i) Lege provinziala di 19 de mà dl 2017, n. 51)
Reforma dles indenités por i organs dl Consëi y dla Junta provinziai

(1) Al fej pert di dovëis de vigni aconsiadú/aconsiadëssa da tó pert ales sentades dl Consëi provinzial, dles comisciuns y di atri organs colegiai de chi che al/ara é gnü cherdé/gnüda cherdada a fá pert.

(2) Sce n aconsiadú/n’aconsiadëssa ne tol nia pert a na sentada dl Consëi provinzial zënza iustificaziun, ti vëgnel trat jö dala soma mensila netto che i speta aladô dl articul 3, coma 1, lëtra a) dla lege regionala di 21 de setëmber dl 2012, n. 6, sciöche retüda dles spëises por eserzité so mandat, chisc imporc netto:

1. 150 euro tl caje d’assënza da n de de sentades metü adöm da na sentada danmisdé, öna domisdé y öna da sëra;
   
2. 100 euro tl caje d’assënza da n de de sentades metü adöm da na sentada danmisdé y öna domisdé;
   
3. 50 euro tl caje d’assënza da mez n de de sentada o da na sentada che döra manco dî;
   

(3) Por apliché le coma 2 por valuté la presënza o assënza de n aconsiadú/n’aconsiadëssa, vëgnel tut en conscidraziun chisc elemënc:

1. la presënza o l’assënza al scomenciamënt dla sentada;
   
2. la presënza o l’assënza canche an lita tratan la sentada.
   

(4) Al vëgn conscidré presënt al scomenciamënt dla sentada nia ma l’aconsiadú/aconsiadëssa che respogn al apel nominal fat al scomenciamënt dla sentada, mo ince l’aconsiadú/aconsiadëssa che röia te salf denanche al vëgnes traté l’ordin dl de y ti segnalëia süa presënza por la registraziun ofiziala al componënt/ala componënta dl ofize de presidënza responsabl/responsabla dla registraziun dles presënzes/assënzes.

(5) Al vëgn conscidré presënt tratan na litaziun l'aconsiadú/l'aconsiadëssa che

1. en ocajiun de na votaziun fata cun le prozedimënt eletronich, vëgn conscidré presënt/presënta dal sistem de votaziun, independentemënter dal fat che al/ara ais spo dé jö o manco süa usc;
   
2. en ocajiun de na votaziun socrëta, tl caje che an lites sön na porsona, é presënt/presënta en ocajiun dl secundo apel nominal, independentemënter dal fat che al/ara ais spo dé jö o manco süa usc don jö la zetola.
   

(6) Al vëgn conscidré ince presënt en ocajiun de na votaziun l’aconsiadú/aconsiadëssa che detlarëia dan o tratan la votaziun da ne tó nia pert ala votaziun.

(7) L’import dé dant dal coma 2, lëtra c) por l’assënza da na sentada de mez le de o plü cörta, vëgn trat jö daldöt sce n’aconsiadú/aconsiadëssa, che é presënt/presënta dal apel nominal al scomenciamënt dla sentada o che é gnü/gnüda te salf dan la conclujiun di laurs preliminars preodüs dal coma 4, n’é daldô nia presënt/presënta, zënza na rajun iustificada aladô dl coma 9, aladô di criters dá dant dai comesc 5 y 6, en ocajiun de almanco le 50 porcënt dles votaziuns fates tratan la sentada. Sce indere n aconsiadú assënt nia iustifiché/aconsiadëssa assënta nia iustificada dal apel nominal dal scomenciamënt dla sentada y gnü/gnüda ite te salf do la stlüta di laurs preliminars, é presënt/presënta en ocajiun de altamo le 50 porcënt dles votaziuns fates tla pert che romagn dla sentada, vëgn la soma nominada dessura da trá jö smendrida dl mez.

(8) La iustificaziun dl’assënza da na sentada dl Consëi provinzial, o da na pert, ti mëss gní presentada al presidënt/ala presidënta dl Consëi, de regola por scrit don dant la rajun. La detlaraziun mëss rové, sce ara reverda döta le sentada danmisdé, domisdé y/o da sëra, al plü tert dan le scomenciamënt dla sentada y, ti caji d’assënza temporanea tratan na sentada, dan le scomenciamënt dl’assënza. Te caji de prescia vëgnel ince azeté na comunicaziun a usc, ince tres terzi, do chëra che al mëss a vigni moda gní fat te set dis na iustificaziun scrita motivada.

(9) Al vëgn conscidré iustificaziuns varëntes ma chëres che vá zoruch a öna de chëstes rajuns:

1. eserzize de n'inciaria istituzionala surandada dal Consëi o dala Junta provinziai o regionai;
   
2. maratia, sojornanza te ospedal, vijita dal dotur, proes de laboratore, terapies y val’ da de te;
   
3. zitaziun iudiziaria;
   
4. rajuns familiares dër zities, da valuté caje por caje dal presidënt/dala presidënta dl Consëi;
   
5. rajuns de forza plü alta.
   

(10) Cina che le Consëi dla Regiun autonoma Trentin-Südtirol se crüzia dl’erogaziun dl’indenité a bëgn di aconsiadus provinziai/dles aconsiadësses provinziales, vëgn les detraziuns preodüdes da chësc articul fates, aladô dl articul 3, coma 1, lëtra a) dla lege regionala di 21 de setëmber dl 2012, n. 6, dal Consëi regional cun l’import y ti lims preodüs dala desposiziun nominada, y plü avisa sön la basa de na comunicaziun scrita ortiada vigni mëis dal presidënt/dala presidënta dl Consëi provinzial. Les somes trates jö romagn sön le bilanz dl Consëi regional.