a) Lege provinziala di 17 de forà dl 2000, n. 71)2) —
Ordinamënt nü dl comerz

(1)  Pro la Ciamena dl comerz, dl’industria, dl artejanat y dl’agricoltöra de Balsan él gnü metü sö l’assoziaziun di maestri profescionai de düc i seturs economics. L’iscriziun n’é nia obligatoria.

(2)  I compic dl’assoziaziun di maestri profescionai é:

1. promöie la conservaziun y le svilup dla formaziun de maester profescional;
   
2. promöie y gestí la formaziun profescionala de sü comëmbri;
   
3. renforzé la garanzia de cualité tles profesciuns de sü comëmbri;
   
4. gestí la rapresentanza di interesc profescionai ti seturs desvalis di comëmbri dl’assoziaziun di maestri profescionai;
   
5. informé i comëmbri dl’assoziaziun di maestri profescionai y le publich sön sües ativités y i argomënc che reverda l’ativité profescionala;
   
6. gestí na lista de maestri profescionai y tecnics dl comerz che fej pert de vigni setur economich; l'iscriziun vëgn fata sön domanda.
   

(3)  Por se scrí ite mësson:

1. avëi la zitadinanza taliana o la zitadinanza de n'ater stat mëmber dl’Uniun europeica;
   
2. avëi i dërc zivii;
   
3. avëi le titul de maester artejan/maestra artejana o de maester profescional/maestra profescionala tl setur dla hoteleria o le titul de tecnich/tecnica dl comerz aladô dles desposiziuns provinziales;
   
4. avëi la sënta legala dl’impresa o la residënza tla provinzia de Balsan;
   
5. ne avëi nia condanes por de gragn reac cuntra le stat o reac che danejëia l’afidabilité profescionala, sciöche la condana definitiva por reac che reverda la partezipaziun a assoziaziuns criminales, la coruziun, la trapolada, le reziclaje.
   

(4)  A ce dl’assoziaziun di maestri profescionai él n organ coleghial de consëi che tol na dezijiun aladô de so codesc disciplinar, sön l’adejiun de comëmbri nüs y l’esclujiun de comëmbri.  41)