b) Lege Provinziala di 14 de merz dl 2003, n. 41)
Disposizions sun la veles dl cunsëi provinziel dl ann 2003

(1) Per la vela dl cunsëi provinziel de Südtirol dl ann 2003 vëniel aplicà la normes nunziedes tla lege regiunela dl 8 d’agost 1983, n. 7 y mudazions suzessives, cumpatiblmënter cun la disposizions aldò di comes tlo dessot.)

(2) L teritore dla provinzia de Bulsan reprejentea n sëul raion litel per la veles dl Cunsëi provinziel.

(3) La cumpëida di cunselieres provinziei ie de trentecinch.

(4) I azertamënc y la istrutories n cont dla ncumapatiblteies ududes danora dala leges ie de cumpetënza dla cumiscion de cunvalideda dl Cunsëi provinziel, che vën nciarieda a se dé ju limpea dal Presidënt/dala Presidënta dl Cunsëi. La cumiscion de cunvalideda ie numineda dal Presidënt/dala Presidënta dl Cunsëi provinziel, do avëi audì i/la mëinagrupa tl lim de tëmp de chindesc dis dala prima senteda dl Cunsëi provinziel, y la ie metuda adum da n numer despèr de cumëmbri, che ne daussa nia vester plu de set.

(5) L decret de cunedida dla veles ie publicà tl Buletin Ufiziel dla Region nia plu de carantecin dis dan l di dla vela y ie publicà tres la plata Internet dla Provinzia autonóma de Bulsan; ai chemuns ti vën l decret mandà tres email.

(6) Tl lim de tëmp de cin dis do la publicazion dl decret de cunedida dla vela vëniel custituì l ufize litel zentrel.

(7) L ufize litel zentrel ie metù adum da n magistrat/na magistrata dl Tribunal Aministratif Regiunel – sezion autonóma de Bulsan y da n magistrat/na magistrata dla Chëurt di conc – sezion autonóma de Bulsan.

(8) I cumpunënc/la cumpuntëntes dl ufize litel zentrel vën crisc/crisses ora per urt, danter trëi prupostes cun trëi inuemes l’una; chësta prupostes vën fates dai Presidënc/dala Presidëntes respetivamënter dl Tribunal y dai Presidënc/dala Presidëntes dla sezions autonómes nunziedes dessëura. L Diretëur/la Diretëura dla Repartizion Servijes zentrei dl’Aministrazion provinziela chir ora per urt danter uni una de chësta prupostes n cumëmber efetif y n cumëmber suplënt per l ufize litel zentrel. I/la cumpunëntes ndividuedes a chësta maniera litea n si Presidënt/na si Presidënta y n Vizepresidënt/na Vizepresidënta.

(9) La funzions de secretariat dl ufize litel zentrel vën dejëutes dala Repartizion provinziela Servijes zentrei.

(10) L ufize litel zentrel mët oradechël a jì uni autra sort de scumenciadiva che possa purté pro a dejëujer bën si funzions y lëura cun la mascima tresudënza y zënza parzialità defin.

(11) Ai cumëmbri dl ufize litel zentrel ti spieta la ndeniteies ududes danora dala lege provinziela dl 19 de merz 1991, n. 6 per la cumiscions cun relevanza oradecà.

(12) I partitic o la grupes politiches urganisedes dà ju pra la Repartizion provinziela Servijes zentrei, per l ufize litel zentrel, i simbui de lista cun chëi che i uel se defrenzië dal’autra listes. De chisc simbui muessel unì dat ju trëi ejemplares, nce a culëures, y chël ntan l orar de servisc, ma nia dan l carantcaterejim y nia do l caranttrëiejim di dan l dì dla vela. I dis de festa y chëi dan la festa ne vën nia cumpedei. 2)

(13)La listes di candidac y dla candidates ti vën prejentedes al ufize litel zentrel pra la Repartizion provinziela Servijes Zentrei danter l trëntcaterejim di y la dodesc da mesdi dl trëntunejim dì dan l dì dla vela – i dis de festa y chëi dan la festa ne vën nia cumpedei – y te uni cajo ntan l orar de servisc. I trëi ejemplares di simbui de lista che ie da prejenté adum cun la lista di candidac aldò dl articul 19, coma 1, pustom a) dla lege regiunela di 8 d’agost 1983, n. 7, possa nce vester a culëures.

