(1) Tl caje de evënc ezezionai che porta pro a n gran desturb dl’economia, o de crisa finanziaria, sciöche ince te situaziuns de emergënza che vëgn da evënc ezezionai cun faziun sön le sistem economich provinzial, statal o internazional, é la junta provinziala autorisada da ti conzede ai operadus economics imprësć alisirá, sovenziuns, contribuc, sostëgns, contribuc sön i fic y aiüc finanziars y vantaji economics de vigni sort por integré süa licuidité y mantigní la situaziun de ocupaziun. Por chisc intervënc ne vëgnel nia apliché les desposiziuns preodüdes dal articul 2-bis.
(2) Tl respet de n’aplicabilité eventuala de mosöres temporanees compatibles cun l’articul 107, coma 3, lëtra b), dl contrat sön le funzionamënt dl’Uniun europeica, vëgnel conzedü i aiüc predüs da chësc articul tl respet dl regolamënt dl’UE sön i aiüc de stat varënc. Sce ares ne ademplësc nia les condiziuns preodüdes dal regolamënt (UE) n. 651/2014 dla Comisciun di 17 de jügn dl 2014, che detlarëia val’ categories de aiüc compatibli cun le marcé intern en aplicaziuns di articui 107 y 108 dl contrat, vëgn chëstes alisiraziuns conzedüdes sciöche aiüc «de minimis» en conformité cun le regolamënt (UE) n. 1407/2013 dla Comisciun di 18 de dezëmber dl 2013 sön l’aplicaziun di articui 107 y 108 dl contrat sön le funzionamënt dl’Uniun europeica sön i aiüc «de minimis» y en conformité al regolamënt (UE) n. 1408/2013 dla Comisciun di 18 de dezëmber dl 2013 sön l’aplicaziun di articui 107 y 108 dl contrat sön le funzionamënt dl’Uniun europeica sön i aiüc «de minimis» tl setur agricul, mudé cun le regolamënt (UE) n. 316/2019 dla Comisciun di 21 de forá dl 2019.
(3) La mosöra y les modalités de prozedöra por la conzesciun dles alisiraziuns vëgn stabilides cun criters spezifics aladô dl articul 2 dla lege provinziala di 22 d’otober dl 1993, n. 17, y mudaziuns suandëntes. 61)