d) Lege provinziala di 19 de setëmber dl 2017, n. 151)2)
Urdinamënt dla urganisazions turistiches

(1)  Per l svilup dl turism tl Südtirol regulea chësta lege la ncëries y l sustëni:

1. dla urganisazions turistiches;
   
2. dl'Azienda speziela "Innovation Development Marketing Südtirol/Alto Adige” (IDM) per cie che reverda si cumpetënza tl setor turistich y la cumerzialisazion respetiva;
   
3. dla sëntes destachedes dl IDM, che ie reguledes dala Jonta provinziela.
   

(1)  Per i fins de chësta lege mienen cun urganisazions turistiches:

1. l'assoziazions turistiches, da tlo inant tlamedes assoziazions;
   
2. la sozieteies cooperatives turistiches, da tlo inant tlamedes sozieteies cooperatives;
   
3. l'Azienda de Sojurnanza y Turism de Bulsan y l'Azienda de Cura, Sojurnanza y Turism de Maran.
   

(1)  La urganisazions turistiches ie urganisazions zënza fin de davani. Ntredes y ezedënzes che se porta n cajo pro ie da adurvé per dejëujer la ncëries dla urganisazions.

(2)  La urganisazions turistiches à l travert de sustenì y fé avané l turism te si raion de cumpetënza.

(3)  Te si raion de cumpetënza àles la ncëria de:

1. istituì y condujer servijes de nfurmazion y d'assistënza turistica y nce de purté inant prestazions per l turism;
   
2. sustenì y atué manifestazions y d'autra scumenciadives de nteres dantaldut turistich sciche nce de publicisé manifestazions locales;
   
3. realisé ativiteies de marketing n acurdanza cun la IDM;
   
4. elaburé cun la IDM tuedes, relevamënc y nrescides tl ciamp turistich;
   
5. valorisé l patrimone dla cuntreda, artistich y storich;
   
6. sustenì y mené mplanc y servijes de nteres dantaldut turistich, a cundizion che la cuotes y la compres vënie respetivamënter cumpredes y fates cun si mesuns.
   
7. reprejenté n pont de referimënt per d'autri operadëures economics y per i reprejentanc y la reprejentantes di setores economics tl ciamp de si ncëries prinzipeles;
   
8. purté inant i valores dla marca Südtirol;
   
9. sustenì la marches locales, deberieda y a una cun la IDM y la marca Südtirol;
   
10. dejëujer la ncëries che ti ie unides sëurandates dala Provinzia o dal Chemun cumpetënt a una cun chisc.
    

(4) Leprò ala ncëries nunziedes tl coma 3, possa la urganisazions turistiches finanzië servijes y infrastrutures de relevanza per l turism che ie per la majera pert de proprietà publica. 3) 

(1)  Pra la repartizion provinziela cumpetënta tla materia dl turism vëniel tenì l indesc provinziel dla urganisazions turistiches.

(1)  Tl indesc provinziel nunzià tl articul 4 veniel scrit ite, sun dumanda, la urganisazions turistiches che à chisc recuisic:

1. l raion de cumpetënza tol ite dut l teritore de n chemun o de de plu chemuns;
   
2. l’adejion al’assoziazion o l'amiscion sciche assoziei tla sozietà cooperativa ie davierta a duta la persones nteressedes al turism dl raion de referimënt curespundënt;
   
3. l'assoziazion à giapà l recunescimënt dla persunalità giuridica privata o la sozietà cooperativa ie scrita ite tl register provinziel di ënc cooperatifs;
   
4. la urganisazion turistica à na sënta zentrela y la à la puscibltà de njinië ite ufizies de nfurmazion te sëntes destachedes;
   
5. l statut curespuend ai prinzips stabilii cun regulamënt d'esecuzion;
   
6. l statut dl'assoziazion turistica vëij danora che, tl cajo che l'assoziazion ëssa da unì deslieda o canceleda dal indesc provinziel, ie i bëns da destiné al chemun cumpetënt per l teritore; chisc ti va ala urganisazion turistica che ti vën n cajo do;
   
7. l statut dla sozietà cooperativa vëij danora la pruibizions y la ublianzes nunziedes tl articul 2514 dl codesc zevil; danter chëstes tomel nce la ublianza de devoluzion, tl cajo de deslieda dla sozietà, de dut l patrimone soziel y la dividëndes eventualmënter madurides, ai fonds per l sustëni y l svilup dla cooperazion.
   
