d) Lege provinziala di 26 de juni dl 2009, n. 31)
Garant per la nfanzia y l’adolescënza

(1) Pra l Cunsëi provinziel vëniel istituì l Ufize dla Garanta o dl Garant per la nfanzia y l'adolescënza per la defendura di dërc y di nteresc dla jëunes y di jëuni dl raion provinziel ndependentmënter da si zitadinanza.

(1) Te chësta lege ntënden cun "jëuni" i mutons, la mutans, i jëuni y la jëunes de mëndra età.

(1) La Garanta o l Garant per la nfanzia y l’adolescënza, tlo dedò denuminà la Garanta o l Garant, defënd y garantësc i dërc di jëuni udui danora dal urdinamënt internaziunel, naziunel, regiunel y provinziel y, n particuler, dala Cunvenzion dla Nazions Unifiedes sun i dërc di mutons, stluta ju a New York ai 20 de nuvëmber dl 1989, da si protocoi de njonta, stluc ju a New York ai 6 de setëmber dl 2000, y dala Cunvenzion europeica sun l eserzize di dërc di mutons, stluta ju a Strassburg ai 25 de jené dl 1996, ratifichei y metui n forza dala Talia respetivamënter cun la leges di 27 de mei dl 1991, n. 176, cun la lege di 11 de merz dl 2002, n. 46, y cun la lege di 20 de merz dl 2003, n. 77.

(2) La Garanta o l Garant à plu avisa chësta funzions:

• a)  ëila o ël controlea l'aplicazion tl raion provinziel dla cunvenzions nunziedes tl coma 1 y dl'autra cunvenzions internaziuneles y europeiches y sun l'aplicazion y l'atuazion dla leges stateles, regiuneles y provinzieles n cont dla defendura di dërc di jëuni;
• b)  ëila o ël sustën l avanamënt dla cunescënza y l’afermazion di dërc ndividuei, soziei y politics di jëuni, metan a jì scumenciadives adatedes a realisé cuncretamënter chisc dërc;
• c)  ëila o ël sustën, nce n culaborazion cun ënc publics y privac, scumenciadives per sensibilisé i jëuni, la families, i operatëures spezialisei tl ciamp dla junëza y la sozietà n generel per cie che reverda i problems y i dërc di mutons y di jëuni;
• d)  ëila o ël pieta cunsulënza ai jëuni sun cuestions giuridiches y fej da mediatëura o mediatëur te situazions de cunflit danter i jëuni y si genitores o chi che ie autorisei a si educazion;
• e)  ëila o ël fej da mediatëura o mediatëur te caji de cunflit danter i jëuni y si genitores o chi che ie autorisei a i eduché da una pert y l'aministrazions y i servijes publics dal'autra pert;
• f)  ëila o ël ti dà urëdla diretamënter y n cunfidënza nce a persones de mëndra età n cont de si bujëns, si dumandes y si prupostes miredes a miuré la cundizion dla nfanzia y dl'adolescënza;
• g)  ëila o ël sustën la culaborazion danter l'aministrazions publiches dla Provinzia cumpetëntes per la defendura dla nfanzia y dl’adolescënza, i sogec privac mpeniei tl setor y l'autoriteies giudizieres;
• h)  ëila o ël tol su la senialazions tl cajo de viulazions di dërc di jëuni y dà nfurmazions sun la modaliteies dla defendura y dl'eserzitazion de chisc dërc;
• i)  ëila o ël ti fej al savëi ai servijes soziei o al'autorità giudiziera de situazions che se damanda na ntervenzion de prëscia dal pont de ududa giuridich o de assistënza per la defendura di jëuni de mëndra età;
• j)  ëila o ël nfurmea l'aministrazions publiches cumpetëntes n cont de fatores de resieda o de danns gaujei a jëuni da cundizions de vita stletes o nia adatedes dal pont de ududa igenich-saniter, abitatif y urbanistich;
• k)  ëila o ël formulea prupostes per miuré l sistem normatif, l sistem di servijes, i programs y i ntervënc a bën dla nfanzia y dl'adolescënza;
• l)  ëila o ël dà, sun dumanda di organns provinziei y cumenei cumpetënc o per si scumenciadiva, arac sun proiec de ac normatifs y aministratifs, sce i reverda nce i nteresc di jëuni;
• m)  ëila o ël cunlëura cun l Cumité provinziel per la comunicazions pra la verdia sun l'atività di mesuns de comunicazion.

(3) La Garanta o l Garant eserzitea si funzions te na maniera defin ndependënta y ne ie sometù o sometuda a deguna forma de cuntrol gerarchich o funzionel. Ëila o ël dejëuj si atività do avëi giapà na senialazion o d'ufize.

(4) Tl eserzize de si funzions à la Garanta o l Garant l dërt de azeder a duc i documënc y ac dl'aministrazions publiches y de fé copies debant. Ëila o ël muessa te uni cajo usservé la despusizions sun la defendura dla privacy.

