b) Lege Provinziala di 16 de merz dl 2000, n. 81)
Normes per stravardé la cualità dl’aria

(1)  I valores lim d’emiscion stabilìi tla njonta C vën aplichei ai ponc singui d’emiscion tl’atmosfera y ie cunscidrei n referimënt ala cuantità d’emiscion gasëusa che ne ie nia slungeda plu de chël che ne ie da schivé dal pont d’ududa tecnich y funzionel.

(2)  Ulache l ie tecnicamënter puscibl muessa la emiscions unì abinedes adum.

(3)  I valores lim d’emiscion purtei a esprescion tl flus de massa o tla cunzentrazion ie n referimënt al’ëura de funzionamënt dl mplant tla cundizions de eserzize plu zariëuses.

(4)  L gas de desćëria muessa unì lascià ora tl’atmosfera a na maniera che l posse se mescedé diretamënter cun la curëntes d’aria, y n generel ne daussa la sbuceda dla desćëria di gasc nia vester plu bassa dla colm dl tët.

(5)  Tla njonta C vëniel oradechël fissà despusizions tecniches spezieles per cër’ mplanc. 3)

(1)  La costruzion, l eserzize o la mudazions sustanzieles di mplanc che toma tla categories dla njontes A y B ie sometui al’apurvazion da pert dla Agenzia provinziela per l ambient 4). La despusizions dla lege provinziela di 24 de lugio 1998, n. 7, y mudazions suzessives resta mpe.

(2)  Per l’apurvazion di mplanc muessel unì presentà al ambolt/al’ambolta teritorialmënter cumpetënt/cumpetënta, adum cun la dumanda per la cunzescion de frabiché, chësta documentazion:

1. la descrizion dl mplant;
   
2. la descrizion dl cërtl produtif y dla materies primes y di prudoc ntermesans adurvei.
   
3. la descrizion dla tecnologies adurvedes per schivé l mpaziamënt;
   
4. la ndicazion dla cuantità, dla cualità y dla lueges dla emiscions.
   

(3)  Pernan che l à giatà la dumanda de cunzescion de frabiché damanda l ambolt/l’ambolta n arat sun l proiet al’Agenzia provinziela per l ambient 4)  che fej al savëi si minonga tl tëmp de 60 dis. L arat dl’Agenzia provinziela per l ambient 4)  ie liënt.

(4)  Contra l arat dl’Agenzia provinziela per l ambient 4)  iel puscibl fé recurs tl lim de tëmp de 30 dis dala nutificazion dl pruvedimënt ala cumiscion per la VFA 5)  aldò dl articul 12 dla lege provinziela di 24 de lugio 1998, n. 7, y mudazions suzessives.

(1)  L’Agenzia provinziela per l ambient dà l’autorisazion ala emiscions per l eserzize di mplanc che toma tla categories nunziedes tla njontes A y B. L trasferimënt di mplanc da na luegia a n’autra cumporta la destumeda dl’autorisazions esistëntes.

(2)  L gestëur/La gestëura dl mplant nunzià tl coma 1 presentea al’Agenzia provinziela per l ambient, almanco 15 dis dan l mëter man dl eserzize, la dumanda d’autorisazion ala emiscions, dajan sëura la data dl scumenciamënt dl eserzize dl mplant. La dumanda muessa unì njunteda da na detlarazion dl gestëur/dla gestëura che atestea la cunformità dl mplant realisà cun l proiet apurvà aldò dl articul 4. La detlarazion ie sotscrita da n tecnich cualificà, scrit ite tl album prufescionel respetif.

(3)  Do la presentazion dla documentazion nunzieda pra l coma 2 possa i mplanc unì metui a jì.

(4)  Tl tëmp de 90 dis da canche i mplanc ie unic metui a jì vëni culaudei dal’Agenzia provinziela per l ambient che dà po l’autorisazion ala emiscions. L’autorisazion vën mandeda al gestëur/ala gestëura dl mplant y al ambolt/ala ambolta teritorialmënter cumpetënt/cumpetënta. L’autorisazion stabilësc la cuantità y la cualità dla emiscions, la periodizità y la sort de mesurazions d’autocuntrol sciche nce la prescrizions che ie de bujën per garantì l drë’ funzionamënt di mplanc.

(5)  Te caji de mplanc particulermënter cumplesc possa l’Agenzia provinziela ambientala cunzeder na desvieda ala despusizions ududes danora ti comes 2 y 4 y damandé l’esecuzion de mesurazions d’autocuntrol che atesteie l respet di valores lim y dla prescrizions. Chësta mesurazions muessa unì fates da n lauratuere d’analisa ndependënt.

