In vigore al

RICERCA:

In vigore al: 11/09/2012

e) Lege provinziala di 18 de nuvëmber 2005 , n. 111)
Scumenciadiva populera y referendum
PERT I
Scumenciadiva populeraArt. 1 (Cundizions)

(1) La scumenciadiva populera dla leges provinzieles vën eserziteda da almanco 8.000 litadëures scric ite tla listes liteles de n chemun dla provinzia cun l dërt de lité pra la veles dl Cunsëi provinziel.

Art. 2 (Pruposta de scumenciadiva populera)

(1) La pruposta de na scumenciadiva populera cuntën l test dl proiet de lege, scrit tla rujenedes taliana y tudëscia, partì su per articuli, na relazion de njonta per l tlarimënt di fins y dl cuntenut y, sce l ie udù danora spëises nueves o majeres a cëria dl bilanz dla Provinzia, la ndicazion dla grovaria curespundënta y la manieres per curì chësta spëises.

(2) La pruposta muessa unì prejenteda al Ufize de Presidënza dl Cunsëi provinziel da almanco trëi promotores scric ite tla listes liteles de n chemun dla provinzia, che à l dërt de lité pra la veles dl Cunsëi provinziel, adum cun la plates per l'abineda dla sotscrizions per la vidimazion da pert dl Secreter generel dl Cunsëi provinziel o da na persona da d'ël delegheda.

(3) Sun la plates destinedes al'abineda dla sotscrizions muessel vester l test dl proiet de lege y les muessa vester numeredes prugressivamënter.

Art. 3 (Abineda y depusizion de sotscrizions)

(1) L litadëur mët si sotscrizion japé dl proiet de lege; dlongia chësta iel dat sëura l inuem, l cuinuem, la luegia y la data de nasciuda y l chemun, ulache l ie scrit ite tla listes liteles.

(2) La sotscrizion dl litadëur vën autenticheda:

  1. dal notar, dal giudesc de pesc, dai canzelieres y dai cunlauradëures dla canzlaries dla Chëurt d'Apel y dla sunieria provinziela, dai secreteres dla procura dla Republica;
  2. dal Presidënt dla Provinzia, dal Presidënt dl Cunsëi provinziel, dai assessëures provinziei, dai cunselieres provinziei, che ti fej al savëi si despunibltà al Presidënt dla Provinzia;
  3. dal ambolt, dal presidënt y dal vizepresidënt dl cunsëi zircoscriziunel, dai assessëures de chemun, dal presidënt dl cunsëi de chemun, dai cuneselieres de chemun che ti fej al savëi si despunibltà al ambolt, y dal secreter de chemun; la cumpetënza per l'autenticazion da pert dla persones nunziedes dessëura ie limiteda al chemun ulache l litadëur ie scrit ite tla listes liteles;
  4. dal presidënt y dal secreter generel dla cumenanza raionela dl teritore pra chël che toca l chemun ulache l litadëur ie scrit ite tla listes liteles;
  5. dai funzioneres nciariei dal Presidënt dla Provinzia, dal ambolt y dal presidënt dla cumenanza raionela.

(3) L'autenticazion possa vester unica per duta la sotscrizions che ie sun uni plata, cun la ndicazion dla cumpëida dla sotscrizions che ie sun la plata.

(4) Canche la cumpëida minima dla sotscrizions che ie debujën ie arjonta, dà i promotores ju la plates relatives tl Ufize de Presidënza dl Cunsëi provinziel.

Art. 4 (Cuntrol d'amiscibltà)

(1) L Ufize de Presidënza dl Cunsëi provinziel verifichea y cumpëida la sotscrizion cun l fin de cunstaté l'amiscibltà dla pruposta de scumenciadiva populera.

(2) La scumenciadiva populera ne vën nia detlareda amiscibla sce:

  1. la sotscrizions ne ie nia unides dates ju tl tëmp de cater mënsc dala data de retuda dla plates vidimedes;
  2. l ne ie nia unit arjont l numer minim dla sotscrizions che ie debujën.

