a) Lege Provinziala di 21 de otober dl 1996, n. 211)
Ordinamënt forestal

(1)  La trasformaziun de bosch vëgn fata aladô dles prozedöres preodüdes dala lege provinziala di 10 de messé dl 1970, y mudaziuns suandëntes. Cun l’autorisaziun ala trasformaziun pól gní stabilí mosöres de compensaziun ecologiches adatades.  5)

(2) Che che trasformëia le bosch vëgn sotmetü a na straufunga aministrativa de 5,00 euro por vigni meter cuadrat plëgn o arondé de spersa trasformada, por n minimo te vigni caje de 62,00 euro. Che che ne se tëgn nia ales prescriziuns dades dant por la trasformaziun o ne realisëia nia les mosöres de compensaziun scrites dant, vëgn sotmetü a na straufunga aministrativa de 2,00 euro por vigni meter cuadrat plëgn o arondé de spersa trasformada, por n minimo te vigni caje de 62,00 euro. 6)

(3)  Sce la trasformaziun vëgn autorisada doprò vëgn la straufunga aministrativa arbassada dl 50 porcënt. 7)

(1)  Ti raiuns sotmetüs a n lian d’adoranza idrogeologich-forestales, ater co ti caji preodüs dal articul 103, coma 11 dla lege provinziala ’Raiun y contrada’ y dal articul 6, coma 3 dla lege provinziala di 21 d’otober dl 1996, n. 21, y mudaziuns suandëntes, autorisëia le diretur dl ispetorat forestal competënt a livel tertorial i laurs de movimënt dl grunt. L’autorisaziun pó contigní prescriziuns liëntes sön les modalités de esecuziun di laurs.  8)

(2)  Les prozedöres por dè fora l’autorisaziun indicada tl coma 1 vëgn regolades tl regolamënt d’esecuziun de chësta lege.9) 

(3)  La Junta provinziala fej fora ince aladô di articui 66 y 71 dla lege provinziala di 10 de messé dl 2018, n. 9, i pici intervënc y chi da na picia faziun idrogeologich-forestala por chi che al ne n’ó nia ester l’autorisaziun preodüda dal coma 1.   10)

(4)  Chi che fej laûrs zënza autorisaziun aladô dl coma 1 y aladô dl regolamënt d’esecuziun relatif o ne se tëgn nia ales prescriziuns scrites dant dal’autorité forestala aladô dles medemes normes é sotmetüs a na straufunga aministrativa de 2 euro por vigni meter cubich intier o na süa fraziun de material spostè; la straufunga minima é te vigni caje de 62 euro.11)

(5)  Sc’ara se trata de laûrs de avaliamënt é la porsona che comët la violaziun sotmetüda a na straufunga aministrativa de 1 euro por vigni meter cuadrat intier o na süa fraziun de spersa splanada o spostada; la straufunga minima é te vigni caje de 62 euro.11)

(6)  Por la determinaziun dl’amunta dles straufunghes aministratives preodüdes da chësc articul vëgnel tignì cunt dl valur mesan danter la cubatöra totala dl material ćiavè fora y la cubatöra dl material lascè jö, sce chësc material vëgn lascè jö anter le raiun de ćiavada y te vigni caje anter n rai de 50 metri dal post di laûrs.

(7)  Sce la ćiavada y/o la deponüda vëgn fates sön terac autorisà aladô dles normes varëntes o nia sotmetüs a lian d’adoranza, ne vëgnel nia apliché les straufunghes preodüdes da chësc articul por l’ativité autorisada.

(8)  Chi che ne fej nia i laûrs de reinverdimënt scrić dant é sotmetüs a na straufunga aministrativa de 1 euro por vigni meter cuadrat intier o na süa fraziun de spersa nia inverdida; la straufunga minima é te vigni caje de 62 euro. 11)

(9) 12)

(1)  Pro la prescriziun dles modalitês d’esecuziun di laûrs preodüs dai articui 5 y 6 pol gnì preodü de dè jö na cauziun sciöche garanzia de n’esecuziun regolara di laûrs.

(2)  Les modalitês por dè jö la cauziun sciöche inće i criters por determiné a tan ch’ara amunta vëgn stabilis tl regolamënt d’esecuziun de chësta lege.

(3)  Les autorisaziuns vel pornanche al vëgn dè jö la cauziun che alda laprò.

(4)  Sce l’autorisaziun fej referimënt ai laûrs por chi ch’al vëgn conzedü n contribut pol gnì tignì indô na pert dl contribut impede la cauziun. 13)

(1)  Por i grunć sotmetüs a lian d’adoranza, aladô dl articul 3, vëgn le tratamënt y la nuzaziun di bosć y dles pastöres, le runćiamënt y l’adoranza dles brüsces cun na funziun protetiva sciöche inće la presservaziun dla funziun de lerch vitala regolà plü avisa tl regolamënt d’esecuziun de chësta lege. Tla medema manira pol gnì stabilì normes che regolëia la funziun recreativa y soziala, sce l’eserzize de chësta ess da compromëte i fins aladô di articui 1 y 2.

(2)  Tignin cunt di dërć di proprietars di grunć vëgnel apliché por la racoiüda di produć secundars dl bosch les desposiziuns che é tles normes de lege speziales te chësta materia.

(1)  Sce pro l’esecuziun de laûrs y de utilisaziuns dl bosch ne vëgnel nia osservè les desposiziuns de chësta lege po le diretur dl ispetorat forestal competënt te chël raiun despone che i laûrs vëgnes atira sospenüs.

