(1) Le gestur di sorvisc de trasport publich che s'un vá mëss, ince tl caje de raporc contratuai che é, che toma, bele tomá o en prorogaziun, ti mëte a desposiziun al afidatar suzessif, che é gnü individué tres na gara o n afidamënt in house, i bëgns che öga por la prestaziun di sorvisc de trasport de bus, ferata, tram y furnadoia, ince sce ai é dá adinfit al gestur di sorvisc de trasport publich che s'un vá, sciöche ince düc i atri bëgns stromentai che é gnüs cumprá deplëgn tres mesi publics, dal momënt che chësta condiziun rapresentëia n lian de destinaziun por döta la dorada d'adoranza dl bëgn o por le tëmp dé dant espressamënter cun le lian de destianziun d'adoranza. Deache i sorvisc de trasport publich é sorvisc publics essenziai che an ne pó nia fá sté sö, mëss le gestur zedënt, tratan le tëmp de trasferimënt de 60 dis preodü dal coma 2, pité inant le sorvisc ales condiziuns dla conzesciun che toma o tomada y arlungiada, y garantí na transiziun zënza interuziun dla continuité.
(2) Tl respet de ci che vëgn desponü dales leges provinziales por ci che reverda l'indenisaziun vëgnel apliché, por calcolé n'indenisaziun eventuala o n compëns eventual a bëgn dl gestur che s'un vá por la metüda a desposiziun di bëgns stromentai preodüs dal coma 1, la mosöra 6, punt 3 y suandënc dl'injunta A dla deliberaziun dl'Autorité de Regolaziun di Trasporc n. 154 di 28 de novëmber dl 2019.
(3) Sce le trasferimënt ne vëgn nia a se le dé o sce al n'é nia gnü metü a desposiziun i bëgns tl tëmp de 60 dis dala recioiüda tres posta eletronica zertificada (PEC) dla ghiranza relativa da pert dla Provinzia, restel impé le dërt dla Provinzia da passé ala recuisiziun d’adoranza aladô dl articul 835 dl Codesc zivil. 8)