f) Lege provinziala di 16 de novëmber dl 2007, n. 121)
Sorvisc publics locai

(1) Chësta lege regolamentëia les modalitês de surandada di sorvisc publics de relevanza economica tl respet dles desposiziuns de lege de setur.

(2) Por chësta lege vëgnel conscidré sciöche sorvisc publics chi sorvisc che vëgn surantuć:

1. dala Provinzia autonoma de Balsan y dai ënć che depënn da d’ëra o che à l’ordinamënt che é de süa competënza, inće delegada;
   
2. dales comunitês raionales y dai comuns, singolarmënter, deboriada o en colaboraziun.
   

(3) Por chësta lege vëgnel conscidré sciöche sorvisc de relevanza economica i sorvisc:

1. che à sciöche oget la produziun de bëgns y la prestaziun de sorvisc cuntra paiamënt da pert di benefiziars,
   
2. pro chi che le soget che manajëia chisc sorvisc surantol daldöt o en pert le risch de gestiun.
   

(4)Por sconè la concorënza y le marćé ne po les aministraziuns odüdes danfora dal coma 2 no costituì - te so ćiamp de competënza - sozietês por la produziun de bëgns o la prestaziun de sorvisc che ne va nia assolutamënter debojëgn por arjunje sües finalitês istituzionales, no partezipé o mantignì partezipaziuns diretamënter a sozietês che ne prodüj nia bëgns o sorvisc de interès general, inće sce ara se trata de partezipaziuns de mendranza.2)3)

(5) Ćina ai 31 de dezëmber dl 2010 ti dà inant les aministraziuns odüdes danfora dal coma 2 les partezipaziuns eventuales a sozietês che à sciöche fin d’atres ativitês co chëres odüdes danfora dal coma 4 a terzi; chësc sozed tl respet dles prozedöres cun carater publich. 2)4)

(5/bis) (5/bis) Tl respet de ci che é preodü dal coma 5, mët a jí i sogec preodüs dala lëtra b) dl coma 2, por garantí le smendrimënt dla spëisa publica pian ia dal 1. de jená dl 2016, n prozes de razionalisaziun dles sozietés y dles partezipaziuns sozietares che ai á diretamënter y indiretamënter, a na moda da conzede so smendrimënt cina ai 31 de dezëmber dl 2016. Porchël pó i sogec nominá fá operaziuns de desmisciun, assegnaziun, conferimënt, agregaziun, trasformaziun, scissiun y fujiun. 5)

(5/ter) I ombolc y i atri organs dirigenziai di ënc preodüs dal coma 5/bis definësc y aprovëia cina ai 31 de merz dl 2016, n plann operatif de razionalisaziun che tëgn cunt de ci che é preodü dal coma 4, sciöche ince dai criters de mascima:

1. scomposiziun dles sozietés che resultëia metüdes adöm ma da aministradus o da n numer de aministradus majer co chël di dependënc;
   
2. eliminaziun dles partezipaziuns te sozietés che fej ativités che é anfat o ti somëia a chëres fates da d’atres sozietés cun partezipaziun o ënc stromentai publics, ince tres operaziuns de fujiun o de internalisaziun dles funziuns;
   
3. agregaziun de sozietés di sorvisc publics locai importanc por l’economica;
   
4. smendrimënt di cosć de funzionamënt, ince tres la reorganisaziun di organs aministratifs y de control y dles strotöres aziendales, sciöche tres le smendrimënt di paiamënc. 6)
   

(5/quater) I organs preodüs dal coma 5/ter motivëia a na moda adatada la desviaziun dai criters de mascima dá dant iló. 7)

(6) Les aministraziuns odüdes danfora dal coma 2 che à o mantëgn diretamënter o indiretamënter le control de sozietês, aladô dl articul 2359, coma 1, numeri 1) y 2), dl codesc zivil, mët a jì - tla forma odüda danfora dales normes en forza - tl tëmp de 180 dis da canche chësta lege é jüda en forza scomenciadies adatades a:

• a)  arbassè le numer di componënć di organns dla sozieté a trëi, sce ai é al momënt metüs adöm da de plü co trëi componënć, y a cinch componënć, sce ai é al momënt metüs adöm da de plü co cinch componënć; le numer di componënć nominà dessura po gnì alzè a cater o a sis por garantì na rapresentanza di ënć publics o di grups linguistics adatada;
  
• b)  odëi danfora por i consëis d’aministraziun o de gestiun metüs adöm da trëi componënć, che al ti vëgnes surandè al presidënt, zënza compëns ajuntè, inće les funziuns de aministradù deleghè;
  
• c)  odëi danfora che - zënza tochè la regolamentaziun varënta sön la ilitabilité y la incompatibilité por la lîta dl ombolt, di aconsiadus de comun y di aconsiadus provinziai - la surantuta da pert de n ombolt, n assessur o n aconsiadù de comun o n assessur o n aconsiadù provinzial o de na porsona che ciafa n vitalize deache ara fajô pert de n Consëi provinzial o regional, dl Parlamënt nazional o europeich dla inćiaria de componënt di organns de aministraziun de sozietês de capitai de chëres che le medem comun o la Provinzia fej pert, ne conzedes degun compëns a ćiaria dla sozieté; 8)
  
• c-bis)  Les porsones a chëres che al ti vëgn surandè dala Provinzia inćiaries de aministradus de ënć publics odüs danfora dal articul 1, comesc 725-734, dla lege di 27 de dezëmber dl 2006, n. 296, ne ciafa degun compëns por chëstes inćiaries, sce ai ciafa bele n vitalize sciöche aconsiadus provinziai o regionai, deputać dl Parlamënt nazional o europeich. A che che ciafa n vitalize por les inćiaries nominades dessura ne pol nia ti gnì surandè inćiaries de consulënza paiades da pert dl Consëi provinzial o dla Junta provinziala. L’emanaziun dl regolamënt che alda laprò ti vëgn dè sö ala Junta provinziala, 9)
  
• d)  stabilì che les desposiziuns odüdes danfora dala lëtra c) vëgnes inće aplicades ai dependënć dles aministraziuns odüdes danfora dal coma 2; la poscibilité de odëi danfora indenitês de resultat adatades y proporzionada tl caje de davagn resta impé ti limi odüs danfora dal articul 14, coma 1, lëtra c), dla lege provinziala di 10 d’agost dl 1995, n. 16. 2)
  
• e)  stabilì che la medema porsona po surantó, en rapresentanza dles aministraziuns preodüdes dal coma 2, sciöche inće dles sozietês controlades da d’ëres y de chëres che ares fej pert, ti organns d’aministraziun y/o de süa verda, alplü trëi inćiaries y por alplü trëi mandać indolater tla medema sozieté.I limic nominá ne vëgn nia aplicá ales inciaries fates debann o cun reversibilité dl paiamënt al management tl cheder dl grup sozietar. 10)
  
• f)  ) garantì che al ne sides nia plü co dui terzi de ëi o de ëres ti consëis d’aministraziun y de verda, scenò vëgn la nominaziun anulada. 11)12)
  
• g)  preodëi ti contrać de laûr stlüć jö cun i aministradus delegà/les aministradësses delegades y i direturs generai/les direturies generales na proibiziun de concorënza, che proibësc les ativitês imprenditoriales tl medemo setur economich y che stabilësc che na violaziun eventuala costituësc na rajun de lizenziamënt. 13)
  

(7) Les mudaziuns statutares é varëntes dal pröm renovamënt di organns dla sozieté. 2)

(1) I ënć odüs danfora dal articul 1, coma 2, manajëia y pîta i sorvisc publics de relevanza economica diretamënter cun sües strotöres organisatives o tres:

1. sozietês cun capital ma publich;
   
2. sogeć privać;
   
3. sozietês cun partezipaziun publica. 14)
   

(1/bis) Te chësta lege capëscion sot a sogeć privać inće les sozietês ma cun capital publich nia organisades tles formes odüdes danfora dal articul 3. 15)

(2) Les aministraziuns che tol la dezijiun de gestì i sorvisc publics aladô dles modalitês odüdes danfora dales lëtres a) o b), o che tol pert a sozietês o a d’atri organisms adotëia - do avëi aldì les organisaziuns sindacales por ći che reverda les conseguënzes por le personal - i provedimënć en referimënt ales ressurses umanes, finanziares y stromentales che é adatà ales funziuns eserzitades dai sogeć odüs danfora dales lëtres nominades dessura y se crüzia de stabilì danü so organich. 16)

(1) I sorvisc publics de relevanza economica po gnì surandà a sozietês de capitai aladô dl articul 2, coma 1, lëtra a), sce un o de plü ënć odüs danfora dal articul 1, coma 2:

1. à döt le capital dla sozieté;
   
2. eserzitëia sön la sozieté le medem control co sön sü sorvisc;
   
3. la sozieté realisëia la pert plü importanta de süa ativité cun un o de plü ënć che la controlëia.
   

(2) Le control vëgn fat aladô dl coma 1, lëtra b), sce i ënć:

1. nominëia o revochëia diretamënter i aministradus y i componënć dl consëi de control dla sozieté;
   
2. eserzitëia funziuns de sorvisc dan dant i obietifs dl’ativité y stabilin les diretives generales por i arjunje;
   
3. eserzitëia ativitês de control de gestiun y finanziar tres suraposć y ispeziuns, sciöche inće tres l'ejam de raporć periodics sön la faziun, la efiziënza y la economizité dl sorvisc.
   

(3) La relevanza dl'ativité aladô dl coma 1, lëtra c), vëgn calcolada aladô dles normes y di prinzips comunitars, sciöche inće dla interpretaziun consolidada tres la iurisdiziun dla Curt de Iustizia dl’Uniun europeica. 17)

(1) I sorvisc publics de relevanza economica po gnì surandà a impreses privates adatades che é da chirì fora tres prozedöres de concurs cun carater publich tl respet dles normes dl'Uniun europeica.

(1) I sorvisc publics de relevanza economica ti po gnì surandà diretamënter a sozietês cun partezipaziun publica, pro chëres che:

1. le assozié privat à na cuota nia mëndra dl 40 por cënt; 18)
   
2. le assozié privat vëgn chirì fora tres prozedöres publiches pro chëres che al vëgn stabilì les condiziuns, i compić operatifs, les modalitês y la dorada dla gestiun dl sorvisc, sciöche inće les modalitês de licuidaziun dl assozié canche le terminn odü danfora toma. 19)20)
   

(2) Al é proibì da sburlé o renovè la surandada canche ara toma. 21)

(1) Ai presidënć/ales presidëntes, ai vizepresidënć/ales vizepresidëntes, ai aministradus delegà/ales aministradësses delegades y ai direturs generai/ales direturies generales di ënć preodüs dal articul 1, coma 2, lëtra a), che depënn dala Provinzia autonoma de Balsan o che à n ordinamënt che alda pro sües competënzes, inće delegades, o dles sozietês cun partezipaziun publica, ti vëgnel proibì da eserzité ativitês imprenditoriales tl medemo setur economich olache al vëgn pité le sorvisc publich. Sce an ne se tëgn nia a chësta desposiziun, revochëia la Provinzia autonoma de Balsan l’inćiaria dada aladô de chësta lege.22)

Chësta lege gnarà publicada tl Boletin Ofizial dla Regiun. Vignun a chël che al ti speta é oblié da la respetè y da la fà respetè sciöche lege dla Provinzia.