(1) La Garanta o l Garant manda uni ann, nchin dl mëns de merz, al Cunsëi provinziel, ala Jonta provinziela y al Cunsëi di chemuns na relazion sun si atività, che cuntën nce na relazion menuda sun la cundizions de vita di jëuni, n cajo cun cunsëies y prupostes de carater normatif y aministratif.

(2) La Garanta o l Garant vën audì dala cumiscions dl Cunsëi provinziel n cont di problems y dla scumenciadives che à da nfé cun i bujëns, i dërc y i nteresc di jëuni.

(3) La Garanta o l Garant cunlëura cun l'autra istituzions publiches semientes a livel regiunel, naziunel y internaziunel y nce cun la urganisazions nia guviernatives atives tl ciamp dla defendura di dërc di mutons.

(1) La Defensëura zivica o l Defensëur zivich y la Garanta o l Garant fej al savëi l un al auter situazions che nteressea tramedoi y coordinea si atività tl cheder dla cumpetënzes respetives.

(2) La Defensëura zivica o l Defensëur zivich y la Garanta o l Garant fej al savëi l un al auter situazions che nteressea tramedoi y coordinea si atività tl cheder dla cumpetënzes respetives.

(1) La Garanta o l Garant vën crissa o cris ora danter la persones che à almanco chisc recuisic:

• a)  laurea;
• b)  atestat de cunescënza dla rujenedes taliana y tudëscia, curespundënt al diplom de laurea (A);
• c)  cumpetënza o esperienza prufescionela cumpurvedes tl ciamp di jëuni de mëndra età y te materies che reverda l'età dl svilup.

(2) L pruzedimënt per la vela dla Garanta o dl Garant di mëndri d'età vën nvià via cun la publicazion tl Buletin Ufiziel dla Region, cumandeda dala Presidënta o dal Presidënt dl Cunsëi provinziel, de na cunedida publica, da chëla che l muessa unì ora tlermënter:

• a)  la ntenzion dl Cunsëi provinziel de lité la Garanta o l Garant;
• b)  i recuisic minims damandei per curì la ncëria;
• c)  l tratamënt economich;
• d)  l terminn de 30 dis dala publicazion dla cunedida publica per la presentazion dla candidatures pra la Presidënza dl Cunsëi.

(3) Dan la vela dla Garanta o dl Garant ie la candidates o i candidac che à i recuisic nunziei pra i pustoms a) y b) dl coma 1, y che l azertea mustran su i documënc aldò o tres na autozertificazion, nviedes o nviei a na audizion tl Cunsëi provinziel, davierta a duta la cunselieres y a duc i cunselieres provinziei. La candidates y i candidac porta dant si cumpetënza o esperienza prufescionela tl ciamp di jëuni y tla materies che reverda l'età dl svilup y desmostra nsci che ëiles o ëi à i recuisic nunziei pra l pustom c) dl coma 1 presentan si ideies n cont di ponc zentrei dl'atività che i eserzitëssa tl daunì y dla cunduzion dl Ufize dla Garanta o dl Garant per la nfanzia y l'adolescënza.

(4) La Garanta o l Garant vën liteda o lità dal Cunsëi provinziel tres na vela sucrëta danter la candidates y i candidac che à partezipà al'audizion nunzieda pra l coma 3 y ëila o ël ie numinei cun decret dla Presidënta o dl Presidënt dl Cunsëi. La candidata o l candidat che giapa i doi terc dla ujes dla cunselieres y di cunselieres provinziei ie liteda o lità.

(5) La ncëria de Garanta o Garanta ne ie nia cumpatibla cun chëla de cumëmber dl Guviern y dl Parlamënt, de Presidënta o de Presidënt dla Region o dla Provinzia, de cumëmber dl Cunsëi regiunel y provinziel, de cumëmber dla Jonta regiunela y provinziela, de ambolta o ambolt, de assessëura o assessëur o de cumëmber dl Cunsëi cumenel de n chemun dla provinzia.

(6) La ncëria de Garanta o Garant ne ie oradechël nce nia cumpatibla cun uni sort de ativiteies de lëur autonom o dependënt y cun uni sort de ativiteies de cumerz y prufescions. Tl tëmp che ël o ëila à la ncëria ne daussa la Garanta o l Garant nce nia dejëujer ncëries o funzions te partic, assoziazions o ënc.

(7) La numinazion da pert dla Presidënta o dl Prësidënt dl Cunsëi dla Garanta liteda o dl Garant lità dal Cunsëi vën fata do che l ie unì prejentà na detlarazion scrita da pert de chësta ultima o chësc ultim che l ne ie deguna rejon de ncumpatibltà coche nunzià pra i comes 5 y 6.