Sun deguna lista ne daussa un n gene vester reprejentà cun plu che doi terzi di candidac/dla candidates. Tl cajo de n numer dezimal vëniel turondà su o ju sun la proscima unità. 3) 4)

(14) Per la prejentazion dla listes di partic o dla grupes politiches che pra l’ultima vela dl Cunsëi provinziel à prejentà candidatures cun n si simbul de lista y che à davanià almanco una na sënta tl Cunsëi, ne iel debujën de deguna sotscrizion. 5)

(15) Nchin l di do la destumënza dl tiermul nunzià tl coma 13 tòl l ufize litel zentrel la dezijion n cont dla listes di candidac y dla candidates y ti fej al savëi debota a chëi/chëles che à prejentà la listes, ciun candidac/ciuna candidates y ciuna listes che ie unides lascedes pro. Tl cajo che l fossa sun na lista na majera cumpëida de candidac/de candidates de chëla fisseda aldò dl coma 13, vën i candidac/la candidates dl gene sëurareprejentà straichei dala lista, scumencian cun l ultim candidat/l’ultima candidata de chël gene sun la lista. 6)

(16) La zedules de vela y i boi dla sezions vën metui a disposizion dala Repartizion provinziela Servijes Zentrei.

(17) Per uni sezion numinea l ambolt/l’ambolta n ufize litel metù adum dal Presidënt/dala Presidënta, da trëi cumpëidaujes – de chisc/chëstes sëurantòl chël/chëla, che giata la ncëria dal Presidënt/dala Presidënta, la funzion de n Vizepresidënt/na Vizepresidënta – y da n scrivan/na scrivana. Sce l ie, tla zircoscrizion dl ufize litel de sezion, spediei y cëses de cura cun manco de 100 liec, ie l ufize litel metù adum dal Presidënt/dala Presidënta, da cater cumpëidaujes y dal scrivan/dala scivana.

(18) I/la cumpëidaujes y l scrivan/la scrivana dl ufize litel de sezion vën crisc ora per urt aldò dla manieres ududes danora dal coma 21, danter la persones che à dejëut la ublianza scolastica.

(19) L Presidënt/la Presidënta dl ufize litel de sezion vën cris/crissa ora per urt aldò dla manieres ududes danora tl coma 21 danter la persones che:

1. à la rejon de lité pra la veles dl cunsëi provinziel,
   
2. à almanco l diplom de maduranza de na scola de istruzion segondera,
   
3. à n atestat d’azertamënt dla cunescënza dla rujenedes tudëscia y taliana aldò dl decret dl Presidënt dla Republica dl 26 de lugio 1976, n. 752 y mudazions suzessives,
   
4. à, sce l se trata di chemuns ladins, l atestat d’azertamënt dla cunescënza dla rujeneda ladina aldò dl decret dl Presidënt dla Republica dl 26 de lugio, n. 752 y mudazions suzessives,
   
5. à la cunescënzes fundamenteles tl ciamp dla nformatica.
   

(20) La funzions de Presidënt/Presidënta, de cumpëidaujes y de scrivan/scrivana ne possa nia unì dejëutes da:

1. chiche ie de servisc pra la Forzes armedes,
   
2. dutores d’ufize y dutores de basa,
   
3. secreteres de chemun y dependënc/dependëntes di chemuns cumandei/cumandedes a vester de servisc pra i ufizies litei cumenei,
   
4. candidac/candidates ala veles dl cunsëi provinziel.
   

(21) Danter l vintcinejim y l vintcaterejim di dan la veles dejëuj l Presidënt/la Presidënta dl Ufize litel cumenel chësta pruzedures te na senteda publica, che ie unida cunedida doi dis dant cun n placat sun tofla de chemun, n prejënza di reprejentanc/dla reprejentantes de lista dla prima sezion dl chemun, sce desiniei/desiniedes:

1. l/la chir ora per uni sezion, trajan ora per urt, l Presidënt/la Presidënta, l scrivan/la scrivana y tan de cumpëidaujes coche debujën.
   
2. l/la mët su na graduatoria de Presidënc/Presidëntes, scrivans/scrivanes y cumpëidaujes che vën crisc/crisses ora per urt, a na moda da pudëi, tl cajo de renunzia o de mpedimënt, remplazé tl ordenn de estrazion la persones crisses ora aldò dl pustom a).
   

