In vigore al

RICERCA:

Ultima edizione

l) Lege provinziala di 12 de dezëmber dl 2016, n. 251)
Ordinamënt contabl y finanziar di comuns y dles comunités comprensorialesdla Provinzia autonoma de Balsan

1)
Publicada tl suplemënt 2 dl B.O. di 20 de dezëmber dl 2016, n. 51.  La verjium ladina é gnüda publicada tl B.O. di 14 de merz dl 2017, n. 11.

TITUL I
DESPOSIZIUNS GENERALES 

Art. 1 (Fins)   delibera sentenza

(1) Aladô dl articul 79 dl decret dl Presidënt dla Republica di 31 d'agost dl 1972, n. 670, y mudaziuns suandëntes, vëgn chësta lege emanada sön la basa dla delegaziun odüda danfora dal articul 10 dla lege regionala di 3 d'agost dl 2015, n. 22, y aladô dl articul 56 dla lege regionala di 22 de dezëmber dl 2004, n. 7.

[(2) Les desposiziuns de chësta lege reformëia le sistem dla contabilité di ënc locai preodüs dala lege regionala di 23 d'otober dl 1998, n. 10, y mudaziuns suandëntes y dal decret dla Presidënta dla Junta regionala di 27 d'otober dl 1999, n. 8/L, y mudaziuns suandëntes, tres intervënc por fá jí adöm i prinzips stabilis dal decret legislatif di 23 de jügn dl 2011, n. 118, y mudaziuns suandëntes. Por chësc fin vëgnel apliché i articui dl decret legislatif di 18 d'agost dl 2000, n. 267, secunda pert, insciö sciöche ai é gnüs mudá dal decret legislatif di 23 de jügn dl 2011, n. 118, tut fora i articui 149, 155, 156, 158, 192, 197, 198, 198/bis, 201, 203, coma 1, 204, 205, 206, 207, 214, 222, comesc 1 y 2, y 223.] 2)

[(3) Aladô de chësta lege capëscion cun ënc locai i comuns y les comunités comprensoriales preodüs dala lege provinziala di 20 de merz dl 1991, n. 7, y mudaziuns suandëntes. ] 3)

massimeVerfassungsgerichtshof - Urteil vom 7. Februar 2017, Nr. 80 - Haushalt und öffentliche Buchhaltung - Buchhaltungs- und Finanzordnung der Gemeinden und Bezirksgemeinschaften
2)
La Curt Costituzionala á detlaré cun sentënza di 13 d'aurí dl 2017, n. 80 che l'art. 1, comesc 2 y 3, l'art. 3, l'art. 4, coma 1 y l'art. 8, coma 1 dla lege provinziala di 12 de dezëmber dl 2016, n. 25, che â abroghé la lege provinziala di 22 de dezëmber dl 2015, n. 17, é cuntra la costituziun.
3)
La Curt Costituzionala á detlaré cun sentënza di 13 d'aurí dl 2017, n. 80 che l'art. 1, comesc 2 y 3, l'art. 3, l'art. 4, coma 1 y l'art. 8, coma 1 dla lege provinziala di 12 de dezëmber dl 2016, n. 25, che â abroghé la lege provinziala di 22 de dezëmber dl 2015, n. 17, é cuntra la costituziun.

Art. 2 (Organisaziun dl sorvisc finanziar)

(1) Le regolamënt de contabilité regolëia, sön la basa dles desposiziuns preodüdes dal regolamënt sön l'ordinamënt di ofizi y di sorvisc, l'organisaziun dl sorvisc finanziar o contabl o de d'atri sorvisc corespognënc, aladô dl numer di abitanc, dl'organisaziun y dl'importanza economich-finanziara dl ënt. Al sorvisc ti vëgnel surandé le coordinamënt dla gestiun dl'ativité finanziara dl ënt.

(2) Aladô dla dimenjiun y dla strotoraziun interna di ënc desvalis vëgn le sorvisc finanziar manajé dal responsabl/dala responsabla dl sorvisc o dala porsona a ce di seturs d'ofize desfarënc o dal secreter/dala secreteria de comun. 

(3) Le responsabl/La responsabla dl sorvisc finanziar mëss verifiché che les previjiuns d'entrada y süa compatibilité cun les previjiuns de spëisa, che vëgn portades dant dai sorvisc y é da scrí ite tl bilanz, stimenëies, sciöche ince verifiché periodicamënter l'azertamënt dles entrades y l'impëgn dles spëises, la tignida regolara dla contabilité economich-patrimoniala y plü en general le mantignimënt dl ecuiliber finanziar y complessif dla gestiun y les limitaziuns de finanza publica.

(4) I ënc locai pó stlüje jö convenziuns aposta por garantí le sorvisc finanziar, le sorvisc de contabilité o n ater sorvisc corespognënt tres strotöres coletives.

TITUL II
BILANZ Y PROGRAMAZIUN

[Art. 3 (Termins por l'aprovaziun dl documënt de programaziun unich y dl bilanz de previjiun)   delibera sentenza

(1) I termins preodüs dal articul 151, coma 1 dl decret legislatif di 18 d'agost dl 2000, n. 267, y mudaziuns suandëntes, pó gní determiná danü cun les modalités preodüdes dal articul 81 dl decret dl Presidënt dla Republica di 31 d'agost dl 1972, n. 670, y mudaziuns suandëntes, y dal articul 18 dl decret legislatif di 16 de merz dl 1992, n. 268.

