unì duledes y curedes regularmënter y sciche l toca. Pra la vaces muessa chësc a uni moda unì fat almanco n iede al ann.

I fieres eletrics daussa mé unì adurvei per vaces y armënc sëura i 18 mënsc. N daussa mé se nuzé de njins adatei y i fieres muessa unì regulei ndividualmënter aldò dl’autëza de uni tier. N i dis dan che la vaces à da fé vadel nchin almanco n’ena do muessa l fier eletrich unì spustà sun la pusizion plu auta. Pruibides ie nce cultrines eletriches, fieres eletrics tl raion dl cë, ciadëines eletrisëntes che taca ju, fiertrac danter i tieres y fieres eletrics che limitea i tieres te si muvimënc da la pertes. L’adurvanza de fii eletrics o de fiertrac scëmpli per sieves da pastura ne vën nia lasceda pro.

Tla stales te chëles che i tieres possa jì ncantëur te na maniera liedia muessa la lueges de passaja vester tan lerges y fates a na moda che i tieres posse se astilé ora l un l auter y che doi tieres posse passé saurì dlongia l auter via. Oradechël muessel te chësta stales vester n cumpartimënt grant assé per tieres amalei o che à da fé vadel. Per uni tier muessel vester lerch assé per pudëi maië y l muessa vester assé lueges da vejelé y box te chëi che i tieres possa se ponder.

No ntan l trasport no te stala ne daussa i armënc mé unì tachei cun cordes ntëur i corni o cun l anel tl nes.

L alatamënt di vadiei cun lat o surogac dl lat muessa unì fat tres n njin da ciucé aposta o tres n auter njin adatà a chësc fin. I vadiei vën tenii sun stram o sun n auter sterdum adatà.

 

2. Cëures y biesces

Sce biesces y cëures vën for mé tenides tachedes, iel da se cruzië che les posse sté dedora d’instà. L muessa vester da garat na lerch granda assé, aldò dla mesura di tieres, sterduda cun stram o cun n auter material munjel y flessibl, adatà acioche i tieres posse se ponder. La biesces da lana muessa unì tendudes almanco n iede al ann.

 

3. Purciei

Purciei muessa unì tenii te na stala adateda a si mesura y i ne daussa nia unì tenii tresora tl scur. I muessa avëi, almanco per ot ëura al di, assé lum naturela o artifiziela. Oradechël muessel vester n mudamënt reguler dl’aria.

L fonz di box o dla plazes singules, te chëi che l vën tenì la purceles da zidlamënt y i purciei, daussa mé vester da sfësses y da bujes per al plu l mez de duta la spersa y, sce l vën tenì pitli purciei, nia per plu de doi terc dla spersa. L muessa vester da garat na plaza per i tieres, a na moda che i posse paussé. Chësta plaza muessa vester granda assé per la dimenscion di tieres; la muessa, oradechël, vester nëta y la ne daussa nia avëi n fonz da sfësses o da bujes. I purciei muessa pudëi se tripé per n pez ala longia cun materiai adatei sciche stram, vejeladura sëcia o auter.

I tieres muessa unì cuntrolei almanco n iede al di y i muessa unì vejelei assé y sciche toca. Oradechël muessi giapé da bever assé ega o n’autra lutranza adateda.

La cianeles muessa vester nluegedes nsci che duc i tieres posse maië tl medemo tëmp. Tieres particulermënter agressifs o tieres che ie restei zeruch te si svilup, muessa unì spartii dala grupa y tenii a pert.

N valgun dis dan parturì y per almanco doi enes dadedò ti muessel unì metù a despusizion ala purceles n sterdum adatà.

I purciei muessa unì tenii a na moda che i posse se raidé zënza rëms te si pert de stala o box. Na sëula ezezion a chësc vën lasceda pro pra la purceles tl tëmp che va da n’ena dan che les à da parturì a doi enes do che les à parturì. 26)

 

4. Ciavei

Ora che per ciavei vel chësta despusizions nce per musciac, mui y bardoc.

