b) Lege provinziala di 13 de forà dl 2023, n. 31)
Sconanza di habitat d’ega y pëscia sostignibla

(1) Chësta lege regolamentëia la sconanza di habitat d’ega y la pëscia sostignibla te eghes da pëscia y eghes stlütes tl respet dles normes varëntes dl’UE, statales y provinziales sön la sconanza dles eghes, la sconanza dla contrada, la sconanza dla natöra y les operes idrauliches.

(2) Por les eghes stlütes vëgnel ma apliché les desposiziuns sön le mantignimënt dles eghes de suraspersa, la verda dla composiziun dles sorts, la sconanza dles sorts de pësc, la sanité di pësc, i dovëis dl ofize provinzial competënt por la pëscia denominé da chiló inant “Ofize”.

(1) Cun chësta lege dessel gní arjunt chisc obietifs:

1. la garanzia de na «bona condiziun» di rüs, di lec y dles eghes de sotfunz aladô dla diretiva 2000/60/CE dl Parlamënt europeich y dl Consëi di 23 d’otober dl 2000, che istituësc n cheder por l'aziun comunitara en materia de eghes;
   
2. le mantignimënt seminatural y le mioramënt dles eghes de suraspersa, sciöche ince di pësc dl post coliá impara, dantadöt di pësc, dles lampredes, di decapods y dles cozes d’ega ducia (Unionids), ince tres l’individuaziun de trasses de sconanza dla pëscia;
   
3. la regolamentaziun dla pëscia y di dërc de pëscia, l'assegnaziun de conzesciuns da pié pësc, la regolamentaziun dla coltivaziun dles eghes da pëscia y dla pëscia;
   
4. la sconanza dl interes publich y l'avaliaziun da pert dl Ofize dl interes publich cun i interesc privac di sogec che á dërc da pié pësc, de che che eserzitëia l’acuacoltöra, dles assoziaziuns, di/dles pëiapësc y di proprietars/dles proprietares di terac.
   

(1) Por i fins de chësta lege velel chëstes definiziuns:

• a) “eghes de suraspersa” é düc i lec y düc i rüs. Les eghes de suraspersa vëgn partides sö te “eghes da pëscia” y “eghes stlütes”;
  
• b) “eghes da pëscia” é dötes les eghes che rogor y chites, ince sot tera ite, dades dant tl register aposta. Le register dles eghes da pëscia é metü adöm dala cartografia provinziala, che vëgn ajornada vigni ann dal Ofize, olache al vëgn porté ite chëstes eghes. Al vëgn conscidré eghes da pëscia ince les eghes diretamënter y funzionalmënter dlungia chëres classificades sciöche eghes da pëscia. La portignënza direta y funzionala án canche al é les condiziuns por n barat de pësc y de iambri de rü danter les eghes tutes en conscideraziun. Fajon referimënt ales sorts de pësc che vëgn dantadöt dant, partëscion sö les eghes da pësc te “eghes de salmonids” y “eghes de ziprinids”;
  
• c) “eghes che rogor” é eghes da pëscia che pó gní partides sö ciamó n iade por la sconanza spezifica dles sorts de pësc autoctones, sciöche la trota ermorisada y le timal (Thymallus thymallus), por podëi atué mosöres particolares de coltivaziun;
  
• d) “eghes stlütes” é dötes les acumulaziuns de eghes nia dades dant tl register y che ne toca nia diretamënter y funzionalmënter pro les eghes da pëscia, cun lapró, por ejëmpl, i lec por pié pësc, i implanc de acuacoltöra, sciöche i alevamënc de pësc o de iambri, i resservars artifiziai sciöche chi adorá por bagné o destodé i medefüch;
  
• e) “lec da pié pësc” é eghes de suraspersa naturales o artifiziales olache al vëgn tigní pësc por conzede da pié pësc;
  
• f) “acuacoltöra” é chës ativités, che se desfarenziëia dal pié pësc, por la produziun artifiziala y controlada da organisms d'ega, sciöche pësc da repopolamënt o da consum, crebesc y somiënc;
  
• g) n “lech da ziprinids” é fat de eghes da pëscia chites, olache al é dantadöt pësc a forma de ziprinids. Le register di lec da ziprinids fej pert dl register dles eghes da pëscia;
  
• h) n “lech de munt” é fat de eghes da pëscia chites naturales a n’altëza danter i 1.200 y i 1.800 metri s.l.m., olache al é dantadöt pësc salmonids. Le register di lec de munt toca pro le register dles eghes da pëscia;
  
• i) n “lech alpin” é fat de eghes chites naturales a n’altëza sura i 1.800 metri s.l.m. Le register di lec alpins toca pro le register dles eghes da pëscia;
  
• j) n “lech artifizial” é fat de eghes chites dër mudades, ampliades naturalmënter o artifiziales, metüdes tl register di lec artifiziai che toca pro le register dles eghes da pëscia;
  
• k) “adatades al post” vëgnel araté les sorts de pësc autoctones y les sorts de pësc d’ega ducia importantes por la pëscia reconesciüdes sciöche autoctones cun le decret dl Ministere dl Ambiënt y dla Segurëza energetica preodü dal articul 1, coma 837 dla lege di 30 de dezëmber dl 2021, n. 234, y stabilides por tres ti ecosistems locai aladô dl regolamënt d’esecuziun de chësta lege, che stabilësc ince sües mosöres minimales y i tëmps de proibiziun de prelevamënt. La lista tol ite ince i crebesc autoctons dl ordin di Decapods y les cozes d’ega ducia autoctones dl ordin Unionoida; 2)
  
• l) “sorts esotiches invasives” é chëres tl Regolamënt (UE) varënt n. 1143/2014 dl Parlamënt europeich y dl Consëi di 22 d'otober dl 2014, sön les desposiziuns por schivé y gestí l’introduziun y la difujiun dles sorts esotiches invasives;
  
• m) “l’Ofize” é l’ofize dl’Aministraziun provinziala competënt tl raiun dla provinzia por l’atuaziun de chësta lege y por i compic preodüs dal articul 15;
  
• n) i “consorc de bonificaziun” é aladô de chësta lege ma i ënc publics preodüs dal decret roial di 13 de forá dl 1933, n. 215, y mudaziuns suandëntes;
  
• o) le “regolamënt sön la pëscia” é metü adöm da normes laurades fora da che che coltivëia les eghes da pëscia, al vëgn aprové dal Ofize y injunté al plann anual de coltivaziun. Al contëgn dötes les regoles che mëss gní osservades da pié pësc y pó contigní desposiziuns plü sciodes co la lege y le regolamënt d'esecuziun;
  
• p) “che che coltivëia les eghes da pëscia” é la porsona fisica che, sciöche titolar/titolara o afitadin/afitadina dl dërt da pié pësc, o sön inciaria dl soget titolar o afitadin, pratichëia la coltivaziun dles eghes da pësc y é responsabla de chësta coltivaziun ti confrunc dl Ofize;
  
