(1) La Jonta provinziela, cun deliberazion che ie da publiché sun la tofla digitela dla Provinzia, determinea danora i criteres per la cunzescion de suvenzions, cuntribuc, sustenimënc, stipendiums, pesć, ncurajamënc y alesiramënc finanzieres y l’atribuzion de vantajes economics d’uni sort a persones, sozieteies y ënc publics y privac, sciche nce la manieres de licuidazion de chisc y la documentazion de spëisa curespundënta che ie da prejenté. Per i ënc y i sogec che ne à nia n fin de davani che lëura ti ciamps dl’assistënza, dl sustëni dla familia, dl lëur, dla sanità, dla prutezion zevila, dla istruzion, dla cultura, dl sport, dl frabiché alesirà, sciche nce dla defendura dla cuntreda dl ambient possa la documentazion vester limiteda ala soma dl vantaje economich cunzedù, restan mpe la ublianza dl’atestazion dl dejeujamënt dla scumenciadiva ntiera lasceda pro al alesiramënt y la facultà de cuantifiché la prestazions fates dai ënc y dai sogec nstësc. 19) 20)
(1/bis) L relevamënt dla situazion economica de persones fisiches per la cunzescion de suvenzions, cuntribuc, stipendiums, premies, sustenimënc, aiuc finanzieres y l’atribuzion de vantajes economics de ce sort che mei, vën fat sun la basa di criteres per la detlarazion unificheda dl davani y dl patrimone, stabilii cun regulamënt d’esecuzion. 21)
(1/ter) Al fin dl cuntrol y dl svilup di criteres per la detlarazion unificheda dl davani y dl patrimone aldò dl coma 1/bis, à la Provinzia azes ai dac che curespuend ai benefizienc y ala prestazions di ënc publics che se nuza di criteres nunziei per la gestion dla prestazions respetives. 22)
(2) La strutura aministrativa respunsabla dla pruzedura verifichea sce la scumenciadives suvenzionedes vën tenides aldò dla regules sun la basa de contes, de cuntrac o d’autra documentazions adatedes, che vën stabilides, setor per setor, tla deliberazions nunziedes tl coma 1, y nce n basa ala detlarazion dla persona che damanda l alesiramënt economich. Te chësta muessel unì detlarà che la cundizions y i recuisic scric dant dala lege vën adempìi y l muessa unì specificà i ufizies o ënc pra chëi che l ie unit fat o l unirà fat d'autra dumandes per n alesiramënt economich per la medema scumenciadiva.
(2/bis) Per i alesiramënc liei ai ntervënc de costruzion o ressanamënt possa i criteres per l’atribuzion de vantajes economics udëi danora che la licuidazion di cuntribuc per lëures de costruzion y de miuramënt dl terac vënie fata, ti lims dla spëisa lasceda pro, tres l’aplicazion, ala cuantità di lëures dejëuc, di priejes uniteres o dla somes pausciales, apurvei n ucajion dla cunzescion dl alesiramënt, cun la njonta, ulache udù danora dai criteres de setor curespundënc, de na cuota fisseda danora per spëises genereles y cëries defrëntes. La detlarazion dl’esecuzion regulera di lëures, data ora da n prufesciunist abilità n basa al stat parziel o finel di lëures, vel coche documentazion adateda per la licuidazion dl vantaje economich. 23)
(2/ter) Tl respet dl prinzip dla scemplificazion di pruzedimënc aministratifs possa i criteres per l’atribuzion di vantajes economics udëi danora che la documentazion de spëisa vënie sustituida da na lista ressuntiva dla spëises abudes. Ala lista, da chëla che l muessa vester da udëi i detai essenziei dla documentazion de spëisa, vëniel njuntà na detlarazion dl reprejentant legal de chi che se damanda l alesiramënt, che atestea che la spëises ie unides fates. 24)
(2/quater) I ënc nunziei tl articul 1/ter, coma 1, se cruzia, tl respet dla normativa sun la prutezion di dac persunei, dl barat dla nfurmazions sun la cunzescion de vantajes economics de ce sort che mei paiei ora dai ënc nstësc. 25)
(3) Uni strutura aministrativa respunsabla de paië ora i alesiramënc economics fej cuntroi a cajo tla mesura de almanco l sies percënt dla scumenciadives sustenides. La manieres vën determinedes dala Jonta provinziela aldò dl coma 1; la possa nce se jué de esperc da dedora. 19)
(4) Danter la spëises lascedes pro a cuntribut iel te uni cajo stlut ora chëles n referimënt ala chëutes sun l davani y sun l patrimone, ora che la chëuta sun l’ativiteies produtives. L vën oradechël lascià pro a cuntribut la cëries respidledes coche cuntribuc previdenziei. 26)
L titul tl test tudësch ie unì mudà nsci dal articul 3, coma 1, dla L.P. di 6 de lugio 2017, n. 8.
L articul 2 ie unit sustituì dal articul 2 dla L.P. di 19 de fauré 2001, n. 4.
L articul 2, coma 1, ie n iede unit sustituì dal articul 24 dla L.P. di 23 de lugio 2007, n. 6, y l ie pona unit mudà dal articul 15, coma 1, dla L.P. di 23 de dezëmber 2014, n. 11, y dal articul 5, coma 1, dla L.P. di 4 de mei 2016, n. 9. L test tudësch ie unì mudà dal articul 3, coma 1, dla L.P. di 6 de lugio 2017, n. 8.
L articul 2, coma 1/bis, ie unit njuntà dal articul 7, coma 2, dla L.P. di 17 de jené 2011, n. 1, y dadedò mudà tl test tudësch dal art. 3, coma 1, dla L.P. di 6 de lugio 2017, n. 8.
L articul 2, coma 1/ter, ie unit njuntà dal articul 4, coma 1, dla L.P. di 26 de setëmber 2014, n. 8, y dadedò mudà tl test tudësch dal articul 3, coma 1 dla L.P. di 6 de lugio 2017, n. 8.
L articul 2, coma 2/bis, ie unit njuntà dal articul 15, coma 2, dla L.P. di 23 de dezëmber 2014, n. 11. y dadedò mudà tl test tudësch dal articul 3, coma 1 dla L.P. di 6 de lugio 2017, n. 8.
L articul 2, coma 2/ter, ie unit njuntà dal articul 15, coma 2, dla L.P. di 23 de dezëmber 2014, n. 11, dadedò mudà tl test tudësch dal articul 3, coma 1 dla L.P. di 6 de lugio 2017, n. 8.
L articul 2, coma 2/quater, ie unit njuntà dal articul 5, coma 2, dla L.P. di 4 de mei 2016, n. 9.
L articul 2, coma 4, ie unit njuntà dal articul 15, coma 3, dla L.P. di 23 de dezëmber 2014, n. 11.