(2) Cun les medemes modalités preodüdes dal coma 1 vëgnel autorisé la gestiun provisora dl bilanz preodüda dal articul 163, coma 3 dl decret legislatif di 18 d'agost dl 2000, n. 267, y mudaziuns suandëntes.] 4)

massimeVerfassungsgerichtshof - Urteil vom 7. Februar 2017, Nr. 80 - Haushalt und öffentliche Buchhaltung - Buchhaltungs- und Finanzordnung der Gemeinden und Bezirksgemeinschaften
4)
La Curt Costituzionala á detlaré cun sentënza di 13 d'aurí dl 2017, n. 80 che l'art. 1, comesc 2 y 3, l'art. 3, l'art. 4, coma 1 y l'art. 8, coma 1 dla lege provinziala di 12 de dezëmber dl 2016, n. 25, che â abroghé la lege provinziala di 22 de dezëmber dl 2015, n. 17, é cuntra la costituziun.

Art. 4 (Plann esecutif de gestiun)   delibera sentenza

[(1) L'aplicaziun dl articul 169, comesc 1 y 2 dl decret legislatif di 18 d'agost dl 2000, n. 267, y mudaziuns suandëntes, é facoltativa por i ënc locai cun manco de 10.000 abitanc, tl respet dl'oblianza da relevé te na manira unitara i fac gestionai sön la basa dla strotöra dl plann di cunc aladô dl schema preodü tl'injunta n. 6 dl decret legislatif di 23 de jügn dl 2011, n 118, y mudaziuns suandëntes.] 5)

(2) Ti ënc locai cun manco de 10.000 abitanc dá fora la junta, sce al n'é nia n plann esecutif de gestiun, normes diretives programatiches por l'esecuziun dl bilanz de previjiun y/o dla relaziun relativa, sön la basa de chëres che i responsabli di sorvisc determinëia i impëgns de spëisa.

massimeVerfassungsgerichtshof - Urteil vom 7. Februar 2017, Nr. 80 - Haushalt und öffentliche Buchhaltung - Buchhaltungs- und Finanzordnung der Gemeinden und Bezirksgemeinschaften
5)
La Curt Costituzionala á detlaré cun sentënza di 13 d'aurí dl 2017, n. 80 che l'art. 1, comesc 2 y 3, l'art. 3, l'art. 4, coma 1 y l'art. 8, coma 1 dla lege provinziala di 12 de dezëmber dl 2016, n. 25, che â abroghé la lege provinziala di 22 de dezëmber dl 2015, n. 17, é cuntra la costituziun.

TITUL III
GESTIUN DL BILANZ

SEZIUN I
GESTIUN DLES SPËISES

Art. 5 (Impëgn)

(1) Ti caji preodüs dal articul 183 dl decret legislatif di 18 d'agost dl 2000, n. 267, y mudaziuns suandëntes, vëgnel costituí, cun l'aprovaziun dl bilanz de previjiun y dles mudaziuns suandëntes y zënza che al ois ester mosöres implü, l'impëgn de spëisa sön i stanziamënc relatifs.

(2) Implü vëgnel costituí, cun l'aprovaziun dl bilanz de previjiun y dles mudaziuns suandëntes y zënza che al ois ester mosöres implü, l'impëgn de spëisa sön i stanziamënc relatifs por les indenités y les retüdes dles spëises bele atribuides ai aministradus.

Art. 6 (Ordinaziun y paiamënt)

(1) Le tesorier fej i paiamënc de cutes, de imporc scric ite te listes, de somes liades a ordins de paiamënt, a d'atres oblianzes de lege y ai contrac de sorvisc preodüs dal articul 183, coma 2, lëtra c) dl decret legislatif di 18 d'agost dl 2000, n. 267, y mudaziuns suandëntes, ince sce al n'é nia ciamó gnü dé fora le mandat de paiamënt corespognënt. L'ënt local dá fora le mandat relatif por la regolarisaziun dl prozedimënt te 30 dis, fajon l'atribuziun al eserzize finanziar te chël che le tesorier á fat le paiamënt, ince sce la comunicaziun relativa ti é rovada al ënt tl eserzize suandënt.

SEZIUN II
PRINZIPS DE CONTABILITÉ POR LA GESTIUN DL BILANZ

[Art. 7 (Defenüda dl ecuiliber de bilanz)   delibera sentenza

(1) Sce al ne vëgn nia adoté i provedimënc por restabilí l'ecuiliber de bilanz preodüs dal articul 193 dl decret legislatif di 18 d'agost dl 2000, n. 267, y mudaziuns suandëntes, vëgnel proibí da tó sö impëgns y paié spëises por sorvisc nia preodüs espressamënter por lege. Tut fora da chësc vëgn les spëises por impëgns bele surantuc ti eserzizi finanziars da denant. Les deliberaziuns fates cuntra chësta norma ne vel nia.] 6)

massimeCorte costituzionale - sentenza del 26 settembre 2017, n. 228 - Bilancio e contabilità pubblica – Ordinamento finanziario e contabile dei comuni e delle comunità comprensoriali – Salvaguardia degli equilibri di bilancio – Enti locali deficitari o dissestati – competenza statale
6)
La Curt Costituzionala á detlaré cun sentënza di 26 de setëmber dl 2017, n. 228 che l’art. 7 y l’art. 32, coma 3 dla lege provinziala di 12 de dezëmber dl 2016, n. 25 é cuntra la costituziun.