(22) Sce la cumpëida dla persones crisses ora aldò dl coma 21 ne ie nia assé, chir l Presidënt/la Presidënta dl ufize litel cumenel mo n iede ora n valguna persones danter chëles scrites ite tla listes liteles, les trajan ora per urt.

(23) L ambolt/l’ambolta ti fej al savëi ala persones crisses ora tan tosc che la va y al plu tert l chindescejim di dan la veles, che les ie unides numinedes.

(24) Uni sort de mpedimënc grieves per dejëujer la ncëria muessa unì fac al savëi tl lim de 48 ëura dala nutificazion dla nomina al ambolt/al’ambolta, che se cruzia de remplazé la persona mpedida cun i/la litadëures dla graduatoria aldò dl coma 21, pustom b); dla nomina vën la persones nteressedes nfurmedes almanco trëi dis dan la veles.

(25) L tratamënt economich di cumëmbri dl ufize litel curespuend a chël che ie udù danora per la veles dla camera di deputac.

(26) I inuemes di saudëies dla Forzes armedes y de chëi che fej pert di corps militermënter urganisei tl servisc dl Stat, sciche nce i inuemes de chëi che ie pra la polizai de Stat, che vën lascei pro a lité aldò dl articul 41 dla lege regiunela dl 8 d’agost 1983, n. 7 y mudazions suzessives, vën anutei jape dla listes liteles.

(27) Do che la ujes ie unides cumpededes, cunedësc l Presidënt/la Presidënta dl ufize litel de sezion l resultat che l mët a protocol, y po se cruziel:

1. che l vënie njinià na busta n. 1, che cuntën la listes liteles dla sezion, l protocol, la tabela de cumpededa dla ujes, la zedules de vela cun la ujes valëivles, la zedules de vela nules, la zedules de vela blances, chëles cun ujes de lista o de preferënza nules o cuntestedes, unfat sce chëles cuntestedes ie ntant bele unides asseniedes o no, la zedules de vela danejedes y chëles che ti ie unides tëutes al litadëur/ala litadëura che ie unic mandei demez dala cabina o che se à parà a jì ite tla cabina. Oradechël ie te chësta medema busta duc i documënc n cont de cuntestazions y lamentanzes che ie unides prejentedes ntan i lëures de vela, i scric che reverda la nomina di reprejentanc/dla reprejentantes de lista, la sentënzes dla Chëurt d’Apel, i atestac dl ambolt/dla ambolta aldò dl articul 32 dl Decret dl Presidënt dla Republica dl 20 de merz 1967, n. 223 y mudazions suzessives, y i zertificac dl dutor/dla dutora,
   
2. che la busta n. 1 vënie segileda cun l bol dl ufize litel, cun si sotscrizion y chëla de almanco doi cumpëidaujes, y, do che i lëures de vela ie unic stluc ju, se cruziel che la vënie mandeda al ufize litel zentrel tres l’aministrazion cumenela locala, che cëla che la cunseniazion vënie fata aslune, o a n’autra maniera, che ie da stabilì dala Repartizion provinziela cumpetënta.
   
3. che l auter material che fova unì sëurandat per pudëi dejëujer i lëures de vela vënie metù tla busta n. 2 y mandà al ufize litel zentrel aldò dla manieres ududes danora pra l pustom b).
   

(28) Tl protocol nunzià pra l coma 27, pustom a) vëniel descrit i lëures che ie unìi dejëuc dal ufize litel de sezion; l cuntën te uni cajo chisc dac:

1. l di y l’ëura prezisa dla nluegeda dl ufize litel y i cuinuemes de si cumëmbri y chëi di reprejentanc/dla reprejentantes de lista.
   
2. la cunstatazion dla cumpëida di/dla litadëures scric/scrites ite tla listes de sezion y dla persones lascedes pro a lité tla sezion aldò dl articul 40, coma 1, pustoms b), c) y d) dla lege regiunela dl 8 d’agost 1983, n. 7 cun mudazions suzessives.
   
3. la ndicazion dla cumpëida dla zedules de vela, che ie unides autentichedes dan l scumenciamënt dla vela o, n cajo, ntan la vela.
   