Ciavei muessa unì tenii cun tieres dla medema sort o cun tieres che passenea adum cun ëi. Ciavei che ne possa nia se muever dedora dala stala per almanco n’ëura al di, ne daussa nia unì tenii tachei, ora che per n tëmp curt.

I taures da zidlamënt muessa unì tenii te n box grant assé, i muessa avëi la puscibltà de se muever assé y i ne daussa nia unì tenii tachei.

La plazes da ponder ti box muessa vester curides cun assé sterdum adatà.

Sce i ciavei vën for tenii dedora muessi avëi na sosta adateda coche prutezion dala nfluenzes atmosferiches. I zocui di ciavei muessa unì scurtei regularmënter y sciche l toca. Sce l ie de bujën iesi nce da nferé. Ciavales plëines muessa unì tenides te box adatei a parturì da almanco trëi enes dan che les parturesc nchin almanco trëi enes dadedo y ntan chësc tëmp ne dausseles nia unì tachedes. I box da sté de pert muessa vester granc assé, acioche la ciavales posse parturì, i muessa vester nëc y curii cun sterdum.

I box singui muessa vester tan granc che i tieres posse se raidé zënza rëms. 27)

 

5. Cians

Cians che vën tenii te locai stluc muessa pudëi jì dedora o muessa pudëi se muever y se neté aldò de si bujëns fisics. Cians tachei muessa pudëi se muever almanco sun na spersa de 20 m2. I ne daussa nia unì tachei cun n amurisc strandlënt o cun ficeri. Cians che vën tenii dedora muessa avëi da garat na sosta adateda a si mesura. Chësta sosta à da vester suta y muessa avëi na prutezion che ijulea dl viers dl terac y dala nfluenzes atmosferiches. Tl cajo de tempratures autes muessa i cians pudëi jì te na luegia da dumbria y avëi for ega assé.

Pra l adestramënt de cians iel da schivé na rigurëusità estrema y straufonghes esageredes. Al fin d’adestramënt ne daussel nia unì adurvà njins d’adestramënt eletrisënc o, ora che scibloc, njins che dà ora seniai acustics.

Mesures miredes a limité o scuender la manifestazion de patimënt, sciche per ejëmpl smendrì la funzion di organns dla usc o dl audì, ie pruibides.

 

6. Cunici

I tieres jëuni sot a doi mënsc ne daussa de regula nia unì tenii da sëui. I cunici muessa unì vejelei uni di cun vejeladura grovia sciche fën o stram y i muessa giapé da bever ega. Oradechël muessi giapé vejeladura nia spiza, adateda a rafé.

 

7. Pulam

L ie pruibì tenì pulam te bateríes. Sce l vën tenì pulam te gabies muessa chëstes avëi la mesures minimes scrites dant nsci: Pra na cumpëida de nchin a trëi tieres chersciui ora muessa la lunghëza, la larghëza y l’autëza dla gabia vester de sies iedesc mo ntant dla mesura curespundënta al majer tier; per uni auter tier avanea la mesura dla spersa dla gabia dl 30 per cënt dla mesura che ie de bujën per na cumpëida de nchin a trëi tieres.

Dala despusizions repurtedes pra l coma 1 daussel mé unì desvià pra trasporc de pulam, sun marcëi, pra scumenciadives ornitologiches y pra l zidlamënt de pulam. Ma sun i marcëi, pra scumenciadives ornitologiches y pra l zidlamënt de pulam muessa uni tier avëi a despusizion almanco tan de lerch che ti lasce pro n minim de muvimënt, acioche i tieres posse se cufé saurì zënza vester de mpedimënt l un cun l auter.

L bech daussa mé unì scurtà tant che i tieres sibe mo boni de maië normalmënter. L’adurvanza de judamënc tecnics che limitea o muda la capazità de udëi di tieres ie pruibida. I tieres muessa giapé ega y vejeladura assé.

