f) Lege Provinziala di 1 de jügn dl 1983, n. 131)
Sostëgn dl sorvisc por la jonëza tla Provinzia de Balsan

(1) Les domandes de contribut mëss gní presentades ala repartiziun provinziala competënta cina al termin stabilí vigni ann dala Junta provinziala. Les domandes de contribut che vëgn presentades do da chësc termin pó ma gní tutes en conscidraziun por i fins preodüs dal articul 9, coma 4, lëtra a), ater co sce ara se trata de cumpres, laurs y prestaziuns de sorvisc che ó ester por che les ativités pois jí inant cun continuité, sciöche ince de spëises por ativités nia periodiches o a vigni moda nia sön le program ala data de chësc termin.

(2) Pro vigni domanda mëssel ester chësta documentaziun:

1. por i fins preodüs dal articul 9, coma 4, lëtra a):
   
   1. la descriziun dla destinaziun d'adoranza y dl'utilisaziun dla strotöra aladô dl articul 6, coma 1, lëtra a), sciöche ince la presentaziun dles rajuns che iustifichëia les cumpres y i laurs;
      
   2. le proiet preliminar o esecutif;
      
   3. le preventif dles spëises y le plann de finanziamënt;
      
2. por i fins preodüs dal articul 9, coma 4, lëtra b):
   
   1. la presentaziun dles rajuns che iustifichëia les cumpres y i laurs;
      
   2. le preventif dles spëises y le plann de finanziamënt;
      
3. por i fins preodüs dal articul 9, coma 4, lëtres c), d) y e):
   
   1. le program anual;
      
   2. le preventif dles spëises y le plann de finanziamënt;
      
   3. la relaziun sön l'ativité dal ann da denant.
      

(3) L'ofize provinzial competënt por le sorvisc por la jonëza á l'autorisaziun da damané documënc eventuai implü che al arata debojëgn por l'elaboraziun dles domandes.

(4) I contribuc aladô dl articul 11 vëgn conzedüs cun decret dl'assessuria provinziala competënta/dl assessur provinzial competënt che determinëia l'impëgn de spëisa y les modalités de licuidaziun.

(5) Sön i contribuc assegná aladô de chësta lege pól gní conzedü antizipaziuns cina alplü l'80 porcënt di contribuc singui. Les antizipaziuns vëgn paiades fora, do avëi presenté domanda, cun decret dl'assessuria provinziala competënta/dl assessur provinzial competënt te n iade o te de plü rates.

(6) Por garantí la continuité dl'ativité sciöche ince dla gestiun dles strotöres vëgn l'assessuria provinziala competënta/l'assessur provinzial competënt autorisé, cina che i planns anuai vëgn aprová y sön domanda fondada aposta, da conzede cun n so decret antizipaziuns che amunta al 50 porcënt di contribuc ordinars conzedüs tratan l'ann finanziar da denant.  12)

(7) Les organisaziuns, a chëres che al ti é gnü assegné les antizipaziuns preodüdes dal coma 6, pó damané na secunda antizipaziun sön le contribut che ti é gnü assegné definitivamënter cun le plann anual a chël che la domanda de finanziamënt fej referimënt. Chësta secunda antizipaziun che vëgn assegnada cun decret dl'assessuria provinziala competënta/dl assessur provinzial competënt ne pó nia ester majera co la desfarënzia danter l'antizipaziun bele conzedüda y l'80 porcënt dl finanziamënt stabilí tl plann anual. Chësta secunda antizipaziun pó gní paiada fora döta te n iade o te de plü rates.

(8) Tl respet de ci che é preodü dal articul 9, coma 2 dla lege provinziala di 29 de jená dl 2002, n. 1, y mudaziuns suandëntes, ti mëss le decunt dles spëises sostignides gní dé jö ala repartiziun provinziala competënta cina le termin fat fora tl provedimënt de conzesciun dl finanziamënt, y a vigni moda, cina la fin dl ann do le provedimënt de conzesciun dl finanziamënt o de adebitaziun dla spëisa, sce desvalí.  13)

(9) Sön domanda di benefiziars comana la direturia/le diretur dl ofize provinzial competënt la licuidaziun di contribuc assegná. Pro vigni domanda mëssel ester la documentaziun dles spëises de döt le contribut conzedü. Cun l'autorisaziun dla Junta provinziala pól gní azeté tl contest di contribuc preodüs dal articul 9, coma 4, lëtra a) ince documënc de spëisa che é gnüs a s'al dé dan dal ann de conzesciun dl contribut sce ai reverda la medema strotöra o le medemo frabicat oget dl contribut.

(10) Tl respet dles sanziuns penales ne pó i documënc de spëisa injuntá nia gní adorá por ciafé d'atri vantaji economics da pert de ënc publics sce al ne vëgn nia conzedü l'acumulaziun ti limic dla spëisa mascima; sce an ne se tëgn nia a chësta desposiziun vëgnel revoché i contribuc.

(11) La licuidaziun di contribuc pó gní fata döta te n iade o te de plü rates. 14)