• q) le “dërt da pié pësc” é le dërt da pié pësc tles eghes da pëscia a chëres che le dërt se referësc y da conzede da pié pësc iló, cun le dovëi da coltivé les eghes tl respet dles desposiziuns de chësta lege, de so regolamënt d'esecuziun y dl plann anual de coltivaziun;
  
• r) le “dërt da pié pësc esclusif” é n dërt privat, ince independënt dala proprieté dl raiun, y é alienabl;
  
• s) i “dërc da pié pësc da eserzité deboriada” é de plü dërc da pié pësc esclusifs che vel contemporaneamënter por les medemes eghes da pëscia;
  
• t) le “dërt parzial nia despartí da pié pësc” é n su dërt da pié pësc esclusif partí sö danter de plü titolars/titolares;
  
• u) le “dërt de mensa” é n dërt da pié pësc esclusif metü sö storicamënter, limité ai bojëgns de na familia, che pó ma gní ghiré da n mesc stlüt;
  
• v) le “dërt da pié pësc provinzial” é n dërt da pié pësc de proprieté dla Provinzia autonoma de Balsan, che l’Ofize pó dé en conzesciun;
  
• w) na “trassa de sconanza dla pëscia” é eghes da pëscia che presentëia condiziuns vantajoses por ej. por la deponüda di üs o por la chersciüda di avanoc, o adatades al invernamënt di pësc; chësc vel sides por les sorts che é sotmetüdes ala pëscia che por chëres che ne l'é nia. Tles trasses de sconanza dla pëscia é la pëscia proibida;
  
• x) la'“cherta da pié pësc” é n’autorisaziun da pié pësc nia da trasferí a terzi, relasciada a che che coltivëia les eghes da pëscia aladô dles indicaziuns dl Ofize por na trassa spezifica de eghes da pëscia y por n tëmp definí;
  
• y) le “repopolamënt de pësc” ó dí mëte certes sorts de pësc te eghes de suraspersa. Le repopolamënt inizial mira al insediamënt o reinsediamënt de sorts adatades al sit; le repopolamënt de sostëgn mira esclusivamënter al raforzamënt di popolamënc de pësc salvari adatá al sit. Tramidui vëgn fac cun üs fecondá, avanoc o pësc dl ann. Le repopolamënt d'atrativité é n’imisciun de pësc arjigná da gní piá che á le fin da incrementé la biomassa che pó gní piada y smendrí insciö la presciun de pëscia sön les sorts de pësc autoctones sot a sconanza;
  
• z) l’“eserzize dl pié pësc” o “la pëscia” ó dí pié o copé organisms viënc tles eghes da pëscia, en conformité cun l’etica dla pëscia. La sopresciun vëgn ma fata por rajuns alimentares, por se procuré paisses o por fins scientifics o igienich-veterinars. Les sorts esotiches invasives mëss gní copades. Pié pësc é ince canche an stá iló cun stromënc por pié pësc o an i arjigna ca sön l'ur dles eghes da pëscia, laite o sön n punt suraía;
  
• aa) la “manutenziun ordinara” fata dai consorc de bonificaziun é sié la vegetaziun d'ega dl let dl funz bagné di fossá. Da desfiré chësta ativité mësson assolutamënter schivé che les atrezadöres da sié arjunjes le sotfunz di fossá. Al toca pro la manutenziun ordinara ince l’ativité da restabilí toc de spona jüs en roa canche chësc ne gaujëia nia dagns al funz dl fossé;
  
• bb) la “manutenziun straordinara” fata dai consorc de bonificaziun é le prelevamënt de sedimënc dal let dl rü bagné di fossá por na lunghëza de passa 5 metri, sciöche ince da restabilí toc de spona jüs en roa canche chësc gaujëia dagns al funz dl fossé. N iade al ann fej i rapresentanc dl consorz de bonificaziun y i rapresentanc dl Ofize deboriada n surapost cun la porsona che coltivëia eghes da pëscia competënta;
  
• cc) l’“ativité da pié pësc” tol ince ite le pié pësc nia a livel profescional cun l'adoranza de atrezadöres particolares y modalités ametüdes da chësta lege;
  
• dd) “agí aladô dl’etica dla pëscia” ó dí traté le pësc cun cura, ti dé la poscibilité da sciampé, ne ti gaujé nia soferënzes por nia y favorí n prelevamënt seletif. Normes plü spezifiches vëgn stabilides tl regolamënt d’esecuziun.
  
• ee) “jí a pié pësc” é n’anotaziun tla cherta da pié pësc. Te n de da jí a pié pësc ván un o plü iadi a pié pësc.
  

(1) L’Ofize realisëia inrescides y monitoraji, ince abinan i pësc, por sconé le patrimone di pësc y la composiziun dles sorts autoctones y de chëres d’ega ducia d’interes por la pëscia reconesciüdes sciöche autoctones cun le decret dl Ministere dl Ambiënt y dla Segurëza energetica preodü dal articul 1, coma 837 dla lege di 30 de dezëmber dl 2021, n. 234. 3)

(2) L’Ofize pó autorisé ince terzi da eserzité les ativités preodüdes dal coma 1, y chël plü avisa aladô dles modalités stabilides cun le regolamënt d’esecuziun de chësta lege, tl respet dles indicaziuns preodüdes dal decret dl Presidënt dla Republica di 8 de setëmbre dl 1997, n. 357. 4)

(3) Al é proibí da mëte tles eghes de suraspersa sorts aloctones de pësc, crebesc y concores fosces d’ega ducia, sciöche ince varietés o pools genetics de sorts autoctones forestes. Tl respet de normes de livel plü alt pó le plann anual de coltivaziun autorisé ezeziuns a chësta regola, por conservé balanzes ecologiches esistëntes. Tles eghes stlütes, ater co chëres de eghes da pëscia por chëres che al vëgn apliché les normes varëntes dl’UE y statales, ne vel la proibiziun dessura nia, sce la sort corespognënta é contignida tla lista preodüda dal regolamënt d'esecuziun de chësta lege.

(4) Les prescriziuns y les mosöres de prevenziun, limitaziun y control dla difujiun, sciöche de sopresciun dles sorts esotiches invasives vëgn atuades aladô dles normes dl'UE y statales varëntes.

(5) Tut fora les chestiuns penales vëgnel, tl caje de inosservanza dles prescriziuns preodüdes dal coma 1, fat paié sanziuns aministratives pecuniares da 200,00 a 2.000,00 euro. Tl caje de violaziun dles prescriziuns preodüdes dal coma 3 vëgnel fat paié sanziuns aministratives pecuniares da 300,00 a 3.000,00 euro.

