g) Lege Provinziala di 21 de dezëmber dl 1987, n. 331)2)
Pruvedimënc revardënc l afadimënt de mëndres y mëndri d’età

(1) Per cie che reverda l afidamënt de mëndres/mëndri te families o pra persones singules à l ufize provinziel chësta ublianzes:

1. nfurmé per scrit la persones, a chëles che l ti ie unit afidà la mëndra/l mënder, y i genitores dl cuntenut dla despusizion cun chëla che l ie unit detlarà l afidamënt; te chësta comunicazion muessel unì ndicà i duvieres liei al afidamënt y l muessa unì damandà na detlarazion d’azetazion de chisc duvieres;
   
2. vardé sun l afidamënt y nen nfurmé l giudesc grep, sce chësc ie udù danora dala lege;
   
3. cunsië y sustenì la persones, a chëles che l ti ie unit afidà na mëndra/n mënder, n cont de problems che reverda l nluegiamënt dla mëndra/dl mënder tla familia y te scola o te d’autri raions;
   
4. stipulé n cuntrat d’assegurazion, tres chël che la mëndres/i mëndri afidei ie assegurei per danns che ti ie unic gaujei y per danns che ëi à eventualmënter gaujà a chi che i à tëuc su y a terzi;
   
5. se cruzië dl afidamënt adum cun l servisc soziel provinziel y cun l personal educatif y terapeutich d’autri servijes atifs a livel provinziel;
   
6. sustenì scumenciadives de preparazion y ajurnamënt per la persones che à tëut su na mëndra/n mënder, per i operadëures y duc chëi che ie tuchei dal afidament, sciche nce sustenì la devulgazion y la nfurmazion sun la problematiches dl afidamënt.
   
7. se cruzië de giapé y crì ora persones, a chëles che l ti posse unì afidà mëndres/mëndri y che à i recuisic aldò dl articul 4, y se cruzië nce che l vënie plutosc dat la preferënza al afidamënt che no a d’autra formes d’assistënza residenziela.