Per i tieres da zidlamënt y da coa sciche la gialines, i tachins y la gialines faraones muessel vester da garat assé zetli adatei. Da chësta despusizion possel mé unì desvià te aziendes de produzion d’ueves de gialines tenides sun terac y tl zidlamënt de pulam tenì sun terac.

Staloc per gialines da coa muessa avëi dedite na lerch per crazé curida cun sterdum sciche stram, planadices, sablon o torf. La mesures dla lerch da crazé tl stalot muessa cumpurté almanco n terz dla spersa dl stalot. La lunghëza dl zetl a despusizion dla gialines muessa vester de 20 zentimetri per uni tier y la distanza urizontela danter i zetli muessa vester de almanco 30 zentimetri.

Aunes muessa avëi da garat na strutura da bani saurida da arjonjer. L ti tò l’ega per fé a na moda che les se splume ie pruibì.

L ie pruibì tenì pavons tresora tla gabia zënza che i posse se muever dedora.

Per uni sort de pulam iel pruibì ti ncrujé l’eles. 28)

 

8. Pësc y tieres da crosa

Tenì pësc y tieres da crosa te eghes tëurbles y pueres de ossigenn sun marcëi, festes y te parcs de devertimënt ie pruibì.

L ie pruibì mëter sasc o ogec semienc te pësc per fé avané si pëis.

 

8/bis Retii y tartarughes

I retii muessa unì teii a na maniera adateda ala spezia y vejelei a na moda deferenzieda. L terarium muessa vester struturà a na maniera y avëi la mesures che curespuende al bujën de muvimënt y che tënie cont dl cumpurtamënt teritoriel di tieres che viv laite. I tieres muessa pudëi se tré zeruch te raions dl terarium, ulache i ne possa nia unì usservei da chi che ti cëla. L terarium muessa vester njinià ite a na maniera adateda ala usanzes de vita dla spezies de tieres che vën tenides iló.

Ala tartarughes da tiera ti muessel unì metù a despusizion na spersa de na lunghëza che sibe almanco ot iedesc tan granda y de na larghëza che sibe almanco cater iedesc tan granda dla lunghëza dl scude dla majera tartaruga. Tl cajo che l ie plu che cin tieres muessa la spersa unì ngrandida per uni tier dl 20 per cënt. Pra la tartarughes de paluch muessa la pert da ega curespuender tla lunghëza a almanco cin iedesc y tla larghëza a almanco trëi iedesc la lunghëza dl scude dla majera tartaruga. L muessa nce vester a despusizion na pert dla spersa granda assé acioche l sibe puscibl che l scude dla tartarughes posse suië defin. L’ega muessa vester almanco doi iedesc tan sota dl’autëza dla majera tartaruga. 29)

 

9. Despusizions valëivles per duta la spezies de tieres

Sce i tieres vën metui n mostra n ucajion de marcëi o esposizions, unfat per cie fin, muessi unì tenii te na maniera adateda ala spezia. N generel muessa i tieres for unì tratei te na maniera adateda ala spezia, nce per chël che reverda la cundizions tlimatiches adecuates dl ambient. La castrazion di tieres daussa mé unì fata da n dutor di tieres y do che l ti ie unit fat na ndormia.

Tò ora la sgrinfles ie pruibì pra duta la spezies de tieres, ora che per rejons de sanità.

Per la spezies de tieres nia nunziedes espressamënter vel, tan inant che les ie aplicables, la despusizions scrites dant da chësta lege.

 