Art. 8 (Reconescimënt de legitimité de debic fora de bilanz)   delibera sentenza

[(1) Cun deliberaziun dl consëi preodüda dal articul 193, coma 2 dl decret legislatif di 18 d'agost dl 2000, n. 267, y mudaziuns suandëntes reconësc i ënc locai la legitimité di debic fora de bilanz che vëgn:

  1. da sentënzes cun forza de lege o atira esecutives, sciöche ince da ordins de paiamënt, transaziuns iudiziares, sentënzes arbitrales y spëises legales relatives;
  2. dala curida de imporc mancianc de consorc, de aziëndes speziales y de istituziuns, ti limic dles oblianzes che vëgn dal statut, dala convenziun o da ac costitutifs, a condiziuns che al sides gnü respeté l'oblianza dl'avaliaziun de bilanz preodüda dal articul 45, coma 3 dla lege regionala di 4 de jená dl 1993, n. 1 y mudaziuns suandëntes, y che la rajun por l'import manciant vëgnes da n fat de gestiun che ara ne vá nia da odëi danfora;
  3. dala recapitalisaziun, ti limic y tles formes preodüdes dal codesc zivil o da normes speziales, de sozietés de capitai costituides por l'eserzize de sorvisc publics locai;
  4. da prozedöres d'espropriaziun o d'ocupaziun de prescia por operes de utilité publica;
  5. da fac y provedimënc a chi che al n'á cooperé o tut pert te degöna manira cun dezijiuns aministradus/aministradësses, funzionars/funzionares o personal dependënt dl ënt;
  6. dal'acuisiziun de bëgns y sorvisc cuntra les oblianzes preodüdes dal articul 191, comesc 1 y 2 dl decret legislatif di 18 d'agost dl 2000, n. 267, y mudaziuns suandëntes, ti limic dl'utilité constatada y desmostrada y de arichimënt por l'ënt, tl cheder dl ademplimënt de funziuns publiches y di sorvisc de competënza.] 7)

(2) A öna cun i crediturs pó l'ënt fá le paiamënt ince a rates tl tëmp de trëi eserzizi finanziars, cun l'ann corënt lapró.

(3) Por le finanziamënt dles spëises preodüdes da chësc articul operëia i ënc locai aladô dl articul 194, coma 3 dl decret legislatif di 18 d'agost dl 2000, n. 267, y mudaziuns suandëntes.

massimeVerfassungsgerichtshof - Urteil vom 7. Februar 2017, Nr. 80 - Haushalt und öffentliche Buchhaltung - Buchhaltungs- und Finanzordnung der Gemeinden und Bezirksgemeinschaften
7)
La Curt Costituzionala á detlaré cun sentënza di 13 d'aurí dl 2017, n. 80 che l'art. 1, comesc 2 y 3, l'art. 3, l'art. 4, coma 1 y l'art. 8, coma 1 dla lege provinziala di 12 de dezëmber dl 2016, n. 25, che â abroghé la lege provinziala di 22 de dezëmber dl 2015, n. 17, é cuntra la costituziun.

TITUL IV
SORVISC DE TESORIER

Art. 9 (Sogec a chi che al ti pó gní afidé le sorvisc de tesorier)

(1) I ënc locai á n sorvisc de tesorier, che vëgn aministré da n istitut bancar autorisé da fá l'ativité preodüda dal articul 10 dl decret legislatif dl 1. de setëmber dl 1993, n. 385.

Art. 10 (Oget dl sorvisc de tesorier)

(1) Les inciaries dl sorvisc de tesorier reverda ativités desvalies liades ala gestiun finanziara dl ënt local, dantadöt le scudimënt dles entrades, le paiamënt dles spëises, la conservaziun di titui y ogec de valur y i ademplimënc de chësc vers preodüs dala lege, dal statut, dai regolamënc dl ënt o da normes basades sön acordanzes.

(2) Le tesorier fej les operaziuns preodüdes dal coma 1 tl respet dla lege di 29 d'otober dl 1984, n. 720, y mudaziuns suandëntes, olache ara pó gní aplicada.

(3) Vigni deponüda de ci sort chessî ti vëgn intestada al ënt local y vëgn aministrada dal tesorier.

(4) Le tesorier contabilisëia separatamënter les entrades preodüdes dal articul 180, coma 3, lëtra d) dl decret legislatif di 18 d'agost dl 2000, n. 267, y mudaziuns suandëntes. Les prelevaziuns de chëstes ressurses vëgn ma conzedüdes cun i mandac de paiamënt preodüs dal articul 185, coma 2, lëtra i) dl decret legislatif di 18 d'agost dl 2000, n. 267, y mudaziuns suandëntes. Al vëgn conzedü da d'adoré les ressurses cun lian de destinaziun aladô dles modalités y tl respet di limic preodüs dal articul 195 dl decret legislatif di 18 d'agost dl 2000, n. 267, y mudaziuns suandëntes.

Art. 11 (Afidamënt dl sorvisc de tesorier)

(1) Le sorvisc de tesorier vëgn afidé tres les prozedöres de concurs publich stabilides tl regolamënt de contabilité.

