(1) Pro i laûrs da eseguì aladô dl articul 31âldel:
- a) i laûrs de sistemaziun dl’ega tl raiun forestal cun:
- 1) mosöres por n deflus idrogeologich regolar dles eghes de suraspersa y dles eghes de sotfunz sön tëmples;
- 2) laûrs de defenüda vegetala por consolidé tëmples che va en roa;
- 3) le remboscamënt de tëmples bludres sciöche inće la recostituziun y le mioramënt di bosć por rajuns de proteziun dl grunt;
- b) i laûrs de sistemaziun dl’ega tl raiun agrar y dles pastöres;
- c) sistemaziuns por stabilisé y mantignì i grunć agrars y les pastöres che é sogeć a erojiun;
- d) la defenüda dai dagns che vëgn dala situaziun particolara di posć cun:
- 1) implantaziuns o costruziuns de proteziun cuntra les lovines y i dagns che vëgn dala situaziun particolara de n post, inće por defëne ćiases singules;
- 2) costruziuns y mosöres de regeneraziun y recostituziun ambientala te raiuns da bosch d’interès naturalistich particolar o fisicamënter püch stabii;
- e) l’implant y la gestiun de vivà de lëgns, la racoiüda, la produziun y la conservaziun de somënzes y pices plantes de lëgns ćiamò da sentè fora;
- f) la proteziun dl bosch y dles plantes dl bosch da dagns biotics y abiotics;
- g) la viabilité nezesciara tl setur dl’economia forestala, agrara y dl’economia da munt por realisé costruziuns aladô de chësc articul y por la gestiun de grunć agricoi, de bosć, de munts, de infrastrotöres y dl demane forestal;
- h) les mosöres de prescia do da n ri tëmp fora dl normal o do da catastrofes naturales por eliminé i dagns pro les costruziuns aladô de chësc articul;
- i) la recostituziun, le mioramënt y le tratamënt di bosć y dl demane forestal cun les mosöres liades laprò sciöch’al é preodü tla lege provinziala di 17 d’otober 1981, nr. 28;
- l) la costruziun, la manutenziun y la recostituziun di frabicać y dles bercstots por l’aministraziun dl demane forestal aladô dla lege provinziala di 17 d’otober 1981, nr. 28.
(2) Tl caje de n intervënt aladô dl coma 1, lëtra h), scrî fora n funzionar dla Repartiziun provinziala Bosć n verbal olach’al vëgn descrit en cört i dagns gaujà y sües conseguënzes, sciöche inće co ch’an po fà por i mëte indô a post dan inće dant les spëises che jarà debojëgn por fà chësc. Le diretur dla Repartiziun provinziala Bosć desponn le mëteman di laûrs y stabilësc inće sciöche chisc mëss gnì fać, do avëi ciafè l’autorisaziun dal assessur competënt. Les mosöres nominades dessura po inće gnì realisades sciöche laûrs definitifs sc’ai é a miù prisc o ademplësc deplü l’interès publich.25)
(3) Sön domanda dl diretur dl ispetorat forestal competënt te chël raiun po la Junta provinziala ti dè l’autorisaziun a d’ël da eseguì i laûrs do l’articul 50, coma 1, en economia adoran por chisc fins i mesi finanziars por intervënć aladô dla lege provinziala di 29 de novëmber 1973, nr. 83. Chësta autorisaziun corespogn ala detlaraziun che i laûrs é de ütl publich, d’urgënza y nia da podëi sburlé. Por gnì aprovà mëssi estlusivamënter ester dotà dl arat aladô dla lege provinziala di 19 de novëmber 1993, nr. 23.
(4) Por i proieć de realisaziun di laûrs, de mosöres de costruziun y de intervënć aladô dl coma 1 de chësc articul ôl ma ester, ater co por la costruziun y la trasformaziun de frabicać sciöche inće por strades da ti podëi pormez a lüć da paur, n arat tecnich-economich preventif dla comisciun aladô dla lege provinziala di 19 de novëmber 1993, nr. 23 y l’arat aladô dl articul 12/bis dla lege provinziala di 25 de lugio 1970, nr. 16, y mudaziuns y integraziuns suandëntes. Denant co mëte man i laûrs ti mëssel gnì menè al comun competënt te chël raiun na copia dl proiet.
(5) I laûrs en economia aladô de chësc articul po gnì fać dala Repartiziun provinziala Bosć, dala Repartiziun provinziala por les eghes publiches y les costruziuns idrauliches aladô dla lege provinziala di 12 de lugio 1975, nr. 35, y mudaziuns y integraziuns suandëntes.
(6) Aladô dla sort d’intervënt y dl interès publich por ći che reverda la realisaziun dla costruziun vëgn i laûrs eseguis deplëgn a ćiaria dl’aministraziun provinziala o cun la partezipaziun finanziara di usufruënć.
(7) I criters y les prioritês di intervënć aladô dl coma 5, vëgn stabilis dala Junta provinziala do avëi aldì le comitê forestal dla Provinzia.