(2)  L’ordinn de sospenjiun di laûrs aladô dl coma 1 vëgn emanè cun n decret aposta che contëgn inće na descriziun dla situaziun constatada y al ti vëgn notifiché da n impiegat forestal ales porsones che à trasgredì la lege y a chëres responsables por solidarieté.

(3)  Sc’al ne vëgn nia osservè la desposiziun aladô dl coma 1 vëgn la straufunga aministrativa de scioldi por la violaziun dles desposiziuns relatives triplicada.

(1)  Chi che taia jö o danejëia lëgns o ti fej d’atri dagns al grunt o al suragrunt, cuntra les prescriziuns de chësta lege o de so regolamënt d’esecuziun, é sotmetüs a na straufunga aministrativa de scioldi tla mosöra de dui ćina a sis iadi le valur di lëgns taià jö o dl dann gaujé, cun n minim de 62 euro, tut fora a vigni moda l’oblianza de fà intervënć de coreziun o de recostituziun aladô dl articul 11.

(2)  Le personal forestal à la inćiaria de valuté le valur di lëgns taià o dl dann gaujé aladô dles normes y di criters stabilis dala Junta provinziala. 14)

(1)  Dlungia l’infliziun dles straufunghes aministratives de scioldi preodüdes da chësta lege por les violaziuns desvalies po le diretur dla Repartiziun provinziala Bosć fà recostituì la situaziun da denant o fà fà intervënć de coreziun aladô dles modalitês y di tëmps stabilis da d’ël, aladô di criters stabilis dala Junta provinziala.

(2)  Sce la situaziun da denant ne vëgn nia recostituida o sce al ne vëgn nia realisé i intervënć de coreziun, dà fora le diretur dla Repartiziun provinziala Bosć n ordinn de paiamënt a na moda che l’aministraziun provinziala se crüzies, impede che che é jü cuntra la lege de realisé a sües spëises i intervënć nia fać.

(3)  Sc’al ne vëgn nia paié la soma tl tëmp stabilì, spo vëgnel invié ia l’esecuziun forzada; les spëises dl prozedimënt é a spëises dl debitur tardì. 15)

(1)  Chi che ne respetëia nia les prescriziuns che é tl regolamënt d’esecuziun revardëntes le runćiamënt di ciüć, la coltivaziun dl bosch jonn y l’estraziun dl larié é sotmetüs a na straufunga aministrativa de 3 euro pro lëgn o ciüch; la straufunga minima é te vigni caje de 62 euro. 16)

(2)  Chi che ne respetëia nia les prescriziuns che é tl regolamënt d’esecuziun revardëntes la racoiüda de dascia y de d’atri produć secundars dl bosch é sotmetüs a na straufunga aministrativa de 62 euro. 16)

(2/bis)  Vigni porsona che s’anüza de n post de deponüda por le lignan cun n’asosta por rajuns comerziales, ciafa na sanziun aministrativa de 1.000,00 euro; la sanziun aministrativa de 500,00 euro ciafa che che lascia iló mascins, veicui, atrezadöres, materai che n’é nia lignan o bestiam, o che afitëia o dá en locaziun chësta strotöra. 17)

(3)  Por la violaziun dles prescriziuns contignides te chësta lege o te so regolamënt d’esecuziun por chëres ch’al n’é nia espressivamënter preodü na straufunga aministrativa, vëgnel apliché chëra de 62 euro.16)

(1)  I laûrs de sistemaziun dl’ega tl raiun forestal, agrar y dles pastöres, les mosöres de costruziun por la sconanza dai dagns che vëgn dala situaziun particolara di posć, les mosöres de costruziun por la realisaziun de infrastrotöres por mantignì y adorè cun respet le terac, les mosöres de costruziun por la viabilité tl raiun forestal, agrar y da munt, les mosöres por scombate i parassić y les maraties di lëgns te bosch y l’acuisiziun di mesi che va debojëgn por fà chësc vëgn eseguis dala Repartiziun provinziala Bosć y dai ispetorać sot a d’ëra, do avëi ciafè l’autorisaziun da pert dla Junta provinziala y tl cheder di mesi finanziars a desposiziun. Al ne vëgn nia aziché les competënzes spezifiches dl’aziënda speziala por la sconanza dl terac, por i rüs da munt y les lovines sciöche gnanca dl’aziënda provinziala bosć y demane.

(1/bis)  La proietaziun di laurs en economia vëgn a s'al dé tres i ispetorac forestai competënc ti raiuns o i ofizi zentrai dla Repartiziun provinziala Bosć. 54)

(1/ter)  Le diretur d'ofize respetif é datur de laur ince aladô dla normativa sön la segurëza sön le laur. Al desponn di mesi de laur corespognënc y dl'adoranza dl personal por l'esecuziun di laurs. Al surantol instës la direziun di laurs o ti deleghëia chësta funziun a n colaboradú dla Repartiziun provinziala Bosć che é incadré te n profil profescional che prevëiga chësta inciaria. 55)

(1/quater)  Le diretur di laurs, sciöche responsabl unich dl prozedimënt, se crüzia da tigní la contabilité dl cantier, surandé les inciaries che é debojëgn por l'esecuziun di laurs, atesté l'esecuziun regolara dles fornidöres y di sorvisc sciöche ince da ortié inant les fatures y les ores de laur fates. 56)

(2)  I intervënć dà dant tl coma 1 vel inće por i raiuns da munt aladô dla lege di 25 de lugio 1952, nr. 991, y mudaziuns y integraziuns suandëntes, y vëgn de regola fać en economia; por i laûrs, les acuisiziuns y i sorvisc che la Repartiziun provinziala Bosć fej en economia vel sambëgn inant les desposiziuns respetives de chësc setur spezifich, zënza aziché les desposiziuns sön l’esecuziun di laûrs publics aladô dla lege varënta.