(6)  Sce l’autorisazion ne vën nia data tl lim de tëmp nunzià ti comes 4 y 5 muessa l eserzize di mplanc unì fermà.

(7)  Per sortes spezifiches de mplanc che toma tla categories nunziedes tla njonta B y ndividuedes n referimënt ala sort y ala manieres de produzion possa la Jonta provinziela apurvé n’autorisazion generela te chëla che la stabilësc i valores lim, la prescrizions, la mesurazions d’autocuntrol periodiches a chëles che uni singula sort de mplant ie sometuda sciche nce la manieres de presentazion dla dumanda d’autorisazion generela n desvieda da cie che ie scrit dant dai comes 2 y 4.

(8)  L’autorisazion ala emiscions vel 15 ani. La dumanda de renuvamënt muessa unì presenteda dal gestëur/dala gestëura almanco un n ann dan che la destoma.

(9)  Contra l’autorisazion ala emiscions nunzieda te chësc articul iel puscibl fé recurs te na sëula istanza ala cumiscion ambientala nunzieda tl articul 3 dla lege provinziela di 5 d’auril 2007, n. 2, y mudazions suzessives. L recurs ie da presenté tl lim de tëmp de 30 dis dala nutificazion dl pruvedimënt, dadedò ie l tëmp destumà.] 6)

(1)  La relasceda de n’autorisazion ala emiscions per mplanc esistënc vën fata cun pruzedura scemplificheda, n desvieda da cie che ie stabilì dai articui 4 y 5, te chisc caji:

1. renuvamënt de n’autorisazion aldò dl articul 5, coma 8;
   
2. relasceda de n’autorisazion aldò dl articul 21, coma 2;
   
3. ajurnamënt de n’autorisazion data ora aldò dl articul 5 pervia de mudazions pra i mplanc nia sometudes ala relasceda de na cunzescion de frabiché.
   

(2)  L gestëur/La gestëura di mplanc manda inant la documentazion ududa danora tl articul 4, coma 2 al ambolt/al’ambolta teritorialmënter cumpetënt/cumpetënta. Tl tëmp de 60 dis da canche chësta documentazion ie ruveda adalerch, y do avëi verificà che l ne ie nia de bujën de relascé na cunzescion de frabiché, manda l ambolt/l’ambolta inant la documentazion al’Agenzia provinziela per l ambient. La muessa vester njunteda da na dumanda d’autorisazion ala emiscions y da na detlarazion dl gestëur/dla gestëura che atestea la cunformità di mplanc ala despusizions de chësta lege, sotscrita da n tecnich cualificà scrit ite te n album prufescionel.

(3)  Tl lim de tëmp de 90 dis dala presentazion dla dumanda nunzieda tl coma 2 dà l’Agenzia provinziela per l ambient l’autorisazion ala emiscions, cun chëla che l vën scrit dant la cuantità y la cualità dla emiscions, la periodizità y la sort de mesurazions d’autocuntrol sciche nce duta la prescrizions che ie de bujën per garantì l drë’ funzionamënt di mplanc. L’autorisazion vën mandeda per cunescënza al ambolt/al’ambolta teritorialmënter cumpetënt/cumpetënta.

(4)  Per la relasceda dl’autorisazion possa l’Agenzia provinziela per l ambient se damandé dal gestëur/dala gestëura duta la nfurmazions che ie de bujën acioche l sibe puscibl verifiché i recuisic tecnics damandei dala lege y fé l culaudamënt di mplanc plu cumplichei.

(5)  L’autorisazion ala emiscions vel 15 ani. La dumanda de renuvamënt muessa unì presenteda dal gestëur/dala gestëura almanco n ann dan che la destoma.

(6)  Contra l’autorisazion ala emiscions nunzieda te chësc articul iel puscibl fé recurs te na sëula istanza ala cumiscion ambientala nunzieda tl articul 3 dla lege provinziela di 5 d’auril 2007, n. 2. L recurs ie da presenté tl lim de tëmp de 30 dis dala nutificazion dl pruvedimënt, dadedò ie l tëmp destumà. 7)

(1)  Per mplant de combustion ntënden n despusitif tecnich te chël che l vën ossidà combustibli per adurvé l’energia produjeda nsci.

(2)  Per mplant termich ntënden n mplant de combustion destinà ala produzion de ciaut costituì da un o plu generatëures de ciaut. N mplant termich vën definì zevil canche la produzion de ciaut ie dantaldut destineda al sciaudamënt de frabiches o al sciaudament d’ega per adurvanzes igeniches y saniteres.

