e) Lege Provinziala di 15 de mà dl 2013, n. 61)-
Zënter d’esperimentaziun agrara y forestala Laimburg

(1) Le Zënter d’esperimentaziun agrara y forestala Laimburg, nominé da chilò inant Zënter, metü sö cun la lege provinziala di 3 de novëmber dl 1975, n. 53, surantol sciöche ënt stromental nia economich dla Provinzia, cun personalité iuridica de dërt publich, cun autonomia d’organisaziun, d’aministraziun, dles finanzes, dla contabilité y dl patrimone, les funziuns dla repartiziun provinziala competënta por l’esperimentaziun agrara y forestala (33) che é gnüda tuta jö do l’adoziun dl statut nominé tl articul 6.

(2) Le Zënter fej ativitês de inrescida y esperimentaziun, ativitês tl ćiamp dl’inovaziun inće tecnica, y fej a na moda che les conescënzes vëgnes dades inant y slariades fora tl setur dl’economia agrara y forestala, dla sciënza agroalimentara, dla botanica sciöche inće te düć i seturs lià a chisc.

(3) Por arjunje i fins preodüs dal coma 2 po le Zënter fà inant dlungia les ativitês istituzionales inće ativitês suraprò liades a chëstes, che les completëia o jô a süa concretisaziun, y che tol ite inće ativitês comerziales, sce chëstes n’é nia prevalëntes. Chëstes ultimes mëss jovè ala fornidöra de bëgns o sorvisc che vëgn a s’al dè dantadöt cun atrezadöres o ressurses che vëgn de regola adorades dal Zënter por sües ativitês istituzionales, o ô ester por podëi arjunje sü fins o completëia sües ativitês. Laprò tóchel inće ativitês de rapresentanza y relaziuns istituzionales y les ativitês por valorisé les lercs vitales y le patrimone rural y forestal sciöche inće l’ospitalité y la rezeziun.

(4) Le Zënter po colaborè cun d’atres aziëndes y cun d’atri ënć publics o privać tl teritore nazional o foradecà – cun laprò inće istituć universitars – y s’anuzé de sü sorvisc sön rembursamënt o avaliaziun dles spëises. Implü pol inće se sorvì di laboratori scientifics dla Provinzia y adorè terac de proprieté de terzi che al tol adinfit o che ti vëgn a vigni moda metüs a desposiziun da d’ëi.

(5) Le Zënter po inće fà esperimënć y analises por cunt de terzi. Le Consëi d’aministraziun dl Zënter sön la basa di elemënć de cost stabilësc a tan che al amunta le rembursamënt dles spëises por chëstes prestaziuns.

(6) Tl Zënter vëgnel istituì na banca genetica por les sorts de plantes nöies y che é bele y inće por le sorts de plantes tl Südtirol che manacia da scomparì. Laprò vëgnel inće coiü adöm les somënzes. La banca genetica à le fin da cöie adöm sorts de plantes, da les imagaziné y les controlè periodicamënter, sciöche inće da relevè y tlassifiché sües carateristiches fenologiches y fisiologiches.

(7) La Junta provinziala po inće tó provedimënć por sconè les razes de tiers da ćiasa che manacia da morì fora.

(1) La Provinzia vëgn autorisada da ti surandè ala proprieté dl Zënter o almanco da garantì che al pois adorè i bëgns mobii y imobii che va debojëgn por eserzité sües ativitês. Les atres spëises por le funzionamënt y por les inćiaries tl ćiamp de competënza dl Zënter va a ćiaria dl bilanz dl Zënter.

(1) Le Zënter adora y aministrëia i bëgns imobii che é en so possès o che ti é gnüs metüs a desposiziun dala Provinzia che va debojëgn por ti jì do a süa ativité.

(2) Le patrimone imobil romagn de proprieté dla Provinzia y vëgn aministré dal Zënter a sües spëises. Le patrimone mobil, cun laprò i bëgns mobii registrà, passa tla proprieté dl Zënter che se crüzia dl inventar y dla gestiun.

(3) Le spëises por la costruziun y la manutenziun ordinara y straordinara di frabicać sciöche inće por la cumpra di bëgns imobii por l’esperimentaziun é a ćiaria dl bilanz provinzial.

(4) La costruziun de frabicać y i laûrs de manutenziun ordinara y straordinara vëgn de regola fać dal ofize competënt dla Repartiziun provinziala Frabiches y Sorvisc tecnich. Sce ara va debojëgn po chisc laûrs inće gnì fać dal Zënter en aministraziun direta y a sües spëises. Te chisc caji po le Consëi d’aministraziun nominé n diretur o na direturia di laûrs.

(5) Sce al va debojëgn po le Zënter fà sö a sües spëises, inće sön tòć de terac tuć adinfit por almanco nü agn, costruziuns nia fisses y d’atri pici frabicać privisori, sce le proprietar/la proprietara é a öna y tl respet dles normes de lege varëntes.

(1) Por i fins preodüs tl articul 1 é la Junta provinziala autorisada da sostignì le Zënter a livel finanziar tres assegnaziuns a ćiaria dl bilanz provinzial.

(2) Dötes les entrades liades al’ativité dl Zënter ti vëgn assegnades diretamënter al Zënter.

(3) Ći che vëgn trat ite dal’alienaziun deliberada dla Junta provinziala sön proposta dl Consëi d’aministraziun de terac agricoi y forestai che vëgn aministrà dal Zënter aladô dl articul 3, coma 1, vëgn de regola adorè por cumprè bëgns dla medema sort o por d’atres investiziuns imobiliares de prescia.

(1) Le Zënter se joa dl personal metü a desposiziun dala Provinzia y de personal, inće ma sajonal, tut sö dal Zënter instës por ativitês aziendales, sciöche inće por proieć particolars y ativitês scientifiches.

(2) Al personal dependënt dl Zënter, por chël che les spëises é a ćiaria dl bilanz dl Zënter, vëgnel apliché le contrat coletif de referimënt, sce le statut ne vëiga nia danfora val’ d’ater.

(1) La Junta provinziala aprovëia le statut dl Zënter che determinëia:

1. i organns dl Zënter, süa composiziun y sües inćiaries;
   
2. l’organisaziun dla strotöra de direziun y les diretives por la strotöra aministrativa dl Zënter;
   
3. les ativitês prinzipales dl Zënter;
   
4. la gestiun aministrativa, finanziara, contabla y patrimoniala dl Zënter.
   

(1) Aladô dl’interpretaziun dles desposiziuns dl articul 1 y dl articul 3, coma 1 dla lege provinziala di 3 de novëmber dl 1975 n. 53, y mudaziuns suandëntes él miné che le Zënter é n ënt publich zënza fins economics.

(1) La lege provinziala di 3 de novëmber dl 1975, n. 53 y mudaziuns suandëntes vëgn abrogada.

(1) I cosć che vëgn da chësta lege vëgn curis cun i stanziamënć de spëisa bele desponüs tl bilanz sön les unitês de previjiun de basa 13105 y 13235 a ćiaria dl eserzize 2013, autorisà por i intervënć preodüs dala lege provinziala di 3 de novëmber dl 1975, n. 53, y mudaziuns suandëntes, abrogada dal articul 8.

(2) Les spëises a ćiaria di agn finanziars che à da gnì vëgn stabilides cun la lege finanziara anuala.

Chësta lege gnarà publicada tl Boletin Ofizial dla Regiun. Vignun a chël che al ti speta é oblié da la respetè y da la fà respetè sciöche lege dla Provinzia.