(1) Por azelerè ti comuns cun passa 10.000 abitanć la realisaziun di programs de costruziun dl IPFS preodüs dai articui 22 y 90, aplichëia l’IPFS, do avëi ciafè l’autorisaziun dala Junta provinziala, la prozedöra suandënta en desviaziun ales desposiziuns preodüdes dal articul 19 y suandënć dla lege provinziala di 11 d’agost dl 1997, n. 13:
- l’IPES chërda ite na gara por la cumpra de sperses fabricades o nia frabicades, adatades ala realisaziun de abitaziuns. Tla mosöra mascima dl 30 por cënt di programs preodüs dai articui 22 y 90 pol ester oget dla gara, ti pröms cin agn dala jüda en forza de chësta lege, inće abitaziuns bele fates sö. L’afidamënt vëgn fat tl respet di prinzips de economizité, efiziënza, imparzialité, parité de tratamënt, trasparënza y proporzionalité;
- l’aiudicaziun vëgn fata a bëgn dl pitadù che presentëia la miù oferta por ći che reverda l’ubicaziun, la dimenjiun, la sort de costruziun y le prisc, y che garantësc inće de ti surandè les abitaziuns te 24 mëisc dal’aiudicaziun al IPFS;
- sce les abitaziuns programades ess da gnì fates sö sön na spersa sön chëra che, sön la basa dles indicaziuns dl plann urbanistich comunal varënt, ne n’él nia conzedü da fà sö abitaziuns, o a vigni moda nia te chë mosöra, mëss le pitadù che tol pert ala gara preodüda dal coma 1, lëtra a) ajuntè l‘arat liënt sön l’idoneité urbanistica dla spersa. La comisciun urbanistica provinziala dà jö sön domanda dl pitadù - a öna cun le comun competënt a livel teritorial - n arat te 60 dis. Sce l’arat ne vëgn nia dè jö tl tëmp dit dessura, vëgnel aratè sciöche positif. Sce l’arat dl comun é positif deliberëia la Junta provinziala la mudaziun dl plann urbanistich.
(2) Les abitaziuns mëss ti corespogne al standard ćiasa clima B aladô dles diretives de aplicaziun dl articul 127, coma 5, dla lege provinziala di 11 d’agost dl 1997, n. 13, y mudaziuns suandëntes.
(3) Le prisc dles abitaziuns mëss ti corespogne ai criters fissà dala Junta provinziala y ne po a vigni moda nia jì sura le 25 por cënt dl valur convenzional preodü dal articul 7 fora. L’Ofize Sciazada dla Provinzia dà jö n arat sön la conformité dl prisc. Sce les abitaziuns ti corespogn aladô dles diretives de aplicaziun dl articul 127, coma 5, dla lege provinziala di 11 d’agost dl 1997, n. 13, y mudaziuns suandëntes, al standard ćiasa clima A, vëgn le prisc de cumpra alzè dl 5 por cënt dl valur convenzional. Le prisc di terac ti corespogn al’indenité de espropriaziun ti raiuns de espanjiun por les frabiches d’abitaziun preodüdes dal articul 7-quinquies, coma 3, dla lege provinziala di 15 d’aurì dl 1991, n. 10.
(4) Sce n comun ô fà sö les abitaziuns odüdes danfora tl program de costruziun preodü dal articul 90, él autorisé da apliché les desposiziuns por aprescè la realisaziun di programs de costruziun preodüdes te chësc articul.
(5) La Junta provinziala ti conzed al IPFS l’autorisaziuns preodüda dal coma 1 ma sce al ne vëgn nia stlüt jö la convenziun por l’individuaziun azelerada di raiuns abitatifs preodüda dal articul 87-bis. Do avëi ciafè le consëns dl comun competënt a livel raional po la prozedöra preodüda da coma 1 gnì daurida inće indipendentemënter dai passaji prozedurai preodüs dal articul 87-bis, comesc 1 y 2.
(6) Do avëi ciafè l’autorisaziun dala Junta provinziala, po la prozedöra preodüda dai comesc 1, 2 y 3 gnì atuada inće dales sozietês o dai ënć preodüs dal articul 2, coma 1, lëtra I), sce ai ciafa la inćiaria da realisé i programs de costruziun dala Junta provinziala.35)