(1) Por la proteziun de categories de porsones determinades y por la prevenziun dla mania dl jüch ne pó l’autorisaziun preodüda dal articul 1, coma 2 por podëi eserzité salfs da jüch y d'atraziun nia gní conzedüda sce chëstes é tla vijinanza de 300 metri da istituziuns scolastiches de ci degré chessî, zëntri por la jonëza o d’atri istituc frecuentá dantadöt da jënt jona o strotöres residenziales o semiresidenziales tl ciamp sanitar o sozio-assistenzial. L’autorisaziun vëgn conzedüda por cin agn alalungia y do che ara é tomada pól gní damané che ara vëgnes renovada. Por les autorisaziuns che é bele pëia ia le termo de cin agn dal 1. de jená dl 2011.
(1/bis) Por la conzesciun dl’autorisaziun por l’eserzize de salfs da jüch y de devertimënt aladô dl coma 1 vëgnel ince conscidré posć sensibli dötes les strotöres sanitares y sozio-assistenziales publiches y privates che fej ativités d’acoliënza, assistënza y consulënza. La Junta provinziala pó stabilí d’atri posć sensibli olache an ne pó nia mëte a desposiziun jüc. 13) 14)
(2) Cun deliberaziun dla Junta provinziala pol ciamó gní stabilí d’atri posć sensibli a chi che al ne ti po nia gní conzedü l’autorisaziun por l’eserzize de salfs da jüch y d’atraziun en conscidraziun de süa faziun sön le raiun y la segurëza incëria sciöche ince sön le trafich, l’incuinamënt acustich y le desturb dl chît publich.
(2/bis) Por i fins preodüs dal coma 1, vëgn les limitaziuns de lerch y de tëmp slariades fora a vigni sort d'eserzize dediché al jüch tres aparac preodüs dal articul 110, coma 6 dl decret roial di 18 de jügn dl 1931, n. 773 y mudaziuns suandëntes. 15)
(3) Al vëgn proibí vigni sort d'ativité de retlam por la daurida o l’eserzize de salfs da jüch y d’atraziun.
(4) La manajadëssa/Le manajadú mëss mostré sö garanzies adatades por che porsones de mëndra eté ne ti pois nia pormez a jüc proibis por chëstes aladô dl Test unich dles leges de segurëza publica, aprové cun decret roial di 18 de jügn dl 1931, n. 773, y mudaziuns suandëntes. Cun deliberaziun dla Junta provinziala vëgnel determiné i criters relatifs. 16)
Cun sentënza n. 300 di 10 de novëmber dl 2011 à la Curt costituzionala detlaré che i articui 1 y 2 dla l.p. di 22 de novëmber dl 2010, n. 13, che á injunté l’art. 5/bis y mudé l’art. 12 dla l.p. di 13 de mà dl 1992, n. 13 y che á mudé l’art. 11, coma 1 y injunté l’art. 1, coma 1/bis tla l.p. di 14 de dezëmber dl 1988, n. 58 é conforms ala costituziun.
L'art. 5/bis, coma 1/bis é gnü injunté dal art. 8, coma 1 dla l.p. di 24 de ma dl 2016, n. 10.
Ciara ince l'art. 20, coma 4 dla l.p. di 24 de ma dl 2016, n. 10.
L’art. 5/bis, coma 2/bis é gnü injunté dal art. 4, coma 2 dla l.p. di 21 de dezëmber dl 2011, n. 15.
L’art. 5/bis é gnü injunté dal art. 1, coma 1 dla l.p. di 22 de novëmber dl 2010, n. 13.