(2) Le sorvisc vëgn afidé sön la basa de na convenziun, deliberada dala junta, cun chëra che al vëgn regolamenté, en concordanza cun les condiziuns de concurs speziales, les oblianzes dl istitut de credit, les modalités por l'ademplimënt dl sorvisc sciöche ince les condiziuns por le paiamënt di fic de ci che é te cassa y por les antizipaziuns de cassa.

(3) Sce le sorvisc vëgn gestí da de plü istituc de credit assoziá mëss l'aziënda de credit responsabla se surantó, ince por les atres aziëndes de credit, l'ademplimënt de dötes les inciaries preodüdes dala lege y dala convenziun, sciöche ince la responsabilité che alda lapró.

Art. 12 (Sorvisc de tesorier fat sön inciaria de de plü ënc locai)

(1) I sogec inciariá dl sorvisc de tesorier che aministrëia le sorvisc por cunt de de plü ënc locai mëss tigní la contabilité despartida por vignun de ëi.

Art. 13 (Responsabilité dl tesorier y di agënc contabli)

(1) Le tesorier é responsabl de dötes les deponüdes de ci sort chessî, intestades al ënt local. Le tesorier respogn cun dötes sües ativités y cun so patrimone por dagns eventuai gaujá al ënt, che ti á surandé l'inciaria, o a terzi.

(2) Le tesorier y vigni ater agënt contabl che aministrëia scioldi publics o vëgn inciarié cun l'aministraziun di bëgns di ënc locai, sciöche ince les porsones che se ficia tles inciaries de chisc agënc mëss dé cunt de süa gestiun y é sotmetüs ala iurisdiziun dla Curt di Cunc, aladô dles normes y dles prozedöres preodüdes dales leges varëntes.

Art. 14 (Ativités liades al paiamënt dles spëises)

(1) I paiamënc pó gní fac ti limic di stanziamënc de cassa. I mandac che reverda la gestiun dles competënzes ne pó nia gní paiá fora sce l'import vá sura la desfarënzia danter le stanziamënt de competënza relatif y la cuota respetiva che reverda le fonds plurienal vincolé. Por chësc fin ti mëna l'ënt local al tesorier - cun referimënt al eserzize de gestiun finanziara corënt - le bilanz de previjiun aprové y les deliberaziuns esecutives de mudaziun y de prelevamënt de cuotes dl fonds de resserva. Le tesorier aministrëia ma le pröm ann dl bilanz de previjiun y registrëia ma les deliberaziuns de mudaziun dl fonds plurienal vincolé che é gnüdes fates cina ala fin dl eserzize finanziar.

(2) Do la notificaziun di ac de ordin de paiamënt mëss le tesorier paié l'import che ti speta ai crediturs anter le termin scrit dant y sce le paiamënt vëgn fat massa tert mëssel gní paié na sanziun d'intardiamënt.

(3) L'estinziun di mandac de paiamënt da pert dl tesorier vëgn fata tl respet dla lege y aladô dles indicaziuns dades dal ënt. Le tesorier se surantol la responsabilité y respogn cun döt so patrimone ti confrunc dl ënt local y de terzi crediturs eventuai por la regolarité dles operaziuns de paiamënt fates.

(4) Le tesorier ne pó destodé degun mandat de paiamënt sce al n'é nia la codificaziun, cun lapró ince la codificaziun SIOPE preodüda dal articul 14 dla lege di 31 de dezëmber dl 2009, n. 196. Le tesorier ne aministrëia nia i codesc dla transaziun elementara preodüda dai articui da 5 a 7 dl decret legislatif di 23 de jügn dl 2011, n. 118, y mudaziuns suandëntes, che é gnüs metüs ite tles lercs lëdies dl mandat a desposiziun dl ënt.

(5) Le tesorier se crüzia dl'estinziun di mandac de paiamënt emetüs tla gestiun dles restanzes passives ma sce ai é da ciafé tla lista dles restanzes sotescrita dal responsabl/dala responsabla dl sorvisc finanziar y dada jö al tesorier. I mandac che reverda la gestiun dles restanzes ne pó nia gní paiá sce l'import vá sura l'amunta dles restanzes che resultëia sön le bilanz por vigni program.

(6) I mandac de paiamënt daldöt o en pert nia destodá ai 31 de dezëmber vëgn fac cun la trasformaziun te assëgns postai direc o cun d'atri mesi ecuivalënc pitá dal sistem bancar o postal. Cun la convenziun dl sorvisc de tesorier preodüda dal art. 11 vëgnel regolamenté cun l'istitut de credit inciarié cun le sorvisc de tesorier i raporc por ci che reverda l'azertamënt dl paiamënt di scec efetif y di atri mesi de paiamënt adorá.

(7) Le tesorier scrí les indicaziuns prinzipales dla cubita diretamënter sön le mandat de paiamënt o sön portadac da ti dé jö al ënt adöm cun i mandac paiá y cun so decunt injunté. Sön domanda di ënc locai ti dá le tesorier les indicaziuns prinzipales de ci operaziun de paiamënt chessî, sciöche ince les desmostraziuns relatives.

Art. 15 (Gestiun informatisada dl sorvisc de tesorier)

(1) Sce l'organisaziun dl ënt local y dl tesorier le conzed, vëgn le sorvisc de tesorier aministré cun metodes y criters informatics, cun n coliamënt diret danter le sorvisc finanziar dl ënt y le tesorier, por dé la poscibilité da se baraté fora i dac y la documentaziun che reverda la gestiun dl sorvisc.