(3)  Ai mplanc de combustion che toma tla categories nunziedes tla njontes A y B vëniel aplicà i valores lim d’emiscion y la despusizions nunziedes tla njonta C.

(4)  La njonta D stabilësc i valores lim d’emiscion, la periodizità y la manieres di cuntroi per i mplanc termics che ne toma nia tla sort nunzieda pra l coma 3. La determinea oradechël la sortes de mplant y la sortes de cuntrol che possa unì dejëutes da pert di/dla cuntrolëures di fums.

(5)  La njonta D stabilësc i recuisic per l recunescimënt dla figura prufesciunela de “cuntrolëur o cuntrolëura di fums”. I/La cuntrolëures di fums muessa sodesfé criteres desmustrei de cumpetënza, mparzialità y de drëta gestion dla nfurmazions. Sce i ufizies provinziei cumpetënc azertea vel’ iregularità o viulazion de lege tl’atività de cuntrol y de verifica pra i/la cuntrolëures di fums, vëniel aplicà a cëria de chisc na straufonga aministrativa medema a diesc nchin a vint iedesc la tarifa de cuntrol dl mplant n cuestion y, tl cajo che l fat ëssa da suzeder inò, revuchea la Jonta provinziela al cuntrolëur/ala cuntrolëura di fums l’autorisazion de fé la verifiches nunziedes tl coma 4.

(6)  La tarifes mascimes che possa unì aplichedes per l’atività de cuntrol y verifica di/dla cuntrolëures di fums vën apurvedes dala Jonta provinziela. La spëises per i cuntroi ie a cëria di/dla gestëures di mplanc.] 9)

(1)  Per mplant de combustion ntënden n despusitif tecnich te chël che l vën ossidà combustibli per adurvé l’energia produjeda nsci.

(2)  Per mplant termich ntënden n mplant de combustion destinà ala produzion de ciaut costituì da un o plu generatëures de ciaut. N mplant termich vën definì zevil canche la produzion de ciaut ie dantaldut destineda al sciaudamënt de frabiches o al sciaudament d’ega per adurvanzes igeniches y saniteres.

(3)  Ai mplanc de combustion che toma tla categories nunziedes tla njontes A y B vëniel aplicà i valores lim d’emiscion y la despusizions nunziedes tla njonta C.

(4)  La njonta D stabilësc i valores lim d’emiscion, la periodizità y la manieres di cuntroi per i mplanc termics che ne toma nia tla sort nunzieda pra l coma 3. La determinea oradechël la sortes de mplant y la sortes de cuntrol che possa unì dejëutes da pert di/dla cuntrolëures di fums. L’autorisazion a dejëujer i controi vën data ora dal’Agenzia provinziela per l ambient.

(5)  La njonta D stabilësc i recuisic per l recunescimënt dla figura prufesciunela de “cuntrolëur o cuntrolëura di fums”. I/La cuntrolëures di fums muessa sodesfé criteres desmustrei de cumpetënza, de mparzialità y de drëta gestion dla nfurmazions. Sce i ufizies provinziei cumpetënc azertea vel’ iregularità o viulazion de lege tl’atività de cuntrol y de verifica pra i/la cuntrolëures di fums, vëniel aplicà a cëria de chisc na straufonga aministrativa medema a diesc nchin a vint iedesc la tarifa de cuntrol dl mplant n cuestion y, tl cajo che l fat ëssa da suzeder inò, revuchea la Jonta provinziela al cuntrolëur/ala cuntrolëura di fums l’autorisazion de fé la verifiches nunziedes tl coma 4. 11)

(1) La Provinzia autonoma de Bulsan dà cuntribuc per la nstalazion de sistems de sciaudamënt a emiscions basses y alimentei cun energies renuvables, per baraté ora generadëures de ciaut tizei cun lënia, che mpazia l’aria y ie obsolec. I mplanc sustenii muessa purté pro a smendrì la emiscions dla sustanzes che mpazia l’aria plu problematiches n cont di valores minims y di valores obietif fissei dala normativa n forza sciche nce dal plan dla cualità dl’aria y dai programs nunziei tl articul 9. La Jonta provinziela stabilësc la manieres y i criteres per la cunzescion di cuntribuc, che muessa jì a una cun i obietifs de defendura dl clima.