(3) Sce l vën cunstatà che la scumenciadiva populera ie amiscibla, ti sëurandà l Presidënt dl Cunsëi provinziel l proiet de lege ala cumiscion legislativa cumpetënta per la materia. Do che l tratamënt da pert dla cumiscion legislativa ie unit stlut ju, o a uni moda do sies mënsc dal'asseniazion zënza che la cumiscion ebe stlut ju l tratamënt dl proiet de lege, vën chësc metù al prim pont dl orden dl di dla senteda dl Cunsëi provinziel che vën do. L Cunsëi provinziel muessa stlù ju l tratamënt dl proiet de lege tl tëmp di siesc mënsc che vën do.2)

(4) Tl cajo de na mudazion sustanziela dla disciplina cumplessiva o dla zircustanzes che à dat gaujion ala prejentazion dla scumenciadiva populera, possa i promotores la tré de reviers cun na comunicazion mutiveda al Ufize de Presidënza dl Cunsëi provinziel. La comunicazion dla retrata possa unì fata nchin che l ne ie mo nia unì lità tl Cunsëi provinziel l passaje ala descuscion di articui. Chësta comunicazion vën publicheda tl Buletin Ufiziel dla Region.3)

PERT II
Referendum abrogatif

Art. 5 (Cundizions)

(1) L referendum per abroghé n pert o defin na lege provinziela vën fissà, sce almanco 13.000 litadëures scric ite tla listes liteles de n chmeun dla provinzia y che à l dërt de lité pra la veles dl Cunsëi provinziel se l damanda. La sotscrizions abinedes adum tl lim de tëmp de cater mënsc dala retuda dla plates vidimides muessa unì dates ju pra la Repartizion provinziela Servijes zentrei.

(2) L referendum abrogatif ne daussa nia unì damandà per la leges tributeres y de bilanz, per la regulamentazion dla cuntribuzions che ti spieta al personal y a d'autri organns dla Provinzia, y per la despusizions sun cuestions che reverda i dërc y la defendura dla grupes linguistiches.

Art. 6 (Dumanda de referendum)

(1) La dumanda de referendum muessa unì fata da almanco 30 litadëures scric ite tla listes liteles de n chemun dla provinzia, che à l dërt de lité pra la veles dl Cunsëi provinziel, y la muessa unì prejenteda ala Repartizion provinziela Servijes zentrei.

(2) Tla dumanda vëniel dat sëura inuem, cuinuem y domizil di promotores singui, de chëi che la sotscrizion muessa unì autenticheda, y l inuem dl promotor che reprejentea y promotores y che giapa la comunicazions pruzedureles.4)

(3) La dumanda de referendum ne daussa nia unì prejenteda ntan i dodesc mënsc dan la fin dla legislatura dl Cunsëi provinziel y nianca ntan i sies mënsc dola la vela dl Cunsëi provinziel nuef.

Art. 7 (Formulazion dla dumanda dl referendum)

(1) La formulazion dla dumanda dl referendum muessa unì scrita tla rujenedes taliana y tudëscia, cumpletan la formulazion "Ulëis'a che l vënie abrogà…" cun la data, l numer y l titul dla lege. Tl cajo de n'abrogazion n pert muessel unì dat sëura nce l numer di articuli o di comes per chëi che l vën damandà n referendum. La formulazion dla dumanda possa nce cuntenì n ressumé curt dl oget dl referendum.

(2) Sce l vën damandà n referendum per abroghé pertes de un o de de plu articuli de lege, muessel nce unì scrit l test parola per parola dla despusizions che dëssa unì abroghedes.

Art. 8 (Cumiscion per la pruzedures di referendums)

(1) Tl tëmp de 15 dis dala prejentazion dla dumanda de referendum vëniel metù su na Cumiscion per la pruzedures di referendums, che deliberea sun l'amiscibltà dl referendum, la ejaminea mo n iede la ujes cuntestedes y cunedësc l resultat dl referendum. La cumiscion ie metuda adum:

  1. da n magistrat dla Sunieria de Bulsan;
  2. da n magistrat dla Sezion de cuntrol dla Chëurt di Conc cun sënta a Bulsan;
  3. da n magistrat dla Sezion autonoma per la provinzia de Bulsan dla Sunieria regiunela de giustizia aministrativa.