Art. 16 (Gestiun de titui y ogec de valur)

(1) I titui dl ënt local vëgn aministrá, sce chësc vëgn lascé pro dala lege, dal tesorier che paia ite i coupons canche ai toma sön le cunt dl ofize dl tesorier.

(2) Le tesorier se crüzia ince da trá ite les deponüdes fates da terzi por spëises de contrat, de concurs y de cauziun sciöche garanzia por i impëgns surantuc, do avëi dé fora na recioiüda aposta, che n’é nia chëra dl ofize dl tesorier, cun dötes les indicaziuns prinzipales dl'operaziun.

(3) Tl regolamënt de contabilité dl ënt local vëgnel determiné les prozedöres por i prelevamënc y les retüdes.

(4) Le regolamënt de contabilité dl ënt regolamentëia les modalités de sciöche la verificaziun straordinara de cassa á da gní a s'al dé.

Art. 17 (Oblianzes dl tesorier)

(1) Tratan l'eserzize finanziar mëss le tesorier fá chisc ademplimënc:

  1. ajornamënt y conservaziun dl register de cassa;
  2. conservaziun di relevamënc de cassa periodics preodüs dala lege;
  3. conservaziun por almanco cin' agn di relevamënc de cassa preodüs dala lege.

(2) Les modalités y i termins por la trasmisciun dla documentaziun preodüda dal coma 1 vëgn stabilis tla convenziun.

Art. 18 (Resultat de gestiun dl tesorier)

(1) Te 30 dis da canche al é gnü stlüt jö l'eserzize finanziar ti presentëia le tesorier, aladô dl articul 13, i resultac de süa gestiun de cassa al ënt local che ti i mëna inant ala seziun iurisdizionala competënta dla Curt di Cunc te 60 dis dal'aprovaziun dl decunt.

Art. 19 (Injuntes al cunt dl tesorier)

(1) Le cunt dl tesorier vëgn metü jö sön la basa dl model preodü dal'injunta n. 17 al decret legislatif di 23 de jügn dl 2011, n. 118, y mudaziuns suandëntes. Le tesorier injunta al cunt chësta documentaziun:

  1. les injuntes por vigni tipologia d'entrada singola y por vigni program de spëisa singul;
  2. i ordins de scudimënt y de paiamënt;
  3. les perts dles cubites originales che é gnüdes dades fora por i ordins de scudimënt y de paiamënt o impede chëstes, i documënc informatics cun les indicaziuns prinzipales dles cubites;
  4. d'atri documënc eventuai damaná dala Curt di Cunc.

TITUL V
RELEVAMËNT Y DESMOSTRAZIUN DI RESULTAC DE GESTIUN

Art. 20 (Decunt dla gestiun)

(1) Por i ënc locai cun na popolaziun sura 8000 abitanc y por chi che á decunc che se stlüj jö cun n import manciant o cun l'indicaziun de debic fora de bilanz vëgn le decunt presenté ala Seziun ënc locai dla Curt di Cunc por la relaziun preodüda dal articul 13 dl decret-lege di 22 de dezëmber dl 1981, n. 786, trasformé cun mudaziuns dala lege di 26 de forá dl 1982, n. 51, y mudaziuns suandëntes.

(2) I ënc locai ti mëna telematicamënter ala Seziun ënc locai dla Curt di Cunc le decunt cun dötes les injuntes lapró, sciöche ince cun les zertificaziuns dl cunt preventif y consuntif.

Art. 21 8)

8)
L'art. 21 é gnü mudé dal art. 26, coma 1 dla l.p. di 7 d’agost dl 2017, n. 12, y spo abroghè dal art. 19, coma 1, lëtra d), dla l.p. 3 de jenà 2020, n. 1.

TITUL VI
REVIJIUN ECONOMICH-FINANZIARA

Art. 22 (Organ de revijiun economich-finanziara)

(1) I ënc locai lîta, cun votaziun limitada a dui componënc por litadú/litadëssa, le collegium di revisurs di cunc, metü adöm da trëi comëmbri scric ite a livel regional, tl Register di revisurs legai preodü dal decret legislatif di 27 de jená dl 2010, n. 39 o tl ordin di doturs comerzialisć y di esperc contabli che á i recuisic formatifs stabilis dala Regiun Trentin-Südtirol aladô dl coma 2 de chësc articul, por eserzité les funziuns de revisur di cunc ti ënc locai tl raiun corespognënt. Ti ënc locai dla Provinzia de Balsan mëss la composiziun dl collegium di revisurs s'adaté ala consistënza di grups linguistics sciöche ara resultëia dai dac dl'ultima cumpëda ofiziala dla popolaziun.

(2) Por l'eserzize dl control de gestiun suzessif sön i ënc locai preodüs dal articul 79, coma 3 dl decret dl Presidënt dla Republica di 31 d'agost dl 1972, n. 670 organisëia la Provinzia autonoma de Balsan, en colaboraziun cun l'ordin profescional competënt y cun les assoziaziuns rapresentatives di revisurs di cunc, percursc de formaziun y ajornamënt por les porsones scrites ite preodüdes dal coma 1, por che ares pois acuisí competënzes spezifiches ti seturs olache la Provinzia eserzitëia funziuns de control. Cun deliberaziun dla Junta provinziala vëgnel stabilí les modalités, la frecuënza y la valutaziun de chisc percursc formatifs, do avëi aldí l'ordin profescional competënt y les assoziaziuns rapresentatives di revisurs di cunc.