(2) I cuntribuc nunziei pra l coma 1 vën mé dac ai sogec che à giapà azes ai sustenimënc statei nunziei tl decret interministeriel di 16 de fauré 2016, y mudazions suzessives. I cuntribuc nunziei pra l coma 1 possa unì amudlei ai sustenimënc recunesciui dal Stat nchin ala mesura mascima dl 90 percënt dla spëises lascedes pro. I cuntribuc a bën dla mprejes vën cunzedui tl respet di regulamënc dla Union europeica tl ciamp di aiuc dl Stat a bën dl clima, dl ambient y dl’energia 2022 (2022/C 80/01).  12)

(1)  Restan mpe la despusizions di comes che vën do vëniel tla provinzia de Bulsan lascià pro l’adurvanza de chisc combustibli:

1. combustibli gasëusc;
   
2. gasuele, kerosenn y d’autri destilei dl petruele cun n cuntenut de solper nia plu aut dl 0,2 percënt dl pëis;
   
3. lënia nia trateda te toc de na tumienza de al plu l 20 percënt tla forma de steles, planadices, scorzes, brichets zënza sustanzes lientes y ciarbon de lënia;
   
4. biodiesel cun la carateristiches aldò dla njonta dl decret ministeriel di 31 de dezëmber 1993 y uelesc vegetei nia tratei;
   
5. uele combustibl y d’autri destilei pesoc de petruele cun n cuntenut de solper nia plu aut dl 0,3 percënt, cun na restanza de carbonium nia plu auta dl 10 percënt dl pëis y n cuntenut de nichel y vanadium mascim de ndut 230 parts per milion.
   
6. uele combustibl y d’autri destilei pesoc de petruele cun n cuntenut de solper nia plu aut dl 1 percënt, cun na restanza de carbonium nia plu auta dl 15 percënt dl pëis y n cuntenut de nichel y vanadium de mascim de ndut de 230 parts per milion.
   

(2)  I mplanc termics zevii che à la destinazions aldò dl articul 7, coma 2, nce sce nstalei te stabilimënc ndustriei o artejanei, te chëi che l vën dejëut d’autra sortes d’ativiteies, cun combustibli aldò di pustoms a), b), c) y d) dl coma 1.

(3)  I mplanc nueves ndustriei y mescedei cun na putënza termica nia majera de 3 megawatt possa unì alimentei cun combustibli aldò dl coma 1, pustoms a), b), c), d) y e).

(4)  Per la lavandaries ndustrieles vëniel lascià pro l’adurvanza de combustibl aldò dl coma 1, pustoms a), b), c), d) y e).

(5)  Ti mplanc termics che funzionea cun combustibli solic a alimentazion automatica y che ie nstalei te aziendes te chëles che l vën laurà l leniam, possel unì adurvà, ora che i combustibli aldò dl coma 1, pustom c), nce lënia de restanza che vën dala produzion de leniam dl’azienda nstëssa, a cundizion che chësc ne sibe nia unì mprenià a prescion y che l ne cuntënie nia organoclorurei.

(6)  L’adurvanza de restanzes vegeteles vën lasceda pro te mplanc cun na putënza termica majera che 500 chilowatt che vën tizei automaticamënter y che ie cuntrolei tresora n cont dla cunzentrazion de monossid de carbonium y dla tempratura dl gas de desćëria.

(7)  Per la fujines vëniel lascià pro l coke mitelurgich y de gas, cun n cuntenut de elemënc julënc nchin al 2 percënt y cun n cuntenut de solper nchin al un percënt.

(8)  Ti furniei per l sciaudaumënt de locai singui ie l’adurvanza de antrazit, de prudoc cuntenënc antrazit, de brichets cun n cuntenut de elemënc julënc de nchin al 13 percënt y n cuntenut de solper de nchin a1 un percënt lasceda pro.

(9)  Per bujëns mutivei y spezifics de defendura dl ambient y dla sanità dla persona possa l’Agenzia provinziela per l ambient 4)  pruibì o lascé pro l’adurvanza de cër combustibli sun l teritore dla provinzia de Bulsan.

(1)  L plann dla cualità dl’aria ndividuea i raions dl teritore provinziel te chël che i valores lim dla cualità dl’aria ie superei y stabilësc i pruvedimënc da adoté per pudëi garantì l respet de chisc valores. Te chisc raions vëniel aplicà programs de reduzion dla emiscions. L plann stabilësc oradechël i traverc n cont dla cualità dl’aria y la manieres d’aplicazion di pruvedimënc per i arjonjer.