(1) La dureda dla ncëria dla Garanta o dl Garant curespuend ala dureda dla ncëria dl Cunsëi provinziel, da chël che ëila o ël ie unic litei. Do che l mandat ie destumà eserzitea ëila o ël inant per ntant si funzions nchin che l ie unit numinà na si suzessëura o n si suzessëur.

(2)L Cunsëi provinziel possa, deliberan a maiuranza di doi terc di cumëmbri y cun lita sucrëta, destituì dala ncëria la Garanta o l Garant per rejons grieves cunliedes al eserzize de si funzions, per viulazions dla lege o sce l ie unit azertà si inefizienza.

(3)Sce l mandat dla Garanta o dl Garant fina via per uni autra gauja defrënta dala destumënza naturela, vën la vela nueva metuda al orden dl di dla prima senteda dl Cunsëi provinziel che vën do l finé via dl mandat dla Garanta o dl Garant.

(1) Per la dureda dla ncëria ti vëniel paià ala Garanta o al Garant, na ndenisazion economica brutto al ann te dodesc rates mensiles, determineda tenian cont di elemënc de retribuzion udui danora dala cuntratazion culetiva intercumpartimentela y calculei per trëdesc mënsc y tlo cumpedei su:

• a)  paiamënt brutto al ann cunlià al livel de retribuzion plu aut, zënza degun avanamënt bianuel, dl otavo livel funzionel;
• b)  ndenità ntegrativa speziela brutto al ann ududa danora per l otavo livel funzionel;
• c)  ndenità de funzion brutto al ann de diretëura o diretëur d’ufize tla mesura che resultea dala aplicazion dl coefizient 0,7.

L ti spieta oradechël eventualmënter la ndenità de miscion oradecà y l rembursamënt dla spëises de viac aldò dla despusizions n forza per l personal dl Cunsëi provinziel.

(2) Pra la Garanta o al Garant vëniel aplicà, coche pra la Defensëura zivica o l Defensëur zivich, la despusizions nunziedes pra l articul 28 dl cuntrat culetif intercumpartimentel che ie n forza.

(1) L Cunsëi provinziel mët a despusizion dl Ufize dla Garanta o dl Garant per la nfanzia y l'adolescënza la sënta, l personal y la ressurses finanzieres che ie debujën per l eserzize dla atività.

(2) L personal ie funzionalmënter sometù ala Garanta o al Garant. L muessa unì garantì per duta la trëi grupes linguistiches l dërt de adurvanza de si rujeneda dl'oma.

(3) L’aministrazion provinziela, la cumenanzes raioneles y i chemuns mët a despusizion dla Garanta o dl Garant i locai che ie debujën per l'ancuntedes cun l publich y la scumenciadives de nfurmazion y de cunsulënza.

(4) L Cunsëi provinziel stipulea a bën dla Garanta o dl Garant na poliza de assegurazion de respunsabltà zevila limiteda a si ncëria.

(1) La Garanta o l Garant prejentea nchin ai 15 de setëmber de uni ann ala Presidënza dl Cunsëi provinziel n proiet programatich de si ativiteies, njuntà cun la previjion dla spëisa curespundënta, per l'apurvazion.

(2) La gestion dla spëises liedes al funzionamënt dl Ufize dla Garanta o dl Garant vën fata aldò dl regulamënt ntern de aministrazion y de cuntabltà dl Cunsëi provinziel.

(3) Per l paiamënt dla spëises liedes ala ativiteies dl Ufize dla Garanta o dl Garant per la nfanzia y l’adolescënza autorisea la Presidënta o l Presidënt dl Cunsëi provinziel, a cëria di stanziamënc respetifs dl bilanz dl Cunsëi provinziel, giaurides de credic a bën de na funzionera delegheda o de n funzioner delegà, cris o crissa ora danter l personal dl Cunsëi provinziel. Chësta funzionera o chësc funzioner se cruzia dl paiamënt dla spëises aldò dla leges provinzieles n forza tla materia di funzioneres deleghei y sun la basa dla istruzions dla Garanta o dl Garant y ti manda regulermënter la rendicontazions di paiamënc fac a cëria dla giaurides de credit, adum cun la documentazion relativa, al ufize aministrazion dl Cunsëi provinziel per la verificazion aministrativa-cuntabla.

(1) La spëises per l Ufize dla Garanta o dl Garant per la nfanzia y l’adolescënza y la spëises che se porta pro da cie che ie udù danora tl articul 8 ie a cëria dl bilanz dl Cunsëi provinziel. De si finanziamënt se cruzien aldò dla modaliteies stabilides dal articul 34 dla lege provinziela dl 29 de jené dl 2002, n. 1.

(1) Chësta lege va n forza n l di do chël de si publicazion tl Buletin Ufiziel dla Region.

Chësta lege unirà publicheda tl Buletin Ufiziel dla Region. Uni un a chël che ti spieta, à da la respeté y da la fé respeté sciche lege provinziela.