(1) L’atività aministrativa se tën a criteres de mparzialità, de fazion, d’economizità, de slune, de publizità, de trasparënza, de valivanza de tratamënt y dla chances, coche nce ai prinzips dl urdinamënt dla Union europeica per l arjunjimënt di fins preudui dala lege. 4)
(1/bis) I raporc danter i sogec privac y l’aministrazion ie caraterisei da na culaburazion leala y da curetëza y crëta i uni ti cun cunfronc di autri. 5)
(1/ter) L’aministrazion alesirea l azes ala pruzedures aministratives nce tres la scemplificazion dl lingaz adurvà per la redazion di ac aministratifs. 6)
(1/quater) Acioche l'atività aministrativa sibe plu efizienta y trasparënta y per garantì i dërc digitei a zitadins y a mprejes, sustën l’aministrazion la partezipazion ala pruzedura aministrativa y l dërt d’azes ai documënc aministratifs tres l’adurvanza dla tecnologies dla nfurmazion y dla comunicazion y la nen segurea oradechël l’adurvanza ti raporc interns, cun l’autra aministrazions y cun i sogec privac. La realisea a chësc fin na plataforma digitela, la proietan y la urganisan a na maniera da garantì la sauridanza de consultazion, la cumprenscibltà y l’azescibltà scëmpla a uni categuria de utënc. 7)
(2) La strutures urganisatives dla Provinzia, dl’aziendes y di ënc che depënd da d’ëila ie struturedes a na maniera che la pruzedures sibe plu scëmples, tambën a livel dla cumpetënzes che a livel di sistems y mesuns de lëur, dla destribuzion dl personal y di lëures y nce dla culaburazions da dedora.
(3) Per i fins nunziei ti comes 1, 1/quater y 2, y tla usservanza di prinzips di articuli suzessifs, vëniel regulà cun regulamënt, nce n mudazion o ntegrazion de normes de lege n forza, do che l ti ie unit comunicà al Cunsëi provinziel: 8)
- l’urganisazion y l funzionamënt di organns colegiai dla Provinzia, co i reurganisé y i tré adum te n organn sëul, sce si ativiteies ie cunliedes. L possa nce unì smendrì la cumpëida de si cumëmbri y, sce i organns ne ie nia de bujën a uni moda, possen i tò ju o i sustituì; 9)
- la modaliteies y i tiermui preudui per la pruzedures aministratives singules, co les tré adum sce les à da nfé cun la medema atività privata o publica. L ie te chësc cajo da tenì cont dla sort de atività y dla natura di pruvedimënc, da cialé de smendrì la fases defrëntes, l numer di organns provinziei che tol pert, da razionalisé la cumpetënzes y i cuntroi, da eliminé l’acurdanzes y i cunsënsc che ne muessa nia vester y da trasferì i pudëies dezijionei a organns monocratics o a direzions aministratives, sce chisc ne se damanda nia, pervia de si gran mpurtanza, che i vënie eserzitei te na forma colegiala; 10)
- i documënc che ie da njunté ala dumandes per l'emiscion di pruvedimënc aministratifs;
- la soprescion dla pruzedures che ne curespuend nia plu ai fins y ai obietifs fundamentei dla legislazion de setor o che cuntrastea cun i prinzips dl urdinamënt giuridich dla Union europeica (UE); 11)
- la soprescion dla pruzedures che cumporta plu custimënc che vantajes per l’aministrazion y per i zitadins, nce tres la sustituzion dla atività aministrativa direta, cun formes de regulamentazion autonoma da pert dla persones nteressedes;
- adatamënt di regulmënc sustanziei y de pruzedura dl’atività y di ac aministratifs ai prinzips dla normativa dla UE; 12)
- la soprescion dla pruzedures che desvieia dala normes de pruzedura de carater generel, canche la rejons che giustifichea n regulamënt de setor speziel ne ie nia plu dates. 13)
(4) 14)
(5) L’atività aministrativa se urientea aldò dl prinzip dl svilup sustenibl, per garantì che l acuntentamënt di bujëns dla generazions da ncuei ne limiteie nia la cualità dla vita y la pusciblteies dla generazions dl daunì. I criteres per purté inant n svilup sustenibl vën fissei cun n regulamënt. 15)
L articul 1, coma 1, ie n iede unì sustituì dal articul 2, coma 1, dla L.P. di 4 de mei 2016, n. 9 y l ie pona unì mudà nsci dala L.P. di 11 de lugio 2018, n. 10.
L articul 1, coma 1/bis, ie unit njuntà dal articul 2, coma 2, dla L.P. 4 de mei 2016, n. 9.
L articul. 1, coma 1/ter, ie uni njuntà dal articul 2, coma 2, dla L.P. 4 de mei 2016, n. 9.
L articul 1, coma 1/quater ie uni njuntà dal articul 2, coma 2, dla L.P. 4 de mei 2016, n. 9.
La vianvieda dl articul 1, coma 3, ie unit mudà nsci dal articul 2, coma 3, dla L.P. di 4 de mei 2016, n. 9.
Cëla nce l D.P.P. di 25 de lugio 2014, n. 26.
Cëla nce l D.P.P. di 21 de merz 2019, n. 6.
L pustom d), dl articul 1, coma 3, ie unì mudà nsci dal articul 6, coma 1, dla L.P. di 17 de nuvëmber 2017, n. 21.
L pustom f), dl articul 1, coma 3, ie n iede unì mudà dal articul 2, coma 4, dla L.P. di 4 de mei 2016, n. 9, y dadedò dal articul 6, coma 2, dla L.P. di 17 de nuvëmber 2017, n. 21.
L coma 3 ie unit modificà dal articul 14 dla lege provinziela di 13 de merz dl 1995, n. 5, dal articul 30 dla lege provinziela di 21 de jené dl 1998, n. 1 y dal articul 1 dla L.P. di 19 de fauré dl 2001, n. 4.
Cëla l articul 11 dla lege provinziela di 21 de jené 1998, n. 1:
Art. 11 (Scemplificazion di formulares dla Provinzia)
(1) Duc i formulares y modiei adurvei dal’aministrazion provinziela ti raporc cun la zitadines y i zitadins te duc i ciamps nce te chël dla tecnologies modernes muessa unì cunzepii aldò de na strutura y na mpustazion grafica standardiseda y dëssa unì scemplifichei y puscibilmënter smendrii te si cuantità.
(2) La Jonta provinziela dà ora l regulamënt d’esecuzion relatif.
(3) Tl lim de tëmp de un n ann do la jita n forza dla lege ejaminea la Repartizion servijes zentrei si atuazion y prejentea na relazion lessù.
L articul 1, coma 4, ie unit abrogà dal articul 38, coma 1, pustom a) dla L.P. di 4 de mei 2016, n. 9.
L articul 1, coma 5, ie unì njuntà dal articul 32, coma 1, dla L.P. di 10 de jené 2022, n. 1.