(2)  L plann y i programs nunziei pra l coma 1 possa stabilì valores lim d’emiscion y prescrizions, nce liei ala cundizions de costruzion o d’eserzize di mplanc nunziei tla Pert I, plu rigurëusc de chëi stabilii aldò dl articul 3, a cundizion che chësc sibe de bujën per arjonjer i valores lim dla cualità dl’aria. 13)

(1)  La cualità dl’aria vën gestida y cuntroleda sun dut l teritore provinziel aldò de cie che ie stabilì dala despusizions europeiches y n basa a cie che ie udù danora dal regulamënt d’esecuzion sun la cualità dl’aria.

(2)  L regulamënt d’esecuzion nunzià tl coma 1 stabilësc chësc:

1. i valores lim dla cualità dl’aria;
   
2. la pruzedures per l cuntrol y la valutazion dla cualità dl’aria;
   
3. i criteres per lauré ora y apurvé l plann dla cualità dl’aria;
   
4. i criteres per l’adozion di programs de reduzion y de prevenzion dl mpaziamënt atmosferich;
   
5. i criteres per l’adozion di planns d’adozion sciche nce la sustanzes de mpaziamënt y de referimënt y i lims relatifs.
   

(3)  I planns d’azion nunziei tl coma 2, pustom e) vën laurei ora per smendrì l risch de superamënt di valores lim y per nen limité la dureda. Chisc planns possa udëi danora mesures de cuntrol y de suspenscion dl’ativiteies, nce per cie che reverda l trafich di auti, che porta pro a superé i valores lim o i lims d’alarm.

(4)  L’Agenzia provinziela per l ambient possa se damandé dai sogec che à la nfurmazions che ie de bujën duc i dac che i adrova per stabilì l cuntribut al mpaziamënt atmosferich tla funtanes d’emiscion defrëntes. 14)

(1)  Canche l transit tres la provinzia de Bulsan de veicui che trasporta marcanzia arjonj i valores lim de frecuenza y de ntensità a na moda da ne vester plu cumpatibli cun la cundizions dla segurëza dla zirculazion y dla mubiltà, dla defendura dl ambient, dla prutezion dla sanità publica y dla prutezion dl orden publich, tòl l Presidënt dla Provinzia, dò avëi audì i assessëures per la Sanità, per i Trasporc, per la Ndustria y per l Ambient, pruvedimënc de limitazion dl trafich per i veicui de trasport de marcanzia cun n decret aposta.

(2)  I criteres curespundënc vën fissei tl regulamënt d’escuzion.

(1)  La Provinzia autonoma de Bulsan possa istituì na tarifa de nuzeda per la ntreda y la zirculazion de veicui a motor sun stredes de si cumpetënza dedora dl luech abità, sun chëles che l vën a se l désostituidade gran flusc de trafich de veicui a motor y chësc nce mé ntan cër tëmps dl ann. La istituzion dla tarifa de nuzeda à l fin de garantì n trafich te cundizions de segurëza, de schivé che l raion nteressà vënie sëuraciarià dal trafich, de smendrì la cungestion dl trafich veiculer y de seguré na miëura defendura dl’aria dal mpaziamënt y na miëura prutezion dl ambient y dla cuntreda.

(2)  Sce l vën metù su na tarifa de nuzeda per la stredes o no depënd da:

1. la ndividuazion dla mesures per l miuramënt dla cundizions de zirculazion y dla segurëza dl trafich sciche nce per l smendrimënt dl mpaziamënt;
   
2. la ndividuazion dla prioriteies y di tiermui per l’atuazion dla mesures;
   
3. la ndividuazion dl lim mascim de trafich veiculer, uel dì, dl numer mascim de veicui a motor che daussa transité sun la streda o sun la pert de streda tl teritore.
   

(3)  Per la ndividuazion dl lim mascim de trafich lascià pro vëniel tenì cont de:

1. la carateristiches dla streda dal pont d’ududa funzionel y de costruzion;
   
2. la despunibltà di raions de paussa y dla plazes da parché publiches y privates sciche nce la tarifes curespundëntes, sce les ie ududes danora;
   
3. la grandëza y la puscibltà de se nuzé dl raion nteressà y la despunibltà de percursc auternatifs;
   
4. la despunibltà de servijes de trasport auternatifs y la sort de chisc servijes;
   
5. la presënza de raions de defendura dla natura o d’autra formes de defendura dl ambient y dla cuntreda.
   

(4)  Sce mëter su na tarifa de nuzeda per la stredes ne ie nia assé per mantenì l trafich ti lims de supurtanza stabilìi tl coma 3, tol la provinzia mo d’autra mesures aldò dl coma 2.

(5)  La tarifa de nuzeda per la ntreda y la zirculazion sun cërta stredes de cumpetënza provinziela vën metuda su dala Provinzia y ie

1. calculeda aldò dla nuzeda efetiva dla stredes sometudes a tarifa de nuzeda;
   
2. calculeda aldò dl’ëura, dl raion, dla modaliteies de passaje y aldò dl veicul adurvà.
   