(3)  Por la realisaziun di laûrs y dantadöt por les infrastrotöres aladô dl articul 32 se damana l’aministraziun provinziala la desponibilité lëdia dl grunt che va debojëgn por l’esecuziun di laûrs. I proprietars di grunć interessà dà so consëns cun la detlaraziun de sotmisciun. Le model por n te’ documënt vëgn stabilì tl regolamënt d’esecuziun de chësta lege.

(1) Pro i laûrs da eseguì aladô dl articul 31 âldel:

• a) i laûrs de sistemaziun dl’ega tl raiun forestal cun:
  
  • 1) mosöres por n deflus idrogeologich regolar;
    
  • 2) laûrs de defenüda vegetala por consolidé tëmples che va en roa;
    
  • 3) le remboscamënt de tëmples bludres sciöche inće la recostituziun y le mioramënt di bosć por rajuns de proteziun dl grunt;
    
• b) i laûrs de sistemaziun dl’ega tl raiun agrar y dles pastöres;
  
• c) sistemaziuns por stabilisé y mantignì i grunć agrars y les pastöres che é sogeć a erojiun;
  
• d) la defenüda dai dagns che vëgn dala situaziun particolara di posć;
  
• e) l’implant y la gestiun de vivà de lëgns, la racoiüda, la produziun y la conservaziun de somënzes y pices plantes de lëgns ćiamò da sentè fora;
  
• f) la proteziun dl bosch y dles plantes dl bosch da dagns biotics y abiotics;
  
• g) la viabilité nezesciara tl setur dl’economia forestala, agrara y dl’economia da munt por realisé costruziuns aladô de chësc articul y por la gestiun de grunć agricoi, de bosć, de munts, de infrastrotöres y dl demane forestal;
  
• h) le pröm aiüt do avenimënc meteorics ezezionai o catastrofes naturales por arjigné ca strades d’azes ales surasperses danajades, sciöche ince tó y jí cun i dagns ales costruziuns aladô de chësc articul;  57)
  
• i) la recostituziun, le mioramënt y le tratamënt di bosć y dl demane forestal cun les mosöres liades laprò sciöch’al é preodü tla lege provinziala di 17 d’otober 1981, nr. 28;
  
• l) la costruziun, la manutenziun y la recostituziun di frabicać y dles bercstots por l’aministraziun dl demane forestal aladô dla lege provinziala di 17 d’otober 1981, nr. 28;
  
• k) les operes y i intervënc por ressané i ambiënc naturai danajá, sciöche ince la cura y manutenziun dla contrada culturala, cun lapró les infrastrotöres por la proteziun di tlaps por schivé dagns gaujá da de gragn predaturs, sciöche ince la realisaziun y manutenziun de sëmenes, percursc d’interes naturalistich y infrastrotöres somiëntes, cun lapró i azessurs.  58)
  

(2) Tl caje de n intervënt aladô dl coma 1, lëtra h), scrî fora n funzionar dla Repartiziun provinziala Bosć n verbal olach’al vëgn descrit en cört i dagns gaujà y sües conseguënzes, sciöche inće co ch’an po fà por i mëte indô a post dan inće dant les spëises che jarà debojëgn por fà chësc. Le diretur dla Repartiziun provinziala Bosć desponn le mëteman di laûrs y stabilësc inće sciöche chisc mëss gnì fać, do avëi ciafè l’autorisaziun dal assessur competënt. Les mosöres nominades dessura po inće gnì realisades sciöche laûrs definitifs sc’ai é a miù prisc o ademplësc deplü l’interès publich. 

(3) Sön domanda dl diretur dl ispetorat forestal competënt te chël raiun po la Junta provinziala ti dè l’autorisaziun a d’ël da eseguì i laûrs do l’articul 50, coma 1, en economia. Chësta autorisaziun corespogn ala detlaraziun che i laûrs é de ütl publich, d’urgënza y nia da podëi sburlé. Por gnì aprovà mëssi estlusivamënter ester dotà dl arat aladô dl articul 1 dla lege provinziala di 19 de novëmber 1993, nr. 23.

(4)  Por düc i proiec de realisaziun di laurs, de mosöres de costruziun y de intervënc preodüs dal coma 1 ól ma ester n arat tecnich-economich preventif dla comisciun tecnica preodüda dal articul 2 dla lege provinziala di 19 de novëmber dl 1993, nr. 23 y l’arat dé jö aladô dl articul 69/bis dla lege provinziala di 10 de messé dl 2018, n. 9. Denant co mëte man i laurs ti mëssel gní mené al comun competënt te chël raiun na copia dl proiet. 59) 

(5) I laûrs en economia aladô de chësc articul po gnì fać dala Repartiziun provinziala Bosć, dala Repartiziun provinziala por les eghes publiches y les costruziuns idrauliches aladô dla lege provinziala di 12 de lugio 1975, nr. 35, y mudaziuns y integraziuns suandëntes.

(6) Aladô dla sort d’intervënt y dl interès publich por ći che reverda la realisaziun dla costruziun vëgn i laûrs eseguis deplëgn a ćiaria dl’aministraziun provinziala o cun la partezipaziun finanziara di usufruënć.

(7)  I criters y les prioritês di intervënć aladô dl coma 5, vëgn stabilis dala Junta provinziala. 60)

(1)  Sc’al esist les condiziuns che se damana n intervënt diret por garantì i fins de chësta lege po l’assessur provinzial por i bosć, sön domanda dl interessè, autorisé la Repartiziun provinziala Bosć, en concordanza cun sü programs, da eseguì laûrs en economia che vëgn finanzià daldöt o inće ma en pert da d’atri sc’ai alda pro les sorts d’intervënt aladô de chësta norma.

