(1) Le personal dè dant ti articui 56 y 57 eserzitëia por ći che reverda bosć y munts la funziun de verda y de sconanza y en general, tan inant ch’ara se trata dl ćiamp de competënza dla Provinzia, les funziuns de polizia y de sorvisc d’istitut che ti speta al Corp forestal statal, les funziuns surandades da pert de chësta lege, sciöch’inće inćiaries eventuales stabilides da d’atres normes.
(2) Por l’esecuziun dles inćiaries y dles funziuns aladô dl coma 1, vëgnel apliché les normes aladô dla lege di 4 de mà 1951, nr. 538, dla lege di 22 de dezëmber 1969, nr. 967, dla lege di 23 de dezëmber 1970, nr. 1054, y mudaziuns y integraziuns suandëntes, dla lege di 22 de dezëmber 1973, nr. 926, dla lege provinziala di 7 de setëmber 1973, nr. 33, dl decret dl Presidënt dla Republica di 22 de merz 1974, nr. 279, dla lege di 27 de mà 1977, nr. 284, y mudaziuns y integraziuns suandëntes, dla lege provinziala di 11 d’aurì 1979, nr. 4, di articui 44 y 46 dla lege provinziala di 21 de mà 1981, nr. 11, dla lege di 20 de merz 1984, nr. 34, dl articul 5 dl decret dl Presidënt dla Republica di 27 de merz 1984, nr. 69, sciöche inće dla lege di 11 de forà 1992, nr. 157 y dl decret legislatif di 12 de mà 1995, nr. 201.
(3) Al personal dè dant tl coma 1 ti mët l’aministraziun provinziala a desposiziun le guant de sorvisc, l’echipamënt y les ermes de sorvisc aladô dles normes de lege corespognëntes.
(4) Les staziuns forestales vëgn aministrades da personal provinzial che à la cualifica de ofiziers de polizia iudiziara. Chisc surantol inće funziuns de coordinamënt di verdabosch che à so raiun de verda tl raiun de competënza dla staziun forestala corespognënta.
(5) Les strotöres aladô dl articul 56, coma 1, lëtres a), b), c) y d), vëgn aministrades da personal laureè te sciënzes forestales che à le titul d’abilitaziun por eserzité la profesciun relativa.36)