In vigore al

RICERCA:

Ultima edizione

g) Lege provinziala di 16 de messè dl 2018, n. 111)
Mosöres de prevenziun y d'intervënt che reverda i gragn carnivors. Atuaziun dl articul 16 dla diretiva 92/43/CEE

1)
Publicada tl suplemënt n. 4 dl Boletin Ofizial di 19 de messè dl 2018, n. 29. La verjium ladina é gnüda publicada tl B.O. di 20 de setëmber dl 2018, n. 38.

Art. 1  (Atuaziun dl articul 16 dla diretiva 92/43/CEE dl Consëi di 21 de ma dl 1992 sön la conservaziun di habitat naturai y seminaturai y dla flora y dla fauna salvares - Mosöres de prevenziun y d'intervënt por sconé l’apicoltöra da de gragn carnivors)

(1) Le Presidënt dla Provinzia pó, do avëi ciafé l'arat dl Istitut superiur por la proteziun y l'inrescida ambientala (ISPRA), ma por les sorts Ursus arctos y Canis lupus, autorisé da prelevé, pié o copé ejemplars de chëstes sorts, a condiziun che al ne sides nia n’atra soluziun y che chëstes aziuns ne preiudichëies nia le mantignimënt, te n stat de conservaziun che vá bun, dl popolamënt dles sorts interessades te so raiun de difujiun natural. Chëstes mosöres vëgn adotades por sconé la fauna y la flora salvares carateristiches dl’alpicoltöra y conservé i habitat naturai che alda lapró, pregní de gragn dagns, dantadöt ales coltivaziuns, al zidlamënt, ai bosć, al patrimone itich, ales eghes y ala proprieté, tl interes dla sanité y dla segurëza publica o por d'atres bones rajuns de gran interes publich, cun lapró les rajuns soziales o economiches, o rajuns che porta pro a conseguënzes positives de importanza primara por l’ambiënt. La Provinzia autonoma de Balsan garantësc da ti ortié al Stat les informaziuns che vá debojëgn por ademplí i dovëis de comunicaziun ala Comisciun europeica.

Art. 2  (Desposiziun finanziara)

(1) Chësta lege ne comporta nia spëises implü a ciaria dl bilanz provinzial.

Art. 3  (Jüda en forza)

(1) Chësta lege vá en forza le de do süa publicaziun tl Boletin Ofizial dla Regiun.

Chësta lege gnará publicada tl Boletin Ofizial dla Regiun. Vigni porsona a chëra che al ti speta mëss la respeté y la fá respeté sciöche lege dla Provinzia.