(2) Do che i laurs preodüs dal coma 1 é gnüs fac ti vëgn chisc metüs en cunt al comitënt.   61)

(3)  Sce la Junta provinziala conzed n contribut por intervënc aladô de chësta lege pó i benefiziá ti dé jö le contribut ala Repartiziun provinziala Bosć che fej spo i laurs en economia.  62) 

(1)  Por i comuns fej l'ombolt competënt te chël raiun, do na deliberaziun corespognënta dla Junta de comun, domanda d'esecuziun di laurs y dles mosöres de costruziun aladô di articui 19, 31, 32 y 33 y al ti surandá l'inciaria ala Repartiziun provinziala Bosć.

(2)  Por i atri ënc publics vëgn la domanda y la surandada dl'inciaria preodüdes dal coma 1 fates dal rapresentant legal respetif. 63)

(1)  L’Agenzia Demane provinzial atuëia en economia por la Repartiziun provinziala Bosć i proiec laurá fora y autorisá da chësta Repartiziun. Por chësc fin adorera les strotöres dla Repartiziun y ciafa i contribuc relatifs. Ala Repartiziun ti spetel inant le control sura la realisaziun legitima di proiec. 64)

(1)  La Repartiziun provinziala Bosć fistidiëia dla proietaziun dles mosöres de costruziun aladô dl articul 31 sciöche inće dles mosoraziuns topografiches che va eventualmënter debojëgn por l’esecuziun di laûrs.

(2)  Les mosoraziuns topografiches por stabilì i confins y por scrì ite dedô i dërć de proprieté tl liber fondiar po inće ti gnì afidades a profescionisć lëdi che é scrić ite tles listes profescionales corespognëntes.

(3)  De regola é i proieć por les mosöres de costruziun aladô dl coma 1, metüs adöm da:

1. na relaziun tecnica;
2. na corografia y na planimetria;
3. na calcolaziun generala y n preventif dles spëises;
4. dessëgns generai por les infrastrotöres;
5. na detlaraziun cuntrafirmada dai proprietars dl grunt sön la desponibilité di toć de grunt che va debojëgn por l’esecuziun di laûrs;
6. listes di toć de grunt tocà dai intervënć don dan les parzeles de terac y les sperses totales o parziales.

(4)  Tratan che le laûr vëgn realisé po le diretur di laûrs, tl cheder dla ligna diretiva dl proiet y dles spëises totales aprovades, fà eventualmënter mudaziuns cuantitatives y cualitatives por arjunje i fins preodüs; chëstes mudaziuns mëss denant gnì autorisades dal diretur dla Repartiziun provinziala Bosć sc’ares va sura le 15 porcënt. Sce chëstes mudaziuns comporta variaziuns che va sura le 20 porcënt fora y va cuntra les prescriziuns dades, mëss le diretur di laûrs te vigni caje presentè na varianta dl proiet che mëss gnì aprovada dai medemi organns che ê competënć por le proiet da denant.

(5)  La colaudaziun di laûrs fać vëgn fata aladô dles normes varëntes te chësta materia.

(1)  L’aprovaziun da pert dla Junta provinziala di proieć esecutifs di laûrs aladô dl articul 31 vel por dötes les faziuns de lege sciöche detlaraziun che les mosöres de costruziun é de ütl publich, de prescia y nia da podëi sburlé.

(2)  Sce por la realisaziun de laûrs de gran interès publich por i fins aladô di articui 31 y 32 de chësta lege él indespensabl, po l’aministraziun provinziala esproprié o comanè l’ocupaziun de prescia di grunć relatifs aladô dles modalitês y dles prozedöres y inće sön na indenisaziun, sciöch’al é preodü tles normes de lege te chësta materia.

(1)  Sc’al vëgn odü ite la nezescité de sistemé grunć de pastöra o de limité dassënn l’adoranza de toć de grunt cun lian d’adoranza tl interès publich cun n gran svantaje por i proprietars di grunć po le Presidënt dla Junta provinziala, sön proposta dl diretur dla Repartiziun provinziala Bosć, ti comanè ai proprietars di grunć de sospëne l’adoranza de chisc por alplü vint agn o inće de passè al’ocupaziun temporana di grunć por realisé i laûrs che va debojëgn.

(2)  Ai proprietars di grunć che é sotmetüs ales prescriziuns aladô dl coma 1 ti pol gnì conzedü na indenisaziun anuala fissa che vëgn stabilida dal assessur provinzial por i bosć, tignin cunt di criters por determiné chësta indenisaziun stabilida cun deliberaziun dla Junta provinziala. 68)

(3)  La indenisaziun ti speta al proprietar dl grunt da canch’al ti vëgn scrit dant la prescriziun aladô dl coma 1 ćina che le tòch de grunt ti vëgn dè derevers, do che i laûrs é gnüs colaudà.

(1)  Do che i laûrs por realisé n proiet determiné é gnüs rovà y é stà colaudà vëgn i tòć de grunt relatifs y de regola les costruziuns, surandà ai proprietars che mëss se tignì ales normes dades dant tl articul 41.

(2)  Les modalitês por ći che reverda la surandada aladô dl coma 1 vëgn regolades tl regolamënt d’esecuziun da chësta lege.

(1)  Grunć remboscà y sistemà ne po no gnì vardà jö no coltivà.