(3) Ti comuns cun manco co 15.000 abitanc ti vëgnel surandé la revijiun economich-finanziara a n su revisur/na sora revisuria che vëgn lité/litada a maioranza assoluta di comëmbri dl consëi de comun danter les porsones preodüdes dal coma 1. Ti comuns cun na popolaziun danter 15.000 y 30.000 abitanc pó le regolamënt de contabilité odëi danfora che l'organ de revijiun sides metü adöm da dui componënc, y regolamenté les modalités de so funzionamënt. Te chësc ultimo caje vëgn un di dui componënc nominé dales mendranzes dl consëi.

Art. 23 (Dorada dl'inciaria)

(1) L'organ de revijiun contabla eserzitëia süa inciaria por n tëmp de trëi agn dal de olache la deliberaziun de nominaziun vëgn esecutiva o atira eseguibla y sü comëmbri pó gní litá ma un n iade indolater. Sce n comëmber dl collegium mëss gní sostituí, eserzitëia le comëmber nü lité süa inciaria cina che al toma i trëi agn, che vëgn calcolá dala nominaziun de döt le collegium. Al vëgn apliché les normes che reverda la prorogaziun dla dorada dl'inciaria di organs aministratifs.

Art. 24 (Rajuns por la pordüda dl'inciaria)

(1) Le revisur/La revisuria di cunc pó ma gní revoché/revocada sce al/ara ne ademplësc nia sü dovëis, dantadöt sce al/ara ne dá nia jö la relaziun sön la proposta de deliberaziun dl consëi sön le decunt. La pordüda dl'inciaria vëgn a s'al dé sce le mandat toma, sce al vëgn dé volontariamënter les demisciuns o sce al é imposcibl da ademplí l'inciaria por n tëmp stabilí dal regolamënt de contabilité de vigni ënt, che döra a vigni moda almanco trëi mëisc.

Art. 25 (Incompatibilité y ilitabilité)

(1) L'inciaria de n revisur é incompatibla cun chëra de aministradú o de revisur di cunc de formes d'assoziaziun o de cooperaziun danter i comuns, de aziëndes speziales o sozietés de capitai che aministrëia sorvisc publics tl raiun dl comun.

(2) Por i revisurs di cunc vel i caji de incompatibilité preodüs dal articul 2399 dl coma 1 dl codesc zivil; cun i aministradus dá dant iló él miné i componënc dl organ esecutif dl ënt local.

(3) I componënc di organs dl ënt local y chi che á ademplí chësta inciaria ti dui agn dan la nominaziun, i comëmbri dl organ de control, le secreter/la secreteria y le personal dependënt dl ënt local olache al mëss gní nominé l'organ de revijiun ne pó nia eserzité l'inciaria de revisur.

(4) I componënc di organs de revijiun contabla de n ënt local ne pó nia surantó inciaries o consulënzes da chësc ënt local o da organisms o istituziuns che depënn da chësc o che é a vigni moda sotmetüdes a so control o a süa verda.

Art. 26 (Revisurs di cunc)

(1) Le collegium di revisurs vëgn costituí validamënter ince sce ma dui componënc é presënc.

(2) Le collegium di revisurs o le revisur unich/la revisuria unica scrí n verbal dles reuniuns, ispeziuns, verificaziuns, determinaziuns y dezijiuns tutes.

Art. 27 (Limit por l'afidamënt dles inciaries)

(1) Vigni revisur/revisuria di cunc ne pó nia surantó indöt plü co ot inciaries.

(2) Por i fins dl coma 1 vëgnel ince tut en conscidraziun les inciaries dades da formes de colaboraziun danter i comuns y dai ënc istituis aladô dl articul 7 dl decret dl Presidënt dla Republica di 22 de merz dl 1974, n. 279.

(3) L'inciaria de revijiun vëgn surandada a condiziun che al vëgnes dé jö la detlaraziun aladô dl decret dl Presidënt dla Republica di 28 de dezëmber dl 2000, n. 445, cun chëra che le soget atestëia le respet dl limit preodü dal coma 1.

(4) I ënc locai ti lascia alsavëi al tesorier, al Comissariat dl govern y ala Junta provinziala i inoms dles porsones a chëres che al ti é gnü surandé l'inciaria te 20 dis da canche la deliberaziun de nominaziun é gnüda esecutiva.

Art. 28 (Funziuns di revisurs di cunc)

(1) Por l'eserzize dles funziuns di revisurs di cunc vëgnel apliché les desposiziuns preodüdes dal articul 239 dl decret legislatif di 18 d'agost dl 2000, n. 267, y mudaziuns suandëntes.

(2) I revisurs di cunc á implü chëstes funziuns:

  1. verda sön l'aplicaziun di contrac coletifs;
  2. verda sön l'aplicaziun dles normes che reverda la curida di posć odüs danfora dai regolamënc dl personal conform ala consistënza di grups linguistics aladô dl articul 62 dla lege regionala di 4 de jená dl 1993, n. 1 y mudaziuns suandëntes, y sön l'aplicaziun dles normes che reverda la conescënza dl lingaz talian, todësch y ladin aladô dl decret dl Presidënt dla Republica di 26 de messé dl 1976, n. 752, y mudaziuns suandëntes.

