(1) I comitënc publics y i ënc aiudicatars mëss tó mosöres adatades por jí cuntra les ingianades, le nepotism y la coruziun y por se stravardé, ciafé sö i conflic de interes gnüs a se le de tratan les prozedöres de surandada y ciafé na soluziun a na moda da tigní fora vigni falsificaziuns dla concorënza y garantí la trasparënza dla prozedöra de surandada y la parité de tratamënt de düc i candidac y pitadus.
(2) Le conzet de conflit d'interesc tol ite altamo i caji olache le personal de n comitënt publich o de n ënt aiudicadú, che tol pert al desfiramënt dla prozedöra de surandada o che pó influenzé le resultat che chësta prozedöra, á diretamënter o indiretamënter n interes finanziar, economich o n ater interes personal che pó gní odü sciöche na manacia de süa imparzialité y independënza tl cheder dla prozedöra de surandada.
(3) Por ci che reverda i conflic d'interesc, ne pó les mosöres adorades nia jí sura ci che vá veramënter debojëgn fora por tigní fora n conflit d'interesc potenzial o tó y jí le conflit d'interesc ciafé sö.
(4) Pro i apalc de sorvisc olache an adora tröpa forza de laur mëss l’operadú economich, che é le pröm sön la gradatöra do che al é gnü daurí les ofertes economiches, desmostré tignon cunt dl'esecuziun dl'inciaria, le cost dl personal definí tignon cunt dl contrat coletif nazional y dl contrat teritorial varënt por le setur y por le raiun olache al vëgn pité les prestaziuns de laur. Le responsabl unich/La responsabla unica dl prozedimënt controlëia che le cost dl personal dé dant dal operadú economich sides adaté ala proposta de surandada, y che al vëgnes respeté tratan l'esecuziun. 39)
(5) I operadus economics mëss garantí, tl’esecuziun di apalc publics, le respet di dovëis varënc en materia de dërt ambiental, sozial y dl laur stabilí dal dërt dl’Uniun, dal dërt nazional o dales normes provinziales, da contrac coletifs, sides de setur che intersetoriai nazionai y teritoriai, o dales desposiziuns internazionales en materia de dërt ambiental, sozial y dl laur scrites sö tl’injunta X dla diretiva 2014/24/UE.