(2)  Sc’al ne vëgn nia respetè la proibiziun aladô dl coma 1 vëgnel fat na straufunga aministrativa de 25 euro por vigni ćioura o ćiaval y de 13 euro por vigni armënt, biscia o porcel; la straufunga minima é te vigni caje de 62 euro. Sc’al vëgn violè l’articul 10 vëgnel apliché les straufunghes che é ilò preodüdes, tan inant ch’ares é maius. 69)

(3)  Le proprietar di grunc sistemá y remboscá mëss i lauré aladô dl articul 1 y se cruzié dla manutenziun ordinara dles operes. 70)

(4)  I patruns mëss se cruzié sciöche al alda dla dërta manutenziun ordinara dles strades de coliamënt cun les munt y dles strades forestales, sciöche ince dantadöt dla dejota dles eghes. Sce al mancia les acordanzes danter i patruns dles strades vëgn les spëises partides sö aladô dla porcentuala dl tru de portignënza de vigni patrun. Sce al ne vëgn nia fat assá manutenziun ordinara mëss le patrun che ne la fej nia paié na straufunga aministrativa da 50 a 500 euro. Sce al vëgn a se le dé dagns porvia dla mancianza de manutenziun ordinara vëgn la straufunga aministrativa triplicada.  71)

(5)  Sce chëstes oblianzes aladô dl coma 3 ne vëgn nia respetades vëgnel fat na straufunga aministrativa de almanco 62 euro y de alplü 622 euro. 69)

(6)  72)

(1)  Por garantì i fins preodüs dal articul 1 po la Provinzia, i comuns, d’atri ënć y i proprietars privać, inće metüs adöm te consorc eseguì, inće deboriada, laûrs de remboscamënt di grunć cun lian d’adoranza y de recostituziun dl bosch y inće curé le bosch en general se tignin ales modalitês scrites dant dala Repartiziun provinziala Bosć.

(2)  La proietaziun, la direziun di laûrs y süa esecuziun ti po gnì surandades ala Repartiziun provinziala Bosć che po i surantó aladô di articui 31 y 32, sc’al é n interès publich.

(3)  Sce l’aministraziun provinziala le vëiga ite spo pora mëte a desposiziun debann les somënzes y les plantes che va debojëgn o inće conzede i contribuć preodüs.

(1)  Tut fora ći che vëgn preodü atramënter da chësta lege vëgn la regolamentaziun por la presentaziun dla domanda por la conzesciun di contribuć sciöche inće les modalitês, i criters y les oblianzes che alda laprò regolà da chisc articui.

(1)  Les domandes por ciafè i alisirimënć aladô de chësta lege ti vëgn adressades ala Junta provinziala y ti vëgn presentades ala Repartiziun provinziala Bosć.

(2)  Les modalitês por ći che reverda la presentaziun dles domandes aladô dl coma 1 y i documënć da injuntè vëgn stabilis te na zircolara dl diretur dla Repartiziun provinziala Bosć, tignin cunt dles carateristiches di intervënć singui.

(1)  La licuidaziun di alisirimënć preodüs da chësta seziun vëgn fata sön la basa dla presentaziun di documënć cun chi ch’al vëgn cumprovè l’esecuziun regolara di laûrs da pert di direturs d’ofize competënć o di funzionars inćiarià aladô dles normes provinziales varëntes.

(2)  Sce les spëises constatades é mëndres co i costimënć reconesciüs vëgn i alisirimënć paià fora en proporziun ala reduziun.

(1)  Por investiziuns y ativitês finanziades aladô de chësta lege pol gnì paié antizipaziuns y acunć ćina al cincanta porcënt dl contribut conzedü o acunć en proporziun ai laûrs bele fać y constatà dai funzionars competënć dl’aministraziun provinziala; al vëgn stabilì n terminn mascimal por le mëteman di laûrs o por l’esecuziun di laûrs finanzià.

(2)  Sce les investiziuns y les ativitês finanziades ne vëgn nia realisades mëss i benefizià paié derevers les somes bele paiades fora cun laprò i fić, aladô dla spana de scunt ofiziala.

(3)  La restituziun mëss gnì fata anter 60 dis da canch’al é gnü ciafè la domanda tres lëtra racomanada cun recioiüda derevers.

(4)  Sce la restituziun ne vëgn nia fata anter le tëmp dè dant, vëgn chi scioldi trać ite cun les prozedöres odüdes danfora dal decret dl Presidënt dla Republica di 28 de jenà 1988, nr. 43.

(5)  Implü, ćina che i scioldi n’é nia gnüs recuperà deplëgn, ne vëgnel paié plü degügn contribuć dla Provinzia ai debiturs tardis.

(1)  Sce les investiziuns finanziades vëgn destinades por valch d’ater, mëss i benefizià dè zoruch les somes cun i fić laprò, aladô dl articul 46 y plü avisa da chël momënt incà da canch’al é gnü mudé la destinaziun d’adoranza ćina al ann por chël che le lian de destinaziun é scrit dant.

(2)  La destinaziun dles investiziuns finanziades mëss gnì mantignida por almanco chinesc agn por bëgns imobii y por cin agn por bëgns mobii. 73)

(3)  Por gauja de forzes plü alalt pol gnì fat fora sön domanda ch’al vëgnes mudé destinaziun cun fins agricoi, forestai, agrituristics y artejanai, sc’ai vëgn realisà tla medema aziënda agricola.

