i) Lege provinziala di 23 de aurì dl 2014, n. 31)
Istituziun dla cuta sön i imobii comunala (IMI/GIS)

Publicada tl B.O. di 29 d'aurì dl 2014, n. 17.

Art. 9 (Determinaziun dl'alicuota)

(1) L'alicuota ordinara dla cuta ti corespogn al 0,76 porcënt. I Comuns pó alzé l’alicuota ordinara cina a 0,8 punc porcentuai o l'arbassé cina a 0,5 punc porcentuai. 21)

(2) L'alicuota vëgn arbassada al 0,4 porcënt por l'abitaziun prinzipala y por ći che alda laprò.

(3) L'alicuota vëgn arbassada al 0,56 porcënt por i frabicac classificá tles categories catastales C/1 y C/3 y tl grup catastal D, tut fora i imobii che alda por la categoria catastala D/5, por les üties da munt classificades tla categoria catastala A/11, por les abitaziuns dla categoria catastala A che vëgn adorades por l’ativité turistica te strotöres da sciori a carater d’alberch y nia d'alberch aladô dla lege provinziala di 14 de dezëmber dl 1988, n. 58, y mudaziuns suandëntes, sciöche ince por unités imobiliares dles categories catastales C/2, C/6 y C/7 che alda pro les unités imobiliares che vëgn adorades esclusivamënter por les ativités turistiches aladô dla lege provinziala nominada dessura. I Comuns pó arbassé l'alicuota cina al'alicuota minima de 0,1 punc porcentuai, ince por categories de frabicac determinades, sön la basa de criters da stabilí tl regolamënt comunal. 22)

(4) L'alicuota vëgn arbassada al 0,2 porcënt por chisc frabicac: i frabicac che vëgn adorá dantadöt por l'ativité d'afit de ciamenes y apartamënc por feries aredá aladô dla lege provinziala di 11 de ma dl 1995, n. 12, y mudaziuns suandëntes, sciöche ince i frabicac che vëgn adorá por les feries sön le lüch da paur aladô dla lege provinziala di 19 de setëmber dl 2008, n. 7, y mudaziuns suandëntes, y ci che alda lapró dles categories catastales C/2, C/6 y C/7, tla mosöra de alplü trëi unités che alda lapró, de chëstes al mascimo döes dla medema categoria. L'alicuota arbassada ne vëgn nia aplicada ales abitaziuns dles categories catastales A/1, A/7, A/8 y A/9. L'alicuota por frabicac che vëgn adorá por les feries sön le lüch da paur pó gní arbassada cina al nul porcënt cun regolamënt comunal, sce al é almanco 75 punc de dificolté. I Comuns pó, sön la basa di criters da stabilí cun regolamënt comunal, aumenté l’alicuota cina al 0,56 porcënt por i frabicac che vëgn dantadöt adorá por l’ativité de afitaciamenes y apartamënc por feries aredá aladô dla lege provinziala di 11 de ma dl 1995, n. 12, y mudaziuns suandëntes, y aumenté l’alicuota cina al 0,3 porcënt por i frabicac che vëgn adorá por feries sön le lüch da paur aladô dla lege provinziala di 19 de setëmber dl 2008, n. 7, y mudaziuns suandëntes. Les alicuotes realzades vëgn ince aplicades a ci che alda lapró en chësc cunt dles categories catastales C/2, C/6 y C/7, tla mosöra de alplü trëi unités che alda lapró, de chëstes al mascimo döes dla medema categoria. 23)

(4/quater) Por podëi apliché les alicuotes arbassades preodüdes dal coma 4 por frabicac, che vëgn dantadöt adorá por l'afit de ciamenes o apartamënc por feries aredá aladô dla lege provinziala di 11 de ma dl 1995, n. 12, y mudaziuns suandëntes mëss i Comuns stabilí, tla deliberaziun dl Consëi comunal sön l'aprovaziun dles alicuotes, le degré d'anuzamënt minim danter le 20 y le 50 porcënt. Le degré d'anuzamënt mascim vëgn calcolé multiplican le numer mascimal de lec comunicá dala strotöra d'alojamënt por 365 dis, sce l'ativité vëgn eserzitada fora por döt l'ann. Por les strotöres d'alojamënt che á comuniché tëmps de daurida plü cörc vëgn le degré d'anuzamënt mascim y minim calcolá en proporziun. Le medemo prinzip vëgn ince apliché sce les strotöres d'alojamënt comunichëia intratan l'ann le scomenciamënt o la fin de süa ativité o l'aumënt o la reduziun dl numer de lec. Le degré d'anuzamënt efetif vëgn determiné sön la basa di pernotamënc comunicá aladô dl articul 9 dl decret dl Presidënt dla Provinzia dl 1. de forá dl 2013, n. 4, y mudaziuns suandëntes, por le tëmp dal 1. de setëmber dl ann da denant al 31 d'agost dl ann fiscal. Por les strotöres d'alojamënt che comunichëia le scomenciamënt de süa ativité tratan l'ann vëgnel apliché por i pröms sis mëisc l'alicuota arbassada stabilida dal Comun aladô dl coma 4, zënza tó en conscidraziun le degré d'anuzamënt. 24)

