i) Lege Provinziala di 29 de jenà dl 2002, n. 21)
Provedimënć por l’adoziun de mitans y mituns de mëndra eté tla provinzia de Balsan

(1) Tl cheder de sües competënzes ti conzed la Provinzia autonoma de Balsan assistënza y sostëgn ai pêrs maridà che vir te ma manira permanënta tl Südtirol y oress adotè na möta/n möt che n’à nia la zitadinanza taliana y à la residënza te n paîsc foradecà.

(2) L’assistënza y le sostëgn vëgn pità tl respet dl ordinamënt iuridich statal y internazional y dantadöt a öna cun i prinzips y les diretives dla Convenziun sön la cooperaziun pro adoziuns internazionales, sotescrita a Den Haag ai 29 de mà dl 1993 y la lege statala sön les adoziuns y i afidamënć di 4 de mà dl 1983, n. 184, mudada dala lege di 31 de dezëmber dl 1998, n. 476, y dala lege di 28 de merz dl 2001, n. 149, da chilò inant nominada “lege statala sön l’adoziun”.

(1) La Provinzia autonoma de Balsan ti pîta assistënza legala, soziala y psicologica ai pêrs maridà, che à bele presentè o é tl laûr da dè jö al tribunal la detlaraziun de desponibilité a n’adoziun internazionala.

(2) Al vëgn pité assistënza te dötes les fases dl’adoziun: tla preparaziun al’adoziun, por les prozedöres d’adoziun tla Talia y tl tëmp do l’adoziun.

(3) Por chësc fin:

1. promöi la Provinzia la creaziun de na rëi che ti pîta ai pêrs maridà assistënza iuridica, soziala y psicologica y coordinëia y controlëia l’ativité de chësta rëi;
   
2. mantëgn la Provinzia contać y raporć, inće sot forma de convenziuns aposta, cun:
   
   1. la Comisciun nazionala por les adoziuns internazionales, insediada pro la Presidënza dl Consëi di ministri, aladô dl articul 38 dla lege statala sön l’adoziun;
      
   2. i zëntri de intermediaziun talians y da foradecà, i ofizi iudiziars y dötes les organisaziuns y strotöres che se dà da fà tl ćiamp dl’adoziun internazionala.
      

(4) Tres na convenziun cun la Comisciun nazionala por les adoziuns internazionales surantol la Provinzia inće chëstes inćiaries aministratives:

1. ara relascia le zertificat de conformité aladô dl articul 39, coma 1, lëtra i) y l’autorisaziun d’entrada aladô dl articul 39, coma 1, lëtra h) dla lege statala sön l’adoziun;
   
2. ara tëgn sö i documënć y les informaziuns aladô dl articul 39, coma 1, lëtra e) dla lege statala sön l’adoziun y informëia i geniturs adotifs por ći che reverda la situaziun sanitara dla möta/dl möt tl cheder dles desposiziuns de lege varëntes;
   
3. ara controlëia i recuisić y ćiara sura l’ativité di zëntri de intermediaziun privać, sön inćiaria dla Junta provinziala;
   
4. ara informëia la popolaziun y se crüzia dla formaziun y dl ajornamënt dl personal tl setur sanitar y di sorvisc soziai che laôra tl ćiamp dl’adoziun;
   
5. ara cöi adöm y valutëia regolarmënter i dać statistics che reverda l’adoziun internazionala tla provinzia de Balsan.
   

(1) Aladô dl articul 39/bis, coma 2 dla lege statala sön l’adoziun y en conscidraziun dles condiziuns odüdes danfora dal articul 39/ter dla lege nominada dessura, po la Provinzia autonoma de Balsan istituì n post d’intermediaziun publich sön l’adoziun che à les inćiaries preodüdes dal articul 31, coma 3 dla lege nominada chilò dessura.

(1) Por podëi concretisé les ativitês preodüdes dal articul 29/bis, coma 4 dla lege statala sön l’adoziun vëgnel metü sö n grup de sostëgn psicologich y sozial metü adöm da porsones che colaborëia ti raiuns soziai tl ćiamp dl sorvisc sozio-pedagogich y da psicologs dla sanité publica o di zëntri privać convenzionà.

(1) La Junta provinziala vëgn autorisada, aladô dl articul 20/bis dla lege provinziala di 30 d’aurì dl 1991, n. 13 “Ordinamënt nü di sorvisc soziai tla Provinzia de Balsan”, da sostignì cun mesi finanziars adeguà i zëntri d’intermediaziun privać tla provinzia de Balsan. Chisc zëntri d’intermediaziun mëss ademplì i recuisić preodüs dal articul 39/ter dla lege statala sön l’adoziun y avëi implü inće l’autorisaziun da pert dla Comisciun nazionala por les adoziuns internazionales por podëi fà les ativitês odüdes danfora dal articul 39, coma 1, lëtra c) dla lege statala sön l’adoziun.

Chësta lege vëgn publicada tl Boletin Ofizial dla Regiun. Vignun a chël che al ti speta é oblié da la respetè y da la fà respetè sciöche lege dla Provinzia.