(1)  L’aministraziun provinziala pó conzede contribuc cina al 100 porcënt dles spëises reconesciüdes amissibles por intervënc por la selvicoltöra, sciöche le remboscamënt, la cura di bosć de vigni sort, i intervënc fito-sanitars y d’atri intervënc sön i bosć, cun lapró chi por la prevenziun di dagns da tiers salvari, da medefüch y da d’atres catastrofes naturales, a pert i laurs che alda lapró. I contribuc vëgn paiá fora por i laurs fac veramënter y sön la basa di prisc unitars che resultëia dai verbai de control.  74)

(2)  Por i bojëgns preodüs dal coma 1, po l’aministraziun provinziala conzede contribuć ćina a alplü le 40 porcënt dles spëises reconesciüdes por investimënć, che reverda la modernisaziun dl parch por mascinns por adorè le lignan, le menè y süa pröma lauraziun. 75)

(3) Ajache al é tan n gran interes da pert dla jënt por mantigní la bona condiziun de sanité di bosć, süa stabilité y vitalité, pó l’aministraziun provinziala conzede contribuc aladô dla regola “de minimis” aladô dl regolamënt (UE) n. 1407/2013 dla Comisciun di 18 de dezëmber dl 2013, por i intervënc preodüs dal coma 1 sön la prevenziun dla difujiun di dagns da parassic y la cura di bosć te na fasa jona, por garantí süa stabilité y resistënza ai agenc esterns, che sides gnüs stlüc jö y por chi che al vëgn fat domanda cina ai 31 de dezëmber dl 2020.  76)

(4)  I contribuc preodüs dal coma 3 vëgn paiá fora aladô dles modalités preodüdes dal coma 1, do che l’autoritá forestala competënta á confermé che i laurs é gnüs fac y stlüc jö sciöche al alda.  77)

(1)  Sciöche mosöra ativa por la sconanza dl clima vëgnel metü sö pro la Repartiziun provinziala Bosć le fonds por les costruziuns de lëgn por promöie l’adoranza dl lëgn sciöche material da costruziun che acumulëia l'anidrida de carbonium y por sostituí tl medemo tëmp i materiai da frabiché cun na gran emisciun de anidrida de carbonium.

(2)  Le fonds vëgn metü sö por le tëmp dal 2023 al 2030 y vigni ann vëgnel stanzié 1.200.000 euro. Vigni ann vëgnel scrit fora na bandida por surandé les ressurses finanziaries. La seleziun di proiec y la determinaziun dla soma di contribuc vëgn surantutes da na comisciun de esperc nominada aposta. La presentaziun dles domandes ne dá nia le dërt da ti rové pormez diretamënter ales ressurses finanziaries dl fonds, ajache ara se trata de n program de promoziun por la sconanza dl clima fat tres n concurs por proiec sostignibli.

(3)  Al vëgn promoiü la realisaziun de frabicac y operes de adoranza publica realisá ma o dantadöt cun lëgn zertifiché che vëgn da bosć coltivá a na moda sostignibla te n rai de 500 km.

(4)  Al fonds ti pól pormez i ënc teritoriai publics, sciöche i comuns, les comunités comprensoriales, les aministraziuns despartides di bëgns de adoranza zivica y somiënc. Al é stlüt fora la Provinzia autonoma de Balsan y sü ënc stromentai.

(5)  La Junta provinziala determinëia i criters por s’anuzé dles ressurses finanziares dl fonds.  78)

(1)  L’aministraziun provinziala po conzede contribuć ćina al setanta porcënt dles spëises reconesciüdes por l'atuaziun de dötes les operes, les mosöres y i sorvisc che va debojëgn por mantignì y miorè la gestiun dles munts, sciöche inće por mantignì y recuperè ambiënć y raiuns de interès naturalistich, de paesajistich o storich-cultural particolar.

(2)  Cun les operes, les mosöres y i sorvisc preodüs dal coma 1, mìnon la costruziun, la sistemaziun y l’adatamënt dles infrastrotöres che reverda i azessurs, la costruziun y la sistemaziun dles infrastrotöres por le alojamënt dl personal y dl bestiam, le refornimënt d’ega por le personal y le bestiam, les infrastrotöres por la abinada y la desgorta dles eghes pazes y dles escreziuns de tiers, la realisaziun y la sistemaziun de sis por la delimitaziun dles pastöres, sciöche inće la separaziun dl bosch dala pastöra, i mioramënć dl terac da munt, sciöche inće les infrastrotöres por la trasformaziun y la conservaziun di produć.

(3)  I contribuć ti po gnì conzedüs ai patruns y, do avëi ciafè so consëns, ai afitadins y a d’atri gesturs, de munts de proprieté publica o privata, che ai gestësc dasusc o deboriada cun d’atri.

(4)  Ti raiuns tlassificà da munt aladô dles normes varëntes y ti raiuns rurai pol ti gnì conzedü ales aziëndes agricoles contribuć por la realisaziun dles infrastrotöres d’azès, sciöche strades y furnadoies. Al vëgn conzedü contribuć ćina al 80 porcënt dla spëisa reconesciüda amissibla por la costruziun, la sistemaziun, l’adatamënt, le funz dla rëi de trus rurai y le refornimënt d’ega da bëre y da destodé i füć. Te raiuns dassënn dejavantajà dal punt de odüda sozio-economich o idrogeologich podarà les porcentuales di contribuć gnì alzades a na manira adatada, ćina ala curida totala dla spëisa reconesciüda amissibla.

(5)  Por la costruziun, l’ampliamënt y le ressanamënt dles infrastrotöres por mëte mascinns agricoles y forestales pol gnì conzedü contribuć ćina al 60 porcënt dla spëisa reconesciüda amissibla. 79)

(1)  L’aministraziun provinziala po ti conzede ai comuns, ales aministraziuns despartides dles rajuns de vijinanza, ales cooperatives, ai consorc, a d’atres assoziaziuns y a porsones privates, contribuć ćina al 70 porcënt dles spëises reconesciüdes amissibles eliminé i dagns a imobii o infrastrotöres de carater dantadöt agrar o forestal, gaujà da catastrofes naturales, sciöche tremoroc, lovines, roes y agajuns.