(2) I cumëmbri dla Cumiscion per la pruzedures di referendums vën determinei tres na estrazion da pert dl Diretëur dla Repartizion provinziela Servijes zentrei che tira ora n cumëmber efetif y n cumëmber suplënt dala trëi prupostes de trëi inuemes, purtedes dant respetivamënter dai presidënc dla Sunieria de Bulsan, dala Sezion de cuntrol dl Chëurt di Conc cun sënta a Bulsan y dala Sezion autonoma per la provinzia de Bulsan dla Sunieria regiunela de giustizia aministrativa.

(3) La funzions de secreter dla Cumiscion per la pruzedures di referendums vën dejëutes dal Diretëur dla Repartizion provinziela Servijes zentrei o da na persona da ël delegheda.

(4) La Cumiscion per la pruzedures di referendums lita danter si cumëmbri l Presidënt, che chërd ite y mëina la sentedes, y si sustitut. La deliberea cun la prejënza de duc i cumëmbri y a maiuranza de ujes.

(5) Ai cumëmbri dla Cumiscion per la pruzedures di referendums ti spieta la ndeniteies nunziedes tla lege provinziela di 19 de merz dl 1991, n. 6 ududes danora per la cumiscions cun relevanza dedora.

Art. 9 (Cuntrol d'amiscibltà)

(1) La Cumiscion per la pruzedures di referendums tòl na dezijion sun l'amiscibltà tl tëmp de 60 dis dala data de prejentazion dla dumanda de n referendum. La se pronunzieia espressamënter y dajan sëura si mutivazions per chël che reverda la cumpetënza provinziela dla materia che ie oget dl referendum, la cunformità dla dumanda ala despusizions dla Costituzion, dl Statut speziel y i liams dl urdinamënt comuniter y dla ublianzes nternaziuneles sciche nce per chël che reverda la cundizions y la limitazions ududes danora da chësta lege.5)

(1/bis) La Repartizion provinziela Servijes zentrei ti comunichea ai promotores la resserves eventueles purtedes a esprescion dala Cumiscion pra l control aldò dl coma 1. Tl tëmp de 20 dis possa i promotores ntegré o formulé mo n iede la dumanda de referendum, dadedò se pronunzieia la Cumiscion n cont dla amiscibltà dl referendum. Sce la detlarea che l referendum ie amiscibl, possel unì nvià via l'abineda dla sotscrizions.6)

(2) La Repartizion provinziela Servijes zentrei ti comunichea ai promotores la dezijion dla Cumiscion per la pruzedures di referendums sun l'amiscibltà dl referendum y, tl cajo che l referendum fossa unì detlarà amiscibl, nviëiel i promotores a prejenté, per la vidimazion, la plates destinedes al'bineda dla sotscrizions.

Art. 10 (Abineda y depusizion dla sotscrizions)

(1) Per la vidimazion dla plates, l'abineda y l'autenticazion dla sotscrizions vëniel aplicà la despusizions nunziedes ti articuli 2 y 3.

Art. 11 (Cuntrol de realisabltà)

(1) Tl tëmp de 30 dis da canche l ie unit dat ju la plates cun la sotscrizions cuntrolea la Cumiscion per la pruzedures di referendums:

  1. la regularità dla sotscrizions abinedes adum, cumpedan ënghe la sotscrizions di promotores;
  2. sce la lege o la despusizions de lege singules che ie oget de referendum ie ntant unides abroghedes o mudedes.

(2) Sce l ne ie nia unit arjont l numer minim de sotscrizions valëivles che ie de bujën o sce la lege o la despusizions de lege singules che ie da somëter a referendum ie ntant unides abroghedes o mudedes te si cuntenuc essenziei, detlarea la Cumiscion che l referendum ne possa nia unì tenì.