(6)  L sistem de tarifa de nuzeda possa vester permanënt o temporer cun n priesc che muda ntan l di o tl tëmp d’aplicazion y l muessa se adaté l plu puscibl ai bujëns di nuzënc.

(7)  Delidei dala tarifa de nuzeda ie chisc veicui:

1. i veicui dla polizai y di servijes de sucors sciche nce i veicui che dejëuj servijes tl nteres publich;
   
2. i veicui che vën adurvei da persones che dejëuj na prufescion sozio-sanitera ntan l eserzize de si lëur;
   
3. la corieres dl servisc publich y veicui, senialei te na maniera adateda, cun persones che à na capazità de se muever limiteda o mancënta;
   
4. i veicui dla persones residëntes tl raion dla streda sometuda a tarifa de nuzeda o dla trata de streda sometuda a tarifa de nuzeda, y i veicui di patrons de bëns imuvibli y di cultivadëures de teraces te chësc raion;
   
5. i veicui de persones che lëura tl raion dla streda sometuda a tarifa de nuzeda o dla trata de streda sometuda a tarifa de nuzeda.
   

(8)  Tl bilanz provinziel vëniel destinà uni ann mesuns finanzieres che ie almanco ecuivalënc a chëi dla ntredes nunziedes te chësc articul per miuré la zirculazion sun la stredes tuchedes dal pruvedimënt, per defënder la sanità y l ambient sciche nce la cundizions de segurëza y, te na maniera particulera per:

1. miuré la sënta dla streda n cuestion, la njinies de prutezion y de senialazion dla stredes nteressedes, la plazes de paussa y da parché;
   
2. putenzië i servijes de trasport publich sun l teritore nteressà;
   
3. limité l trafich de veicui ti raions ambientalmënter sensibli;
   
4. tò pruvedimënc per la revalutazion y per la defendura dl ambient naturel ntëurvia.
   

(9)  La Jonta provinziela possa dé dant, nce mé per proa, na tarifa de nuzeda per la ntreda y la zirculazion sun cërta stredes de cumpetënza provinziela per pudëi relevé i dac n cont dl smendrimënt dl mpaziamënt. 15)

(1)  Duc chëi che ne respetea nia la prescrizions, la limitazions o la pruibizions dates dant tres i pruvedimënc stabilii aldò dl articul 11/bis o dl articul 19 dl decret dl Presidënt dla Republica di 22 de merz 1974, n. 381, y mudazions suzessives, ie sometui a na straufonga aministrativa dl paiamënt dla soma ududa danora dal articul 6, coma 14, dl decret legislatif di 30 d’auril 1992, n. 285, y mudazions suzessives.

(2)  La straufonghes aministratives nunziedes tl coma 1 vën dates dai sogec che dejëuj servijes de polizai dla stredes aldò dl articul 12 dl decret legislatif di 30 d’auril 1992, n. 285, y mudazions suzessives, y dal personal dla Provinzia autonoma de Bulsan.  16)

(1)  Per miuré la cualità dl’aria ti zëntri abitei dla provinzia y smendrì la emiscions de mpaziamënt atmosferich gaujedes da situazions de mpifamënt pesoch y slungià dl trafich sun la stredes stateles, provinzieles y cumeneles, possa la Provinzia sëurantò la cëries che se porta pro dal trasferimënt dl trafich di veicui sun cër trac dl’autostreda, tl lim di tëmps che ie assolutamënter de bujën.

(2)  Per atué i fins nunziei pra l coma 1, possa la Jonta provinziela stipulé cunvenzions cun i gestores dl’autostrada, do avëi audì i Chemuns diretamënter nteressei. La fazions sun l ambient y sun la viabiltà che vën a se l dé dal trasferimënt dl trafich di veicui vën valutedes dal’Agenzia provinziela per l ambient y la defendura dl clima y i resultac vën prejentei regulermënter ala Jonta provinziela.  17)

(1)  Lëures de lacadura a spriz daussa mé unì fac te mplanc de lacadura cun sistems d’aspirazion y de filtrazion adatei.

(2)  Tëuc ora da chësta pruibizion ie i lëures de realisazion y de dertureda de frabriches y de mplanc che ne possa nia unì tëuc adalerch.