(2)  L’import mascim vëgn stabilì cun deliberaziun dla Junta provinziala, y po gnì revaluté dala medema en conscidraziun dl incremënt dl cost dla vita aladô dl'indesc ISTAT. I contribuć vëgn paià fora por i laûrs fać veramënter y sön la basa di prisc unitars che resultëia dai verbai de azertamënt.80)

(1)  Le sorvisc forestal dla Provinzia é metü adöm:

1. dala direziun dla Repartiziun forestala Bosć cun zircoscriziun provinziala;
2. dai ofizi zentrai cun competënzes spezifiches y cun zircoscriziun provinziala;
3. dai ispetorać forestai cun zircoscriziun intercomunala;
4. dal’aziënda provinziala bosć y demane;
5. dales staziuns forestales, sciöche unitês operatives di ispetorać forestai y dl’aziënda provinziala bosć y demane;
6. 82)
7. dai ofizi por le control dla ćiacia y dla pëscia.

(2)  Le numer, la denominaziun y les competënzes di ofizi zentrai y periferics vëgn determinà dales normes respetives dla Provinzia.

(3) Cun regolamënt d’esecuziun de chësta lege vëgnel stabilì le numer, la denominaziun y les competënzes dles staziuns forestales y di sorvisc de control dla ćiacia y dla pëscia. 83)

(1)  Al personal dla Provinzia che laora pro la Repartiziun provinziala Bosć y che à n profil profescional che corespogn ales funziuns dl personal dl Corp forestal statal ti vëgnel atribuì les funziuns de funzionar dla segurëza publica sciöche inće de ofizier o agënt de polizia iudiziara aladô dles deposiziuns relatives.

(2) Le personal dè dant tl coma 1, a chël ch’al ti é atribuì la funziun de agënt de segurëza publica, é autorisé a portè l’erma de sorvisc.

(1)  Ala Repartiziun provinziala Bosć ti spétel la verda sön döta l’ativité forestala y da munt a livel provinzial sciöche inće le control y la coordinaziun dl’ativité di ofizi zentrai y di ispetorać dla forestala.

(2)  I ispetorać dla forestala y l’aziënda provinziala bosć y demane é strotöres operatives dla Repartiziun forestala Bosć y vëgn sostignides dales staziuns forestales y dales zircoscriziuns de verda sön i bosć, sce la sort dles inćiaries se damana n’organisaziun raionala plü detaiada.

(3)  Tl ćiamp de sües zircoscriziuns é i direturs dla Repartiziun provinziala Bosć, di ispetorać forestai y di ofizi zentrai, sciöche inće le diretur dl’aziënda provinziala bosć y demane i surastanć direć de döt le personal assegné ai sorvisc de chël raiun.

(4)  Le diretur dla Repartiziun provinziala Bosć o na porsona da d’ël delegada sostituësc le diretur dl ispetorat forestal competënt te chël raiun te süa funziun, aladô dles normes varëntes dla Provinzia, de componënt de vigni comisciun, consëi, comitê o collegium nominé cochessî.

(1)  Le personal dè dant ti articui 56 y 57 eserzitëia por ći che reverda bosć y munts la funziun de verda y de sconanza y en general, tan inant ch’ara se trata dl ćiamp de competënza dla Provinzia, les funziuns de polizia y de sorvisc d’istitut che ti speta al Corp forestal statal, les funziuns surandades da pert de chësta lege, sciöch’inće inćiaries eventuales stabilides da d’atres normes.

(2)  I dovëis istituzionai dl sorvisc forestal provinzial é la gestiun sostignibla dl terac tl respet dl lian idrogeologich-forestal, süa verda y so control, sciöche inće le control surandé al Corp forestala provinzial dl respet de d’atres desposiziuns, l'esecuziun di laurs forestai en economia, la conzesciun de sostëgns, la consulënza, sciöche inće dötes les ativitês coliades y, en particolar, inće les ativitês scientifiches y aministratives che reverda le desfiramënt de chisc compić.

(3)  Por ademplì les funziuns odüdes danfora da chësc articul y realisé en economia i laûrs y i intervënć preodüs dai articui 25, 28, 31, 32 y 33 se crüzia le diretur dla Repartiziun provinziala Bosć da realisé en economia laûrs y cumprè en economia bëgns y sorvisc cun laprò le guant de sorvisc, l’echipamënt y les ermes de sorvisc, les mascinns y i veicui speziai. 84)

(4)  Les staziuns forestales vëgn aministrades da personal provinzial che à la cualifica de ofiziers de polizia iudiziara.

(5) Les strotöres aladô dl articul 56, coma 1, lëtres a), c) y d), vëgn aministrades da personal laureè te sciënzes forestales che à le titul d’abilitaziun por eserzité la profesciun relativa. 85)86)

(1)  Por l’esecuziun en economia de düć i laûrs y intervënć preodüs dales normes che vel te chësta materia é i ofizi dla Repartiziun provinziala Bosć autorisà a tó sö personal forestal cun n contrat de laûr de dërt privat aplican les normes y le tratamënt economich preodü dal contrat de laûr coletif nazional corespognënt por i lauranć che fej laûrs de sistemaziun dl’ega tl setur forestal y agrar y dai contrać raionai d’integraziun relatifs.

