- H1 "Esplojif": sustanzes y preparac che possa sauté tl aier per fazion de na flama o che ie sensibli a scassedes y sfriamënc plu che l dinitrobenzen;
- H2 "Comburënt": sustanzes y preparac, che, a cuntat cun d’autra sustanzes, dantaldut sce nflamables, à na reazion esotermica sterscia;
- H3-A "Saurì nflamabl": sustanzes y preparac tla forma lutra che à n pont de nflamabltà plu bas che 21°C (stluc ite i licuic estremamënter nflamabli), o che, a cuntat cun l’aria, a tempratura d’ambient y zënza purté pro energia, possa se sciaudé o se mpië, o corps solic che possa se mpië saurì tres na funtana de mpieda y che bruja inant o se cunsuma nce do che la funtana de mpieda ie unida tëuta demez, o gasëusc che se mpëia a cuntat cun l’aria a prescion normala, o che, a cuntat cun l’ega o l’aria tumia, dà ora gasc che se mpëia saurì te cuantiteies periculëuses;
- H3-B "Nflamabl": sustanzes y preparac licuic de chëi che l pont de nflamabltà ie unfat o plu aut che 21°C y plu bas o unfat aut che 55°C;
- H4 "Iritant": sustanzes y preparac nia smagënc cun chëi che l cuntat diret, slungià y che vën dant de plu iedesc, cun la pel o la mucoses possa gaujé na reazion de nflamazion;
- H5 "Danejënt": sustanzes y preparac che tres inalazion, dlutida o penetrazion tla pel possa cumpurté riscs per la sanità de grievëza limiteda;
- H6 "Da tuesse": sustanzes y preparac (stlutes ite la sustanzes y i preparac dassënn da tuesse) che per inalazion, dlutida o penetrazion tla pel possa cumpurté riscs griefs, acuc o cronics per la sanità, y nchinamei la mort;
- H7 "Gauja crëibes": sustanzes y preparac che tres inalazion, dlutida o penetrazion tla pel possa gaujé crëibes o fé avané si frecuenza;
- H8 "Smagënt": sustanzes y preparac che, a cuntat cun tessù vif possa gaujé sun chësc na fazion destrutiva;
- H9 "Nfetif": sustanzes che cuntën microorganisms vives o si tossines, cunesciudes o de chëles che n miena per de bona rejons che les gauje malaties pra la jënt o te d'autri organisms vivënc;
- H10 "Teratogenn": sustanzes y preparac che tres inalazion, dlutida o penetrazion tla pel possa gaujé melfurmazions cungenites che ne vën nia arpedes o fé avané si frecuenza;
- H11"Mudagenn": sustanzes y preparac che tres inalazion, dlutida o penetrazion tla pel possa gaujé defec genetics che vën arpei o fé avané si frecuenza;
- H12 Sustanzes y preparac che, a cuntat cun cun l'ega, l'aria o n eje, dà ora n gas da tuesse o dassënn da tuesse;
- H13 Sustanzes y preparac che possa, do che i ie unic eliminei, uriginé a vel' maniera n'autra sustanza, p.e. n prudot de lescivazion che à una dla carateristiches cumpededes su dessëura;
- H14 "Ecologicamënter da tuesse": sustanzes y preparac che prejentea o che possa prejenté riscs a tëmp curt o a tëmp mesan per un o de plu raions ambientei.
--------------------------------------------------
Anutazions
1. L'atribuzion dla carateristiches de pericul "da tuesse" (y "scialdi da tuesse"), "danejënt", "smagënt" y "iritant" vën fata aldò di criteres stabilii tla njonta VI, pert I.A y II.B dla diretiva 67/548/CEE dl Cunsëi, dl 27 de juni 1967, n cont dl avaliamënt dla despusizions legislatives, regulamenteres y aministratives relatives ala tlassificazion, al mpacamënt y ala etichetatura dla sustanzes periculëuses, tla verscion mudeda dala diretiva 79/83/CEE dl Cunsëi.
2. Per chël che à da nfé cun l'atribuzion dla carateristiches "gauja crëibes", "teratogenn" y "mudagenn" y n cont dl stat dla cunescënza atuela iel cuntenì prezisazions sëuraprò tl manual d'urientamënt per la tlassificazion y la etichetatura nunzià tla njonta VI (pert II D) dla diretiva 67/548/CEE, tla verscion mudeda dala diretiva 83/467/CEE dla Cumiscion
Metodes de proa
La metodes de proa ie da ntënder a na moda da ti dé n senificat spezifich ala definizions nunziedes tla njonta III ala diretiva 91/689/CEE.
La metodes da adurvé ie chëles descrites tla njonta V dla diretiva 67/548/CEE tla verscion mudeda dala diretiva 84/449/CEE dla Cumiscion o dala diretives suzessives dla Cumiscion che avalieia la diretiva 67/548/CEE al prugres tecnich. Chësta metodes ie basedes sun i lëures y sun la racumandazions di organisms nternaziunei cumpetënc, dantaldut sun chëi dla OCSE
(1) L se trata dla njonta III dla diretiva 91/689/CEE.