(1) Por vigni intervënt tles eghes da pëscia ti damana le soget comitënt l’autorisaziun al Ofize altamo 30 dis dan le scomenciamënt di laurs; tl’autorisaziun relasciada pól ester prescriziuns. Le soget che fej domanda atuëia dötes les mosöres por la sconanza dles sorts, la recostitiziun dl habitat d'ega tan inant che al é poscibl y so mioramënt, y ti ret a che che coltivëia les eghes da pëscia i dagns al patrimone de pësc. Por chësc fin pó l’Ofize scrí dant da paié ite na cauziun sciöche garanzia dl'esecuziun di laurs coreta. Les desposiziuns vëgn stabilides cun regolamënt d'esecuziun.

(2) Por i intervënt fac tl let dl rü bagné dles eghes da pëscia dal’Agenzia provinziala por la Proteziun zivila, dal’Agenzia provinziala por l’ambiënt y la sconanza dl clima, dala Repartiziun provinziala Bosć o dala Repartiziun provinziala Sorvisc strades, sciöche ince por i intervënc de manutenziun straordinara fac dai consorc de bonificaziun, tlechel la comunicaziun al Ofize. Por i intervënc defora dal let dl rü bagné dles eghes da pëscia y por i intervënc ordinars di consorc de bonificaziun ne ól ester degöna comunicaziun. Do avëi consulté la porsona che coltivëia eghes da pëscia interessada, stabilësc l’Ofize les mosöres de sconanza dles sorts che gnará atuades dal’Autorité che fej i intervënc.

(3) Sce en ocajiun di intervënc preodüs dai comesc 1 y 2 ne vëgnel nia respeté les prescriziuns stabilides tl’autorisaziun, ne él nia gnü fat la comunicaziun preodüda o sce i intervënc vëgn fac zënza l’autorisaziun, pó le diretur/la direturia dl Ofize despone, cun n so provedimënt, atira la sospenjiun di laurs; le provedimënt, che contëgn ince na descriziun dla situaziun dl fat azerté, ti vëgn notifiché da n agënt forestal/n'agënta forestala ai sogec responsabli dl’infraziun y ai sogec responsabli tl raiun. Tl caje de inosservanza dl provedimënt vëgnel tripliché la sanziun aministrativa pecuniara preodüda dal coma 16.

(4)Tl caje d'intervënc de prescia canche al manacia n prigo fac dai Comuns, dal’Aministraziun provinziala, dai consorc de bonificaziun o dai sogec conzescionars ti vëgn la comunicaziun ortiada al Ofize te 72 ores dal scomenciamënt di laurs.

(5) I sogec proprietars de implanc o de strotöres che impedësc o limitëia dassënn y tresfora la mobilité di pësc söpert o jöpert mëss realisé, tl respet dl Plann general dl’adoranza dles eghes publiches, y mantigní l'efiziënza surantolon i cosć de istalaziuns adatades da conzede le passaje di pësc tles döes direziuns. An pó desvié da chësta oblianza por limité la difujiun de maraties, por tigní sot a control sorts invasives, por rajuns genetiches, sciöche l’insediamënt de pools genetics de sorts manaciades, o tl caje de vijinanza a implanc de drenaje. Les desposiziuns menüdes sön les istalaziuns che conzed la mobilité di pësc vëgn stabilides cun regolamënt d'esecuziun.

(6) I sogec che á les conzesciuns de derivaziun d'ega mëss istalé, aladô dl Plann general dl’adoranza dles eghes publiches, injins che impedësc l’entrada de pësc tles condütes de presciun y tles turbines, y se cruzié da mantigní tresfora le funzionamënt de chisc injins. Les desposiziuns menüdes sön i inijins de proteziun vëgn stabilides cun regolamënt d'esecuziun.

(7) Por derivaziuns d'ega o stuades vëgnel stabilí tl’autorisaziun, tl respet dl Plann general dl’adoranza dles eghes publiches, le deflus vital minimal che vá debojëgn por la coltivaziun dles eghes da pëscia y por la sconanza di habitat d'ega, che mëss gní mantigní por döta la trassa sot la derivaziun d'ega o la stuada. Por les derivaziuns nöies por n fin idroeletrich mëss le deflus vital minimal nominé dessura tles eghes da pëscia adatades ala coltivaziun autonoma, ester a vigni moda de altamo 50 litri al secunt.

(8) Sce les eghes da pëscia vá sura les spones fora, pó che che coltivëia les eghes da pëscia recuperé i pësc ti raiuns inagá, ince sce ai é privac, tl respet dles desposiziuns dl Codesc zivil en materia d’azes al terac de d’atri. 5)

(9) Sce do le deflus dl’ega dai terac inagá romagnel ciamó pësc tles fopes o te d'atres büjes nia coliades cun les eghes da pëscia, á che che coltivëia les eghes da pëscia le dërt da i recuperé te set dis y da i mëte indô tles eghes da pëscia, ater co les sorts esotiches invasives. 6)

(10) Tratan i intervënc de manutenziun di fossá mëss le soget comitënt s'assiguré che i sedimënc da asporté vëgnes controlá a man tratan i laurs, chirin i organisms viënc che mëss indô gní metüs t'ega cun atenziun.

(11) Che che gestësc eghes stlütes mëss adoté dötes les mosöres che vá debojëgn por che al ne vëgnes nia a se le dé, ince te caji straordinars, passaji de pësc.

(12) Sce al vëgn a se le dé intervënc de terzi ti fossá de bonificaziun, informëia l’Ofize le consorz competënt y le consorz l'ofize competënt.

(13) Les ativités sportives y dl tëmp lëde te eghes che rogor é proibides. La Junta provinziala pó stabilí ezeziuns por chësta proibiziun. Chëstes ezeziuns mëss gní motivades a na moda adatada ponsan ai obietifs de sconanza di habitat d'ega stabilis da chësta lege.

(14) Sce al vëgn dant n'alteraziun importanta dl ecuiliber ecologich danter le popolamënt di pësc y sü predaturs, adotëia l'Ofize les mosöres adatades o al inciaria da arjigné indô ca l’ecuiliber.

(15) L’Ofize pó ti scrí dant al soget comitënt di laurs le dovëi da mëte dlungia la direziun di laurs n consulënt ecologich/na consulënta ecologica de pësc, sce al é la poscibilité che al vëgnes a se le dé faziuns importantes sön les eghes da pëscia.