Art. 29 (Responsabilité)

(1) I revisurs di cunc é responsabli dla verité de sües detlaraziuns y mëss ademplí sü dovëis cun l'acuratëza dl mandatar. Implü mëssi mantigní la resservatëza sön i fac y i documënc che ai conësc por rajuns de so ofize.

Art. 30 (Compëns di revisurs di cunc)

(1) Le compëns mascimo che ti pó gní atribuí ai comëmbri dl collegium di revisurs di cunc o al revisur unich/ala revisuria unica vëgn preodü dales normes regionales relatives.

(2) Le compëns por i revisurs di cunc vëgn stabilí tles deliberaziuns de nominaziun y ne pó nia jí sura les tarifes determinades sön le plann general por vigni categoria o classa de ënc cun deliberaziun dla Junta regionala, do avëi aldí i ordins profescionai y les assoziaziuns rapresentatives di comuns a livel provinzial.

Art. 31 (Norma de renviada)

(1) L'indunada dl consorz preodüda dal articul 61 dl decret dl Presidënt dla Regiun dl 1. de forá dl 2005, n. 3/L aplichëia pro la nominaziun y la determinaziun di recuisic y dles incompatibilités di revisurs di cunc les desposiziuns de chësc titul, y plü avisa fajon referimënt, por ci che reverda le numer di comëmbri dl organ de revijiun contabla, ales desposiziuns che é tl statut.

(2) Le coma 1 vëgn apliché ales aziëndes speziales y ales istituziuns, tignin cunt de ci che vëgn odü danfora dal articul 45 dla lege regionala di 4 de jená dl 1993, n. 1, y mudaziuns suandëntes.

TITUL VII
ËNC LOCAI CUN DEFIZIT O CUN DIFICOLTÉS DE PAIAMËNT

Art. 32 (Ënc locai cun defizit o cun dificoltés de paiamënt)   delibera sentenza

(1) Ai ënc locai cun defizit o cun dificoltés de paiamënt ti vëgnel apliché les desposiziuns che é tl titul VIII dl decret legislatif di 18 d'agost dl 2000, n. 267, y mudaziuns suandëntes, tut fora l'articul 242, coma 2 y i articui 252 y 269.

(2) Les autorités aministratives statales nominades tl titul VIII dl decret legislatif di 18 d'agost dl 2000, n. 267, y mudaziuns suandëntes, vëgn sostituides dales autorités aministratives relatives dla Provinzia aladô dl articul 54 dl decret dl Presidënt dla Republica di 31 d'agost dl 1972, n. 670, y mudaziuns suandëntes.

[(3) Les competënzes che ti vëgn atribuides dal titul VIII dl decret legislatif di 18 d'agost dl 2000, n. 267, y mudaziuns suandëntes, ala Curt di cunc che toma sot ales funziuns preodüdes dal articul 79 dl decret dl Presidënt dla Republica di 31 d'agost dl 1972, n. 670, y mudaziuns suandëntes, vëgn ademplides dala Provinzia autonoma de Balsan. ] 9)

(4) La Junta provinziala:

  1. determinëia i parametri preodüs dal articul 242, coma 2 dl decret legislatif di 18 d'agost dl 2000, n. 267, y mudaziuns suandëntes;
  2. definësc y nominëia l'organ de licuidaziun straordinar preodü dal articul 252 dl decret legislatif di 18 d'agost dl 2000, n. 267, y mudaziuns suandëntes.

(5) Les modalités d'aplicaziun dla prozedöra de ressanamënt di ënc locai che á dificoltés de paiamënt vëgn stabilides cun regolamënt d'esecuziun.

massimeBeschluss vom 31. Oktober 2017, Nr. 1184 - Genehmigung der Parameter zur Feststellung der defizitären Lage für die örtlichen Körperschaften der Autonomen Provinz Bozen
massimeCorte costituzionale - sentenza del 26 settembre 2017, n. 228 - Bilancio e contabilità pubblica – Ordinamento finanziario e contabile dei comuni e delle comunità comprensoriali – Salvaguardia degli equilibri di bilancio – Enti locali deficitari o dissestati – competenza statale
9)
La Curt Costituzionala á detlaré cun sentënza di 26 de setëmber dl 2017, n. 228 che l’art. 7 y l’art. 32, coma 3 dla lege provinziala di 12 de dezëmber dl 2016, n. 25 é cuntra la costituziun.

Art. 32/bis (Reelaboraziun dl plann de reecuiliber finanziar plurienal)

(1)Ai ënc locai che á presenté, denant che chësc articul jiss en forza, le plann de reecuiliber finanziar plurienal o á ciafé süa aprovaziun aladô dl articul 243/bis dl decret legislatif di 18 agost dl 2000, n. 267, y mudaziuns suandëntes, vëgnel apliché l’articul 1, coma 888 dla lege di 27 de dezëmber dl 2017, n. 205, y mudaziuns suandëntes. 10) 

10)
L'art. 32/bis é gnü ajunté dal art. 2, coma 1 dla l.p. di 24 de setëmber dl 2019, n. 8, y spo sostituí dal art. 4, coma 1 dla l.p. di 27 de merz dl 2020, n. 2.

