(1) Tl respet de ci che vëgn dé dant dal Statut spezial y dales normes d'atuaziun á la Provinzia autonoma de Balsan la competënza da definí l'orientamënt de svilup strategich dles rëis por la destribuziun de gas natural sön so teritore. Tla Provinzia autonoma de Balsan vëgn le sorvisc publich de destribuziun de gas natural a s'al dé te na manira uniforma sön döt le raiun provinzial.
(2) La Provinzia autonoma de Balsan surantol diretamënter, tl cheder de sües competënzes, les funziuns y les inciaries surandades dales normes statales ales autorités competëntes sciöche ince les funziuns de staziun che dá ia i laurs.
(3) Tl respet di prinzips dla concorënza lëdia, dla trasparënza, dl'efiziënza y economizité, dl'imparzialité, dla publizité, dla proporzionalité y dla nia discriminaziun, stabilësc la Junta provinziala a öna cun le Consëi di comuns, ci che vëgn do:
- les condiziuns y les modalités por tigní le concurs por dé ia le sorvisc de destribuziun de gas natural;
- l'indiziun, l'indesc dles prestaziuns y les condiziuns de partezipaziun, sciöche ince le contrat de sorvisc por l'ativité de destribuziun de gas;
- les diretives cun i criters y les modalités operatives por determiné le valur de retüda di implanc de destribuziun de gas natural.
(4) I comuns che é proprietars di implanc de destribuziun pó ti surandé chisc al gestur de raiun che röia ite. Ti atri caji, tut fora les sozietés patrimoniales blotes dles rëis, ti vëgn la proprieté di implanc de destribuziun surandada al gestur de raiun che röia ite.