(3) Sce la lege o la despusizions de lege singules de lege da somëter a referendum ie ntant unides abroghedes n pert o mudedes te pertes nia essenzieles, vëniel sometù a referendum la despusizions che ie restedes n forza o che ie unides mudedes te na maniera nia sustanziela. Te chësc cajo adatea o reformulea la Cumiscion la formulazion dla dumanda.

Art. 12 (Ndizion dl referendum)

(1) Do avëi giapà la comunicazion dla dezijion sun la realisabltà dl referendum abrogatif, stabilësc l Presidënt dla Provinzia l tiermul dl referendum, che muessa unì tenì n na dumënia tl tëmp danter i 15 d'auril y i 15 de juni. Tl decret curespundënt, che ie da emané nia plu abenëura de sessanta dis y nia plu tert de cincanta dis dan la data dl referendum, vëniel nce repurtà la formulazion dla dumanda da somëter ai litadëures.7)

(2) Sce de plu referendums ie unic detlarei realisabli aldò de chësta lege, vëni tenii tl medemo tëmp cun na sëula cunvocazion di litadëures n l medemo di. L dejëujament de un o plu referendums possa unì renvià a n auter di tl cajo che l fossa bele unit fissà tl medemo ann d'autri referendums statei, regiunei y provinziei nunziei tla lege provinziela di 17 de lugio dl 2002, n. 10, cun chëi che l possaunì tenì l referendum o i referendums. L dejëujamënt tl medemo tëmp di referendums aldò de chësta lege y de lites a livel cumenel, provinziel, statel y europeich ne ie nia lascià pro.8)

(3) L decret nunzià pra l coma 1 vën publicà tl Buletin Ufiziel dla region y l nen vën dat nutizia tres placac da taché ora, da pert di chemuns, almanco 30 dis dan la data dla lita.

(4) La Repartizion provinziela Servijes zentrei garantësc na nfurmazion ogetiva y balanzeda sun l oget da lité y se cruzia de la publiché tres i mesuns de nfurmazion locai.

(5) Uni atività y operazion lieda al dejëujamënt dl referendum vën lasceda su ti dodesc mënsc dan la fin dla legislatura dl Cunsëi provinziel y ntan i sies mënsc do la vela dl Cunsëi provinziel nuef.

(6) Sce dan la data ududa danora per dejëujer l referendum iel unì fat n'abrogazion o na mudazion sustanziela dla lege o de despusizions de lege singules, a chëles che l referendum fej referimënt, detlarea l Presidënt dla Provinzia, do avëi audì la Cumiscion nunzieda tl articul 8, che l referendum ne unirà nia tenì.

(7) Sce dan la data ududa danora per tenì l referendum iel unì fat l'abro­gazion parziela o na mudazion nia sustanziela dla lege o dla despusizions de lege a chëles che l referendum fej referimënt, vën l referendum tenì sun la formulazion dla dumanda adateda o reformuleda dala Cumiscion.9)

(8) Tl cajo de na mudazion sustanziela dla desciplina cumplessiva o dla zircustanzes che à dat gaujion ala prejentazion dla dumanda de referendum, possa i promotores - tl tëmp de cin dis dala publicazion dl decret dl Presidënt dla Provinzia cun chël che l referendum vën fissà - prejenté ala Repartizion provinziela Servijes zentrei la comunicazion mutiveda che l referendum vënie ratà superà. Chësta comunicazion y l decret dl Presidënt dla Provinzia che detlarea che il referendum ne vën nia tenì vën publichei tl Buletin Ufficiale dla Region.10)

Art. 13 (Cunedida di resultac)

(1) Sun la basa di verbai dla cumpëida dla ujes mandei da duc i ufizies litei de sezion dla provinzia, azertea la Cumiscion per la pruzedures di referendums l numer di litadëures che à tëut pert ala vela y, do avëi verificà la ujes valëivles cunsenzientes y chëles cuntreres y do avëi ejaminà mo n iede la ujes cuntestedes, cunedëscela l resultat dl referendum. I promotores dl referendum possa tò vijion dl verbal curespundënt y se fé na copia.