TITUL VIII
NORMES TRANSITORES Y FINALES

SEZIUN I
CONTROI

Art. 33 (Renviada ala lege regionala sön l' ordinamënt di comuns)

(1) Por i caji de scomposiziun y sospenjiun dl consëi por ci rajun chessî vëgnel renvié ala lege regionala relativa.

SEZIUN II
TERMINS POR L'APLICAZIUN DL SISTEM DE CONTABILITÉ NÜ

Art. 34 (Termins por l'adoziun y l'adatamënt dl regolamënt de contabilité)

(1) I consëis ajornëia le regolamënt de contabilité dl ënt tl tëmp de n ann dala jüda en forza de chësta lege y l'adatëia ai prinzips preodüs dal decret legislatif di 23 de jügn dl 2011, n. 118, y mudaziuns suandëntes.

(2) Dala jüda en forza de chësta lege ne vëgnel nia plü apliché les desposiziuns regolamentares di ënc locai che n'é nia compatibles cun la regolamentaziun provinziala nöia y cun le decret legislatif di 23 de jügn dl 2011, n. 118, y mudaziuns suandëntes.

(3) Al resta a vigni moda impé les desposiziuns preodüdes dal articul 23, comesc 1, 2 y 3 dla lege provinziala di 23 de dezëmber dl 2014, n. 11.

Art. 35 (Abrogaziun de normes y norma transitora)

(1) Cun faziun dala jüda en forza de chësta lege vëgnel abroghé la lege provinziala di 22 de dezëmber dl 2015, n. 17.

(2) L'articul 6 dla lege provinziala di 21 de messé dl 2016, n. 17, y mudaziuns suandëntes, vëgn aborghé, ater co nia por i comuns che â bele deliberé, canche chësc articul é jü en forza, l'estinziun dl imprëst dan dal tëmp.

Art. 36 (Desposiziun finanziara)

(1) Chësta lege ne comporta nia spëises implü a ciaria dl bilanz provinzial.

Art. 37 ( Jüda en forza)

(1) Chësta lege vá en forza al 1. de jená dl 2017.

Chësta lege gnará publicada tl Boletin Ofizial dla Regiun. Vigni porsona a chëra che al ti speta á da la respeté y da la fá respeté sciöche lege dla Provinzia.

 

indice
ActionActionNormativa Costituzionela
ActionActionLegislazion Provinziela
ActionActionI Alpinistica
ActionActionII Lëur
ActionActionIII Mineres
ActionActionIV Chemuns y cumenanzes raioneles
ActionActionV Furmazion prufescionela y adestramënt al lëur
ActionActionVI Defendura di teraces, frabiches per l’ega
ActionActionVII Energia
ActionActionVIII Finanzes
ActionActionA A – Partezipazions dla Provinzia
ActionActionB B – Chëutes provinzieles
ActionActionC C – Finanzes locales
ActionActionh) Lege Provinziala di 18 de aurì dl 2012, n. 8
ActionActioni) Lege provinziala di 23 de aurì dl 2014, n. 3
ActionActionj) Lege provinziala di 22 de dezëmber dl 2015, n. 17
ActionActionl) Lege provinziala di 12 de dezëmber dl 2016, n. 25
ActionActionDESPOSIZIUNS GENERALES 
ActionActionBILANZ Y PROGRAMAZIUN
ActionActionGESTIUN DL BILANZ
ActionActionSORVISC DE TESORIER
ActionActionRELEVAMËNT Y DESMOSTRAZIUN DI RESULTAC DE GESTIUN
ActionActionREVIJIUN ECONOMICH-FINANZIARA
ActionActionËNC LOCAI CUN DEFIZIT O CUN DIFICOLTÉS DE PAIAMËNT
ActionActionNORMES TRANSITORES Y FINALES
ActionActionD D – Bilanz dla Provinzia
ActionActionE - Debit ora dl bilanz
ActionActionIX Turism y ndustria d’albierch
ActionActionX Assistënza y benefiziënza
ActionActionXI Ustaries
ActionActionXII Nuzënzes ziviches
ActionActionXIII Urdinamënt di bòsc
ActionActionXIV Sanità y igena
ActionActionXV Nuzeda dl’eghes
ActionActionXVI Cumerz
ActionActionXVII Artejanat
ActionActionXVIII Liber fundier y cataster
ActionActionXIX Ciacia y Pëscia
ActionActionXX Prutezion contra l meldefuch y prutezion zevila
ActionActionXXI Scolines
ActionActionXXII Cultura
ActionActionXXIII Ufizies provinziei y personal
ActionActionXXIV Defendura dla cuntreda y dl ambient
ActionActionXXV Agricultura
ActionActionXXVI Lernerat
ActionActionXXVII Fieres y marceies
ActionActionXXVIII Lëures publics
ActionActionXXIX Manifestazions publiches
ActionActionXXX Raiun y contrada
ActionActionXXXI Cuntabltà
ActionActionXXXII Sport y tëmp liede
ActionActionXXXIII Stredes
ActionActionXXXIV Trasporc
ActionActionXXXV Istruzion
ActionActionXXXVI Patrimone
ActionActionXXXVII Economia
ActionActionXXXVIII Frabiché abitatif
ActionActionXXXIX Leges cun desposiziuns desvalies (Omnibus)
ActionAction*
ActionAction*
ActionAction*
ActionActionIndesc cronologich