8. tl cajo de deslieda o cancelazion dla sozietà cooperativa dal indesc provinziel dla urganisazions turistiches vëij l statut de chësta nce danora che si capital soziel y la dividëndes eventualmënter madurides vënie destinedes al chemun cumpetënt o ai chemuns cumpetënc per l teritore; chisc ti va pona ala urganisazion turistica che ti vën n cajo do;
   
9. l'assoziazion à adotà la denuminazion "assoziazion turistica" y la sozietà cooperativa à adotà chëla de "sozietà cooperativa turistica", a chëla che l ti va do l inuem dl chemun o dl raion ulache la ie ativa;
   
10. la ntredes tleca per l arjunjimënt di traverc statuteres.
    

(2)  Per uni raion de cumpetënza possel mé unì scrit ite una na sëula urganisazion turistica tl indesc provinziel.

(3)  La Jonta provinziela definea i criteres y la manieres dla iscrizion tl indesc y la documentazion che ie da prejenté.

(4)  La iscrizion tl indesc o la refudeda dla dumanda de iscrizion vën dejëuta cun pruvedimënt mutivà, dal assessëur provinziel cumpetënt/dala assessëura provinziela cumpetënta, do che l ie unì audì l chemun o i chemuns de cumpetënza dl raion respetif.

(5)  I mudamënc dl statut ie da comuniché tl tëmp de 15 dis ala repartizion provinziela cumpetënta per l turism che nen verifichea la cunformità ai prinzips fissei tl regulamënt d'esecuzion; i mudamënc revardënc la ncëries sozieles y i organs dl'assoziazion o dla sozietà cooperativa ie da comuniché tl medemo tëmp.

(6)  Uni ntegrazion ala denuminazion nunzieda tl coma 1, pustom i) muessa unì autoriseda dala repartizion provinziela cumpetënta per l turism. Per la comunicazion ai fins de marketing possel nce unì adurvà d'autra denuminazions. Nce chëstes muessa unì autorisedes dala repartizion provinziela nunzieda dessëura.

(1)  La cancelazion dal indesc provinziel vën fata te chisc caji:

1. sce l vën azertà che la cundizions preududes per la iscrizion ne ie nia unides respetedes;
   
2. sce l statut ne vën nia respetà, sce l vën ora iregulariteies grieves tla gestion dl'assoziazion o dla sozietà cooperativa o sce chëstes ne fej giut alalongia nia.
   

(2)  La cancelazion possa oradechël unì cumandeda tl cajo che la maiuranza di sogec che eserzitea ativiteies economiches, cualifichedes coche turistiches, tl ciamp de cumpetënza dla urganisazion turistica o te na cërta pert de chësc, ne ie nia plu assoziei dl’assoziazion o dla sozietà cooperativa.

(3)  L assessëur provinziel cumpetënt /L'assessëura provinziela cumpetënta, do avëi audì l chemun o i chemuns dl raion de cumpetënza respetif, cumanda cun pruvedimënt mutivà la cancelazion dla urganisazion turistica dal indesc provinziel. Dan cumandé la cancelazion muessa la urganisazion turistica unì amunida y si presidënt/presidënta audì/audida.

(1)  La scritura dl bilanz de previjion y dl cont cunsuntif dla urganisazions turistiches vën fata sun la basa de modiei standardisei metui a despusizion dla Provinzia.

(2)  La urganisazions turistiches ti manda ala repartizion provinziela cumpetënta per l turism, tl tëmp nchin ai 30 de nuvëmber de uni ann, l program dl'ativiteies y na copia dl bilanz de previjion dl eserzize finanzier suzessif, nchin ai 31 de jené la soma dl autofinanziamënt relatif al ann dant y nchin ai 30 de juni na copia dl cont cunsuntif dl ann finanzier da dant y dla relazion sun l'ativiteies.

(3)  La Provinzia possa mo se damandé documënc sëuraprò y, tl cajo de iregulariteies azertedes o jaghedes, possela fé i cuntroi che ie debujën.

(1)  Per i fins de chësta lege dejëuj l'Azienda speziela IDM chësta ncëries tla materia dl turism:

1. svilup dla strategies;
   
2. marketing turistich dl Südtirol tla Talia y oradecà;
   
3. funzion de cuntrol dla urganisazions turistiches.
   

(2)  La funzion de cuntrol nunzieda tl coma 1, pustom c) ie chëla de cunfermazion dl program d’atività y la relazion sun l’ativieteies dla urganisazions turistiches singules, l cuntrol dl'atuazion dl program anuel cuncurdà aldò dl program d’atività y aldò dla relazion sun l’ativiteies y l cuntrol dla usservanza di criteres de cualità. I raporc de cuntrol respetifs ti vën mandei ala repartizion cumpetënta tla materia de turism.