(5) L'alicuota vëgn arbassada al 0,2 porcënt por chëstes categories de frabicać agricoi stromentai che é destinà:

abitaziun por le personal dependënt che eserzitëia ativitês agricoles y forestales tl'aziënda sciöche dependënć/dependëntes a tëmp indeterminé o determiné por plü de 100 dis da laûr al ann y che é gnü tut sö en conformité ales normes varëntes tl dërt dl laûr, inće sce chisc frabicać é scrić ite te na categoria dl grup A, tut fora les categories A/1, A/7, A/8 y A/9. N'abitaziun vëgn conscidrada n frabicat agricol cun adoranza stromentala por döt le tëmp de cuta sce ara vëgn abitada da dependënć/dependëntes che laôra tl'agricoltöra a tëmp indeterminé o determiné por indöt plü de 100 dis da laûr al ann;
da gnì adorà sciöche ofize dl'aziënda agricola, inće sce ai é scrić ite te n'atra categoria catastala co D/10;
al tratamënt, ala lauraziun, ala conservaziun, ala valorisaziun o comerzialisaziun di produć agricoi di seturs dl'ordöra y verzöra, dla viticoltöra y dla lataria da pert dles cooperatives y sü consorc preodüs tl articul 1, coma 2 dl decret legislatif di 18 de mà dl 2001, n. 228, sciöche inće da pert de sozietês agricoles preodüdes tl articul 2 dl decret legislatif di 29 de merz dl 2004, n. 99.

(6) L'alicuota vëgn arbassada al 0,2 porcënt por i imobii che é en posses de chisc sogec de dërt y vëgn adorá da chisc:

scores y scolines parificades preodüdes dal articul 20/bis dla lege provinziala di 29 de jügn dl 2000, n. 12, sciöche ince les cooperatives de scolines convenzionades cun le Comun;
ënc nia comerziai preodüs dal articul 73, coma 1, lëtra c) dl decret dl Presidënt dla Republica di 22 de dezëmber dl 1986, n. 917, y mudaziuns suandëntes, che fej por statut ativités tl ćiamp dl'assistënza, dla previdënza, dla sanité, dl'inrescida scientifica, dla didatica, dl alojamënt, dla cultura, dla recreaziun y dl sport;
organisaziuns zënza fin de davagn de ütl sozial (ONLUS) preodüdes dal articul 10 dl decret legislatif di 4 de dezëmber dl 1997, n. 460, y mudaziuns suandëntes, che fej por statut ativités tl ciamp dl'assistënza, dla previdënza, dla sanité, dl'inrescida scientifica, dla didatica, dl alojamënt, dla cultura, dla recreaziun y dl sport, sciöche ince les cooperatives zënza fin de davagn che respetëia les clausoles mutualistiches tl ciamp dla cultura. 25)

(6/bis) L’alicuota arbassada dl 0,2 porcënt vëgn ince aplicada sce un di sogec de dërt nominá tl coma 6 o n ënt teritorial publich ti dá, cun n contrat d’afit registré o cun contrat d’imprëst debann registré, n imobil che é te so posses a n ater soget de dërt nominé tl medemo coma 6. Ince por categories de frabicac spezifiches pó i Comuns arbassé l’alicuota cina a nul, sön la basa di criters da stabilí tl regolamënt comunal. 26)

(7) Les alicuotes vëgn stabilides dal Consëi de Comun cun deliberaziun da adotè ćina canche al vëgn aprovè le bilanz de previjiun, cun faziun a pié ia dal 1. de jenà dl ann a chël che le bilanz se referësc.

(8) I Comuns po odëi danfora alicuotes arbassades tla mosöra preodüda dal coma 1 por chisc caji tassatifs, tignin cunt dl prinzip aladô de chël che a situaziuns medemes y/o similares mëssel gnì apliché la medema alicuota:

por les abitaziuns y ći che alda laprò dles categories catastales C/2, C/6 y C/7 tla mosöra de alplü trëi unitês che alda laprò, de chëstes al mascimo döes dla medema categoria sce ares vëgn afitades sön la basa de n contrat d'afit registré y sce l'afitadin/l'afitadina à stabilì ilò süa residënza y se tëgn de regola sö ilò; 27)
por abitaziuns y ći che alda laprò dales categories catastales C/2, C/6 y C/7 tla mosöra de alplü trëi unitês che alda laprò, de chëstes al mascimo döes dla medema categoria, conzedüdes debann a parënć/parëntes en linea direta de ći degré chessî y en linea laterala ćina al secundo degré, sce la porsona imparentada à stabilì ilò süa residënza y se tëgn de regola sö ilò. La reduziun ne vëgn nia aplicada a frabicać dles categories catastales A/1, A/7, A/8 y A/9;
28)
por frabicac olache al vëgn fat laurs de restauraziun y de ressanamënt aladô dl articul 59, coma 1, lëtra c) dla lege provinziala di 11 d’agost 1997, n. 13, y mudaziuns suandëntes. I Comuns pó odëi danfora n alisiramënt dla cuta por n tëmp zënza interuziun de alplü 4 agn che pëia ia dala data da canche al é gnü relascé la conzesciun da frabiché o l’autorisaziun da frabiché o l’autorisaziun, aladô dl articul 8, coma 1/bis dla lege provinziala di 25 de messé dl 1970, n. 16, y mudaziuns suandëntes y aladô dl regolamënt d’esecuziun che alda lapró. Tl medemo tëmp mëssel gní stlüt jö cun suzes i laurs de restauraziun y de ressanamënt, scenó tomel l’alisiramënt dla cuta. Vigni possessuria/possessur pó se jové de chësc alisiramënt dla cuta ma un n iade por vigni unité imobiliara; 29)
por les abitaziuns y ci che alada lapró dles categories catastales C/2, C/6 y C/7, tla mosöra de alplü trëi unités che alda lapró, de chëstes al mascimo döes dla medema categoria sce ares vëgn afitades sön la basa de n contrat d'afit registré y sön la basa de n afit alisiré determiné da n’acordanza danter l’Assoziaziun por la proteziun dl afitadin y l’Assoziaziun dla proprieté da frabiché dla provinzia de Balsan;29)
por les abitaziuns y ci che alda lapró dles categories catastales C/2, C/6 y C/7 tla mosöra de alplü trëi unités che alda lapró, de chëstes al mascimo döes dla medema categoria, sce ares vëgn afitades ma por fins abitatifs sön la basa de n contrat d'afit registré, mo nia por fins turistics. 30)

(9) La reduziun dl'alicuota speta por chël tëmp dl ann olache al é les condiziuns scrites dant. Chëstes mëss gnì desmostrades cun na documentaziun adatada aladô dles modalitês stabilides tl regolamënt comunal, scenò tómel le dërt ala reduziun.

21)

L'art. 9, coma 1 é gnü mudé insciö dal art. 18, coma 5 dla l.p. di 25 de setëmber dl 2015, n. 11.

22)

L'art. 9, coma 3 é impröma gnü sostituí dal art. 2, coma 5 dla l.p. di 26 de setëmber dl 2014, n. 7 y dedô dal articul 3, coma 1 dla l.p. di 20 de dezëmber dl 2017, n. 23.

23)

L'art. 9, coma 4 é naota gnü sostituí dal art. 2, coma 6 dla l.p. di 26 de setëmber dl 2014, n. 7, y dedô él gnü mudé dal art. 4, coma 1 dla l.p. di 20 d’aurí dl 2022, n. 3, y inultima él gnü sostituí insciö dal art. 5, coma 2 dla l.p. di 23 de dezëmber dl 2022, n. 16.

24)

L'art. 9, coma 4/quater é gnü injunté dal art. 4, coma 2 dla l.p. di 20 d’aurí dl 2022, n. 3 y spo él gnü sostituí dal art. 12, coma 1 dla l.p. di 3 d’agost dl 2022, n. 9 y dal art. 5, coma 3 dla l.p. di 23 de dezëmber dl 2022, n. 16.

25)

L'art. 9, coma 6 é gnü naota sostituí dal art. 2, coma 7 dla l.p. di 26 de setëmber dl 2014, n. 7, y spo dal art. 18, coma 6 dla l.p. di 25 de setëmber dl 2015, n. 11. Ciara ince l'art. 18, coma 14 dla l.p. di 25 de setëmber dl 2015, n. 11.

26)

L'art. 9, coma 6/bis é gnü injunté dal art. 18, coma 7 dla l.p. di 25 de setëmber dl 2015, n. 11. Ciara ince l'art. 18, coma 14 dla l.p. di 25 de setëmber dl 2015, n. 11. Dedô é le coma 6/bis gnü mudé insciö dal art. 4, coma 3 dla l.p. di 20 d'aurí dl 2022, n. 3. Ciara ince l'art. 10, coma 1 dla l.p. di 20 d'aurí dl 2022, n. 3.

27)

La lëtra a) dl art. 9, coma 8 é gnüda sostituida insciö dal art. 2, coma 8 dla l.p. di 26 de setëmber dl 2014, n. 7.

28)

La lëtra c) dl art. 9, coma 8 é gnüda ajuntada dal art. 2, coma 9 dla l.p. di 26 de setëmber dl 2014, n. 7, y dedô éra gnüda abrogada dal art. 3, coma 3, lëtra b) dla l.p. di 19 d’agost dl 2020, n. 9. La lëtra c) vel indô aladô dl art. 11, coma 4 dla l.p. di 13 d’otober dl 2020, n. 12, cun faziun dai 21 d’agost dl 2020 cina ai 31 de dezëmber dl 2020.

29)

Les lëtres d) y e) dl art. 9, coma 8 é gnüdes injuntades dal art. 18, coma 8 dla l.p. di 25 de setëmber dl 2015, n. 11.

30)

La lëtra f) dl art. 9, coma 8 é gnüda ajuntada dal art. 4, coma 4 dla l.p. di 20 d’aurí dl 2022, n. 3 y spo sostituida insciö dal art. 5, coma 4 dla l.p. di 23 de dezëmber dl 2022, n. 16.