(1) L ie pruibì brujé ala lergia material de derivazion vegetela, tlo leprò iel nce ratà restanzes vegeteles d’uni sort che se porta pro dal rumé prei, ciamps, ronesc y bosc.  19)

(2)  La pruibizion nunzieda tl coma 1 ne vën nia aplicheda te chisc caji:

1. brujé material de derivazion vegetela sun teraces ërc che ne ie nia da arjonjer cun mascins;
   
2. brujé plantes zidledes tuchedes da organisms danejënc de sort nfetiva, sce la nfezion ie zertificheda da na detlarazion relasceda dal servisc fito-saniter provinziel dla Repartizion 31 – Agricultura. Tl cajo de n cuntrol muessa chësc zertificat unì mustrà su;
   
3. brujé material vegetel pra proes contra l meldefuech da pert di studafuech;
   
4. mpië fuesc da ciamp, fuesc per griliedes y d’autri fuesc n ucajion de manifestazions tradiziuneles y usanzes, l resta a uni moda mpe la facultà dl chemun de regulé chësta ativiteies tl raion di zëntri abitei; 20)
   
5. brujé material de derivazion vegetela che ruva adum canche n ruma prei y pastures cun leresc dal prim de merz nchin ai 30 de juni d’uni ann, do che l ti ie unit fat al savëi al’autorità furestela cumpetënta. 21)
   

(3) L vën a uni moda lascià pro fuesc mpiei cun combustibli adatei tla cultures agricules per l sëul fin de schivé la jeledes. 22)

(1)  Per l’ativiteies che cumporta la produzion, la laurazion, la manipulazion, l trasport, l cuncé su, l ciarië o l desćiarië de sustanzes stuepëntes vëniel aplicà la despusizions dla njonta C, Pert II, zifres 20 y 21.

(2)  La Jonta provinziela dà ora diretives spezifiches per l cuntenimënt dla emiscions de sustanzes stuepëntes ti cantieres y sun la stredes d’azes respetives aldò dl nluegiamënt, dla dureda, dla sort y dla grandëza di cantieres o dla carateristiches tecniches di mplanc y dla mascins adurvedes. 23)

(1)  Pra i mplanc aldò dla njontes A y B, che possa gaujé n desturb per si stlet tof, iel debujën che l vënie tëut pruvedimënc adatei, tecnicamënter atuabli, per limité l puz.

(1)  I mplanc per l netamënt chimich de stofs y prudoc de pel muessa funzioné te n cërtl stlut.

(1)  I mplanc termics cun putënza termica numinela medema o mëndra de 35 chilowatt y alimentei a man cun combustibli solic ie da manejé a na maniera che la emiscions de mpaziamënt vënie arbassedes l plu puscibl.

(2)  I chemuns possa pruibì l eserzize di mplanc, che pervia de na si gestion fauza o nstalazion nia sciche l toca, gauja n mpedimënt grief ala igena publica.

(3)  Sce l teritore cumenel ie te na luegia ulache i valores dla cualità dl’aria ie plu auc che i valores lim nunziei tl articul 10 possa i chemuns stabilì manieres spezieles de funzionamënt di mplanc nunziei tl coma 10 y udëi danora criteres per la nstalazion de mplanc nueves.

(4)  La limitazions, la manieres y i criteres nunziei ti comes 1, 2 y 3 vën fissei cun regulamënt cumenel, do avëi audì la minonga dl’Agenzia provinziela per l ambient. 24)

(1)  La verdia sun l’aplicazion de chësta lege ti spieta ai funzioneres dl’Agenzia provinziela per l ambient 4)  che ie autorisei a chësc. Per cie che ie udù danora dala pertes II, III y IV de chësta lege ti spieta la verdia nce ai organns de cuntrol di chemuns. Per la pruibizions nunziedes tl articul 13 ti spieta la verdia nce ai organns de cuntrol dla Repartizion cumpetënta per i bosc y al corp di studafuech de prufescion.

(2)  I funzioneres nciariei di cuntroi ie liedesc d’azeder a duta la lueges, te chëles che i à da fé cuntroi.

(3) Restan mpe l’aplicazion dla straufonghes preududes dal articul 19, tl cajo de nia usservanza dla despusizions de chësta lege o dla prescrizions de carater tecnich preududes tla njonta C, passa l’autorità de verdia nunzieda te chësc articul, aldò dla grievëza dla nfrazions:

1. al amunimënt y la scrij dant n tiermul nchin chël che la iregulariteies muessa unì eliminedes;
   
2. al amunimënt y tl medemo tëmp la suspenscion temporera, sce l se manifestea situazions de pericul per la sanità publica o per l ambient;
   
3. ala revucheda dl'autorisazion tl cajo che l ne ie nia unit fat n adatamënt ala prescrizions cumandedes cun amunimënt y tl cajo dla repetizion dla viulazions che determinea situazions de pericul o dann per la sanità publica o per l ambient. 25)
   

(4)  26)

(5)  Contra la prescrizions dl’Agenzia provinziela per l ambient 4)  possel, tl tëmp de 30 dis, unì fat recurs pra la cumiscion ambientela 5)  aldò dl articul 12 dla lege provinziela di 24 de lugio 1998, n. 7, y mudazions suzessives.