(3)  La culaburazion dl'Azienda speziela IDM cun la urganisazions turistiches vën dejëuta tres la sëntes destachedes, che ie reguledes dala Jonta provinziela.

(4)  Tl cajo de istituzion de na urganisazion turistica dedora di cunfins dla sënta destacheda dl IDM ti spietel al assessëur provinziel cumpetënt/al’assessëura provinziela cumpetënta de stabilì, do avëi audì l IDM y la sëntes destachedes tuchedes, pra ciuna sënta destacheda che la urganisazion turistica toca.

(5)  Tl ciamp de cumpetënza de uni sënta destacheda dla IDM iel istituì n coleghium di presidënc. 4)

(1)  L coleghium di presidënc/dla presidëntes ie metù adum da duc i presidënc y duta la presidëntes dla urganisazions turistiches dla sënta destacheda dl IDM respetiva. L presidënt/La presidënta de uni urganisazion turistica possa nce desinië n cumëmber dl cunsëi diretif o dl cunsëi d'aministrazion a presidenzië tl coleghium di presidënc/dla presidëntes tla cualità de reprejentant.

(2)  I cumëmbri dl coleghium di presidënc/dla presidëntes lita danter d'ëi l presidënt/la presidënta y si sostitut/sostituta.

(3)  Uni cumëmber dl coleghium di presidënc/dla presidëntes à a despusizion na cuota de stimes calculeda sun la basa dla mesaneria di pernuetamënc di ultimi trëi ani turistics aldò di dac dl Istitut provinziel de statistica (ASTAT).

(4)  L coleghium di presidënc y dla presidëntes à chësta ncëries:

1. l sustën l flus de nfurmazions danter la sënta destacheda y la urganisazions turistiches;
   
2. l armonisea l’ativiteies danter la IDM y la urganisazions turistiches;
   
3. l ejaminea l program dl’ativiteis dla IDM;
   
4. l controlea, tën de uedl y valutea la realisazion dl program dl’ativiteies dla IDM. 5)
   

(5)  IL coleghium di presidënc y dla presidëntes vën adum almanco cater iedesc al ann cun l/la manager dla sënta destacheda dla IDM.  6) 

(6)  L presidënt/la presidënta dl coleghium di presidënc y dla presidëntes ie n cumëmber/na cumëmbra dl cumité per l marketing dl’IDM.   7)

(1)  La culaburazion danter la urganisazions turistiches y l'azienda speziela IDM se dejëuj tres la sëntes destachedes dl IDM cumpetëntes y la reverda:

1. l'acurdanza sun l program d'atività dla urganisazions turistiches;
   
2. la realisazion dl'ativiteies aldò dl program d'atività;
   
3. scumenciadives de marketing.
   

(2)  Tl ciamp de cumpetënza de uni sënta destacheda dl’IDM iel istutuì n coleghium di presidënc y dla presidëntes. La cunlaurazion danter la urganisazions turistiches yla sëntes destachedes se dejëuj tres l coleghium di presidënc y dla presidëntes.   9)

(1)  Per sustenì la urganisazions turistiches y l’IDM tl ademplimënt de si duvieres iel stanzià tl bilanz provinziel uni ann mesuns aposta.  10)

(2)  I mesuns nunziei tl coma 1 vën mé asseniei ala urganisazions turistiches sce les respetea i criteres de cualità stabilida dala Jonta provinziela.

(3)  I mesuns stanziei ie partii su uni ann aldò de chisc criteres:

1. na cuota, medema o variabla, per duc chëi che nen à l dërt;
   
2. na cuota mplu aldò de chisc criteres:
   
   1. capazità rezetiva d’albirch y nia d’albierch;
      
   2. mesaria di pernuetamënc registrei ti trëi ani turistics da dant, da nuvëmber a utober;
      
   3. mesaria dla ruvedes registredes ti trëi ani turistics da dant;
      
   4. mesura dl autofinanziamënt.
      

(4)  La mesura dla cuotes nunziedes tl coma 3 y la cuota che ti spieta al’IDM vën fissedes uni ann dala Jonta provinziela. Per chësc fin determinea la Jonta provinziela i criteres y la manieres per l’asseniazion di mesuns y la stabilësc la cuota de autofinanziamënt a cëria dla urganisazions turistiches.   11)

(5)  La defrënzia eventuela danter la somes calculedes n basa ai criteres de repartizion y i mesuns efetivamënter asseniei aldò dl coma 4 possa unì assenieda dala Jonta provinziela al'Azienda speziela IDM cun la destinazion spezifica per l ciamp turism.