(16) Tl respet dles desposiziuns penales y dla poscibilité de na responsabilité zivila, vëgnel fat paié por la violaziun dles desposiziuns preodüdes dai comesc 1, 5, 6, 10, 11 y 13 sanziuns aministratives pecuniares da 400,00 a 2.000,00 euro. Por la violaziun di comesc 2 y 4 él da paié sanziuns aministratives pecuniares da 200,00 a 1.000,00 euro. Sce i intervënc da sanzioné vëgn fac sön na trassa de sconanza dla pëscia, vëgn la sanziun aministrativa pecuniara radoplada. Sce al ne vëgn nia respeté le deflus vital minimal preodü dal coma 7, vëgnel dé tl caje de implanc cun na potënza nominala anuala mesana mëndra o anfat a 220 kW na sanziun aministrativa pecuniares da 4.000,00 a 15.000,00 euro, tl caje de implanc cun na potënza nominala anuala mesana danter 221 y 3.000 kW vá la sanziun da 12.000,00 a 39.000,00 euro y tl caje de implanc cun na potënza nominala anuala mesana de passa 3.000 kW vá la sanziun da 20.000,00 a 200.000,00 euro.

(1) Por n monitoraje da faziun dla sanité di pësc ti segnalëia atira les porsones che eserzitëia l’acuacoltöra, che che gestësc implanc che interagësc cun eghes da pëscia y les porsones che á sura la verda sön la pëscia al Ofize vigni möria de pësc y vigni fat che podess fá miné che al vëgnes a se le dé prighi, dagns o maraties por i pësc.

(2) Che che coltivëia les eghes da pëscia mëss da atira inant atué dötes les desposiziuns che vëgn dal Ofize o dal Sorvisc veterinar provinzial por la prevenziun y la scombatüda de maraties eventuales.

(3) Por schivé maraties di pësc pó l’Ofize despone, tl caje che al vëgnes sospeté n'infeziun, prelevamënc da ci ega chessî de ejemplars che an arata sides gnüs contaminá.

(4) An ne pó nia somené pësc amará o che an arata sides amará.

(5) Por schivé o limité la difujiun de maraties pó l’Ofize despone mosöres straordinares, ince desvian dai planns de coltivaziuns aprová.

(6) Tl caje de violaziun dles desposiziuns preodüdes da chësc articul vëgnel dé sanziuns aministratives pecuniares da 400,00 a 2.000,00 euro.

(1) Les trasses de sconanza dla pëscia de dërt é:

1. les istalaziuns che conzed le passaje di pësc tles döes direziuns y les trasses d’ega cina a na destanza de diesc metri da chëstes;
   
2. les eghes da pëscia sön chëres che al n'é nia dërc esclusifs da pié pësc y chëres che ne é nia gnüdes dades, en conzesciun por pié pësc dala Provinzia, cina che al vá en forza chësta lege;
   
3. les eghes da pësc nia adatades ala coltivaziun. L’Ofize pó ciafé sö, por rajuns de carater ecologich-gestional, do avëi aldí le titolar/la titolara dl dërt da pié pësc, certes eghes da pëscia nia adatades ala coltivaziun de pësc. Pro chësta categoria tochel por lege dötes chës formes de eghes da pësc olache la formaziun de n popolamënt d'ega permanënt ne pó nia ester por gauja de condiziuns naturales spezifiches, sciöche por ejëmpl na portada d'ega ma periodica;
   
4. eghes nöies.
   

(2) L’Ofize pó stlü jö cun le titolar/la titolara de n dërt da pié pësc n'acordanza contratuala por ciafé sö les trasses de sconanza dla pëscia o atué na gestiun sostignibla dl pié pësc. La Junta provinziala emanëia les desposiziuns sön le stlü jö i contrac, la sort y la mosöra dles retüdes y i dovëis, les condiziuns y i termins coliá cun i contrac.

(3) Tles trasses de sconanza dla pëscia él proibí da pié pësc y vigni atra ativité de pëscia che pó danejé o desturbé i pësc. L’Ofize pó despone ezeziuns motivades.

(4) I raiuns olache al é proibí da pié pësc che é bele pó gní revocá dal Ofize sce al n'é nia plü les condiziuns istitutives.

(5) Por vigni raiun olache al é proibí da pié pësc determinëia la Junta provinziala les ativités che pó gaujé mudaziuns che döra al habitat d'ega y stabilësc cares che pó gní eserzitades cun limitaziuns y cares zënza, don na motivaziun adatada. La Junta provinziala pó ala medema manira detlaré ambiënc naturai sconá i decursc d’ega, o toc de chisc, che á na valënza particolara dal punt de odüda ecologich o che costituësc n habitat de pësc ra, y proibí dailó la realisaziun de derivaziuns idriches nöies y implanc de de vigni sort.

(6) Sce an ne se tëgn nia ales desposiziuns preodüdes dai comesc 3 y 5 él da paié na sanziun aministrativa pecuniara da 200,00 a 2.000,00 euro.

(1) I dërc da pié pësc vëgn scric ite te n cataster dles eghes da pëscia aministré dal Ofize. I dërc da pié pësc che é bele é da tigní tres ajorná. Cun regolamënt d'esecuziun vëgnel definí les desposiziuns tl detai, ince por ci che reverda la conzesciun di dërc da pié pësc provinziai, sciöche ince l’individuaziun dles eghes da pëscia.

(2) Le cataster dles eghes da pëscia é metü adöm da:

1. n register dles porsones cun le dërt da pié pësc che tol ite le dërt de mensa y le dërt da pié pësc en comunanza;
   
2. na cartografia de suravijiun olache al vëgn dé dant i confins di singui dërc da pié pësc;
   
3. na racoiüda di documënc che alda pro vigni dërt da pié pësc.
   

(3) I dërc da pié pësc ti pó gní trasferis a terzi tres contrat. Les desposiziuns menüdes vëgn stabilides cun le regolamënt d’esecuziun.

(4) Le titolar/La titolara dl dërt da pié pësc che n'á nia i recuisic damaná por eserzité la funziun de che che coltivëia les eghes da pëscia ti comunichëia al Ofize te 30 dis, l'inom dla porsona che coltivëia eghes da pëscia a chëra che al ti é gnü surandé chësta inciaria.

(5) L’acuisiziun de n dërt esclusif da pié pësc é da ti lascé alsavëi al Ofize te 30 dis.

(6) I dërc da pié pësc en comunanza ne pó nia gní metüs sö ex novo.

(7) I dërc da pié pësc pó gní despartis o metüs sö ex novo impormó do la valutaziun dl Ofize cun decret dl assessur/dl’assessuria de competënza. I criters de referimënt vëgn stabilis cun le regolamënt d’esecuziun.

(8) I dërc da pié pësc che toca pro n mesc stlüt vëgn ince sotmetüs ales desposiziuns sön i mesc stlüc.

(9) I dërc da pié pësc esclusifs pó gní afitá. L’afitadin/afitadina é por dötes les faziuns de chësta lege la porsona che coltivëia les eghes da pëscia. La porsona che afitëia mëss ti ortié na copia dl contrat d’afit registré al Ofize te 30 dis dala registraziun dl contrat.

