(1) L raion mescedà ie destinà dantaldut ala residënza y ala destinazions de nuzeda cumpatibles limpea che ne superea nia i lims de emiscion fissei dala Jonta provinziela.
(2) Tl raion mescedà muessa almanco l 60 percënt dl volum de frabica y dla sëuraspersa vester destinà a na nuzeda residenziela, ora che sce l volum de frabica vën adurvà per l ampliamënt de n’azienda che ie bele sun chëla luegia. Tl cajo de mancianza de na planificazion atuativa muessa chësc raport unì tenì ite per uni lot de frabica che ie oget de ntervënt. Cun uni ntervënt de costruzion nuef sun sperses nia frabichedes muessel unì realisà almaco l 80 percënt dla capazità de frabica despunibla per l lot de frabica. Cun lot de frabica iel minà na purzion de grunt che taca adum y a chëla che l’autorisazion a despusizion dl damandant/dla damandanta fej referimënt. L lot de frabica possa ënghe vester metù adum da de plu parzeles de cataster. Ti raions, te chëi che l ie, n basa a chësta lege o al plan cumenel, scrit dant l’ elaburazion de n plan de atuazion, iel nchin che chësc vën apurvà mé lascià pro i ntervënc aldò dl articul 62, coma 1, pustoms a), b), c) y d). 45)
(3) Restan mpe la despusizion particulera n cont dla detrazion dla sëurasperses de frabiches bele legitimamënter ejistëntes aldò dl articul 19, coma 3, y la despusizions dl articul 20, muessa l Chemun te uni cajo garantì che almanco l 60 percënt dl volum de frabica preudù sun la spersa individueda da nuef dl raion mescedà vënie resservà al frabiché alesirà, stlut ite l frabiché residenziel publich y soziel, y/o a cuatieres a priesc lià. Almanco l 40 percënt dl volum de frabica ntier preudù sun la spersa individueda da nuef dl raion mescedà muessa te uni cajo vester resservà per persones che à i recuisic per l’asseniazion de grunt da frabiché suvenziunà aldò dl articul 82, coma 5, dla lege provinziela di 17 de dezëmber 1998, n. 13, y mudazions suzessives, y/o per l frabiché residenziel publich y soziel. La ublianzes indichedes tla frases da dant ne vën nia a se l dé, sce l 80 percënt dl indesc de frabicabltà teritoriel stabilì ie bele unit arjont y almanco la metà dl volum de frabica ejistënt à la destinazion de nuzeda nunzieda tl articul 23, coma 1, pustom a). Per la sperses resservedes al frabiché residenziel alesirà y/o per i cuatieres a priesc lià vëniel scrit ite tl liber fundier l liam nunzià tl articul 39. Per la sperses per l frabiché alesirà vëniel anutà sun la basa dla delibra de asseniazion, ora che l liam nunzià tl articul 39, l liam soziel nunzià tla lege sun l frabiché alesirà. La ublianzes nunziedes tl articul 38 reverda la sperses che ne ie nia destinedes al frabiché alesirà o a cuatieres a priesc lià. 46) 47)
(3-bis) N acurdanza cun i sogec patrons, possel unì resservà tl plan de atuazion al frabiché alesirà o ai cuatieres cun priesc lià na cuota de sëuraspersa y cubatura majera de cie che ie preudù tl articul 19, coma 3. Sce l plan de atuazion vëija danora la despuscion de chësta cuota de grunt majera che la mesura nunzieda tl articul 19, coma 3, ie la ndenità de despuscion per la pert n plu de grunt medema al valor de marcià dl bën. 48)
(3-ter) Sce te n raion mescedà iel nce grunc de avëi dl chemun o de n auter ënt publich, muessa la spersa de chisc grunc vester resserveda per ntier al frabiché alesirà, a cuatieres a priesc lià y/o a opres de urbanisazion segondera. Per lascé pro na nuzeda raziunela dla sperses possa l plan de atuazion preudëi che nchin al 15 percënt dl volum de frabica vënie destinà al cumerz ala menuda, a ativiteies de servisc o ala ativiteies de eserzize publich. 49)
(4) Per l raion mescedà muessa l plan cumenel preudëi n indesc de frabicabltà teritoriel (spessënza dl frabicà) che ne ie nia plu bas de 1,50 m3 per meter cuadrat, ora che sce l arjunjimënt dl indesc inant nunzià resultea mpuscibl per rejons de defendura di bëns culturei, dla cuntreda o di ensembli. La frabiches ejistëntes lieia la sëurasperses de purtenienza n basa al indesc de frabicabltà teritoriel n forza tl mumënt che l vën dat l’autorisazion per l’atività de frabiché, ndependëntmënter dal fraziunamënt dl lot uriginel o dal’alienazion de pertes de chësc. Sce l ne ie nia preudù autramënter dal plan d’atuazion, muessa la sperses destinedes al frabiché residenziel te chël raion mescedà garantì l medemo indesc de frabicabltà dl grunt. Sce l ie scrit dant per l raion o per pertes de chësc na planificazion atuativa ie l indesc de frabicabltà teritoriela ntendunda coche raport danter l volum de frabica dedora dal fonz lascià pro, n referimënt a duta la spersa oget dla planificazion atuativa, y la sëuraspersa teritoriela relativa. Sce l ne ie nia preudù na planificazion atuativa ie l indesc de frabicabltà teritoriel ntendù coche l indesc de frabicabltà dl grunt de uni lot oget de ntervënt. La planificazion atuativa possa preudëi che la cubatura scrita dant vënie realiseda te de plu tapes per i fins dla cunvivënza multigeneraziunela. 50)
(5) I Chemuns possa fé ora per ciuna mudazions dla destinazions de nuzeda tl raion mescedà che l ne ie nia de bujën de n’autorisazion de ntervënt.
(6) Restan mpe la normes preududes da chësta lege y dala lege provinziela dl 17 dezëmber 1998, n. 13, y mudazions suzessives, che reverda l trasferimënt de sperses destinedes al frabiché alesirà, possa la imubilies nluegedes te n raion mescedà nce unì despuscionedes per schivé l amudlé de grunt da frabiché, sce l raion resta nia nuzà o nia frabicà per plu de 20 ani a pië via da si destinazion de nuzeda coche raion mescedà. 51)
L articul 24, coma 2, ie n iede unì baratà ora nsci dal articul 8, coma 1, dla L.P. di 20 de dezëmber 2019, n. 17 y pona mudà nsci dal articul 7, coma 2, dla L.P. di 16 d’agost 2022, n. 10.
L art. 24, coma 3, ie n iede unì mudà dal art. 8, coma 1, dla L.P. di 17 de dezëmber 2020, n. 15, y dadedò baratà ora nsci dal art. 8, coma 2, dla L.P. dl prim de juni 2023, n. 9.
Cëla nce l art. 32, coma 1, (despusizions de transizion) dla L.P. dl prim de juni 2023, n. 9.
L art. 24, coma 3-bis, ie unì metù ite dal art. 8, coma 2, dla L.P. dl prim de juni 2023, n. 9.
L art. 24, coma 3-ter, ie unì metù ite dal art. 8, coma 2, dla L.P. dl prim de juni 2023, n. 9.
L art. 24, coma 4, ie unì baratà ora nsci dal art. 8, coma 3, dla L.P. dl prim de juni 2023, n. 9.
Cëla nce l art. 32, coma 1, (despusizions de transizion) dla L.P. dl prim de juni 2023, n. 9.