(6)  L paiamënt dla somes asseniedes ala urganisazions turistiches ie sometù ala prejentazion dl bilanz de previjion. Tl cajo de iregulariteies azertedes possa la Jonta provinziela stlù ora la urganisazions turistiches dala asseniazions. Tl cajo de mpëni nia efizient y zënza fazion di mesuns asseniei possa la Jonta provinziela preudëi la reduzion o la revucheda dl'asseniazion nstëssa. La somes nia asseniedes possa unì mo n iede partides ora ala urganisazions turistiches restedes.

(7)  L paiamënt dla somes asseniedes al'Azienda de Sojurnanza y Turism de Bulsan y al'Azienda de Cura, Sojurnanza y Turism de Maran ie sometù al’apurvazion di bilanc de previjion respetifs da pert dl organn.

(1)  I chemuns tol pert al finanziamënt dl turism ti dajan ala urganisazions turistiches locales cuntribuc per si ativiteies. La mesura de chisc cuntribuc ie determineda tl’acurdanza per l finanziamënt local.  12)

(1)  Ora di fonds preudui dl articul 12 vëniel stanzià uni ann tl bilanz provinziel fonds aposta per proiec de nvestimënt de nteres turistich metui a jì dala urganisazions turistiches. Chësta scumenciadives possa unì metudes a jì dala urganisazions, singules o assoziedes, o adum cun ënc y privac.

(2)  La Jonta provinziela, cun deliberazion da publiché sun la tofla dla Provinzia online, stabilësc i criteres y la modaliteies dla cunzescion di fonds nunziei pra l coma 1, sciche nce la modaliteies de licuidazion de chisc y la documentazion da prejenté.

(1)  La Provinzia ie autoriseda a cunzeder cuntribuc tla mesura dl 90 percënt al'assoziazion plu reprejentativa dla urganisazions turistiches per la spëises abudes per la stipulazion de polizes d'assegurazion, per tenì ndenisei i patrons de purtoies de passlonch/pudejé, troies, percursc per la rodes o purtoies senialei per mountain bikes davierc al publich, tl cajo de azions da dumandes de rembursamënt de danns y custimënc legai che se porta pro dainora. La Provinzia possa nce stipulé diretamënter chësta polizes.

(2)  La Provinzia ie oradechël autoriseda a cunzeder al’assoziazion plu reprejentativa dla urganisazions turistiches alesiramënc mplu aldò dl articul 13.

(1)  La urganisazions turistiches bele scrites ite tl indesc nunzià tl articul 16 dla lege provinziela di 18 d'agost 1992, n. 33 vën scrites ite d'ufize tl indesc nunzià tl articul 4.

(2)  Tl cajo che la documentazion che ie da prejenté per la iscrizion ne ie nia cumpleta o sce la mancia defin, muessela unì cumpleteda o cunsenieda tl tëmp de sies mënsc dala publicazion di criteres y dla modaliteies per la iscrizion tl indesc provinziel aldò dl articul 5, coma 3, de chësta lege, sce no vën la urganisazion straicheda dal indesc.

(3)  La urganisazions turistiches bele esistëntes n la data dla jita n forza de chësta lege possa resté n vita sciche teles, ënghe sce les ne curespuend nia ala cundizions dl articul 5, coma 1, pustom a).

(1)  La lege provinziela di 18 d'agost 1992, n. 33 y mudazions suzessives, ora che i articuli 23, 24, 25 y 26, ie abrogheda cun fazion dal prim de jené 2018.

(2)  La despusizions nunziedes tla lege provinziela di 18 d'agost 1992, n. 33, y mudazions suzessives, vën mé mo aplichedes ala dumandes bele unides ite ma mo nia tratedes.

(3)  I referimënc ala lege provinziela di 18 d'agost 1992, n. 33, per la pert abrogheda, cuntenii tla leges provinzieles ie da ntënder sciche referimënc a chësta lege.

(1)  Ala curidura dla cëries che se porta pro tres l'atuazion de chësta lege se cruzien a pië via dal ann 2018 tres na reduzion curespundënta dl'autorisazion de spëisa nunzieda tla lege provinziela di 18 d'agost 1992, n. 33, y mudazions suzessives, coche refinanzieda dala lege provinziela di 22 de de zëmber 2016, n. 28.

(1)  Chësta lege va n forza l prim de jené 2018.

Chësta lege unirà publicheda tl Buletin Ufiziel dla Region. Uni persona a chëla che l ti spieta à da la respeté y da la fé respeté sciche lege provinziela.