(10) Sce al n'é nia n dërt da pié pësc esclusif sön les eghes da pëscia, ti speta le dërt da pié pësc ala Provinzia autonoma de Balsan y al pó gní assegné en conzesciun dal assessur competënt/dal'assessuria competënta por n tëmp danter cin' y chinesc agn, tl respet dles conzesciuns da pié pësc che é bele. Tl at de conzesciun fej fora l’Ofize les desposiziuns por la coltivaziun dles eghes.

(11) Sce les eghes originariamënter stlütes vëgn scrites ite tl register dles eghes da pëscia, ti speta le dërt che alda lapró da pié pësc ala Provinzia autonoma de Balsan, che pó assegné les eghes da pësc en conzesciun; te chësc caje á la porsona che ê denant proprietara dles eghes stlütes n dërt de prelaziun.

(12) Sce n decurs d’ega müda so let do evënc naturai o sciöche conseguënza de mosöres artifiziales, se desleria fora i dërc da pié pësc esistënc ince al decurs d’ega mudé.

(13) I dërc da pié pësc esclusifs vëgn anulá sce an ne s'un á nia anuzé por cin' agn indolater o tl caje de de gran violaziuns dl plann anual de coltivaziun cun dagns che döra al habitat d'ega o al popolamënt de pësc. La destodada vëgn detlarada cun n decret dl diretur/dla direturia dl Ofize che pó gní registré pro le liber fondiar zënza le consëns dla comisciun por i mesc stlüc locala.

(14) Tl caje de derivaziuns idriches te eghes da pëscia o renovada de conzesciuns idriches te eghes da pëscia che á faziuns nia da trascuré, él da ti presenté, te 90 dis dala racioiüda dla comunicaziun dla dezijiun dla conferënza di sorvisc en materia ambientala, al ofize competënt n’intenüda sön le smendrimënt dl valur dl dërt da pié pësc. Sce an n'arjunj nia n'acordanza danter les perts, mëss le soget che fej domanda ti presenté al titolar/ala titolara dl dërt da pié pësc na sciazada sön le smendrimënt dl valur dl dërt da pié pësc. Sce an n'arjunj porimpó nia n’intenüda vëgn la conzesciun de derivaziun relasciada, o renovada, tl respet dl dërt de retüda dl dann dl titolar/dla titolara dl dërt da pié pësc. Les desposiziuns menüdes gnará portades ite cun regolamënt d'esecuziun.

(15) Sce le titolar/la titolara dl dërt da pié pësc ne trasmët nia les comunicaziuns aladô di comesc 4 y 5 o la copia dl contrat d’afit registré aladô dl coma 9 ti tëmps preodüs, él da paié na sanziun aministrativa pecuniara de 100,00 euro.

(1) Che che coltivëia les eghes da pëscia á en general dërc y dovëis por che la coltivaziun dles eghes da pëscia sides sostignibla te so cheder de competënza por dötes les sorts, cun lapró les concores fosces d’ega ducia y i decapods. Dantadöt che che coltivëia les eghes da pëscia:

1. pó recuperé i pësc ti terac inagá, sce l'ega da pëscia vá sura la spona fora;
   
2. pó apié i pësc te set dis y i mëte indô te sües eghes da pëscia, do che l’ega é rogorüda demez, sce ai é romagnüs sön i terac, tles fopes o te d'atres büjes nia coliades cun les eghes da pëscia;
   
3. ti pó pormez, surantolon la responsabilité por le prigo, y meton averda sciöche al alda por schivé dagns, avisa sciöche al pó gní fat da che che á le dërt da eserzité la pëscia y dal personal ausiliar y de verda, a terac dlungia spones, isoles, punc y costruziuns idrauliches de d'atri, y pó ince fissé barches y atrezadöres, tan inant che chësc ó ester por l'eserzize regolar dla pëscia y por la coltivaziun y verda dles eghes da pëscia. Che che fej dagns tratan l'eserzize dla pëscia mëss refá le dann;
   
4. vëgn informé/informada dal Ofize sön i intervënc programá, anunziá y aprová, sciöche ince sön les inrescides ecologiches di pësc programades, dan le scomenciamënt di laurs;
   
5. pó dé so consëns da tó fora pësc por la fecondaziun artifiziala;
   
6. pó ghiré i pësc confiscá, apiá ilegalmënter y nia bugn da suravire;
   
7. pó ortié la domanda de contribut por la coltivaziun de eghes da pësc y por la verda sön la pëscia;
   
8. pó ti presenté al Ofize n azertamënt dla situaziun cualitativa y cuantitativa dl popolamënt de pësc de na trassa coltivada por na süa revalutaziun; les desposiziuns menüdes vëgn stabilides cun regolamënt d'esecuziun;
   
9. pó s'anuzé por la coltivaziun ince de stromënc y atrezadöres por l'apiada particolars.
   

(2) Che che coltivëia les eghes da pëscia:

1. ne pó nia realisé strotöres che podess impedí le passaje di pësc, ater co chëres autorisades dal Ofize;
   
2. mëss coltivé les eghes da pëscia tl respet dles desposiziuns de chësta lege, de so regolamënt d'esecuziun y dles prescriziuns dl Ofize;
   
3. mëss ti presenté al Ofize, ti termi preodüs, n plann anual de coltivaziun y ortié inant mudaziuns eventuales por eserzité so dërt. Les desposiziuns menüdes vëgn stabilides cun le regolamënt d’esecuziun;
   
4. mëss mëte les tofles che reverda sües eghes da pëscia d’intenüda cun i patruns y les patrones di terac, che che gestësc les operes dlungia les eghes y les autorités, aladô dl regolamënt d'esecuziun;
   
5. mëss controlé, canche al vëgn surandé les autorisaziun da pié pësc olache al vëgn anoté l'inom dl/dla pëiapësc, che al sides danman i recuisic por les ciafé;
   
6. mëss ti ortié ala fin dl ann de pëscia al Ofize les chertes da pié pësc adorades;
   
7. mëss ti comuniché por scrit al Ofize, altamo set dis dan l’esecuziun, vigni repopolamënt y l’adoranza de stromënc de piada particolars; les desposiziuns menüdes vëgn stabilides cun regolamënt d'esecuziun;
   
8. mëss respeté les desposiziuns veterinares;
   
9. mëss garantí na verda efiziënta sön sües eghes da pëscia;
   
10. mëss relascé les chertes da pié pësc aladô dles indicaziuns dl Ofize;
    
11. pó despone limitaziuns dla pëscia, romagnon tl cheder dl plann anual de coltivaziun;
    
12. ne pó nia abiné iambri zënza autorisaziun dl Ofize.
    

(3) Por les eghes da pëscia sön le confin danter les provinzies de Balsan y Trënt, che é por la maiú pert tl raiun dla provinzia de Trënt y olache la pert tla provinzia de Balsan n'arjunj nia n’estenjiun adatada a na coltivaziun a pert, ne vëgnel nia apliché les normes en materia varëntes tla provinzia de Balsan, sce ares é incompatibles cun les normes che vel tla provinzia de Trënt.

