(1) L’aziënda conzepësc sües ativitês sön la basa dla programaziun, che s’articolëia tla programaziun trienala y anuala, en armonia cun i contignüs y i orientamënć dles normes de lege statales y provinziales, dl Plann sanitar provinzial y dles diretives dl’organisaziun y dla programaziun dla Junta provinziala.
(2) La programaziun trienala definësc la politica sanitara sciöch’inće les strategies sanitares y organisatives en conformité cun les prescriziuns dl Plann sanitar provinzial y les diretives por le svilup a tëmp mesan dl’aziënda.
(3) La programaziun anuala stabilësc obietifs, ativitês, tëmp y responsabilité por la realisaziun tignin cunt dla cualité y dla cuantité.
(4) Stromënt dla programaziun trienala é le plann trienal general d’aziënda.
(5) I stromënć dla programaziun anuala é le program d’ativité anual, le budget y le bilanz preventif anual.
(6) Le bilanz preventif anual é de natöra economica y esponn les dezijiuns dades dant tl program d’ativité anual y tl budget. L’eserzize ti corespogn al ann solar.3)
(7) I documënć costitutifs obligatori dl bilanz preventif anual é metüs adöm dal cunt economich y dal budget finanziar, cun laprò:
- i criters de determinaziun tecnics cun laprò les tabeles por la pert economica preodüda tla injunta;
- la relaziun dl diretur general;
- la relaziun dl collegium di revisurs di cunć. 3)
(8) Le bilanz preventif anual vëgn realisé aladô di modì preodüs dales diretives de contabilité generala preodüdes dal articul 10. 3)
Art. 3 (Compilaziun dl bilanz)
(1) Por valuté i mesi che va debojëgn tl tëmp de n ann, fajon referimënt sistematicamënter ales dezijiuns dla programaziun, ala formulaziun dles previjiuns puntuales di resultać da arjunje, ales ativitês da eseguì, ai faturs produtifs da adorè, ales ressurses finanziares da procuré y da apliché, ai investimënć da atuè, adora les aziëndes la compilaziun dl bilanz.
(2) La Junta provinziala stabilësc, cun deliberaziun, i contignüs y les modalitês dla compilaziun dl bilanz; chësta contëgn:
- le documënt cun les diretives;
- le program d’ativité anual y le budget, partì sö aladô di zëntri de responsabilité y dla strotöra fondamentala dl’aziënda.