(1) Cun eserzize dla ćiacia capëscion vigni ativité por pié o copè salvarjina cun i mesi preodüs tl art. 14.
(2) Vigni atra manira da pié o copè salvarjina é proibida, ater co sce al vëgn a s’al dè por caje o por forza plü alta.
(3) Al vëgn inće aratè eserzize dla ćiacia le jì incërch o le stè chić tl raiun a ćiarè o aspetè o chirì cun ermes y mesi destinà ala ćiacia la salvarjina por la copè o la pié.
(4) La salvarjina copada o piada tl respet dla lege é de che che l’à piada o copada.
(5) La salvarjina ćiaciabla copada o piada ilegalmënter é dl aministradù dl raiun da chël che ara é gnüda tuta. Che che ciafa salvarjina morta, püra o ferida mëss ti le lascè alsavëi te 24 ores al aministradù dl raiun interessè. 39)
(5/bis) Sce al vëgn ciafé vicí püri o feris che toca pro les sorts de vicí sot a proteziun cumpedades sö tles injuntes I y II dla norma diretiva 2009/147/CE dl Parlamënt europeich y dl Consëi di 30 de novëmber dl 2009, che reverda la conservaziun di vicí salvari, se crüzia l’aministradú de chël raiun da i dé jö te n zënter de cura por i vicí che vir chiló, autorisé por chësc fin, tl respet dles desposiziuns varëntes en materia de verda y controi veterinars. 40)
(5/ter) Sön i mamifri salvari ciafà püri o feris él l’aministradù dl raiun corespognënt che tol na dezijiun. Por podëi s’i tignì, inće ma por i curé o i varì, ôl ester l’autorisaziun aposta aladô dl articul 19; cun chësta pol gnì desponü che chësta sort de tier vëgnes plü tert indô lasciada jì danü te so ambiënt natural. 41)
(5/quater) Les sorts de tiers salvari che ne po nia gnì ćiaciades, che é gnüdes ciafades mortes, mëss gnì denunziades al ofize provinzial competënt por la ćiacia, al post de sorvisc competënt por la verda dla ćiacia y dla pëscia o al presidënt raional dl’assoziaziun di iagri a chëra che al ti é gnü surandè la gestiun di reviers de dërt; chisc scrî fora n zertificat de provegnënza aladô dl articul 22, coma 3, ater co sce l’ofize provinzial competënt por la ćiacia damana da ciafè i cadavri di tiers por rajuns didatiches y de documentaziun. 42)
(5/quinquies) Trofês eventuai de salvarjina d’aundla copada o piada ilegalmënter, ciafada morta o copada aladô dles modalitês preodüdes dal articul 17, comesc 2 y 2/bis, sce ai vëgn aratà adatà por l’ejam da iagher o por la preparaziun di aspiranć iagri y verdaćiacia, mëssi gnì dà jö sön domanda al ofize provinzial competënt por la ćiacia. Sce al vëgn aratè d’ütl po l’ofize ti surandè chisc trofês sciöche inće i cadavri dles sorts de tiers che ne po nia gnì ćiaciades, damanades aladô dl coma 5/quater o aladô dl articul 15, coma 1, lëtra d), al’Aziënda provinziala Bosć y demane o al’assoziaziun preodüda dal articul 23. 43)
(6) La ciacia po gní eserzitada da che che á complí dejedot agn y á la lizënza d’avëi n stlop da ciacia, n’assiguraziun de responsabilité zivila por la ciacia, sciöche ince n’assiguraziun cuntra inzidënc cun referimënt al eserzize dla ciacia aladô dles normes statales y á paié la tassa de conzesciun statala. 44)
(7) Tratan che le iagher va a ćiacia mëssel se tó para düć i documënć damanà, che mëss ti gnì mostrà sö ai verdaćiacia, sce ai s’al damana.
(8) Tratan le pröm ann do l’emisciun dla pröma lizënza de ćiacia por n revier de dërt, po le iagher eserzité la ćiacia ma sce al é acompagné da n iagher che à na lizënza de ćiacia varënta da almanco trëi agn por chël revier o da na porsona che à l’abilitaziun da verdaćiacia y é competënt por chël revier. Da chësta prescriziun vëgnel stlüt fora la ćiacia ala salvarjina che n’é nia sotmetüda al plann de stlopetada preodüda dal articul 27. 45)
(9) Al ne vëgn nia conscidré eserzize dla ćiacia la chirida autorisada de salvarjina ferida che po gnì ćiaciada, sciöche inće le copè o le stlopetè la salvarjina ćiaciabla da pert di organns de suraverda preodüs dal articul 31 y da pert di iagri, sce al é n bojëgn evidënt. 46)
Le coma 5 é gnü sostituì dal art. 6 dla l.p. di 28 de novëmber dl 1996, n. 23, y plü inant mudé dal art. 2 dla l.p. di 11 de forà dl 2000, n. 4 y dal art. 6, coma 1 dla l.p. di 12 d’otober dl 2007, n. 10.
L'art. 11, coma 5/bis é gnü injunté dal art. 6, coma 2 dla l.p. di12 d’otober dl 2007, n. 10 y spo dedô él gnü sostituí insciö dal art. 20, coma 1 dla l.p. di 24 de setëmber dl 2019, n. 8, y ala fin mudé dal art. 18, coma 1 dla l.p. di 27 de merz dl 2020, n. 2.
Le coma 5/ter é gnü injuntè dal art. 6, coma 2 dla l.p. di 12 d’otober dl 2007, n. 10.
Le coma 5/quater é gnü injuntè dal art. 6, coma 2 dla l.p. di 12 d’otober dl 2007, n. 10.
Le coma 5/quinques é gnü injuntè dal art. 6, coma 2 dla l.p. di 12 d’otober dl 2007, n. 10.
L’art. 11, comma 6 é impröma gnü sostituí dal art. 6 dla l.p. di 28 de novëmber dl 1996, n. 23 y dedô él gnü mudé insciö dal art. 20, coma 2 dla l.p. di 24 de setëmber dl 2019, n. 8.
Le coma 8 é gnü sostituì dal art. 6, coma 3 dla l.p. di 12 d’otober dl 2007, n. 10.
Le coma 9 é gnü ajuntè dal art. 6 dla l.p. di 28 de novëmber dl 1996, n. 23, y mudé dal art. 6, coma 4 dla l.p. di 12 d’otober dl 2007, n. 10.