(4) Cun la jüda en forza de chësta lege devënta l’abilitaziun da pié pësc n recuisit essenzial por l’eserzize dla funziun de che che coltivëia les eghes da pëscia. La partezipaziun al curs por che che coltivëia les eghes da pëscia é n ater recuisit essenzial por che che ciafa chësta inciaria impormó do la jüda en forza de chësta lege.

(5) Sce les chertes da pié pësc ne ti vëgn nia retüdes al Ofize ti termi fac fora y nia tla mosöra dl 75 porcënt dles autorisaziuns da n de y dl 90 porcënt dles autorisaziuns anuales, ti surandá l’Ofize l'ann do a che che coltivëia les eghes da pëscia les autorisaziuns nöies cun n'intardiada da un a trëi mëisc do le scomenciamënt dla sajun da pié pësc tles eghes interessades.

(6) Tl caje de violaziun dles desposiziuns preodüdes dal coma 2, lëtres a), c), d), e) y g), vëgnel fat paié sanziuns aministratives pecuniares da 40,00 a 400,00 euro; por la violaziun dl coma 2, lëtres b), h), i) y j) vá la sanziun da 200,00 a 2.000,00 euro.

(1) La coltivaziun mira a na gestiun sostignibla dles eghes da pëscia, finalisada ala conservaziun y al sostëgn de n popolamënt de pësc adaté aladô dla consistënza, dla strotöra, dla composiziun dles sorts y dla produtivité naturala.

(2) Cun produtivité naturala dles eghes da pëscia él miné la cuantité de pësc te chilograms por etar che pó gní prelevada vigni ann zënza danejé le popolamënt de pësc aladô dl coma 1.

(3) La coltivaziun dles eghes da pëscia mëss garantí le svilup y la conservaziun de n popolamënt de pësc cualitativamënter y cuantitativamënter proporzioné ai faturs ambientai y ala presënza de predes t'ega, metü adöm da dötes les classes d'eté dles sorts adatades al sit por garantí la produtivité naturala.

(4) Tles eghes che mostra sö na cualité seminaturala, che á na portada d’ega che tëgn pro y basta, y n suzes de reproduziun tangibl se basëia la coltivaziun sön i pësc nasciüs tla natöra. Por les eghes dër mudades che ne conzed nia n svilup dl popolamënt de pësc adaté al sit vel chësc prinzip ma en pert, o ma en presënza de condiziuns particolares stabilides tl plann anual de coltivaziun.

(5) L’Ofize partësc sö les eghes da pëscia te toc che pó gní coltivá, tignin cunt di confins naturai dles eghes y di dërc da pié pësc.

(1) Cun deliberaziun dla Junta provinziala vëgnel stabilí desposiziuns plurienales che vel te döt le raiun provinzial por la coltivaziun dles eghes da pëscia, do avëi aldí les rapresentanzes di interesc preodüs dal regolamënt d'esecuziun. Chëstes desposiziuns, definides “plann strategich de coltivaziun”, stabilësc les modalités d'aplicaziun dles normes generales sön la coltivaziun tles sorts desvalies de eghes da pëscia y vel por de plü agn.

(2) Le plann de coltivaziun anual é le stromënt de planificaziun prinzipal a livel local y al é obligatore por vigni toch de eghes da pëscia coltivé; al ti vëgn presenté vigni ann por l’ann do al Ofize che l'aprovëia. Les desposiziuns menüdes vëgn stabilides cun le regolamënt d’esecuziun.

(3) Tl plann de coltivaziun anual di toc d'ega, olache al é habitat o sorts sconades, pól gní metü sö desposiziuns surapró.

(4) Le plann de coltivaziun anual pó preodëi, cun na motivaziun aposta, mosöres minimales y tëmps de proibiziun da prelevé sorts de pësc ince desvian dales desposiziuns che alda lapró.

(1) Le repopolamënt dles eghes é n stromënt de coltivaziun dles eghes da pëscia che vëgn ma ametüda sce ara ne vá nia da mëte a jí tla sort de eghes conscidrades, na produtivité de pësc che döres tl tëmp. Le repopolamënt n'é porchël nia n stromënt de coltivaziun che vëgn ametü tles eghes da pëscia caraterisades da funziuns ecologiches efiziëntes y da na produtivité naturala adatada. Cina ai 31 de dezëmber dl 2026 pól gní fat n repopolamënt en derogaziun al plann strategich de coltivaziun.

(2) La planificaziun spezifica di repopolamënc por les sorts desvalies de eghes da pëscia y i criters da ti jí do tl zidlamënt vëgn stabilis tl plann strategich de coltivaziun plurienala, aladô dles indicaziuns dl regolamënt d'esecuziun, y vëgn atuades dedô ti planns de coltivaziun anuai.

(3) N repopolamënt de atrativité vëgn ametüda te düc i resservars artifiziai do avëi ciafé l'autorisaziun dl Ofize.

(4) N repopolamënt de atrativité pó gní autorisé ince tles eghes da pëscia por chëres che al n'é nia da preodëi, porvia di dagns che é gnüs fac, na produtivité grana assá tl tëmp lunch y olache chësc repopolamënt ne porta nia pro a faziuns ecologiches significatives. Le danejamënt vëgn atira spezifiché tl plann strategich de coltivaziun plurienal y l’autorisaziun dl singul caje vëgn anotada tl plann de coltivaziun anual.

(5) Le zidlamënt por le repopolamënt dles sorts autoctones, sciöche la trota ermorisada, le ti

mol o les sorts de pici pësc, decapoc y concores fosces d’ega ducia autoctones, vëgn fat tl zënter de sconanza dles sorts acuatiches o te incubadus privac. A vigni moda mëssel gní osservé tl zidlamënt i criters sön la genetica y la situaziun de sanité di tiers preodüs tl plann strategich de coltivaziun.

(6) Les desposiziuns detaiades che reverda sides les cuantités mascimales conzedüdes por le repopolamënt, che i incubadus publics y privac atifs tla provinzia de Balsan, vëgn stabilides tl plann strategich de coltivaziun.

(1) Por arjunje i obietifs fissá da chësta lege, stabilësc le regolamënt d'esecuziun les regoles por pié pësc a na moda sostignibla. Chëstes regoles reverda i stromënc de piada conzedüs, i limic de piada al de y sajonai, i tëmps de proibiziun, les mosöres minimales y le numer dles sortides da pié pësc.

(2) Tles eghes da ziprinids él proibi da adoré le plom da pié pësc pian ia dal 1. de jená dl 2025.