(2)  Le diretur dla Repartiziun provinziala Bosć mena les tratatives por renové i contrac integratifs preodüs dal coma 1 y i sotesscrí definitivamënter por la pert dl datur de laur. 87)

(1)  La verda sön l’aplicaziun de chësta lege y de vigni atra desposiziun che reverda le mantignimënt dl terac, la maioraziun, la sconanza y l’adoranza de bosć, armentares y fodares, la sconanza dla natöra y dla contrada, la sconanza dla flora y dla fauna a livel provinzial, la ćiacia y la pëscia, sciöche vigni atra atribuziun che vëgn da leges speziales ti vëgn surandades al personal forestal aladô dl articul 57. Les desposiziuns che é tl decret legislatif di 12 de merz 1948, nr. 804, ratifiché cun mudaziuns dla lege di 4 de mà 1951, nr. 538, y surantutes aladô dl articul 4, coma 6, dla lege provinziala di 24 de merz 1977, nr. 11, y mudaziuns y integraziuns suandëntes resta impé.

(2)  Tl respet dles competënzes surandades ai direturs d’ofize aladô dles desposiziuns varëntes, vëgn l’ordinanza de sanziun dada fora dal diretur dla Repartiziun provinziala Bosć. Ara ti mëss gní ortiada ai sogec interessá te dui agn da canche ai á ciafé i scric de defenüda o dala data dl’aldiziun o, sce ai mancia, dala tomanza di termins preodüs por chësta rajun.  88)

(3)  Chi che cun n’aziun o na manćianza va tl medemo tëmp cuntra de plü desposiziuns che vëiga danfora sanziuns aministratives o va plü iadi cuntra la medema desposiziun vëgn straufè cun la sanziun odüda danfora da vigni singula violaziun.

(4)  Por les sanziuns aministratives de scioldi proporzionales preodüdes da chësta lege ne vëgnel nia apliché le paiamënt te na mosöra smendrida aladô dl articul 6 dla lege provinziala di 7 de jená dl 1977, n. 9, y mudaziuns suandëntes, ajache les sanziuns aministratives á, tl interes publich, ince carater de retüda por le dann fat al ambiënt y ala natöra y mëss porchël ester a vigni moda diretamënter proporzionales ala soma. 89)

(1)  Tla pröma aplicaziun de chësta lege é sotmetüs ales desposiziuns aladô dl articul 3 y suandënć, i terac cun lian d’adoranza ala data de jüda en forza de chësta lege, aladô di articui 1 y 17 dl decret roial di 30 de dezëmber 1923, nr. 3267, sciöche inće i biotops cun lian de sconanza dla contrada aladô dles normes varëntes tl ćiamp dla sconanza dla natöra y dla contrada.

(2)  Aspetan che la cherta reala dl bosch y dles pastöres aladô dl articul 21 vëgnes completada, se jo la Repartiziun provinziala Bosć por identifiché i terac de bosch y de pastöra dles chertes injuntades ai planns de gestiun aladô di articui 13 y 16.

(3)  Les desposiziuns sön i laûrs en economia aladô dl articul 31, coma 2, vëgn inće aplicades ai intervënć istituzionai o surandà al’aziënda speziala por la sconanza dl terac, por i rüs da munt y les lovines.

(4)  La dotaziun dl organich spezial di sotofiziers y dles verdes forestales provinziales vëgn aumentada de 15 posć.

(5)  Al personal laureè te sciënzes forestales bele inćiarié cun la direziun de na strotöra canche chësta lege é jüda en forza, mo che n’à nia le titul d’abilitaziun preodü dal articul 59, coma 5, ti réstel impò la direziun dla strotöra che ti é gnüda surandada y la inćiaria ti po gnì renovada inće zënza chësta condiziun.

(1)  Chëstes desposiziuns é gnüdes abrogades:

1. les seziuns I, II, V y VI dla lege provinziala di 31 de dezëmber 1976, nr. 58;
2. l’articul 22 dla lege provinziala di 11 d’aurì 1979, nr. 4;
3. i articui 22, 25 y 26 dla lege provinziala di 7 de lugio 1980, nr. 24;
4. la lege provinziala di 4 de mà 1982, nr. 18;
5. la lege provinziala di 14 de jügn 1983, nr. 17.

(2)  Por les violaziuns dles normes indicades tl coma 1, che é gnüdes fates dan la jüda en forza de chësta lege, vëgnel apliché les regolamentaziuns contignides tles desposiziuns nominades, sce le prozedimënt por ći che reverda l’infliziun dl strauf corespognënt n’é nia ćiamò stlüt jö.

(3)  Les desposiziuns contignides tles normes abrogades aladô dl coma 1 vel ma plü por i laûrs bele autorisà che mëss gnì portà a fin.

(4)  Ales domandes presentades dan la jüda en forza de chësta lege por la conzesciun di alisirimënć abrogà aladô dl coma 1, vëgnel apliché les normes nöies.

(5)  Le bilanz provinzial aladô dl articul 3, coma 1, dla lege provinziala di 14 de jügn 1983, nr. 17 vëgn adorè inant por i fins y cun les modalitês, sciöch’al vëgn odü danfora dal articul 34 de chësta lege.90) 

(6)  I intervënć a ćiaria dl bilanz dla Provinzia fać fora dan la jüda en forza de chësta lege y nia realisà ćina a chël momënt, vëgn portà a fin en atuaziun dles desposiziuns contignüdes tles normes abrogades aladô dl articul 63, coma 1. 90) 

(1)  Chësta lege va en forza al 1. de jenà dl ann suzessif a süa publicaziun tl Boletin Ofizial dla Regiun Trentino-Südtirol.

Chësta lege é da publiché tl Boletin Ofizial dla Regiun. Vignun a chël ch’al ti speta é oblié de la respetè y de la fà respetè sciöche lege dla Provinzia.