d) Lege Provinziala di 22 de otober dl 1993, n. 171)2)
Regulamënt dl pruzedimënt aministratif 3)

(1) Sce l pruzedimënt aministratif vën nvià via d’ublinaza do na istanza o sce l muessa unì nvià via d’ufize, ie la strutures urganisatives di ënc nunziei tl articul 1/ter, coma 1, ubliedes a l stlù ju espressamënter tres n pruvedimënt. Sce l’aministrazion ëssa da cunstaté che l’istanza ne possa nia unì rezevuda, sce la ne possa nia unì lasceda pro, sce l ne ti po nia unì jit do o sce la ne ie nia de rejon, stlujela ju l pruzedimënt cun n pruvedimënt espressif scrit te na forma scemplificheda y la mutivazion relativa ie metuda adum da n referimënt sintetich y da ntënder dl fat o dla rejon giuridica ratei ressolutifs. Tl cajo de pruvedimënt tla forma scemplificheda ne vëniel nia aplicà l articul 11/bis.

(2) L diretëur dla repartizion cumpetënta, o sun si delega l diretëur dla strutura urganisativa, dà l orden d’archiviazion dl pruzedimënt do che l ie unit comunicà o stlut ju l pruvedimënt de cuntlujion o sce l ne se porta nia pro per l’aministrazion la ublianza de se ativé pervia de na istanza o de n raport d’ufize.

(3) La documentazion y la istanzes prejentedes a na strutura urganisativa defrënta da chëla cumpetënta a les giapé, ma che toca pra l’aministrazion provinziela o pra i ënc nunziei tl articul 1/ter, coma 1, o prejentedes tres la Purtela per la relazions cun l publich vën mandedes d’ufize ala strutura cumpetënta.

(4) L tiermul per la cuntlujion dl pruzedimënt ie de 30 dis. Canche, tenì cont dla sustenibltà di tëmps per la urganisazion aministrativa, dla natura di nteresc publics defendui o dla complessità particulera dl pruzedimënt, iel debujën de n tiermul plu lonch de 30 dis per la cuntlujion dl pruzedimënt, ie chësc fissà cun deliberazion dla Jonta provinziela, da publiché sun la tofla digitela dla Provinzia. Chësc tiermul ne daussa nia vester plu lonch de 180 dis. L resta mpe i tiermui defrënc stabilii da despusizions de lege.

(5) Ora che sce l ne ie nia stabilì autramënter destoma l tiermul nunzià tl coma 4 pian via dala data de rezevuda dla istanza da pert dl’aministrazion cumpetënta tl cajo de pruzedimënt a istanza de pert y dala data de vianvieda de pruzedimënt tl cajo de pruzedimënt ativà d’ufize.

(6)  L tiermul nunzià pra l coma 4 vën sburdlà te chisc caji: 43)

1. n pendënza dl tiermul assenià aldò dl articul 15/bis, coma 1, pustom b), per la prejentazion de lecurdanzes scrites y documënc;
   
2. n pendënza dl tiermul de n tëmp nia plu lonch che 30 dis assenià aldò dl articul 12, coma 1, pustom a), y eventualmënter slungià, per rejons giustifichedes y sun istanza mutiveda dl nteressà, al plu de mo 30 dis mplù, per la relasceda de detlarazions y per la regularisazion o la ntegrazion de detlarazions o istanzes faledes o nia cumpletes – ulache amiscibles;
   
3. n aspitanza dla emiscion d’arac de ublianza, de arac facultatifs y dla valutazions tecniches nunziedes ti articuli 19 y 20.
   

(7) L tiermul nunzià pra l coma 4 possa mé unì sburdlà un n iede y per n tëmp nia plu lonch de 30 dis per tò ite d’ufize nfurmazions o documënc aldò dl articul 5.  44)