(3) Tl caje de violaziun dles desposiziuns stabilides tl regolamënt d'esecuziun cun referimënt al coma 1 y al coma 2 de chësc articul mësson paié sanziuns aministratives pecuniares da 60,00 a 600,00 euro, tl respet di fac relevanc dal punt de odüda penal.

(1) Che che pëia pësc mëss avëi n documënt d’identité varënt, na lizënza da pié pësc varënta, l’abilitaziun da pié pësc y la cherta da pié pësc. I detais vëgn stabilis tl regolamënt d’esecuziun.

(2) La lizënza da pié pësc pó ester:

1. de sort B por les porsones cun la residënza tl teritore nazional; chësta sort de lizënza autorisëia ince da pié pësc cun la maza da pié pësc y le rampin y da pié pësc sot ega defora dal raiun dla provinzia de Balsan;
   
2. de sort D por les porsones che n’á nia la residënza tl teritore nazional.
   

(3) Les desposiziuns menüdes surapró vëgn stabilides cun le regolamënt d’esecuziun.

(4) Les lizënzes da pié pësc relasciades dales Regiuns talianes ales porsones cun la residënza te chës regiuns vel ince ti raiuns tla provinzia de Balsan.

(5) L’abilitaziun da pié pësc vëgn relasciada dal Ofize ales porsones che á cumplí 14 agn y passé l’ejam da pié pësc. I detais vëgn stabilis cun le regolamënt d’esecuziun.

(6) Al n'ó nia ester n’abilitaziun da pié pësc:

1. por les porsones che n'á nia la residënza tla provinzia de Balsan che á na cherta da pié pësc da n de;
   
2. tl caje de controi di popolamënc de pësc autorisá dal Ofize o de intervënc por sconé les sorts de pësc fac sön inciaria de che che coltivëia les eghes da pëscia o dl Ofize;
   
3. por porsones sot a 16 agn y porsones cun dejabilités aladô dla normativa statala varënta, tan inant che ares vëgn acompagnades da n/na pëiapësc che á l’abilitaziun da pié pësc.
   

(7) Le contignü y la validité dles chertes da pié pësc vëgn definis cun le regolamënt d’esecuziun.

(8) Por promöie la pëscia da pert di/dles pëiapësc jogn/jones vëgnel apliché le dërt da pié pësc adöm, aladô de chël che les porsones sot a 16 agn, ince zënza la lizënza da pié pësc, pó pié pësc sot le control y la responsabilité personala de na porsona che á cumplí 18 agn che á la lizënza da pié pësc, s'anuzan dl'autorisaziun da pié pësc de chësta porsona. Por ci che reverda le numer de mazes da pié pësc y le limit mascimal de apiades velel les limitaziuns dla cherta da pié pësc.

(9) Sce le/la pëiapësc n'á nia para un di documënc damaná aladô dl coma 1, mëssel gní paié na sanziun aministrativa pecuniara de 50,00 euro. Sce al/ara n'á indere nia un di documënc damaná mëssel gní paié na sanziun aministrativa pecuniara de 200,00 euro. Che che n'á nia para o n'á nia de plü documënc mëss paié na sanziun por vigni infraziun.

(10) Tl caje de violaziun dles desposiziuns de chësc articul pól gní secuestré i mesi de piada. Sce an ne vá nia a se dó i mesi secuestrá te sis mëisc dala data de paiamënt dla sanziun aministrativa pecuniara, tol le diretur/la direturia dl Ofize na dezijiun sön co i adoré. I pësc piá a na moda ilegala vëgn confiscá y, sce ara vá, metüs indô tles eghes; scenó ti speti a che che coltivëia les eghes da pëscia.

(1) L’Ofize se crüzia da avalié i interesc, armonisan te vigni caje l’interes publich por la sconanza di habitat d'ega cun i interesc privac legitims. Al ti vëgn dé la priorité al interes publich.

(2) L’Ofize á chisc dovëis:

1. cherié banches dac y gestí i dac, dantadöt fajon referimënt ai dërc da pié pësc, ales eghes da pëscia y a süa coltivaziun, sciöche ince ales statistiches dla pëscia, cun les inrescides sön i popolamënc de pësc;
   
2. relascé i documënc da pié pësc, dantadöt les lizënzes da pié pësc, l’abilitaziun da pié pësc y i formulars dles chertes da pié pësc;
   
3. conzede i dërc provinziai da pié pësc;
   
4. ejaminé, valuté y autorisé i intervënc tles eghes da pëscia;
   
5. refá o mantigní i popolamënc de pësc te na bona situaziun de conservaziun adatada al sit;
   
6. arjigné ca le plann strategich de coltivaziun plurienal provinzial, sciöche ince ejaminé y autorisé sü planns anuai de coltivaziun;
   
7. fá intervënc por la sconanza di habitat d'ega, ince autonomamënter;
   
8. ciaré sura les eghes da pëscia y ciaré che les desposiziuns sön le pié pësc vëgnes respetades;
   
9. monitoré les sorts esotiches invasives;
   
10. controlé les sorts de pësc y de iambri de rü esotiches invasives;
    
11. apliché les sanziuns aministratives;
    
12. dé consulënza en materia de habitat d'ega y de pëscia sostignibla;
    
13. realisé stüdi y surandé inciaries de stüdi te so ciamp de competënza;
    
14. stipulé convenziuns ince de de plü agn;
    
15. istruí y fá formaziuns ti seturs dl pié pësc y dla coltivaziun dles eghes da pëscia;
    
16. tigní ativités de formaziun tl setur dl pié pësc cun les zertificaziuns de idoneité coliades impara, cun lapró l’ejam da pié pësc, l’ejam por les porsones inciariades dla verda sön la pëscia y i cursc por che che coltivëia les eghes da pëscia;
    
17. sostigní tecnicamënter le zënter de sconanza dles sorts acuatiches;
    
18. deleghé i compic istituzionai al’organisaziun plü rapresentativa di interesc dl pié pësc tla provinzia de Balsan;
    
19. aministré le raiun da pié pësc y assegné i contribuc aladô dl art. 16;
    
20. realisé autonomamënter inrescides de ecologia itica tles eghes da pëscia.
    

(1) Al pó gní conzedü contribuc cina alplü le 70 porcënt dla spëisa conzedüda por l’istruziun y la formaziun de pëiapësc, de che che coltivëia l’ega da pëscia y porsones inciariades dla verda sön la pëscia, por la verda, por ativités por amplié y mioré le patrimone de pësc, por consulënzes sön i habitat d'ega y la pëscia sostignibla, sciöche ince por ativités de relaziuns publiches. I criters por la conzesciun di contribuc vëgn stabilis cun deliberaziun dla Junta provinziala.

(2) Al pó gní stlüt jö convenziuns aposta por l’esecuziun de intervënc por sconé i habitat d'ega, por la verda dles eghes da pëscia y por la verda dl respet dles desposiziuns sön la pëscia y le monitoraje dles sorts esotiches invasives.