26)
L pont 3 dla njonta ie unit njuntà tres l articul 22, coma 6, pustom a) dla lege provinziela di 10 de juni 2008, n. 4.
27)
L pont 4 ie unit njuntà nsci dal articul 1 dla lege provinziela di 20 de juni 2005, n. 4 y dal articul 22, coma 6, pustom b) dla lege provinziela di 10 de juni 2008, n. 4.
28)
L pont 7 ie unit mudà nsci dal articul 43 dla lege provinziela di 29 d’agost 2000, n. 13.
29)
L pont 8/bis dla njonta ie unit njuntà tres l articul 22, coma 6, pustom c) dla lege di 10 de juni 2008, n. 4.
ActionActionNormativa Costituzionela
ActionActionLegislazion Provinziela
ActionActionI Alpinistica
ActionActionII II – Lëur
ActionActionIII Mineres
ActionActionIV Chemuns y cumenanzes raioneles
ActionActionV Furmazion prufescionela y adestramënt al lëur
ActionActionVI Defendura di teraces, frabiches per l’ega
ActionActionVII VII – Energia
ActionActionVIII Finanzes
ActionActionIX Turism y ndustria d’albierch
ActionActionX Assistënza y benefiziënza
ActionActionXI Ustaries
ActionActionXII Nuzënzes ziviches
ActionActionXIII Urdinamënt di bòsc
ActionActionXIV Sanità y igena
ActionActionXV Nuzeda dl’eghes
ActionActionXVI XVI – Cumerz
ActionActionXVII XVII – Artejanat
ActionActionXVIII Liber fundier y cataster
ActionActionXIX Ciacia y Pëscia
ActionActionXX Prutezion contra l meldefuch y prutezion zevila
ActionActionXXI Scolines
ActionActionXXII XXII – Cultura
ActionActionXXIII Ufizies provinziei y personal
ActionActionXXIV Defendura dla cuntreda y dl ambient
ActionActionA A – Mpaziamënt dl terac y smaltimënt dl refudam
ActionActionB B – Defendura dla cuntreda
ActionActionC C – Mpaziamënt acustich
ActionActionD D – Mpaziamënt dl’aria
ActionActionE E – Defendura dla flora y fauna
ActionActionF F – Mpaziamënt dl’ega y smaltimënt dl refudam luter
ActionActionG G – Valutazion dla fazion sun l ambient
ActionActionH H – Prutezion di tieres
ActionActiona) Lege Provinziala di 15 de mà dl 2000, n. 9
ActionActionArt. 1 (Fins)
ActionActionArt. 2 (Despusizions n cont dl tratamënt di tieres)  
ActionActionArt. 3 (Asii per tieres slundernënc y arbandunei)
ActionActionArt. 4 (Sistemazion de tieres te asii per tieres y cianii)  
ActionActionArt. 4/bis Tupes de zità  
ActionActionArt. 5 (Cuntribuc per la defendura di tieres)   
ActionActionArt. 6 (Register anagrafich di tieres d’afezion)   
ActionActionArt. 7 (Tenì cians a fins cumerziei y scoles d’adestramënt)
ActionActionArt. 8 (Nfurmazion, educazion y furmazion)
ActionActionArt. 9 (Trasport di tieres)  
ActionActionArt 10 (Sucors a tieres ferii)  
ActionActionArt. 11 (Tenì i tieres)   
ActionActionArt. 12 (Fieres, marcëi y mostres)
ActionActionArt. 13 (Spetacui y garejedes)
ActionActionArt. 14 (Esperimënc sun i tieres)
ActionActionArt. 15 (Verdia)  
ActionActionArt. 16 (Straufonghes aministratives)  
ActionActionArt. 17
ActionActionArt. 18
ActionActionArt. 19
ActionActionArt. 20
ActionActionArt. 21 (Despusizions cuntlujives)
ActionActionCriteres per tenì tieres
ActionActionXXV XXV – Agricultura
ActionActionXXVI Lernerat
ActionActionXXVII Fieres y marceies
ActionActionXXVIII Lëures publics
ActionActionXXIX Manifestazions publiches
ActionActionXXX Raiun y contrada
ActionActionXXXI Cuntabltà
ActionActionXXXII Sport y tëmp liede
ActionActionXXXIII Stredes
ActionActionXXXIV XXXIV – Trasporc
ActionActionXXXV XXXV – Istruzion
ActionActionXXXVI XXXVI – Patrimone
ActionActionXXXVII XXXVII – Economia
ActionActionXXXVIII Frabiché abitatif
ActionActionXXXIX Leges cun desposiziuns desvalies (Omnibus)
ActionAction*
ActionAction*
ActionAction*
ActionActionIndesc cronologich