b) Lege provinziala di 30 de jenà dl 2006, n. 11)
Desposiziuns sön i implanć da föm y i impedimënć por l’aviaziun

(1) L’ombolt/la ombolta relascia le nulla osta por l’eserzize de chisc implanć:

1. furnadoies por le trasport de porsones y de cosses;
2. gran teleferiches da material ma por le trasport de cosses;
3. pices teleferiches da material y föms da sbalz ma por trasportè cosses sciöche teleferiches da material temporanes por trasportè lignan, che passa ia costruziuns publiches, frabicać abità o strades tlassificades sciöche publiches, tut fora chi implanć che passa ia strades provinziales, strades en gestiun dla Provinzia, strades comunales o la rëi de strades rurales, tan inant ch’al vëgn tut mosöres de proteziun adatades, ch’al vëgn desponü la stlüta temporana dles strades interessades o al vëgn fat laûrs de proteziun sciöch’ai é definis cun regolamënt d’esecuziun. Le conzet de “mosöres de proteziun adatades” vëgn stabilì cun regolamënt d’esecuziun.

(2) Le nulla osta por l’eserzize vëgn relascè a condiziun che l’implant sides gnü colaudè da pert de na porsona esperta de furnadoies aladô dles modalitês stabilides cun regolamënt d’esecuziun y ch’al sides gnü stlüt jö n’assiguraziun de responsabilité zivila cuntra i dagns provocà dal implant a porsones, tiers o cosses. La mosöra minima de proteziun dl’assiguraziun vëgn stabilida cun regolamënt d’esecuziun, tignin cunt dles dimenjiuns, dles carateristiches y dl post di implanć singui.

(3) Por la relasciada dla conzesciun da frabiché y dl nulla osta por l’eserzize por les furnadoies preodüdes dal articul 32, coma 1, lëtra a), ôl ester l’arat tecnich da pert dl ofize provinzial competënt por les furnadoies.