(1) I ënć indicà tl articul 1 surantol sön domanda di aministradus y dl personal, dl personal inćiarié altró, inćiarié o cun na inćiaria limitada, sciöch’inće dl personal volontar, la rapresentanza y la defenüda ti prozesc zivii, te chi ch’ai é gnüs trać ite por fać o gaujes de sorvisc, tres i avocać de chisc ënć, ater co sc’al é n conflit d’interès.
(2) Respetan ći che é stabilì tl coma 1, ti ret i ënć indicà tl articul 1, sön domanda, ai aministradus y al personal indicà tl coma 1, sön presentaziun di cunć stabilis aladô dles tarifes profescionales varëntes, les spëises legales y di perić sciöch’inće les spëises iudiziares, sostignides por la defenüda te prozesc penai, zivii o de responsabilité aministrativa, te chi ch’ai é gnüs trać ite por fać o gaujes de sorvisc nia cometüs intenzionalmënter o cun colpa groia, inće tl caje de azertamënt de colpa lisiera y de compensaziun dles spëises por i prozedimënć dan la Curt di cunć, sciöche inće tl caje che ai sides gnüs trać ite la fasa de inrescida de chësc prozedimënt, olache al vëgn aratè dal’Avocatöra dla Provinzia. 6)
(3) I ënć indicà tl articul 1 po conzede antizipaziuns söles spëises indicades tl coma 2 che ne va nia sura les ghiranzes di defensurs y di perić fora a condiziun che i aministradus y le personal s’obliëies da rete les antizipaziuns tl caje d’azertamënt de süa responsabilité aministrativa y che ai autorisëies i ënć da trà jö i imporć relatifs dai paiamënć che ti speta, ti lims dla lege. I aministradus y le personal nia plü dependënć o inćiarià, mëss presentè na garanzia bancara adatada.
(4) Por vigni grè dl prozès é la retüda dles spëises legales limitada ales spëises sostignides por n su defensur y por so domiziliatar. La retüda dles spëises di perić é limitada ales spëises por n su profescionist, por vigni ćiamp o setur che é lié al oget dl arat.
(5) Les retüdes indicades te chësc articul ti speta inće por les spëises legales y di perić por prozedimënć penai, zivii o de responsabilité aministrativa, daverć tl momënt che chësta lege va en forza.
(6) Tl caje de na responsabilité aministrativa aladô dl’articul 2, azertada dal’autorité competënta, mëss i aministradus y le personal ti rete al ënt les antizipaziuns.L’import dles antizipaziuns ne po nia jì sura l’import indiché tl articul 4, coma 1, fora, tl caje de fać o omisciuns nia cometüs intenzionalmënter.