(1) I sorvisc soziai realisëia intervënć por sostignì, mantignì y arjunje indô le bëgnester dla popolaziun, por che la porsona pois se svilupé deplëgn tl ambiënt familiar y sozial, sciöche inće por curì i bojëgns fondamentai dla vita.
(2) La Provinzia, i comuns, i consorc di comuns, les istituziuns publiches y privates d’assistënza y benefiziënza y les comunitês raionales tol pert al’atuaziun di sorvisc soziai. I comuns, i consorc di comuns y les comunitês raionales, che s’un tol sura di sorvisc soziai aladô de chësta lege, vëgn denominà sciöche ënć de gestiun di sorvisc soziai. 2)
(3) I sorvisc soziai à dantadöt chisc fins:
- tignì fora y tó y jì les situaziuns de bojëgn o d’emarginaziun tl cheder de na politica generala che ô superè les desvalianzes soziales che vëgn dant sön chësc teritore;
- sostignì la familia da ademplì sü dovëis;
- defëne la maternité, l’infanzia, la jonëza, la jënt atempada, les porsones cun handicap y les porsones cun dificoltês o che é al prigo;
- tó demez le sistem dl’assistënza aladô de categories tres l’atuaziun di medemi intervënć por i medemi bojëgns, y tres intervënć desfarënć aladô di caji spezifics;
- promöie la plü ampla agregaziun poscibla dla sozieté por reconësce, schivé y eliminé les gaujes de malester.
(4) I intervënć di sorvisc soziai mira a mantignì, integrè y reintegrè les porsones assistides tla vita dla familia, dla sozieté, dla scora y dl laûr. Ai se completëia cun chi di sorvisc tl ćiamp dl’educaziun, dla formaziun, dla scora, dl tribunal y dla sanité.