(3) Aladô dles desposiziuns varëntes pó les strotöres dla Provinzia autonoma de Balsan, i ënc publics, les organisaziuns de rapresentanza y les assoziaziuns da pié pësc y che che coltivëia les eghes da pëscia damané do ressurses finanziares che vëgn dal’adoranza dles eghes publiches por rajuns idroeletriches. Chëstes ressurses é destinades ala conservaziun o al mioramënt di pësc dles eghes publiches y vëgn gestides tres le insciödit “fonds da pié pësc”.

(4) I cosć che vëgn da chësc articul de 155.000,00 euro por l’ann 2023, 155.000,00 euro por l’ann 2024 y 155.000,00 euro por l’ann 2025, vëgn curis tres le smendrimënt di stanziamënc scric ite tl fonds spezial “Fonds global por curí cosć che vëgn da provedimënc legislatifs nüs” por cosć corënc tl cheder dl program 03 dla misciun 20 dl bilanz de previjiun 2023-2025. Di eserzizi suandënc se cruzion cun la lege de bilanz.

(1) L’organisaziun plü rapresentativa a livel provinzial di sogec che á i dërc da pié pësc, de che che coltivëia l’ega da pëscia y di/dles pëiapësc rapresentëia i interesc de sü assoziá y sües assoziades, che ti vá do ala gestiun sostignibla di popolamënc de pësc y promöi la pëscia sciöche ativité de aurela cörta, tolon ite dantadöt la jonëza; chësta organisaziun pó fá sön inciaria dl Ofize ativités de interes publich, stipolan convenziuns aposta o damanan contribuc. Implü pó chësta organisaziun stlü jö convenziuns cun strotöres publiches che surantol les spëises.

(1) I patruns y les patrones di terac:

1. se tol dant da ne realisé nia mosöres che ne lascia nia nodé zoruch i pësc tles eghes duces da pié pësc;
   
2. azetëia les tofles sön les eghes da pëscia.
   

(2) I y les pëiapësc y le personal de verda:

1. ti pó pormez, surantolon le risch y le prigo y ciaran da ne danajé nia, ai terac publics y privac y fissé iló les barches y les atrezadöres, sce chësc vá debojëgn por pié pësc y coltivé y controlé indortöra les eghes da pëscia. Vigni porsona che fej n dann tratan che ara pëia pësc mëss refá le dann. Por rajuns de segurëza desmostrades pó l’azes gní proibí cun tofles de spligaziun aposta o mosöres somiëntes. A vigni moda mësson romagne a altamo 5 metri dai raiuns jöinsom y söinsom les stlütes y les atres operes idrauliches di consorc de bonificaziun; an ti pó pormez ai fossá de bonificaziun tl respet dles condiziuns preodüdes da chësc coma.
   

(3) I y les pëiapësc:

1. se comporta tl respet dl’etica dla pëscia. Les desposiziuns menüdes vëgn stabilides cun le regolamënt d’esecuziun;
   
2. ti dá indô a che che coltivëia l’ega da pëscia les chertes da pié pësc adorades y scrites fora ala fin dla sajun da pié pësc o ti trasmët i dac dá dant laite;
   
3. ciara sura sües massaries da pié pësc;
   
4. stá assá dainciará por ne se desturbé nia;
   
5. deura, sön domanda dles porsones inciariades dla verda sön la pëscia, i contignidus olache al vëgn conservé i pësc apiá;
   
6. ti segnalëia ai organs che á sura la verda sön la pëscia comportamënc o fac che gaujëia dagns ala natöra y al ambiënt.
   

(4) Tl caje de violaziun dles desposiziuns stabilides tl coma 1 y tl coma 3, lëtres c) y e), vëgnel fat paié na sanziun aministrativa pecuniara de 100,00 euro. Tl caje de violaziun de ci che é gnü fat fora dal coma 3, lëtra a) vëgnel fat paié na sanziun aministrativa pecuniara da 200,00 a 2.000,00 euro.

(1) La verda dl respet dles desposiziuns é n'inciaria dl corp forestal provinzial. Les funziuns de verda, cun lapró les mosoraziuns eventuales dl flus vital minimal, ti speta ales dependëntes y ai dependënc dl Ofize che á i recuisic aministratifs y de polizia iudiziara de verda iurada particolara inciariá aladô dles modalités preodüdes dal coma 2, sciöche ince ales y ai verdapëscia cun competënzes de polizia aministrativa. 7)

(2) Le diretur/La direturia dl Ofize nominëia les verdes iurades particolares che á sura la verda dla pëscia y dla ciacia aladô dl articul 163, coma 3 dl decret legislatif di 31 de merz dl 1998, n. 112.

(3) Les verdes iurades particolares pó desfiré sü compic de verda te döt le raiun provinzial zënza limic de tëmp y vëgn istruides y formades dal Ofize. Ares ciara te döt le raiun provinzial che al vëgnes respeté les desposiziuns de chësta lege y so regolamënt d'esecuziun; por ci che reverda les prescriziuns dl plann de coltivaziun anual áres ma competënza te so ciamp de verda.

(4) Che che violëia contemporanamënter cun n’aziun o omisciun de plü desposiziuns che prevëiga sanziuns aministratives vëgn sanzioné por vigni violaziun.

(1) La lege provinziala di 9 de jügn dl 1978, n. 28 vëgn abrogada. Les tofles sön le teritore vel inant cina che ares vëgn baratades fora cun les tofles nöies.

(2) Les lizënzes da pié pësc dla sort B y D varëntes canche chësta lege vá en forza mantëgn süa validité cina che ares toma; i organs che á sura la verda sön la pëscia romagn en ciaria cina che al toma so mandat.

(3) I planns de coltivaziun anuai por les singoles trasses de eghes da pëscia, bele aprová canche chësta lege vá en forza, romagn en forza cina ala fin dl ann de referimënt.

(4) Cina ai 31 de dezëmber dl ann de jüda en forza de chësta lege gnarál aprové na deliberaziun nöia dla Junta provinziala sön les ativités sportives y de aurela cörta.

(1) Tl respet de ci che vëgn preodü dal articul 16, se crüzion dl’atuaziun de chësta lege cun les ressurses umanes, stromentales y finanziares desponibles aladô dles normes varëntes y, a vigni moda, zënza de majeres spëises o spëises nöies a ciaria dl bilanz provinzial.

(2) La Repartiziun provinziala Finanzes pó fá cun sü decrec les mudaziuns de bilanz che ó ester.

(1) Chësta lege vá en forza al 1. de merz dl 2023. Chësta lege gnará publicada tl Boletin Ofizial dla Regiun. Vigni porsona a chëra che al ti speta mëss la respeté y la fá respeté sciöche lege dla Provinzia.