(1)  La viulazion dla despusizions de chësta lege vën sanziuneda cun la straufonghes aministratives ududes danora te chësc articul. Tl cajo che l vën aplicà la straufonghes peneles ududes danora dala legislazion statela ne vëniel nia aplicà la straufonghes aministratives per la medema viulazion.

(2)  Chësta viulazions vën sanziunedes cun straufonghes aministratives:

1. chi che fej su n mplant zënza avëi tëut ite l arat nunzià tl articul 4 o chi che à metù a jì n mplant zënza l’autorisazions ududes danora dai articui 5 o 6 ie sometù a chësta straufonga aministrativa:
   
   1. per i mplanc nunziei tla njonta A: da euro 3.000,00 a euro 9.000,00;
      
   2. per i mplanc nunziei tla njonta B: da euro 1.000,00 a euro 3.000,00;
      
2. Chi che ne respetea nia, tl eserzize de n mplant, la despusizions nunziedes tl articul 3, chi che ativea n mplant nuef y ne respetea nia i tiermui y la prescrizions nunziedes ti articuli 5 o 6 y chi che ne respetea nia i tiermui nunziei tl articul 21, ie sometù a chësta straufonga aministrativa de scioldi: 27)
   
   1. per i mplanc nunziei tla njonta A, da euro 1.500,00 a euro 4,500,00;
      
   2. per i mplanc nunziei tla njonta B, da euro 500,00 a euro 1,500,00;
      
3. chi che se nuza de n combustibl nia autorisà aldò dl articul 8 ie sometù a chësta straufonghes aministratives:
   
   1. per i mplanc cun na putenzialità nchin 50 chilowatt: da euro 200,00 a euro 600,00.
      
   2. per i mplanc cun na putenzialità da 51 a 300 chilowatt: da euro 600,00 a euro 1.800,00.
      
   3. per i mplanc cun na putenzialità de plu che 300 chilowatt: da euro 1.800,00 a euro 5.400,00.
      
4. chi che ne se tën nia ala despusizions tla materia de cuntrol di fums nunziedes tl articul 7 ie sometui a na straufonga aministrativa da euro 100,00 a euro 300,00; 28)
   
5. chi che ne se tën nia a cie che ie stabilì dai articui 12, 14 y 15 ie sometù a na straufonga aministrativa da euro 500,00 a euro 1.500,00;
   
6. chi che ne se tën nia ala prescrizions nunziedes tl articul 18, coma 3, ie sometù a na straufonga aministrativa da euro 1.000,00 a euro 3.000,00. 29)
   

(1)  La lege provinziela di 4 de juni 1973, n. 12 ie abrogheda. 30)

(1)  I mplanc autorisei aldò dla lege provinziela di 4 de juni 1973, n. 12 che ne respetea nia i valores lim d’emiscion aldò dl articul 3 muessa unì adatei ala despusizions de chësta lege. Per chisc mplanc vëniel aplicà cie che ie udù danora dal articul 18, comes 3 y 4.

(2)  I/La gestëures di mplanc che toma tla categories dla njontes A y B y che ie unic realisei o autorisei dan i 12 d’auril 2000 muessa presenté na dumanda d’autorisazion ala emiscions te chisc lims de tëmp:

1. nchin ai 31 de dezëmber 2009 per i mplanc che ne à nia l’autorisazion aldò dla lege provinziela di 4 de juni 1973, n. 12;
   
2. nchin ai 31 de dezëmber 2012 per i mplanc aldò dla lege provinziela di 4 de juni 1973, n. 12.
   

(3)  Nchin al’apurvazion dla njonta D nunzieda tl articul 7 restel n forza l decret dl Presidënt dla Jonta provinziela di 15 de jené 1993, n. 2. 31)

(1)  La Jonta provinziela ajurnea, sostituësc y muda la njontes de chësta lege aldò dla cunescënzes scientifiches y dl prugres tecnologich, n presënza de fac y zircustanzes de prëscia y che ne ie nia da udëi danora, y n cunseguenza de mudazions dla despusizions comuniteres. 32)