(1/bis) Sce n l di dl referendum stabilì aldò dl articul 12, coma 1, ëssel da vester referendums cun chëi che de plu cumiscions se à dat ju aldò dl articul 8, sëurantòl la cumiscion metuda su per prima la funzions ududes danora dal coma 1 per duc i referendums y.11)

(2) L resultat dl referendum ie per l'abrogazion sce l 40 percënt de chi che à l dërt de lité à tëut pert ala vela y sce l ie unit arjont la maiuranza dla ujes valëivles cunsenzientes per l'abrogazion.

Art. 14 (Resultat y fazion)

(1) Sce l resultat dl referendum ie per l'abrogazion dla lege o de despusizions de na lege singules, nen detlarea l Presidënt dla Provinzia l'abrogazion cun decret da publiché tl Buletin Ufiziel dla Region. L'abrogazion à fazion dal di do la publicazion dl decret.

(2) Sce l resultat dl referendum ie contra l'abrogazion, nen dà la Cumiscion per la pruzedures di referendums nutizia tl Buletin Ufiziel dla Region. Per i cin ani che vën do ne daussel nia unì purtà dant la medema dumanda de referendum.

PERT III
Referendum propositif y cunsultif

Art. 15 (Referendum propositif)

(1) L referendum propositif vën nvià via tres la prejentazionde na dumanda aposta ala Repartizion provinziela Servijes zentrei, da pert de 13.000 litadëures scric ite tla listes liteles de n chemun dla provinzia cun l dërt de lité pra la veles dl Cunsëi provinziel. Ala dumanda iel da njunté l proiet de lege, partì su per articuli, scrit tla rujenedes taliana y tudëscia, a chël che l ie metù dancà la formulazion "Ulëis'a che l vënie apurvà chësc proiet de lege…", na relazion de njonta, che tlarësc i fins y l cuntenut, y tl proiet de lege la ndicazion dla grovaria finanziera curespundënta y dla manieres de curì chësta spëises, sce l ie udù danora spëises majeres o nueves a cëria dl bilanz provinziel.12)

(2) L referendum propositif ne ie nia lascià pro per leges tributeres y de bilanz, per la regulamentazion dla cuntribuzions che ti spieta al personal y ai organns dla Provinzia, y per la despusizions che reverda cuestions liedes ai dërc y ala defendura dla grupes linguistiches.

(3) Per cie che reverda la promozion, l'abineda dla sotscrizions, l cuntrol d'amiscibltà y de realisabltà, l dejëujamënt, l cuorum de partezipazion y la verificazion dl resultat dl referendum, coche nce per cie che ne ie nia espressamënter udù danora, vëniel aplicà la despusizions ududes danora per l referendum abrogatif.

(4) La Cumiscion per la pruzedures di referendums, do avëi azertà la regularità dla sotscrizions abinedes adum tl tëmp de trëi mënsc dala restituzion dla plates vidimedes, suspënd uni autra atività y operazion n relazion al dejëujamënt dl referendum per n tëmp de 180 dis. L tëmp de suspension nunzià te chësc coma ne vën nia ratà de relevanza ai fins dl articul 12, coma 5.13)

(4/bis) Sce l Cunsëi provinziel apurvea ntan l tëmp de suspension nunzià pra l coma 4 na lege provinziela che curespuend al proiet de lege da somëter a referendum, fajan eventualmënter mé vel' adatamënt tecnich, redaziunel y linguistich, detlarea la Cumiscion che l referendum ne possa nia unì fat. Tl cajo cuntrer vën l referendum tenì.14)

(4/ter) Tl cajo dla dumandes de referendums nunziei tl coma 1, che reverda la medema tematica y che ne ie danter ëiles nia cumpatibles dal pont d'ududa dl cuntenut, vën chëstes detlaredes "cuncurëntes" dala Cumiscion nunzieda tl articul 8 y les vën sometudes a referendum n l medemo di. Sun la zedula litela vën la formulazion dla dumanda nunzieda tl coma 1 mudeda nsci: "Ulëis'a che l vënie apurvà l proiet de lege ..., prejentà da …., o l proiet de lege …., prejentà da …., o ulëis'a che degun di doi ne vënie apurvà?". Tl cajo de plu che doi proiec cuncurënc sometui a referendum, vën la formulazion mudeda nsci: "Ciun di proiec ulëis'a che vënie apurvà o ulëis'a che degun de chisc proiec de lege ne vënie apurvei?" y l litadëur possa se pronunzië a una cun un o degun di proiec de lege de chëi che i tituli y i promotores ie cumpedei su sun la zedula litela. L orden de coche i vën cumpedëi su vën fat ora trajan al lot. L vën garantì che i litadëures posse ti cialé ai proiec de lege y ala relazion de njonta curespundënta.15)

