(1) La Junta provinziala regolamentëia la definiziun di organics dl personal ispetif, diretif y insegnant dles scores tl respet di criters di comesc 2, 3 y 4. Por garantì la continuité didatica dl personal insegnant prevëiga la Junta provinziala la dorada de de plü agn di provedimënć che reverda l'esenziun, l'adoranza, la delegaziun y le laûr a tëmp parzial dl personal insegnant y l'assegnaziun definitiva di posć. La Junta provinziala stabilësc inće i terminns por la presentaziun dles domandes por podëi stè demez n ann intier. 26)
(2) Por le sostëgn y l'integraziun de scolares y scolars cun handicap vëgnel conzedü na dotaziun de personal insegnant de sostëgn tla mosöra de un n insegnant vigni 100 scolares y scolars. La Junta provinziala stabilësc les condiziuns y i limić por les assunziuns dl personal insegnant de sostëgn cun contrat a tëmp determiné, inće desvian dal raport danter personal insegnant y scolares y scolars che vëgn odü danfora da chësc coma, sce tratan le decurs dl ann de scora vëgnel a se le dè la nezescité de sostignì scolares y scolars cun bojëgns educatifs particolars.
(3) La Junta provinziala definësc les modalitês y i criters por l'assegnaziun de personal insegnant cualifiché por scemplifiché l'inserimënt dles scolares y di scolars cun na situaziun de imigraziun doìa tl sistem formatif y por alisiré l'aprendimënt dl lingaz todësch, talian o ladin, por chël che al vëgn dantadöt tignì cunt dl bojëgn de alfabetisaziun.
(4)Tl cheder di organics dles scores pól gní tut sö, dlungia le personal cun n'abilitaziun al insegnamënt spezifica, ince personal insegnant che á n'abilitaziun al insegnamënt por d'atri degrá de scora, sce al á competënzes profescionales y didatiches adatades por insigné. Chësc sorvisc vëgn reconesciü por la cariera. Le personal insegnant a tëmp indeterminé mantëgn so incadramënt de paiamënt. La Junta provinziala stabilësc les diretives por le reconescimënt dles competënzes y por l'istituziun de catedres verticales. Canche al ti vëgn assegné le personal insegnant ales classes dla scora elementara ciara la direturia o le diretur dla scora da limité le numer dles insegnantes y di insegnanc tl consëi de classa por garantí n'impostaziun formativa globala. 27)
(5)Le personal insegnant che é gnü detlaré nia adaté al insegnamënt do l’azertamënt de dërt dl laur o de medejina dl laur, vëgn inciarié cun compic aministratifs tl cheder dl’aministraziun scolastica, aladô dl bojëgn organisatif dl’Aministraziun y dles indicaziuns de idoneité dl laur. Chësc vëgn fat tres le trasferimënt te n contingënt aposta despartí dal contingënt complessif dla Provinzia, da fá fora cun deliberaziun dla Junta provinziala. 28)
(6) Suraprò al personal assegné po les scores dla provinzia adorè mesi finanziars de so bilanz por stlüje jö, por periodes determinades, contrać d’esecuziun di laûrs cun porsones espertes de materies y ativitês nia obligatories. Insciö déssel gnì porte ite o porvè fora materies d’insegnamënt nöies o metodes inovatives, amplié y perfezionè l'oferta formativa o tignì cunt de bojëgns particolars lià a dificoltês particolares y al'inserimënt de scolares y scolars de families che é imigrades dan da püch. Les desposiziuns dades dant tl articul 17/ter dla lege provinziala di 31 d’agost dl 1974, n. 7, y mudaziun suandëntes resta impé. 29)
L'art. 15/bis, coma 1 é gnü mudé insciö dal art. 2, coma 1 dla l.p. di 26 de jenà dl 2015, n. 1.
L'art. 15/bis, coma 4 é gnü sostituí insciö dal art. 1, coma 3 dla l.p. di 20 de jügn dl 2016. n. 14.
L'art. 15/bis, coma 5 é gnü sostituí insciö dal art. 9, coma 1 dla l.p. di 22 de dezëmber dl 2016, n. 27.
L'art. 15/bis é gnü injuntè dal art. 3, coma 1, dla l.p. di 14 de merz dl 2008, n. 2.