a) Lege provinziala di 17 de forà dl 2000, n. 71)2) —
Ordinamënt nü dl comerz

(1)  L'ativité revardënta l'istalaziun y l'eserzize de staziuns dal benzinn, tutes ite chëres sön les autostrades y superstrades, sciöch’inće chëres te stabilimënć, cantiers, magazinns y de medemo, destinades estlusivamënter a fà benzinn por i veicui dl’impreja, é sotmetüda al’autorisaziun. I comerzianć de staziuns dal benzinn a adoranza privata interna ne po nia zede benzinn a terzi, anfat a ći titul. 17) 

(2)  L'autorisaziun de istalaziun y de trasferimënt te n’atra localité, de mudaziun y de conzentraziun de staziuns dal benzinn sön le teritore provinzial vëgn relasciada dal assessur provinzial por le comerz, do avëi aldì le arat dl comun, y é sotmetüda estlusivamënter al’osservanza dles normes diretives decretades dala Junta provinziala, dles desposiziuns dl plann regoladù, dles desposiziuns fiscales, cuntra le me de füch, sön la segurëza sanitara, ambiëntala y stradala y dles desposiziuns por la sconanza di bëgns storics y artistics.

(3)  Les domandes vel sciöche azetades sce ares ne vëgn nia refusades anter 90 dis dala data de recioiüda. L'assessur provinzial por le comerz po anulè l'azetaziun che é gnüda a s’al dè cuntra la lege sce la porsona interessada ne se fistidiëia nia de mëte apost les manćianzes anter le termo fissé.

(3/bis)  I grossisć che laôra sön le teritore provinzial, che refornësc cun benzinn impreses cun contignidus mobii y staziuns dal benzinn por l’adoranza privata, cun laprò chëres dles aministraziuns publiches, mëss ti ortié vigni ann al’aministraziun provinziala la lista di benefiziars y dla cuantité fornida. 18)

(4)  Cun le regolamënt d’esecuziun de chësta lege vëgnel regolamentè tl detai chësc setur, dantadöt por ći che reverda les modalitês revardëntes la presentaziun dles domandes, le conferimënt y la revocaziun dl'autorisaziun. Le regolamënt d’esecuziun stabilësc i caji olache l'istalaziun de staziuns dal benzinn por adoranza privata interna é sotmetüda ma ala denunzia. Ala denunzia mëssel gnì injuntè la documentaziun preodüda dal coma 2. 19)