(4/quater) Tl cajo che l proiet de lege da somëter a referendum reverda na lege o despusizions de na lege singules che ie ntant unides - ënghe sce mé n pert - abroghedes o mudedes, adatea o reformulea la Cumiscion per la pruzedures de referendum l proiet de lege aldò dl articul 11, coma 3, y dl articul 12, coma 7, do avëi audì l reprejentant di promotores nunzià tl articul 6, coma 2. I promotores possa oradechël prejenté la comunicazion mutiveda de raté superà l referendum aldò dl articul 12, coma 8.16)

(4/quinquies) I promotores possa se nuzé dl’assistënza di ufizies provinziei cumpetënc per la predespusizion dla curidura finanziera dl proiet de lege. Ulache l ie debujën adatea la Cumiscion nunzieda tl articul 8 la curidura finanziera dan che l vënie tenì l referendum y do avëi audì i ufizies cumpetënc. Te uni cajo vën l test che resultea dai adatamënc sometù a referendum.17)

(5) Sce l resultat dl referendum ie per l'emanazion dla lege, vëniela promulgheda dal Presidënt dla Provinzia.Tl cajo de referendums sun proiec de lege cuncurënc aldò dl coma 4-ter, promulghea l Presidënt dla Provinzia l proiet de lege che à giapà la maiuranza dla ujes cunsenzientes valëivles, a cundizion che l numer dla ujes per chësc proiet de lege sibe majer che l numer dla ujes per la refudeda de duc i proiec de lege cuncurënc.18)

(6) Sce l resultat dl referendum ie cuntrer ala emanazion dla lege, iel la Cumiscion per la pruzedures di referendums che l fej al savëi tl Buletin Ufiziel dla Region. Per i cin ani che vën do ne daussa la medema dumanda de referendum nia unì purteda dant.

Art. 16 (Referendum cunsultif facultatif)

(1) L Cunsëi provinziel possa deliberé, a maiuranza assoluta de si cumëmbri, la ndizion de n referendum cunsultif sun n dessëni de lege, dan che chësc vënie apurvà definitivamënter.

(2) Tan inant che les ie cumpatibles, vëniel aplicà, la despusizions per l referendum abrogatif.

(3) Restan mpe la natura nia liënta dl referendum cunsultif, muessa l Cunsëi provinziel deliberé sun l dessëni de lege sometù a referendum tl tëmp de sies mënsc dala publicazion tl Buletin Ufiziel dla Region dl resultat dl referendum, sce chësc ie positif.

PERT IV
Despusizions fineles

Art. 17 (Remburseda dla spëises)

(1) Ai promotores de scumenciadives populeres y de referendums ti spietel, sun dumanda y a titul de rembursamënt dla spëises, na soma de 0,50 euro per uni sotscrizion valëivla nchin che l vën arjont l numer che ie debujën acioche la pruposta sibe valëivla, a cundizion che la cumiscion legislativa cumpetënta dl Cunsëi provinziel azertëie la cumpetënza provinziela tla materia che ie oget dla scumenciadiva populera, o a cundizion che la Cumiscion per la pruzedures di referendums detlarëie l'amiscibltà dl referendum.

(2) La dumanda curespundënta ie da dé ju, aldò dla cumpetënza, al Ufize de Presidënza dl Cunsëi provinziel o ala Repartizion provinziela Servijes zentrei. Tla dumanda iel da dé sëura l inuem dla persona autoriseda a pië do la soma ntiera, cun fazion delibrënta.

