b) Lege Provinziala di 17 de dezëmber dl 1998, n. 131)
Ordinamënt sön le frabiché abitatif alisiré 2)

(1)  La porsona benefiziada po renunzié te vigni momënt al alisirimënt por frabiché y damanè ch’al vëgnes tut demez le lian sozial dal’abitaziun a chëstes condiziuns:

1. tl caje de n imprëst zënza fić mëssera dè zoruch ala Provinzia na soma che corespogn al imprëst romagnënt y ai fić legai por l’imprëst romagnënt; i fić vëgn calcolà dal pröm dé de amortamënt dl imprëst aplican le tas de fit legal varënt tl momënt dla renunzia. La soma da paié ala Provinzia sciöche indenité por le lian sozial ne po nia ester mëndra co n terzo dl imprëst zënza fić che é gnü conzedü. Ti ultimi cater agn de dorada dl lian s’arbassa la soma d’indenité vigni ann de n cuinto dla soma nominada dessura;166)
2. tl caje de n imprëst a fić basc ne mëssel nia gnì paié inant i contribuć de fić y la porsona benefiziada mëss paié ala Provinzia na soma anfat ai contribuć de fić paià, mo te degun caje sura la soma di contribuć de fić por cin agn. Ti ultimi cater agn de dorada dl lian s’arbassa la soma d’indenité vigni ann de n cuinto dla soma nominada dessura;
3. tl caje de n contribut costant por diesc agn ne mëssel nia gnì paié inant i contribuć y la porsona benefiziada mëss paié ala Provinzia na soma anfat ai contribuć paià, mo te degun caje sura la soma de cin contribuć anuai. Ti ultimi cater agn de dorada dl lian s’arbassa la soma d’indenité vigni ann de n cuinto dla soma nominada dessura;
4. tl caje de n contribut de n iade tl pröm dezenn de dorada dl lian mëssel gnì dè derevers döta la soma. Tl secundo dezenn de lian mëssel gnì dè derevers por vigni ann ch’al manćia al compimënt dl vintejimo ann de dorada dl lian, n diejimo dl contribut de n iade. 167)168)

(2)  Sce sön la medema abitaziun resultëiel ester anotà tl liber fondiar de plü lians aladô dl articul 3 dla lege provinziala di 2 d’aurì 1962, nr. 4, remplazè dal articul 43 dla lege provinziala di 21 de novëmber 1983, nr. 45, remplazè dal articul 3 dla lege provinziala di 16 de novëmber 1988, nr. 47, mudé dal articul 3 dla lege provinziala di 20 de dezëmber 1993, nr. 27 tla verjiun che valô dan la jüda en forza de chësta lege, dà la renunzia al ultimo alisirimënt conzedü le dërt de straihé inće düć i lians anotà denant.169)