(1) Per garantì che l vënie respetà la normes de lege tl setor dl zidlamënt dl'eves y dla defendura dla plantes possa l Presidënt dla jonta provinziela numiné sun pruposta dl assessëur cumpetënt persones espertes dl'eves desiniedes dala "Lia provinziela di zidlaeves", tlo dessot tlameda bel scëmpl lia, coche "agënc giurei". Chësta persones dejëuj si funzion debant y sciche atività segondera coche dependënc dla lia. Per i medemi fins possa l Presidënt dla jonta provinziela sun dumanda dl assessëur cumpetënt numiné "agënc giurei" funzioneres singui dl ispetorat provinziel per l'agricultura.
(2) L Presidënt dla jonta provinziela numinea i agënc giurei pernan che l ie unit azertà l'esistënza di recuisic udui danora nunziei tl T.U. dla leges de segurëza publica y pernan che l ie dan man la deliberazion dla jonta nstëssa.
(3) La numinazion va n forza cun l decret d'autorisazion dl Cuestor aldò dl articul 138 dl T.U. dla leges sun la segurëza publica, apurvà cun D.dl Rë di 18 de juni 1931, n. 773, y di articuli dl regulamënt d'esecuzion curespundënt, apurvà cun l D. dl Rë di 6 de mei 1940, n. 635; la autorisea i esperc dl'eves de dejëujer la funzions preududes aldò dla despusizions respetives.
(4) I agënc giurei ie funzioneres publics aldò dl articul 357 dl Codesc penal cun la cualificazion de agënc de polizai giudiziera. Tla esecuzion de si servisc ài sëura la uniform o i porta n destintif, chisc ie determinei dal ënt de pruvenienza y autorisei dal Cuestor aldò dl articul 254 dl D. dl Rë di 6 de mei 1940, n. 635. I agënc se legitimea mustran su na tessera cun fotografia, data ora dal Presidënt dla jonta provinziela y senieda cun l vist dl Cuestor. Sun la tessera muessel vester scrit l ënt de purtenienza.
(5) Per pudëi dejëujer si ncëries à i esperc dl'eves te uni mumënt l dërt d’azes ai bandaleves y a si ntëurvia, ai locai per la depusizion dla miel y dl'atrezatures respetives y a d'autra lueges ulache l material nunzià vën tenì su.