4. la ndicazion di inuemes di litadëures/dla litadëures, che ie unides lascedes pro a lité aldò dl articul 46, coma 4 dla lege regiunela dl 8 d’agost 1983, n. 7 y mudazions.
   
5. la ndicazion di resultac dla cumpededa che ie da scrì adum nsci:
   
   1. cumpëida de duta la persones litëntes,
      
   2. cumpëida de duta la zedules de vela cun la ujes valëivles, nce chëles cuntestedes ma asseniedes,
      
   3. cumpëida de duta la zedules de vela cun la ujes cuntestedes y nia asseniedes,
      
   4. cumpëida de duta la zedules de vela cun la ujes nules,
      
   5. cumpëida de duta la zedules de vela nules,
      
   6. cumpëida de duta la zedules de vela blances.
      

I dac nunziei pra la zifra 1) vën tëuc ora dla lista litela de sezion y dala listes, ududes danora ti articuli 45, 46 y 47 dla lege regiunela dl 8 d’agost 1983, n. 7 y mudazions suzessives, che ie unides adurvedes per la veles, ntan che i dac nunziei pra la zifres 2, 3, 4, 5 y 6 ie tëuc ora dla tabeles de cumpededa dla ujes, che ie pert ntegrela dl protocol,

1. na descrizion curta de uni sort de fat curiëus, de uni sort de ntraunida, de uni cuntestazion o auter che ie suzedui ntan i lëures de vela, sciche nce la ndicazion dla prutestes y retlamazions prejentedes al ufize y dla mesures tëutes dal Presidënt/dala Presidënta.
   
2. la listes dla njontes al protocol,
   
3. la ndicazion dl di y dl’ëura dla stlujura di lëures de vela,
   
4. jape, la sotscrizion de duc i cumëmbri dl ufize litel y di reprejentanc/dla reprejentantes de lista.
   

(29) Ora che tla forma sun papier possa i dac nunziei ti comes 27 y 28 unì mandei al ufize litel zentrel nce tres posta eletronica aldò dla pruzedura stabilida dala Repartizion provinziela per i Servijes zentrei.

(30) L muessa unì scrit n protocol de duc i lëures dl ufize litel zentrel cun chisc dac:

1. l di y l’ëura prezisa dla nluegeda dl ufize litel y i cuinuemes de si cumëmbri y chëi di reprejentanc/dla reprejentantes de lista.
   
2. la ndicazion di resultac dl’ejaminazion dla zedules de vela cuntestedes y nia asseniedes,
   
3. la ndicazion dla cumpëida dla ujes de lista,
   
4. la ndicazion dl numer dla sëntes che ti ie unides asseniedes a uni lista,
   
5. la graduatoria dla candidates y di candidac te n orden decrescënt n cont dla cumpëida de ujes persuneles,
   
6. la ndicazion dla candidates y di candidac che ie unic cunedìi litei per uni lista,
   
7. jape, la sotscrizion de duc i cumëmbri dl ufize litel.
   

(31) Na copia dl protocol ti vën mandeda ala cumiscion de cunvalideda dl Cunsëi provinziel al fin dla ublianzes nunziedes tl coma 4.

(32) L ufize litel zentrel ti comunichea ai cunselieres litei la cunedida y ti l fej riesc al savëi al Presidënt/ala Presidënta dla Provinzia, acioche l/la posse debota cunedì la nutizia al publich.

(33) La spëises che vën a se l dé tres l’aplicazion de chësta lege ie a cëria dla Provinzia.

(34) La spëises per njinië ite i ufizies litei, per mëter su la listes liteles de sezion y per l paiamënt dla ndeniteies che ti spieta ai cumëmbri dl ufize litel vën antizipedes dal chemun y rembursedes dala Provinzia tres la Repartizion Servijes zentrei.

(35) Per seguré che l servisc de vela vënie dejëut regulermënter ti vëniel cunzedù ai chemuns n cuntribut determinà dala Jonta provinziela a una cun l Cunsorz di chemuns te na mesura curespundënta al numer dla persones scrites ite tla listes liteles.

Chësta lege ie da publiché tl Boletin Ufiziel dla Region. Uni un y uni una a chël/chëla che ti spieta, à da la respeté sciche lege provinziela y da la fé respeté.