(1) L' eserzize dl comerz sön sperses publiches é sotmetü al respet dles condiziuns de tëmp y de lerch stabilides dal comun dl teritore competënt.
(2) L'eserzize dl'ativité preodüda dal articul 17, coma 2, lëtra b), po ester oget de limitaziuns y proibiziuns por rajuns de trafich o de carater igienich - sanitar o por d’atres rajuns de interès o de ordinn publich. Te vigni caje mëss i provedimënć dles autoritês de segurëza publica competëntes gnì respetà.
(3) La dimenjiun intiera dles sperses destinades al eserzize dl comerz sön sperses publiches, sciöch’inće i criters de assegnaziun de n post, süa suraspersa y i criters d’assegnaziun dles sperses resservades ai paurs, singui o assozià, che eserzitëia la venüda de sü produć, vëgn stabilis dal comun n conformité cun les regoles dla Provinzia y tignin cunt dles prescriziuns eventuales di stromënć urbanistics. I posć, aladô dles usanzes y dles tradiziuns locales, po avëi na destinaziun spezifica de marćianzia por i seturs alimentars, de ortam y ordöra, guant y produć nia alimentars, che vincolëia i proprietars a vëne ma chëstes marćianzies. Chëstes sperses vëgn stabilides sön la basa dles carateristiches economiches dl teritore, dla densité dla rëi de destribuziun y dla capazité de domanda che an po preodëi da pert dla popolaziun residënta y nia residënta, por assiguré la miù funzionalité y produtivité dl sorvisc al consumadù, y n ecuiliber adeguè cun les istalaziuns comerziales cun n post fis y les atres formes de destribuziun che vëgn adorades, tut ite le setur di eserzizi publics.
(4) La conzesciun de n post à na dorada de diesc agn. La conzesciun de n post toma sce les normes sön le eserzize dl'ativité regolamentada da chësta lege ne vëgn nia respetades o sce le post ne vëgn nia adorè vigni ann solar por indöt passa dui mëisc, ater che tl caje de assënza por maratia, maternité o assistënza a na porsona che convir invalida o portadëssa de n ri handicap o partezipaziun a n ater marćé, dann mecanich o inzidënt cun so auto o caje de mort dl titolar. Al ne vëgn nia aratè sciöche manćianza dl’adoranza l'assënza ti dis olache al é preodü eventualmënter la presënza facoltativa, y a vigni moda ti mëisc de dezëmber, jenà y forà, sciöch’inće tles cater edemes de feries partides sö alplü te döes periodes. 31)
(5) Cun n preavis de almanco dodesc mëisc po la conzesciun de n post gnì revocada, zënza groaria a ćiaria dl'ënt che à revochè la conzesciun, por rajuns cumprovades de interès publich che comporta la restrotoraziun dl marćé. La conzesciun de n post y l’autorisaziun relativa vëgn revocades a chi che tla spezialisaziun de marćianzia interessada dal provedimënt à l’anzianité de frecuënza plü bassa, tignin cunt dl'anzianité de frecuënza di proprietars eventuai da denant. Sce al manćia d’atri posć vëgn la porsona, a chëra che al ti é gnü revocada la conzesciun, automaticamënter metüda al pröm post – tl caje de deplü porsones al post atira dedô – tla gradatöra dles porsones che s’à candidé por la conzesciun de n post. Tl caje de revocaziun dla conzesciun de n post por l'eserzize dl'ativité por de plü dis al’edema, à la porsona interessada le dërt de ciafè n’ater post tl teritore comunal. 32)
(5/bis) Le medemo soget iuridich ne po nia ester titolar o avëi de plü co cater conzesciuns de posć sön la medema fiera o marćé. Chësc limit vëgn alzè a sis sce le marćé o la fiera à de plü co 100 posć. 33)
(6) 34)
(7) L'istituziun, le funzionamënt, la sopresciun, le spostamënt dla data di marćià o dles fieres locales y les cutes por la conzesciun de n post vëgn stabilis dal comun tignin cunt dles regoles dla Provinzia.
(8) L'autorité por la sconanza di bëgns culturai y ambiëntai o i regolamënć dla polizia de comun individuëia les sperses che à n valur archeologich, storich, artistich y ambiëntal, olache l’eserzize dl comerz preodü da chësta lege ne vëgn nia consintì o po gnì consintì ma cun limitaziuns particolares. Te chësc ultimo caje é l’eserzize dl comerz sotmetü al nulla osta preventif dl'autorité por la sconanza di bëgns culturai y ambiëntai, che por ći che reverda le dé fora alimentars y boandes po ma gnì conzedü por les istalaziuns mobiles.
(9) Le eserzize dl comerz preodü da chësta lege ti aeroporć, tles staziuns y sön les autostrades é proibì zënza l’autorisaziun dl proprietar o manajadù.
L'art. 19, coma 4 é gnü naôta mudé dal art. 8, coma 1, lëtra a), punt 11 dla l.p. di 16 de merz dl 2012, n. 7, y spo dal art. 16, coma 2 dla l.p. di 19 de messè dl 2013, n. 11.
Le coma 5 é gnü sostituì dal art. 16 dla lege provinziala di 23 de lugio 2007, n. 6.
L'art. 19, coma 5/bis é gnü ajuntè dal art. 16, coma 3 dla l.p. di 19 de messè dl 2013, n. 11.
L'art. 19, coma 6 é gnü abroghè dal art. 8, coma 1, lëtra a), punt 12 dla l.p. di 16 de merz dl 2012, n. 7.