(1) Ćina che i istituć autonoms de previdënza y assiguraziun soziala preodüs dal decret dl Presidënt dla Republica di 6 de jenà dl 1978, n. 58 ne vëgn nia costituis, vëgnel istituì pro l’istitut de credit, che à sura le sorvisc de tesorier dla Provinzia, le fonds provinzial por prestaziuns de previdënza regionales delegades, da chilò inant nominé “fonds”, por l’eserzize dles funziuns aministratives delegades dales leges regionales tl setur de previdënza y assiguraziuns soziales.
(2) Les assegnaziuns dla Regiun por l’eserzize dles funziuns aministratives delegades, i contribuć de previdënza che é debit dales porsones scrites ite ales formes de previdënza desvalies sciöche inće dötes les atres entrades che à da nen fà cun le paiamënt de prestaziuns de previdënza vëgn paiades ite diretamënter tl fonds.
(3) Le paiamënt de prestaziuns a ćiaria dl fonds, l’investimënt dles desponibilitês de cassa che ne va tl momënt nia debojëgn por prestaziuns corëntes, la cumpra dles atrezadöres, dla dotaziun tecnica y di sorvisc da defora y vigni ater provedimënt che é lié al eserzize de funziuns aministratives delegades, vëgn desponüs dal diretur dla Repartiziun provinziala Sorvisc sozial sön la basa de n program anual aprovè dala Junta provinziala.
(3/bis) Ma por ći che reverda les dezijiuns sön i investimënć dles desponibilitês de cassa, vëgn le diretur daidé da n comitê de gestiun metü adöm insciö:
- da n espert tl setur dla previdënza soziala, dles prestaziuns de ponsiun y de assistënza;
- da n rapresentant dla Repartiziun provinziala Finanzes y bilanz;
- da n espert de finanzes. 53)
(4) La Junta provinziala aprovëia le sböz dl plann finanziar preventif y de decunt dla gestiun dl fonds y determinëia i criters por l’investimënt dles desponibilitês de cassa sciöche inće les modalitês de gestiun di cunć individuai dles porsones scrites ite ales formes de previdënza desvalies.
(5) I mesi finanziars che é rovà tl bilanz provinzial tla competënza y ti aretrać por les mosöres preodüdes dales leges regionales dades dant tl coma 1, y nia paià fora denant che i ać aladô dl coma 4 devëntes efiziënć, vëgn trasferis tl fonds. 53)