(1) La Provinzia sustën la sensibilisazion ala defendura dla cuntreda y la devulgazion dla normes aldò, nce chëles tl ciamp dl svilup dl teritore; la Provinzia sustën oradechël l’atività de ënc y urganisazions che se mpënia tla realisazion de chisc fins, tres la cunzescion de cuntribuc o aiuc y metan a despusizion mesuns adatei.
(2) La Provinzia possa sustenì oradechël l stude, la cunservazion y la valorisazion di bëns sometui a liam de cuntreda o de defendura di ensembli, dajan ncëries de cunsulënza, stude, nrescida y proietazion a persones espertes, coche nce dajan cuntribuc o aiuc ai sogec patrons, pussessëures o detentëures di bëns sometui a liam. Per chisc bëns possa la Provinzia, oradechël, atué diretamënter mesures de defendura, cunservazion, sistemazion y ressanamënt dl ambient naturel y dla cuntreda, o mëter a despusizion i mesuns per la realisazion de proiec per senté plantes finalisei a miuré la ntegrazion tla cuntreda di ntervënc de trasfurmazion y adurvanza dl teritore. Per dejëujer lëures y mesures per fins istituziunei possa l’Aministrazion provinziela mëter a jì lëures y cumpré bëns y servijes, tlo ratà pea nce l guant da lëur y l ecuipajamënt, coche nce veiculi, mascins spezieles y atrezatures. 16)
(3) Sce la Provinzia miena che l sibe de bujën, possela nce cunzeder cuntribuc anuei tenian cont dla sort y dla dureda dla mesures nunziedes tl coma 2. Per l'atuazion de chësta mesures y per la regulamentazion di raporc patrimuniei possel unì stlut ju cunvenzions aposta cun i sogec patrons.
(4) Per la cunservazion a tëmp lonch di bëns de cuntreda nunziei tl articul 11, coma 1, pustoms a), c) y e), possa la Provinzia cumpré grunc o stlù ju cuntrac de fit a tëmp lonch. Per la compra o l fit de sperses da stravardé da pert di Chemuns, possa la Provinzia cunzeder n cuntribut nchin al 50 percënt dl priesc de compra o dl priesc dl fit.
L art. 15, coma 2, ie n iede unì mudà dal art. 4, coma 1, dla L.P. di 10 de jené 2022, n. 1, y dadedò ntegrà nsci dal art. 2, coma 1, dla L.P. dl prim de juni 2023, n. 9.