Art. 18 (Regulamentazion dla litazion)

(1) Duc i zitadins scric ite tla listes liteles de n chemun dla provinzia cun l dërt de lité per la vela dl Cunsëi provinziel, à l dërt de tò pert al referendum.

(2) Per cie che ne ie nia udù danora espressamënter da chësta lege, vëniel aplicà la normativa tla materia dla veles dl Cunsëi provinziel.

Art. 19 Despusizions finanzieres)

(1) L rembursamënt dla spëises ai promotores de scumenciadives populeres ie a cëria dl bilanz dl Cunsëi provinziel.

(2) A cëria dl bilanz dla Provinzia ie:

  1. l rembursamënt dla spëises ai promotores dl referendum;
  2. i cumpënsc ai cumëmbri dla Cumiscion per la pruzedures di referendums;
  3. la spëises per l dejëujamënt dla operazions liedes ai referendums, tëutes ite nce chëles di chemuns per l funzionamënt dla sezions liteles.

(3) La spëises eventueles aldò dl coma 2 vën curides tres stanziamënc aposta a cëria dl UPB 01110 dl bilanz de previjion per l eserzize 2005 y suzessifs, che po unì ntegrei aldò dl articul 18 dla lege provinziela di 29 de jené 2002, n. 1.

Chësta lege unirà publicheda tl Buletin Ufiziel dla Region. Uni un a chël che ti spieta, à da la respeté y da la fé respeté sciche lege provinziela.

1)
Publicheda tl B.U. di 29 de nuvëmber dl 2005, n. 48.
2)
L art. 4, comma 3, ie nsci unit remplazà dal art. 1, comma 1, dla L.P. 7 setëmber 2009, n. 4.
3)
L art. 4, coma 4, ie unit njuntà dal art. 1, coma 2, dla L.P. 7 setëmber 2009, n. 4.
4)
L art. 6, coma 2, ie nsci unit remplazà dal art. 2, coma 1, dla L.P. 7 setëmber 2009, n. 4.
5)
L art. 9, coma 1, ie nsci unit remplazà dal art. 3, coma 1, dla L.P. 7 setëmber 2009, n. 4.
6)
L art. 9, coma 1/bis, ie unit metù leprò dal art. 3, coma 2, dla L.P. 7 setëmber 2009, n. 4.
7)
L art. 12, coma 1, ie nsci unit remplazà dal art. 4, coma 1, dla L.P. 7 setëmber 2009, n. 4.
8)
L art. 12, coma 2, ie nsci unit remplazà dal art. 4, coma 2, dla L.P. 7 setëmber 2009, n. 4.
9)
L art. 12, coma 7, ie unit njuntà dal art. 4, coma 3, dla L.P. 7 setëmber 2009, n. 4.
10)
L art. 12, coma 8, ie unit njuntà dal art. 4, coma 4, dla L.P. 7 setëmber 2009, n. 4.
11)
L art. 13, coma 1/bis, ie unit metù leprò dal art. 5, coma 1, dla L.P. 7 setëmber 2009, n. 4.
12)
L art. 15, coma 1, ie nsci unit mudà dal art. 6, coma 1,dla L.P. 7 setëmber 2009, n. 4.
13)
L art. 15, coma 4, ie nsci unit remplazà dal art. 6, coma 2, dla L.P. 7 setëmber 2009, n. 4.
14)
L art. 15, coma 4/bis, ie unit metù leprò dal art. 6, coma 3, dla L.P. 7 setëmber 2009, n. 4.
15)
L art. 15, coma 4/ter, ie unit metù leprò dal art. 6, coma 4, dla L.P. 7 setëmber 2009, n. 4.
16)
L art. 15, coma 4/quater, ie unit metù leprò dal art. 6, coma 6, dla L.P. 7 setëmber 2009, n. 4.
17)
L art. 15, coma 4/quinquies, ie unit metù leprò dal art. 6, coma 7, dla L.P. 7 setëmber 2009, n. 4.
18)
L art. 15, coma 5, ie nsci unit modificato dal art. 6, coma 5, dla L.P. 7 setëmber 2009, n. 4.